Rirhandzu Ra Ntiyiso Ra Vuyerisa
“Xikwembu a xi na mona, xi nga ka xi nga rivali ntirho wa n’wina ni rirhandzu leri mi ri kombeke hi vito ra xona.”—VAHEVERU 6:10.
1, 2. Ha yini rirhandzu ra ntiyiso ri vuyerisa eka hina ha un’we-un’we?
RIRHANDZU ro pfumala vutianakanyi i mfanelo leyikulu, leyi xiyekaka, ya nkoka lowukulu leyi hi nga yi kombisaka. Rirhandzu leri (a·gaʹpe, hi Xigriki) ri lava swo tala eka hina nkarhi na nkarhi. Kambe hikwalaho ka leswi hi vumbiweke hi Xikwembu xa vululami ni rirhandzu, hi kuma leswaku rirhandzu ro pfumala vutianakanyi ra vuyerisa hakunene. Ha yini lewi swi ri tano?
2 Xivangelo xin’wana xa leswaku rirhandzu ra ntiyiso ra vuyerisa xi katsa nsinya wa nawu wa mianakanyo, vuyelo bya miehleketo ni minsusumeto emimirini ya hina. Mutshunguri wa ntshikilelo u te: “‘Ku rhandza muakelani wa wena’ hi xin’wana xa swiphemu leswi hlayisekeke swa xitsundzuxo xa vutshunguri lexi tshameke xi nyikeriwa.” Ina, “munhu wa tintŝalo o endlela moya wa yena e v̌unene.” (Swivuriso 11:17) Lama nga ni nkoka lowu fanaka i marito lama nge: “L’a hananaka o ta nona, l’a tšheletaka o ta tšheletiwa na yena.”—Swivuriso 11:25; ringanisa Luka 6:38.
3. Xikwembu xi endla njhani leswaku rirhandzu ra ntiyiso ri vuyerisa?
3 Rirhandzu nakambe ra vuyerisa hikuva Xikwembu xi hakela ku pfumala vutianakanyi. Ha hlaya: “L’a ṭeṭe[le]laka šisiwana o lomba Yehova, kutani Yehova o ta hakela ku endla ka yena.” (Swivuriso 19:17) Timbhoni ta Yehova ti endla hi ku twanana ni marito lawa loko ti huwelela mahungu lamanene ya Mfumo wa Xikwembu. Va swi tiva leswaku ‘Xikwembu a xi na mona, xi nga ka xi nga rivali ntirho wa vona ni rirhandzu leri va ri kombisaka hikwalaho ka vito ra xona.’—Vaheveru 6:10.
Xikombiso Xa Hina Lexinene
4. I mani loyi a nyikelaka xikombiso lexinene xa leswaku rirhandzu ra ntiyiso ra vuyerisa, naswona u endle tano hi ndlela yihi?
4 I mani loyi a nyikelaka xikombiso lexinene xa leswaku rirhandzu ra ntiyiso ra vuyerisa? Phela, leswi a swi nyikeriwi hi un’wana handle ka Xikwembu hi xoxe! Xi “rhandzile misava [ya vanhu] swonghasi, xi ko xi nyika N’wana wa xona la nga un’we.” (Yohane 3:16) Ku nyikela hi N’wana wa yena leswaku lava va amukelaka gandzelo rero ra nkutsulo va ta kuma vutomi lebyi nga heriki entiyisweni swi koxe Yehova nchumu lowukulu, naswona swi kombise kahle leswaku u ni rirhandzu ni ntwela-vusiwana. Leswi swi kombisiwa hi laha ku engetelekeke hi mhaka ya leswaku ‘eku karhatekeni hinkwako ka Israyele aEgipta, a a karhateka.’ (Esaya 63:9) Swi fanele swi khomise gome swinene ku fikela kwihi eka Yehova ku vona N’wana wa yena a xanisiwa emhandzini ya nxaniso ni ku n’wi twa a huwelela a ku: “Xikwembu xanga, Xikwembu xanga, u ndzi tshikele yini?”—Matewu 27:46.
