Vutomi Ni Vutirheli Bya Yesu

Xilalelo Xa Xitsundzuxo

ENDZHAKU ka loko Yesu a hlantswe milenge ya vaapostola vakwe, u tshaha tsalwa eka Psalma 41:9, a ku: “Loyi a dyaka vuswa bya mina, ú ndzi hundzukele, a ndzi khadlanya.” Kutani, hi ku khunguvanyeka emoyeni, wa hlamusela: “Un’wana wa n’wina ú ta ndzi xenga.”

Vaapostola va sungula ku khomiwa hi gome kutani ha un’we-un’we va ku ka Yesu: “A ndzi ri, a wu vuli mina?” Hambi ku ri Yudasi Iskariyota wa joyina a vutisa. Yohane, loyi a tshameke kusuhi na Yesu etafuleni, u tikhegetela exifuveni xa Yesu kutani a vutisa: “Hosi, i mani xana?”

Yesu wa hlamula: “I un’wana wa n’wina lava khume na vambirhi, la phemaka na mina enkambaneni, loko a ri N’wana-wa-Munhu, ú ta tifambela hilaha ku tsariweke hakona ehenhla ka yena; kambe ú ni khombo munhu loyi N’wana-wa-Munhu a xengiwaka ha yena! A swi ta antswa eka munhu loyi loko onge a nga velekiwanga.” Endzhaku ka sweswo, Sathana nakambe a nghena Yudasi, a teka xivandla embilwini ya yena, leyi yi nga yo biha. Endzhakunyana evusikwini byebyo, hi laha ku fanelaka Yesu u vula Yudasi “n’wana wa ku lova.”

Kutani Yesu u byela Yudasi: “Lexi u xi endlaka, hatlisa u xi endla.” A ku na un’we wa vaapostola la twisisaka leswi Yesu a swi vulaka. Van’wana va ehleketa leswaku tanihi leswi Yudasi a khomaka nkwama wa mali, Yesu wa n’wi byela: “Xava swa nkhuvo leswi pfumalekaka,” kumbe leswaku a a fanele a famba a ya nyika xanchumu eka swisiwana.

Endzhaku ka loko Yudasi a humile, Yesu u sungula nkhuvo lowuntshwa hi ku helela, kumbe xitsundzuxo, a ri ni vaapostola va yena vo tshembeka. U teka xinkwa, a endla xikhongelo xa ku nkhensa, a xi phema, kutani a va nyika xona, a ku: “Tekani mi dya.” Wa hlamusela: “Leswi i miri wa mina, [lowu nyiketiwaka hikwalaho ka n’wina; endlani leswi hi ku ndzi anakanya].”

Endzhaku ka loko un’wana ni un’wana a dyile xinkwa, Yesu u teka khapu ya vhinya, leyi entiyisweni ku nga khapu ya vumune leyi a yi tirhisiwa enkhubyeni wa Paseka. Nakambe u endla xikhongelo xo nkhensa eka yona, a yi hundzisela eka vona, a va kombela ku nwela eka yona, kutani a ku: “Xinwelo lexi i ntwanano lowuntshwa engatini ya mina, leyi halatiwaka hikwalaho ka n’wina.”

Kutani entiyisweni, leswi i xitsundzuxo xa rifu ra Yesu. Lembe rin’wana ni rin’wana hi Nisan 14 xi fanele ku phindhiwa, hi laha Yesu a vulaka ha kona, ku n’wi tsundzuka. Xi ta tsundzuxa vahlanganyeri leswi Yesu ni Tata wa yena wa le matilweni va swi endleke ku nyikela ku pona eka vanhu eka xigwevo xa rifu. Eka Vayuda lava hundzukaka va va valandzeri va Kriste, nkhuvo lowu wu ta siva Paseka.

Ntwanano lowuntshwa, lowu endliwaka lowu tirhaka hi ngati ya Yesu leyi halatiweke, wu pfala ntwanano wa Nawu wa khale. Wu hlanganisiwa hi Yesu Kriste exikarhi ka mintlawa yimbirhi—evokweni rin’wana, Yehova Xikwembu, naswona eka lerin’wana, Vakriste lava tswariweke hi moya va 144 000. Handle ko nyikela ku rivaleriwa ka swidyoho, ntwanano lowu wu pfumelela ku vumbiwa ka rixaka ra le tilweni ra tihosi ni vaprista. Matewu 26:21-29; Marka 14:18-25; Luka 22:19-23; Yohane 13:18-30; 17:12; 1 Vakorinto 5:7.

◆ I vuprofeta byihi bya Bibele lebyi Yesu a byi tshahaka mayelana ni nakulobye, naswona u byi tirhisa njhani?

◆ Ha yini vaapostola va khomiwa hi gome lerikulu, naswona i yini lexi un’wana ni un’wana wa vona a xi vutisaka?

◆ Yesu u byela Yudasi ku endla yini, kambe vaapostola lavan’wana va swi tekisa ku yini swileriso leswi?

◆ I nkhuvo wihi lowu Yesu a wu sungulaka endzhaku ka loko Yudasi a humile, naswona wu hetisisa xikongomelo xihi?

◆ I vamani mintlawa ya ntwanano lowuntshwa, naswona ntwanano wu hetisisa yini?