“Hi Dyondzise Ku Khongela”

“Un’wana wa vadyondzisiwa va yena a ku ka yena: ‘Hosi, hi dyondzise ku khongela.’”—LUKA 11:1.

1-3. (a) Ha yini vadyondzisiwa va Yesu va lave ndzetelo ehenhleni ka xikhongelo? (b) Hi swihi swivutiso leswi tlakukaka mayelana ni xikhongelo?

VANHU van’wana va ni nyiko ya rito lerinene ro yimbelela. Van’wana va ni vuswikoti bya ntumbuluko bya ku va swiyimbeleri. Kambe leswaku va fikelela vuswikoti bya vona lebyi tlakukeke, hambi ku ri vayimbeleri ni vatlangi volavo va swichayachayana va lava ndzetelo. Switano na hi xikhongelo. Vadyondzisiwa va Yesu Kriste va swi xiyile leswaku va lava ndzetelo loko Xikwembu xi ta twa swikhongelo swa vona.

² Yesu hi ntolovelo a ya eka Tata wakwe exihundleni hi xikhongelo, hi laha a endleke ha kona vusiku hinkwabyo a nga si hlawula vaapostola va 12. (Luka 6:12-16) Hambi loko a tlhele a khongotela vadyondzisiwa va yena leswaku va khongela exihundleni, va n’wi twile a vula swikhongelo erivaleni kutani va swi xiya leswaku a a nga fani na vona vakanganyisi va vukhongeri lava a va khongelela ku voniwa hi vanhu. (Matewu 6:5, 6) Kutani ke, hi laha ku faneleke, valandzeri va Yesu va navele ndzetelo wa yena lowu tlakukeke ehenhleni ka xikhongelo. Xisweswo, ha hlaya: “Yesu a a khongela exivandleni xin’wana; loko a hetile, un’wana wa vadyondzisiwa va yena a ku ka yena: ‘Hosi, hi dyondzise ku khongela, hikuva Yohane [Mukhuvuri] na yena ú dyondzisile vadyondzisiwa va yena.’”—Luka 11:1.

³ Xana Yesu u hlamurise ku yini? Xana hi nga dyondza yini eka xikombiso xa yena? Naswona hi nga pfunekisa ku yini eka ndzetelo wa yena ehenhleni ka xikhongelo?

Tidyondzo Ta Hina

4. Ha yini hi fanele hi “nga tshiki ku khongela,” naswona xana swi vula yini ku endla tano?

⁴ Hi nga dyondza swo tala eka marito ni xikombiso xa Yesu tanihi munhu wa xikhongelo. Dyondzo yin’wana hi leswaku loko N’wana wa Xikwembu la hetisekeke a boheke ku khongela minkarhi hinkwayo, vadyondzisiwa va yena va ni xilaveko lexikulu swinene xo hambeta va languta eka Yehova leswaku va kuma nkongomiso, nkhongotelo ni ku tiyisiwa hi tlhelo ra moya. Hikwalaho, hi fanele hi “nga tshiki ku khongela.” (1 Vatesalonika 5:17) Kavula, leswi a swi vuli swona leswaku hi minkarhi hinkwayo hi fanele hi nkhinsama hi matsolo hi ku kongoma. Ematshan’weni ya sweswo, hi minkarhi hinkwayo hi fanele hi voyamela eku khongeleni. Hi fanele hi languta eka Xikwembu leswaku hi kuma nkongomiso eka swivumbeko hinkwaswo swa vutomi leswaku hi ta teka magoza ya vutlhari naswona hi minkarhi hinkwayo hi amukeriwa hi xona.—Swivuriso 15:24.

5. I yini leswi nga nghenelelaka enkarhini lowu hi faneleke hi wu tirhisela ku khongela naswona xana hi fanele hi endla yini hi leswi?