5. I yini lexi humeleleke hi ku va Xikwembu xi rhandze vanhu swonghasi xi ko xi nyikela N’wana wa xona tanihi gandzelo?
5 Xana Yehova u kume xikombiso xa yena n’wini xa rirhandzu ra ntiyiso xi ri lexi vuyerisaka? Hakunene u xi kume xi vuyerisa. Hi laha ku xiyekaka, mawaku nhlamulo leyi Xikwembu xi koteke ku yi tisa emahlweni ka Diyavulosi hi ku va Yesu a tikombise a tshembekile ku nga khathariseki hinkwaswo leswi Sathana a swi koteke ku swi endla eka yena! (Swivuriso 27:11) Entiyisweni, hinkwaswo leswi Mfumo wa Xikwembu wu nga ta swi hetisisa ku susa vito ra Yehova xisandzu, ku kondletela Paradeyisi la misaveni, ni ku nyika timiliyoni vutomi lebyi nga heriki swi ta humelela hikuva Xikwembu xi rhandzile vanhu swonghasi lerova xi nyika rifuwo leri rhandzekaka ra mbilu ya xona tanihi gandzelo.
Xikombiso Lexinene Xa Yesu
6. Rirhandzu ri susumetele Yesu ku endla yini?
6 Xikombiso xin’wana lexinene lexi kombisaka leswaku rirhandzu ra ntiyiso ra vuyerisa hi lexiya xa N’wana wa Xikwembu, Yesu Kriste. U rhandza Tata wa yena wa le tilweni, naswona rirhandzu rero ri vangele Yesu ku endla ku rhandza ka Yehova ku nga khathariseki ku lahlekeriwa. (Yohane 14:31; Vafilipiya 2:5-8) Yesu u hambete a kombisa rirhandzu ra yena eka Xikwembu hambi leswi sweswo minkarhi yin’wana a swi vula leswaku a a fanele ku kombela eka Tata wa yena [hi ku] huwelela “hi matimba ni ku rila hi mihloti.”—Vaheveru 5:7.
7. Yesu u kume rirhandzu ra ntiyiso ri vuyerisa hi tindlela tihi?
7 Xana Yesu u hakeriwile hikwalaho ka rirhandzu ro tano ra ku tinyiketela? Hakunene u hakeriwile! Anakanya hi ntsako lowu a wu kumeke eka swilo hinkwaswo leswinene leswi a swi endleke hi nkarhi wa vutirheli bya yena bya malembe manharhu ni hafu. Vona ndlela leyi a pfuneke vanhu swinene ha yona emoyeni ni le nyameni! Ku tlula hinkwaswo, hi ku kombisa leswaku munhu la hetisekeke a nga hlayisa vutshembeki hi ku hetiseka eka Xikwembu ku nga khathariseki hinkwaswo leswi Sathana a nga swi tisaka eka yena, Yesu u ve ni ku aneriseka ko kombisa Diyavulosi a ri muhembi. Ku tlula kwalaho, tanihi nandza wo tshembeka wa Xikwembu, Yesu u amukele hakelo leyikulu ya ku nga fi loko a pfuxeriwe evuton’wini bya le tilweni. (Varhoma 6:9; Vafilipiya 2:9-11; 1 Timotiya 6:15, 16; Vaheveru 1:3, 4) Naswona mawaku malunghelo lama hlamarisaka swonghasi lama nga emahlweni ka yena eArmagedoni na hi nkarhi wa ku Fuma ka yena ka Gidi ra Malembe, loko Paradeyisi yi ta kondleteriwa emisaveni ni loko magidi ya timiliyoni ma ta pfuxiwa eku feni! (Luka 23:43) Ku hava ku kanakana leswaku Yesu u kume rirhandzu ra ntiyiso ri vuyerisa.
