“Leswi I Miri Wa Mina”
“TEKANI mi dya; . . . leswi i miri wa mina.” (Matewu 26:26, The New Jerusalem Bible)
Hi marito lawa, Yesu Kriste u hundzisele xinkwa xo kala comela eka vaapostola vakwe loko a sungula Xilalelo xa Hosi. Kambe a a vula yini hi marito lama nge, “Leswi i miri wa mina”?
NHLAMULO ya xivutiso lexi i ya nkoka eka Makhatoliki ya Rhoma, tanihi leswi marito ya Yesu ma vumbaka masungulo ya dyondzo ya ku hundzuka. Hi ku ya hi dyondzo leyi, loko Makhatoliki ma tlangela Mass ivi ma dya xinkwa, xi hundzuka miri kumbe nyama yinene ya Kriste. Hikwalaho, a a va ta yi kaneta ngopfu New World Translation of the Holy Scriptures, leyi hundzuluxelaka marito ya Yesu yi ku: “Tekani mi dya. Leswi swi vula miri wa mina.” Ku hundzuluxela loku ku ringanyeta leswaku xinkwa xexo a ku ri xifanekiselo xa nyama ya Yesu, ku nga ri nyama hi yoxe. Xana i ku hundzuluxela kwihi loku khomeke mongo lowunene?
Rito ra Xigriki leri hundzuluxeriweke “i” kumbe “vula” i e·stinʹ. Kahle-kahle ri vula “i,” kambe ri nga ha vula “ku vula, ku kombisa.” Hi kwihi ku hundzuluxela loku antswaka eka mongo lowu?
Xa nkoka i nhlamuselo ya le hansi eka Matewu 26:26 eka ririmi ra Xipaniya La Sagrada Escritura, Texto y comentario por Profesores de la Compañía de Jesús, Nuevo Testamento I (Matsalwa Yo Kwetsima Ndzimana Ni Nhlamuselo hi Vaprofesa va Ntlawa wa Yesu, Testamente Leyintshwa). Yi ri: ‘Ku hundzuluxeriwa, hi ku ya hi ririmi, ku nga ha hundzuluxeriwa va ku vula kumbe fanekisela tanihi i—leswi vulaka xikombiso xinene. Ku nga ha tshahiwa, Genesa 41:26; Ezekiel 5:5; Daniel 7:17; Luka 8:11; Matewu 13:38; 16:18; Vagalatiya 4:24; Nhlavutelo 1:20 tanihi swikombiso leswi vula a tirhisiweke kona. Nhlamuselo ya i ([eka mongo wa] ku fana ni) ya hlanganisiwa, hi laha yi nga voniwaka ha kona etibukwini ta dyondzo ya vukhongeri, ku nga ri na ku fanekisela na hi ndlela leyi Kereke ya Khale a a yi twisisa xivulwa-hava ha kona.’
Hi laha entiyisweni ku hundzuluxela ka Rhoma Khatoliki ku kombisaka ha kona, hi tlhelo ra ririmi, marito ya Yesu ma nga twisisiwa hi ndlela yin’wana. Kahle-kahle, rito ra Xigriki e·stinʹ ri hundzuluxeriwe ri va “nhlamuselo ya,” kun’wana eka New Jerusalem Bible ya Khatoliki. (Matewu 12:7) Hi rihi rito leri muhundzuluxeri a fanelaka ku ri hlawula eka Matewu 26:26? Tanihi leswi Yesu a a ha hanya emirini lowu hetisekeke loko a vula marito ya ndzimana yoleyo, xinkwa lexi a xi nyikeke valandzeri vakwe a a ku nga ta va yona nyama ya yena hi ku kongoma. Ku tlula kwalaho, hinkwawo miri wakwe lowu hetisekeke a wu nyikeriwe tanihi gandzelo ra nkutsulo. (Vakolosa 1:21-23) Hikwalaho, nhlamuselo leyi nga yona-yona ya ndzimana leyi hi leyi: “Leswi swi vula miri wa mina.” Xinkwa lexo kala comela xi kombisa miri wa Yesu, lowu a wu ta nyiketiwa ematshan’wini ya vanhu.
Hambi loko Bibele ya wena yi ri ni nhlamuselo leyi nge “Leswi i miri wa mina,” a wu fanelanga leswaku u pfilunganyeka. Hakanyingi Yesu u tirhise ririmi leri fanaka. Loko a ku, “Hi mina nyangwa” ni leswaku, “Hi mina nsinya wa xiviri wa vhinya,” a ku na munhu ni un’we la twisiseke leswaku a a ri nyangwa wunene kumbe nsinya wunene wa vhinya. (Yohane 10:7; 15:1) Naswona, hi ku ya hi The New Jerusalem Bible, loko a ri karhi a hundzisa xinwelo xa vhinya eka vadyondzisiwa vakwe ivi a ku: “Xinwelo lexi i ntwanano lowuntshwa,” ku hava loyi a ehleketeke leswaku xinwelo xexo hi xiviri a ku ri wona ntwanano lowuntshwa. (Luka 22:20) Hi ku fanana, loko a ku xinkwa ‘a a’ ku ri miri wakwe, hi fanele ku twisisa leswaku xinkwa xexo xi ‘vula,’ kumbe xi fanekisela miri wa yena.