⁵ ‘Emasikwini lawa ya makumu,’ swi tele swilo leswi nga nghenelelaka eka nkarhi lowu a hi fanele hi wu tirhisela ku khongela. (2 Timotiya 3:1) Kambe loko swiphiqo swa le kaya, timhaka ta mabindzu ni swin’wana swo fana ni sweswo swi lwisana ni xikhongelo xa nkarhi na nkarhi eka Tata wa hina wa le tilweni, hi tshikeleriwe swinene hi mivilelo ya vutomi lebyi. Xiyimo xo tano xi fanele xi lulamisiwa handle ko hlwela, hikuva ku tsandzeka ku khongela swi yisa eku lahlekeriweni hi ripfumelo. Hi nga ha hunguta mindzhwalo ya hina kumbe hi ringanisela timhaka ta vutomi hi ku hundzukela swinene hi mbilu ya hina hi ku chivirika na hi ku phindha-phindha eka Xikwembu leswaku hi kuma nkongomiso. Hi fanele hi ‘chivirika eku khongeleni.’—1 Petro 4:7.

6. Hi xihi xikhongelo lexi hi nga ta xi dyondza sweswi naswona hi ri na xikongomelo xihi?

⁶ Eka leswi swi vuriweke xikhongelo xa xikombiso, Yesu u dyondzise vadyondzisiwa va yena ndlela yo khongela, hayi leswi hi ku kongoma va faneleke va swi vula. Mhaka ya Luka ya hambananyana ni liya ya Matewu hikuva a ku katseka swiyimo leswi hambaneke. Hi ta dyondza xikhongelo lexi tanihi xikombiso xa xivumbeko xa swikhongelo swa hina tanihi valandzeri va Yesu ni Timbhoni ta Yehova.

Tata Wa Hina Ni Vito Rakwe

7. I vamani lava nga ni lunghelo ro vitana Yehova “Tata wa hina”?

⁷ “Tata wa hina la nge matilweni.” (Matewu 6:9; Luka 11:2) Tanihi leswi Yehova a nga Muvumbi wa vanhu naswona a tshamaka ematilweni, swi fanerile ku n’wi vitana “Tata wa hina la nge matilweni.” (1 Tihosi 8:49; Mintirho 17:24, 28) Ku tirhisiwa ka xiga lexi nge “wa hina” swi vula leswaku van’wana na vona va na vuxaka bya le kusuhi na Xikwembu. Kambe i vamani lava nga ni lunghelo leri nga hikiwangiki ra ku n’wi vitana Tata wa vona? I vanhu lava tinyiketeleke, lava khuvuriweke ntsena endyangwini wa yena wa vagandzeri. Ku vitana Yehova “Tata wa hina” swi kombisa leswaku hi na ripfumelo eka Xikwembu naswona ha swi xiya leswaku xisekelo xin’we tsena xa ku vuyelelana na yena i ku amukela gandzelo ra nkutsulo ra Yesu hi ku helela.—Vaheveru 4:14-16; 11:6.

8. Ha yini hi fanele hi navela ku heta nkarhi hi khongela eka Yehova?

⁸ Mawaku ndlela leyi hi faneleke hi titwa hi ri ekusuhi ha yona ni Tata wa hina wa le tilweni! Tanihi vana lava nga karhaliki ku ya eka tata wa vona, hi fanele hi navela ku heta nkarhi hi khongela eka Xikwembu. Ku tlangela loku enteke ka mikateko ya xona ya moya ni ya nyama ku fanele ku hi susumetela ku xi nkhensa hikwalaho ka vunene bya xona. Hi fanele hi titwa hi bohekile ku yisa mindzhwalo leyi hi tikelaka eka xona, hi tiyiseka leswaku xi ta hi tiyisa. (Psalma 55:22) Hi nga tiyiseka leswaku loko hi tshembeka, hinkwaswo eku heteleleni swi ta famba kahle hikuva xa hi khathalela.—1 Petro 5:6, 7.