Xikombiso Xa Pawulo
8. A ku ri wihi ntokoto wa Pawulo hikwalaho ka rirhandzu ra yena ra ntiyiso eka Xikwembu ni le ka vanhu-kulobye?
8 Muapostola Petro hi khamba rin’wana u vutise Yesu: “Waswivo, hina hi tshikile hinkwaswo, hi ku landza; xana hi ta vuyeriwa hi yini?” Hi ku komisa, Yesu u hlamule a ku: “Un’wana ni un’wana la tshikeke tindlu ta yena, kumbe vamakwavo va xinuna ni va xisati, kumbe tata wa yena, kumbe mana wa yena, kumbe vana, kumbe masimu, hikwalaho ka vito ra mina, ú ta nyikiwa swona ka dzana, a tlhela a dya ndzhaka ya vutomi lebyi nga heriki.” (Matewu 19:27-29) Hi na xikombiso lexi nyanyulaka xa leswi eka muapostola Pawulo, loyi a tsakeleke mikateko yo tala, hi laha ngopfu-ngopfu swi rhekhodiweke ha kona hi Luka ebukwini ya Mintirho. Rirhandzu ra ntiyiso eka Xikwembu ni le ka munhu-kulobye swi vangele Pawulo ku tshika ntirho-vutomi wa yena tanihi Mufarisi la xiximiwaka. Nakambe, anakanya hi leswi Pawulo a swi tiyiseleke hi ndlela ya ku hlaseriwa, ku lava ku fa, makhombo ni ku pfumala—hinkwaswo hikwalaho ka rirhandzu ra ntiyiso eka Xikwembu ni ntirho wa xona wo kwetsima.—2 Vakorinto 11:23-27.
9. Pawulo u hakeriwe njhani hi ku kombisa rirhandzu ra ntiyiso?
9 Xana Yehova u n’wi hakerile Pawulo hi ku va a ri xikombiso xo tano lexinene eku kombiseni ka rirhandzu ra ntiyiso? Kutani, anakanya hi ndlela leyi vutirheli bya Pawulo a byi humelela ha yona. U swi kotile ku simeka mabandlha ya Vukriste hi ku landzelelana. Naswona mawaku masingita lawa Xikwembu xi n’wi nyikeke matimba ya ku ma endla! (Mintirho 19:11, 12) Pawulo nakambe u ve ni lunghelo ro amukela swivono leswi nga tolovelekangiki ni ku tsala mapapila ya 14 lawa sweswi ma nga xiphemu xa Matsalwa ya Vukriste ya Xigriki. Ehenhla ka hinkwaswo leswi, u nyikiwe hakelo ya ku nga fi ematilweni. (1 Vakorinto 15:53, 54; 2 Vakorinto 12:1-7; 2 Timotiya 4:7, 8) Entiyisweni Pawulo u kume leswaku Xikwembu xi hakela rirhandzu ra ntiyiso.
Rirhandzu Ra Ntiyiso Ra Vuyerisa eSikwini Ra Hina
10. Xana swi nga lava yini leswaku hi va vadyondzisiwa va Yesu ni ku kombisa rirhandzu ra hina eka Yehova?
10 Timbhoni ta Yehova namuntlha hi ku fanana ti kume leswaku rirhandzu ra ntiyiso ra vuyerisa. Ku kombisa rirhandzu ra hina eka Yehova hi ku teka xiyimo xa hina eka tlhelo ra yena ni ku va vadyondzisiwa va Yesu swi nga ha lava vutomi bya hina tanihi vahlayisi va vutshembeki. (Ringanisa Nhlavutelo 2:10.) Yoleyo hi yona mhaka leyi Yesu a vuleke ha yona leswaku hi fanele ku hlayela nxavo. Kambe a hi endli sweswo leswaku hi vona loko ku va mudyondzisiwa swi vuyerisa kumbe e-e. Ku ri na sweswo, hi endla tano leswaku hi tilulamisela ku hakela hambi yini lexi vudyondzisiwa byi xi lavaka.—Luka 14:28.