9. Xikhongelo xa ku kwetsimisiwa ka vito ra Xikwembu i xikombelo xa yini?

⁹ “Vito ra wena a ri hlawuleke.” (Matewu 6:9; Luka 11:2) Rito “vito” minkarhi yin’wana ri vula munhu hi yexe naswona “ku hlawulekisa” swi vula “ku kwetsimisa, ku hlawula kumbe ku teka hi ndlela leyi kwetsimaka.” (Ringanisa Nhlavutelo 3:4.) Kutani ke, kahle-kahle xikhongelo xa ku kwetsimisiwa ka vito ra Xikwembu i xikombelo xa leswaku Yehova a teka goza ro tikwetsimisa. Njhani? Hi ku susa ndzhukano hinkwawo lowu wu tshameke wu vekiwa evitweni ra yena. (Psalma 135:13) Hikwalaho, Xikwembu xi ta susa vubihi, xi tidzunisa kutani xi endla matiko ma tiva leswaku hi xona Yehova. (Ezekiel 36:23; 38:23) Loko hi navela ku vona siku rero ivi hi vona vukulukumba bya Yehova, hi minkarhi hinkwayo hi ta ya eka yena hi moya wa xichavo lowu vuriwaka hi marito lama nge “vito ra wena a ri hlawuleke.”

Mfumo Wa Xikwembu Ni Ku Rhandza Ka Xona

10. Xana swi vula yini loko hi khongelela leswaku Mfumo wa Xikwembu wu ta?

¹⁰ “A ku te ku fuma ka wena.” (Matewu 6:10; Luka 11:2) Mfumo lowu ku vulavuriwaka ha wona laha i vuhosi lebyikulu bya Yehova, hi laha byi yimeriweke ha kona hi hulumendhe ya Vumesiya ya le tilweni emavokweni ya Yesu Kriste ni “vahlawuriwa” lava nga na yena. (Daniel 7:13, 14, 18, 27; Esaya 9:6, 7; 11:1-5) Xana swi vula yini ku wu khongelela leswaku wu “ta”? Leswi swi vula leswaku hi kombela leswaku Mfumo wa Xikwembu wu ta herisa vakaneti hinkwavo va vuhosi bya Xikwembu. Loko Mfumo se wu ‘faye ni ku herisa mimfumo hinkwayo ya misava,’ wu ta cinca misava yi va paradeyisi ya xirhendzevutana hinkwaxo.—Daniel 2:44; Luka 23:43.

11. Loko hi tiyimisele ku vona ku rhandza ka Xikwembu ku endliwa evuakweni hinkwabyo, xana hi ta endla yini?

¹¹ “Ku rhandza ka wena a ku endliwe misaveni, tanihi loko ku endliwa tilweni.” (Matewu 6:10) Lexi i xikombelo xa leswaku Xikwembu xi hetisisa xikongomelo xa xona emisaveni, leswi katsaka ku susa valala va xona. (Psalma 83:9-18; 135:6-10) Entiyisweni, xi vula leswaku hi rindzele ku vona ku rhandza ka Xikwembu ku endliwa evuakweni hinkwabyo. Loko sweswo swi ri embilwini ya hina, hi minkarhi hinkwayo hi ta endla ku rhandza ka Yehova hi laha hi nga kotaka ha kona. A hi nga ta endla xikombelo xo tano loko a hi nga tiyimiselanga ku endla leswaku ku rhandza ka Xikwembu ku endliwa etlhelweni ra hina. Kutani ke, loko hi khongela hi ndlela leyi, hi fanele hi tiyiseka leswaku a hi endli leswi hambaneke ni ku rhandza koloko, tanihi ku gangisana ni la nga riki mupfumeri kumbe ku amukela tindlela ta misava. (1 Vakorinto 7:39; 1 Yohane 2:15-17) Ematshan’weni ya sweswo, minkarhi hinkwayo hi fanele hi tsundzuka mianakanyo leyi, ‘Hi kwihi ku rhandza ka Yehova emhakeni leyi?’ Ina, loko hi rhandza Xikwembu hi mbilu ya hina hinkwayo, hi ta lava nkongomiso wa xona etimhakeni hinkwato ta vutomi.—Matewu 22:37.

Vuswa Bya Hina Bya Siku Na Siku

12. Ku kombela ‘vuswa bya siku na siku’ ntsena swi na vuyelo byihi eka hina?

¹² “U hi nyika namuntlha vuswa bya hina bya siku [leri].” (Matewu 6:11) Mhaka ya Luka yi hlayekisa xileswi: “Hi nyike vuswa bya hina bya siku hi ku ya hi xilaveko xa siku.” (Luka 11:3, NW) Ku kombela Xikwembu leswaku xi lunghiselela swakudya ‘swa siku leri’ swi kurisa ripfumelo eka vuswikoti bya xona byo khathalela swilaveko swa hina siku na siku. Vaisrayele a va fanele va hlengeleta mana “wun’wana ni wun’wana leswi n’wi ringaneke siku na siku,” hayi swo ringana vhiki kumbe ku tlula. (Eksoda 16:4, NW) Lexi a hi xikhongelo xo kombela mafehlefehle ni swilo leswi taleke ku tlula mpimo kambe xa swilaveko swa hina swa siku na siku loko swi humelela. Ku kombela vuswa bya siku na siku ntsena nakambe swi hi pfuna leswaku hi nga vi na makwanga.—1 Vakorinto 6:9, 10.

13. (a) Hi ndlela leyi anameke, swi vula yini ku kombela vuswa bya siku na siku? (b) Ri fanele ri va rihi langutelo ra hina, hambi loko hi tirha hi matimba naswona hi nga ri na swo anela ku hanya ha swona?

¹³ Hi ndlela leyi anameke, ku kombela vuswa bya siku na siku swi kombisa leswaku a hi titwi hi ri lava tilawulaka kambe minkarhi hinkwayo hi languta eka Xikwembu leswaku hi kuma swakudya, swakun’wa, swiambalo ni swilaveko swin’wana. Tanihi swirho leswi tinyiketeleke swa ndyangu wa vagandzeri va yena, ha n’wi tshemba Tata wa hina kambe a hi tshami hi mavoko hi rindzela yena leswaku a hi nyika swilo hi singita. Ha tirha ni ku tirhisa marhengu wahi na wahi lawa hi nga na wona leswaku hi kuma swakudya ni swilaveko swin’wana. Hambi swi ri tano, hi laha ku faneleke hi nkhensa Xikwembu hi xikhongelo hikuva eka swilo leswi hi vona rirhandzu, vutlhari ni matimba ya Tata wa hina wa le tilweni. (Mintirho 14:15-17; ringanisa Luka 22:19.) Ku gingiriteka ka hina ku nga endla leswaku hi humelela. Hambi loko hi tirha hi matimba kambe hi nga ri na nchumu hi fanele hi va lava tlangelaka ni ku aneriseka. (Vafilipiya 4:12; 1 Timotiya 6:6-8) Kahle-kahle, munhu la chavaka Xikwembu la nga ni swilo swo ringanela a nga ha tsaka swinene ku tlula van’wana lava humelelaka hi swilo leswi vonekaka. Kutani hambi loko hi ri na swintsongo hikwalaho ka swiyimo leswi hi nga kotiki ku swi lawula, hi nga tshuki hi karhateka. Hi nga va lava fuweke emoyeni. Hakunene, a hi fanelanga hi va swisiwana eripfumelweni, ntshembo ni ku rhandza Yehova, loyi ku dzuneka ni minkhenso swi tlhandlukelaka eka yena hi xikhongelo lexi humaka embilwini.