11. Ha yini van’wana va tsandzeka ku tinyiketela eka Xikwembu?
11 Namuntlha, vo tala—handle ko kanakana timiliyoni—va pfumela rungula leri Timbhoni ta Yehova ti va tiselaka rona leri humaka eRitweni ra Xikwembu. Kambe va kokela endzhaku eku tinyiketeleni eka Xikwembu ni ku khuvuriwa. Xana leswi swi nga va tano hikwalaho ka leswi va pfumalaka rirhandzu ra ntiyiso eka Xikwembu leri van’wana va nga na rona? Vo tala va tsandzeka ku teka magoza ya ku tinyiketela ni nkhuvulo hikuva va lava ku tshama va tsakeriwa hi munghana la nga pfumeriki. Van’wana a va tshineli ekusuhi ni Xikwembu hikuva va ni langutelo ra n’wamabindzu loyi a byeleke Mbhoni a ku: “Ndzi rhandza xidyoho.” Handle ko kanakana, vanhu vo tano a va swi tlangeli hinkwaswo leswi Xikwembu na Kriste va va endleleke swona.
12. I yini leswi magazini lowu wu swi vuleke leswi kombaka mimbuyelo ya vutivi lebyi hi tshinetaka ekusuhi ni Xikwembu hi rirhandzu ra ntiyiso?
12 Loko hi swi tlangela hi xiviri hinkwaswo leswi Yehova Xikwembu na Yesu Kriste va hi endleleke swona, hi ta kombisa leswi hi ku hakela hambi ku ri yini lexi lavekaka hi ku swi rhandza leswaku hi tirhela Tata wa hina wa le tilweni ni ku va un’wana wa vadyondzisiwa va Yesu. Hikwalaho ka rirhandzu ra ntiyiso eka Xikwembu, vavanuna ni vavasati eswiyin’weni hinkwaswo swa vutomi—van’wamabindzu lava humelelaka, vanhu va mintlangu leyi dumeke, ni van’wana—va tshike mintirho-vutomi ya ku titsakisa va teka vutirheli bya Vukriste, hi laha ku endleke muapostola Pawulo ha kona. Naswona a va nga ta teka nchumu handle ka mimbuyelo ya ku tiva ni ku tirhela Xikwembu. Emhakeni leyi, The Watch Tower yi tshama yi ku: “Minkarhi yin’wana hi vutisile, I vamakwerhu vangani lava a va ta tsakela ku teka [R2 600] ematshan’wini ya leswi va swi tivaka hi Ntiyiso? A ku voniwanga voko! I mani loyi a a ta teka [R26 000]? Ku hava! I mani loyi a a ta teka [R2 600 000]? I mani loyi a nga ta teka misava hinkwayo ematshan’wini ya leswi a swi tivaka hi xivumbeko xa Xikwembu ni kungu ra Xikwembu? A nga kona! Kutani hi te, A mi wona ntlawa lowu nga anerisekiki, wo biha, vanghana lava rhandzekaka. Loko mi titwa mi fuwile lerova a mi nga ta teka nchumu ematshan’wini ya vutivi bya n’wina hi Xikwembu, kutani mi titwa mi fuwile hi laha hi titwaka ha kona.” (December 15, 1914, tluka 377) Ina, vutivi lebyi kongomeke hi Xikwembu ni swikongomelo swa xona byi hi tshineta ekusuhi na xona hi rirhandzu ra ntiyiso leri vuyerisaka hakunene.
13. Hi fanele ku languta dyondzo ya munhu hi xiyexe hi ndlela yihi?
13 Loko hi rhandza Xikwembu, hi ta lwela ku tiva ni ku endla ku rhandza ka xona. (1 Yohane 5:3) Hi ta teka dyondzo ya munhu hi xiyexe, xikhongelo ni ku va kona eminhlanganweni ya Vukriste swi ri swa nkoka swinene. Hinkwaswo leswi swi lava ku tinyiketela, hikuva mintirho leyi yi katsa ku tirhisiwa ka nkarhi, matimba ni rifuwo rin’wana. Hi nga ha boheka ku hlawula exikarhi ko hlalela nongonoko wa thelevhixini ni ku nghenela dyondzo ya munhu hi xiyexe ya Bibele. Kambe vona ndlela leyi hi tiyaka swinene ha yona emoyeni, vona ndlela yo antswa leyi hi kotaka ku nyikela vumbhoni eka van’wana ha yona, naswona vona ndlela leyi hi kumaka swo tala ha yona eminhlanganweni ya Vukriste loko hi teka dyondzo yo tano yi ri ya nkoka ni ku veka nkarhi wa yona lowu faneleke etlhelo!—Psalma 1:1-3.