Ku Hi Rivalela Swidyoho Swa Hina

14. Xana hi kombela ku rivaleriwa eka milandzu yihi naswona xana Xikwembu xi tirhisa yini eka yona?

¹⁴ “Hi riv̌alele milanḍu ya hina, tanihi loko na hina hi riv̌alela vaṅwana la’v̌a nga ni milanḍu ka hina.” (Matewu 6:12, BX) Mhaka ya Luka yi kombisa leswaku milandzu leyi i swidyoho. (Luka 11:4) Vudyoho bya ndzhaka byi hi sivela ku endla swilo hinkwaswo hi ku ya hi ku rhandza loku hetisekeke ka Tata wa hina. Hikwalaho, hi ndlela yin’wana swihoxo leswi swi ve milandzu ya hina kumbe mindzhwalo ya hina eka Xikwembu, tanihi leswi hi sunguleke ku ‘hanya ni ku famba hi moya.’ (Vagalatiya 5:16-25; ringanisa Varhoma 7:21-25.) Hi na milandzu leyi hi mhaka ya leswi hi nga hetisekangiki naswona sweswi a hi swi koti ku fikelela mimpimanyeto ya Xikwembu hi xitalo. Hi na lunghelo ro khongelela ku rivaleriwa swidyoho leswi. Lexi tsakisaka Yehova a nga tirhisa ntikelo wa gandzelo ra nkutsulo ra Yesu eka milandzu kumbe swidyoho leswi.—Varhoma 5:8; 6:23.

15. Hi fanele hi va ni langutelo rihi eka ndzayo leyi lavekaka?

¹⁵ Loko hi langutele leswaku Xikwembu xi hi rivalela milandzu kumbe swidyoho swa hina, hi fanele hi hundzuka naswona hi tiyimisela ku amukela ndzayo. (Swivuriso 28:13; Mintirho 3:19) Hi mhaka ya leswi Yehova a hi rhandzaka, u hi nyika ndzayo leyi hi yi lavaka hi munhu hi xiyexe leswaku hi ta lulamisa ku tsana ka hina. (Swivuriso 6:23; Vaheveru 12:4-6) Kavula, hi nga tsaka loko ku kula eripfumelweni na hi vutivi swi endla mbilu ya hina yi fambisana swinene ni milawu ya Xikwembu ni misinya ya milawu lerova hi nga endli xihoxo hi mpimo wihi na wihi wa ku tirhandzela. Kambe ku vuriwa yini loko hi kuma ku tirhandzela ko karhi eka xidyoho xa hina? Kutani hi fanele hi vaviseka swinene naswona hi fanele hi khongela swinene leswaku hi kuma ku rivaleriwa. (Vaheveru 10:26-31) Hi ku tirhisa xitsundzuxo lexi hi xi amukeleke, hi fanele hi swi kota ku lulamisa ndlela ya hina hi ku hatlisa.

16. Ha yini swi pfuna ku hambeta hi kombela Xikwembu leswaku xi hi rivalela swidyoho swa hina?

¹⁶ Ku hambeta hi kombela Xikwembu leswaku xi hi rivalela swidyoho swa pfuna. Ku endla leswi swi veka vudyoho bya hina emahlweni ka hina naswona swi fanele swi va ni vuyelo bya ku titsongahata. (Psalma 51:3, 4, 7) Tata wa hina wa le tilweni u fanele a hi “rivalela swidyoho swa hina, [a] hi hlantswa [a] susa ku homboloka ka hina hinkwako.” (1 Yohane 1:8, 9) Ku tlula kwalaho, ku boxa swidyoho swa hina loko hi khongela swi hi pfuna leswaku hi lwisana swinene na swona. Xisweswo hi hambeta hi tsundzuxiwa hi xilaveko xa hina xa nkutsulo ni ntikelo wa ngati ya Yesu leyi halatiweke.—1 Yohane 2:1, 2; Nhlavutelo 7:9, 14.

17. Xana ku khongelela ku rivaleriwa swi hi pfunisa ku yini eka vuxaka bya hina ni van’wana?

¹⁷ Ku khongelela ku rivaleriwa nakambe swi hi pfuna leswaku hi va ni tintswalo, ntwela-vusiwana ni musa eka lava va nga ha vaka ni milandzu eka hina etimhakeni letikulu ni letintsongo. Mhaka ya Luka yi ri: “Hi rivalele swidyoho swa hina, hikuva na hina hi rivalela mani na mani la nga ni nandzu eka hina.” (Luka 11:4) Kahle-kahle hi nga kuma ku rivaleriwa hi Xikwembu ntsena loko ana se hi “v̌a [rivalerile] v̌aṅwana la’v̌a nga ni milanḍu ka hina,” vanhu lava hi dyoheleke. (Matewu 6:12, BX; Marka 11:25) Yesu u engeterile: “Loko mi rivalela vanhu swidyoho swa vona, Tata wa n’wina wa le tilweni u ta mi rivalela na n’wina; kambe loko mi nga rivaleli van’wana, Tata wa n’wina na yena a nga ka a nga mi rivaleli swidyoho swa n’wina.” (Matewu 6:14, 15) Ku khongelela ku rivaleriwa swidyoho swa hina swi fanele swi hi susumetela ku hanyisana ni van’wana ni ku va rivalela. Muapostola Pawulo u tsarile: “Kukota leswi [Yehova a] mi rivaleleke, na n’wina rivalelanani.”—Vakolosa 3:13; Vaefesa 4:32.

Ndzingo Ni Lowo Biha

18. Ha yini hi nga fanelanga hi sola Xikwembu hi miringo ya hina?

¹⁸ “U nga hi yisi emiringweni.” (Matewu 6:13; Luka 11:4) Marito lawa a ma vuli swona leswaku Yehova u hi ringa leswaku hi dyoha. Matsalwa ma vulavula hi ku endla kumbe ku vangela ka Xikwembu swilo leswi xi nga lo swi pfumelela. (Ruti 1:20, 21; ringanisa Eklesiasta 11:5.) Kambe “Xikwembu xi nga ka xi nga ringiwi hi leswo biha; naswona, xona hi xoxe, a xi ringi munhu ni un’we,” ku tsale mudyondzisiwa Yakobo. (Yakobo 1:13) Hikwalaho, hi nga tshuki hi sola Tata wa hina wa le tilweni hi miringo yo endla leswo biha, hikuva Sathana hi yena Muringi loyi a ringetaka ku hi susumetela ku dyohela Xikwembu.—Matewu 4:3; 1 Vatesalonika 3:5.

19. Xana hi fanele hi khongerisa ku yini malunghana ni ndzingo?

¹⁹ Hi xikombelo lexi nge, “U nga hi yisi emiringweni,” kahle-kahle hi kombela Yehova leswaku a nga hi pfumeleli hi tsana loko hi ringiwa kumbe loko hi tshikileriwa leswaku hi nga n’wi yingisi. Hi nga kombela Tata wa hina leswaku a kongomisa magoza ya hina leswaku ku nga tshuki ku ta ndzingo lowu nga ta hi hlula. Emhakeni leyi, Pawulo u tsarile: “A mi si humeleriwa hi miringo leyi tlulaka matimba ya munhu. Xikwembu xa tshembeka, xi nga ka xi nga pfumeri leswaku mi hlangana ni ndzingo lowu wu mi hlulaka; loko wu tshuka wu mi tela, xi ta mi nyika matimba ya ku tiyisela, mi ko mi huma eka wona.” (1 Vakorinto 10:13) Hi nga khongelela leswaku Yehova a hi rhangela leswaku hi nga ringiwi ku tlula leswi hi nga swi tiyiselaka ni leswaku a hi nyika ndlela yo huma eka wona loko hi tshikileriwe ngopfu. Miringo yi huma eka Diyavulosi, miri wa hina lowu nga ni xidyoho ni ku tsana ka van’wana, kambe Tata wa hina la nga ni rirhandzu a nga hi kongomisa leswaku hi nga hluriwi.