14. Xikhongelo ni vuxaka lebyinene na Yehova Xikwembu i swa nkoka hi ndlela yihi?
14 Xana nkarhi na nkarhi hi tsakela ku vulavula ni Tata wa hina wa le tilweni hi ku ‘phikelela eku khongeleni’? (Varhoma 12:12) Kumbe xana hakanyingi hi khomeka ngopfu ku endla vululami eka lunghelo leri ra nkoka? ‘Ku khongela nkarhi na nkarhi’ i ndlela ya nkoka yo tiyisa vuxaka bya hina na Yehova Xikwembu. (1 Vatesalonika 5:17) Naswona ku hava lexi fanaka ni vuxaka lebyinene na Yehova lexi nga hi pfunaka loko hi langutana ni mindzingo. I yini lexi pfuneke Yosefa ku landzula loko a ringiwa hi nsati wa Pontifaro? Naswona ha yini Daniyele a nga tshikanga ku khongela loko nawu wa Vamede ni Vaperesi wu n’wi sivele ku khongela Yehova? (Genesa 39:7-16; Daniel 6:4-11) Entiyisweni, vuxaka lebyinene na Xikwembu byi pfune vavanuna volavo leswaku va hlula, hi laha swi nga ta hi pfuna ku endla tano ha kona!
15. Hi fanele ku yi languta njhani minhlangano ya Vukriste, naswona ha yini?
15 Kutani ke, xana hi swi teka swi ri swa nkoka ku fikela kwihi ku va kona eka minhlangano ya hina ya ntlhanu ya vhiki na vhiki? Xana hi pfumelela ku karhala, ku vabyanyana emirini, kumbe ku bihanyana ka maxelo ku kavanyeta ndzhwalo wa hina wa ku nga tshiki ku hlangana ni vapfumeri-kulorhi? (Vaheveru 10:24, 25) Mutivi un’wana wa michini la hakeriwaka kahle wa le Amerika u vone leswaku ntirho wa yena nkarhi hinkwawo a wu kavanyetana ni vukona bya yena eminhlanganweni ya Vukriste. Kutani u cince ntirho wa yena, a lahlekeriwa hi mali leswaku a kota ku va kona eminhlanganweni hinkwayo ya bandlha nkarhi hinkwawo. Minhlangano ya hina yi hi pfuna ku tsakela ku nyikana xikhutazo ni ku tiyisana ripfumelo. (Varhoma 1:11, 12) Etimhakeni leti hinkwato, xana a hi kumi leswaku “loyi a byalaka swo tala, ú ta tshovela swo tala”? (2 Vakorinto 9:6) Ina, ku kombisa rirhandzu ra ntiyiso hi tindlela to tano swi vuyerisa swinene.
Rirhandzu Ra Ntiyiso Ni Vutirheli Bya Hina
16. I yini lexi xi nga humelelaka loko rirhandzu ri hi susumetela ku veka vumbhoni hi xitshuketa?
16 Rirhandzu ri hi susumetela ku chumayela mahungu lamanene tanihi vanhu va Yehova. Hi xikombiso, ri hi susumetela ku nghenela vumbhoni bya xitshuketa. Hi nga ha kanakana ku veka vumbhoni hi xitshuketa, kambe rirhandzu ri ta hi susumetela ku vulavula. Hakunene, rirhandzu ri ta hi vangela ku anakanya hi tindlela ta vutlhari to sungula bulo kutani hi ri yisa eka Mfumo. Hi xikombiso: Endzeni ka xihahampfhuka, nkulu wa Mukriste siku rin’wana u tikume a tshame etlhelo ka muprista wa Rhoma Khatoliki. Xo sungula, nkulu u tlhontlhe muprista hi swivutiso leswi nga vavisiki. Hambi swi ri tano, hi nkarhi lowu muprista a xikeke eka xihahampfhuka, ku tsakela ka yena ku n’wi susumetele ku kuma timbirhi ta tibuku ta hina. Mawaku vuyelo lebyinene bya ku nyikela vumbhoni hi xitshuketa!
17, 18. Rirhandzu ri ta hi susumetela ku endla yini malunghana ni vutirheli bya Vukriste?
17 Rirhandzu ra ntiyiso nakambe ri hi susumetela ku hlanganyela nkarhi hinkwawo entirhweni wo chumayela wa yindlu na yindlu ni swivumbeko swin’wana swa vutirheli bya Vukriste. Ku fikela eka mpimo lowu hi kotaka ku va ni mabulo ya Bibele ha wona, hi ta tisa ku dzuneka eka Yehova Xikwembu naswona hi ta pfuna vanhu lava fanaka ni tinyimpfu leswaku va nghena endleleni leyi yaka evuton’wini lebyi nga heriki. (Ringanisa Matewu 7:13, 14.) Hambi loko hi nga swi koti ku va ni mabulo ya Bibele, matshalatshala ya hina ma nge vi swa hava. Vukona bya hina emakaya ya vanhu byi tirha tanihi vumbhoni, naswona hina ha vuyeriwa hi vutirheli, hikuva hi nga ka hi nga huweleri ntiyiso wa Bibele handle ko tiyisa ripfumelo ra hina. I ntiyiso, ku famba hi yindlu na yindlu swi lava ku titsongahata, hi endla swilo hinkwaswo hikwalaho ka mahungu lamanene, leswaku hi avelana wona ni van’wana.’ (1 Vakorinto 9:19-23) Kambe hikwalaho ka rirhandzu eka Xikwembu ni vanhu-kulorhi, hi ku titsongahata hi endla matshalatshala naswona hi hakeriwa hi mikateko leyi fuweke.—Swivuriso 10:22.
18 Nakambe swi lava rirhandzu ra ntiyiso leswaku malandza ya Yehova ma va ni vukheta ehenhleni ka ku endla maendzo yo vuyela eka vanhu lava tsakelaka ntiyiso wa Bibele. Ku fambisa tidyondzo ta Bibele vhiki rin’wana ni rin’wana ni n’hweti yin’wana ni yin’wana i xikombiso xa rirhandzu eka Xikwembu ni muakelani wa hina, hikuva ntirho lowu wu lava ku tirhisa nkarhi, matshalatshala ni rifuwo leri vonakaka. (Marka 12:28-31) Hambi swi ri tano, loko hi vona xin’wana xa swichudeni leswi swa Bibele xi khuvuriwa kumbe hambi ku ri ku nghenela vutirheli bya nkarhi hinkwawo, xana a hi tiyiseki leswaku rirhandzu ra ntiyiso ra vuyerisa?—Ringanisa 2 Vakorinto 3:1-3.
19. I vuxaka byihi lebyi nga kona exikarhi ka rirhandzu ni ntirho wa nkarhi hinkwawo?
19 Rirhandzu ro pfumala vutianakanyi ri hi susumetela ku tshika ku tiphina hi swilo swa nyama hikwalaho ka ntirho wa nkarhi hinkwawo loko swi koteka leswaku hi hlanganyela eka ntirho wo tano. Magidi ya magidi ya Timbhoni ya nga tiyisa leswaku ku kombisa rirhandzu ra vona ku fikela eka mpimo wolowo swi ve leswi vuyerisaka swinene. Loko swiyimo swi ku pfumelela ku hlanganyela evutirhelini bya nkarhi hinkwawo kambe u nga swi tirhisi, a wu yi tivi mikateko leyi u yi kayelaka.—Ringanisa Marka 10:29, 30.