20. Hikwalaho ka yini hi khongelela ku ‘kutsuriwa eka lowo biha’?

²⁰ “Kambe u hi ponisa eka Lowo biha.” (Matewu 6:13) Xikwembu hakunene xi nga n’wi sivela Sathana, “Lowo biha,” leswaku a nga hi hluli. (2 Petro 2:9) A ku si tshama ku va ni xilaveko xo kutsuriwa eka Diyavulosi ku tlula sweswi, hikuva ‘u hlundzuke ngopfu, hi ku tiva leswaku nkarhi wa yena wu komile.’ (Nhlavutelo 12:12) A hi ma honisi marhengu ya Sathana, kambe na yena wa ku vona ku tsana ka hina. Hikwalaho, hi fanele hi khongela leswaku Yehova a hi sirhelela eka mintlhamu ya Nala loyi wo fana ni nghala. (2 Vakorinto 2:11; 1 Petro 5:8, 9; ringanisa Psalma 141:8, 9.) Hi xikombiso, loko hi tsakela ku nghenela vukati, hi nga ha kombela Yehova leswaku a hi kutsula eka mintlhamu ya Sathana ni miringo yo hlakulela swinakulobye swa misava leswi swi nga yisaka eka ku tikhoma loko biha kumbe ku nga yingisi Xikwembu hi ku tekana ni la nga riki mupfumeri. (Deuteronoma 7:3, 4; 1 Vakorinto 7:39) Xana ha ri navela rifuwo? Kutani xikhongelo xi nga ha laveka leswaku xi hi pfuna ku hlula miringo yo gembula kumbe ku tirhisa vuxisi. Hi ku chivirikela ku herisa vuxaka bya hina na Yehova, Sathana u ta tirhisa tlhari rihi na rihi leri a nga na rona enguleni ya yena ya miringo. Kutani a hi hambeteni hi khongela eka Tata wa hina wa le tilweni, loyi a nga tshikiki vo lulama endzingweni ni la va kutsulaka eka lowo biha.

Xikhongelo Xi Aka Ripfumelo Ni Ntshembo

21. Xana hi pfunekise ku yini hi ku khongelela Mfumo?

²¹ Tata wa hina la nge tilweni, la hi kutsulaka eka lowo biha, wa swi tsakela ku hi katekisa hi laha ku fuweke. Hambi swi ri tano, ha yini hi nkarhi wo leha swonghasi a pfumelele vanhu va yena lava rhandzekaka leswaku va khongela, “A ku te ku fuma ka wena”? Phela, hi malembe yo tala, ku khongela hi ndlela leyi ku engetele ku navela ni ku tlangela ka hina Mfumo. Swikhongelo swo tano swi hi tsundzuxa hi xilaveko lexikulu xa hulumendhe leyi yinene ya le tilweni. Nakambe xi hi tsundzuxa hi ntshembo wa vutomi ehansi ka ku fuma ka Mfumo.—Nhlavutelo 21:1-5.

22. Xana ri fanele ri va rihi langutelo ra hina ra nkarhi hinkwawo ehenhleni ka xikhongelo eka Tata wa hina wa le tilweni, Yehova?

²² Handle ko kanakana xikhongelo xi aka ripfumelo eka Yehova. Xiboho xa hina na yena xa tiyisiwa loko a hlamula swikhongelo swa hina. Hikwalaho, hi nga tshuki hi karhala ku hundzukela eka yena siku na siku hi ku dzunisa, minkhenso ni swikombelo. Naswona onge hi nga tlangela nhlamulo ya Yesu leyi pfunaka eka xikombelo xa valandzeri vakwe: “Hosi, hi dyondzise ku khongela.”

Wa Tsundzuka Xana?

◻ Hi tihi tidyondzo leti hi nga ti dyondzaka emaritweni ni le ka xikombiso xa xi khongelo xa Yesu tanihi munhu?

◻ Xana hi fanele hi khongelela yini malunghana ni Tata wa hina wa le tilweni ni vito rakwe?

◻ Xana hi kombela yini loko hi khongelela Mfumo wa Xikwembu leswaku wu ta ni leswaku ku rhandza ka xona ku endliwa emisaveni?

◻ Xana hi kombela yini loko hi khongelela vuswa bya hina bya siku na siku?

◻ Xana hi vula yini loko hi khongelela ku rivaleriwa milandzu ya hina?

◻ Ha yini swi ri swa nkoka ku khongela malunghana ni ndzingo ni ku kutsuriwa eka lowo biha, Sathana?

[Xifaniso lexi nga eka tluka 16]

Valandzeri va Yesu va n’wi kombele leswaku a va dyondzisa ndlela yo khongela. Xana wa yi tiva ndlela leyi hi nga pfunekaka ha yona eka swiletelo swa yena ehenhleni ka xikhongelo?