Ra Vuyerisa Hi Tindlela Tin’wana
20. Rirhandzu ri hi pfuna ku va lava rivalelaka hi ndlela yihi?
20 Ndlela yin’wana leyi rirhandzu ra ntiyiso ri vuyerisaka ha yona hi leswaku ri hi pfuna leswaku hi rivalela. Ina, rirhandzu “a ri na xiveketela xa leswo biha.” Entiyisweni, “rirhandzu ri funengeta swidyoho leswo tala.” (1 Vakorinto 13:5; 1 Petro 4:8) “Leswo tala” ku vuriwa swidyoho swo tala, a hi swona ke? Naswona vona ndlela leyi swi vuyerisaka ha yona ku va la rivalelaka! Loko u rivalela, swi endla leswaku wena ni loyi a ku dyoheleke mi titwa ku antswa. Kambe xa nkoka ngopfu i mhaka ya leswaku handle ka loko ana se hi rivalele lava va hi dyohelaka, hi nge languteli Yehova leswaku a hi rivalela.—Matewu 6:12; 18:23-35.
21. Rirhandzu ra ntiyiso ri hi pfuna ku va lava titsongahataka hi ndlela yihi?
21 Ku tlula kwalaho, rirhandzu ra ntiyiso ra vuyerisa hikuva ri hi pfuna leswaku hi titsongahata. Loko hi rhandza Yehova, hi ta titsongahata ehansi ka voko ra yena ra matimba. (1 Petro 5:6) Rirhandzu ra yena nakambe ri ta hi susumetela ku titsongahata eka xitirhisiwa xa yena lexi hlawuriweke, “nandza la tshembekaka, wo tlhariha.” Leswi swi katsa ku titsongahata eka lava va rhangelaka ebandlheni. Leswi swa vuyerisa hikuva ku tsandzeka ku endla tano a swi ta ‘vavisa’ hina. (Matewu 24:45-47; Vaheveru 13:17) Kavula, nsinya lowu wa nawu wa ku titsongahata, nakambe wu tirha exikarhi ka ndyangu. Ndlela yo tano ya vuyerisa hikuva yi tlakusa ntsako, ku rhula ni ntwanano wa ndyangu loko yi hi nyika ku aneriseka loku fambisanaka ni ku tiva leswaku hi tsakisa Xikwembu.—Vaefesa 5:22; 6:1-3.
22. Hi nga va lava tsakeke hakunene hi ndlela yihi?
22 Kutani ke, entiyisweni mfanelo leyikulu leyi hi nga yi hlakulelaka i a·gaʹpe, muxaka wa rirhandzu leri pfumalaka vutianakanyi, ra nsinya wa nawu. Naswona ku nga ka ku nga vi na ku kanakana leswaku rirhandzu ra ntiyiso ra vuyerisa. Hikwalaho, hakunene hi ta tsaka loko hi hlakulela ni ku kombisa mfanelo leyi hi mpimo lowukulu eku dzunekeni ka Xikwembu xa hina xa rirhandzu, Yehova.
A Wu Ta Hlamula Njhani?
◻ Yehova Xikwembu u kombise rirhandzu ra ntiyiso hi tindlela tihi?
◻ Yesu Kriste u kombise rirhandzu hi ndlela yihi?
◻ I xikombiso xihi lexi muapostola Pawulo a xi vekeke eku kombiseni ka rirhandzu ra ntiyiso?
◻ Timbhoni ta Yehova a ti ri karhi ti kombisa rirhandzu hi ndlela yihi?
◻ Ha yini a wu ta vula leswaku rirhandzu ra ntiyiso ra vuyerisa?
[Xifaniso lexi nga eka tluka 16]
Rirhandzu ra Yehova hi vanhu ri n’wi susumetele ku nyikela hi N’wana wa yena leswaku hi kuma vutomi lebyi nga heriki. Xana wa ri tlangela rirhandzu ro tano ra ntiyiso?
[Xifaniso lexi nga eka tluka 18]
Rirhandzu ra ntiyiso eka Yehova ri ta hi susumetela ku ‘phikelela eku khongeleni’