Sweswi I Nkarhi Wo Lava Yehova
“Yehova o langutile v̌ana v̌a v̌anhu a ri tilweni, a v̌ona šana o kona l’a nga ni ku twisisa, l’a lav̌aka [Yehova].”—PSALMA 14:2.
1, 2. (a) Xana vo tala va n’wi languta njhani Yehova Xikwembu xa ntiyiso? (b) Hi swi tiva njhani leswaku Yehova wa ku xiya ku nga tsakeli ka vanhu?
NAMUNTLHA, Xikwembu xa ntiyiso, Yehova, xi ariwa hi lava nga byi pfumeriki vukona bya Xikwembu, lava nge Xikwembu a xi tiviwi, vagandzeri va swikwembu swa mavunwa, ni timiliyoni leti vulaka leswaku ti pfumela eka Xikwembu kambe ti xi landzula hi mintirho ya tona. (Tito 1:16) Vo tala tanihi mutivi wa filosofi wa le Jarimani wa lembe xidzana ra vu-19, Nietzsche, va pfumela leswaku “Xikwembu xi file.” Xana Yehova a nga byi voni vuhunguki lebyi byi honisiwaka? E-e, hikuva u huhutele Davhida ku tsala a ku: “Šihunguki ši te e mbilwini ya šona: a ku na Šikwembu! V̌a borile; mitiro ya v̌ona yi ni manyala; a ku na l’a endlaka ŝinene.”—Psalma 14:1.
2 Davhida u ye emahlweni a ku: “Yehova o langutile v̌ana v̌a v̌anhu a ri tilweni, a ta v̌ona šana o kona l’a nga ni ku twisisa, l’a lav̌aka [Yehova].” Ina, Hosi Leyikulu ya va vona lava lavaka ku yi tiva ni ku yi tirhela. Xisweswo, ku yi lava ka hina hi ku hiseka sweswi i ka nkoka. Swi ta vula ku hambana exikarhi ka vutomi lebyi nga heriki ni ku herisiwa hi laha ku nga heriki.—Psalma 14:2; Matewu 25:41, 46; Vaheveru 11:6.
3. I yini leswi nga ha kotekaka enkarhini lowu saleke?
3 Hikwalaho, hi nga vona leswaku ha yini swi ri swa nkoka leswaku hi pfuna van’wana ku lava Yehova sweswi. Ka ha ri na timiliyoni ta vanhu lava nga si tshamaka va hlangana ni un’wana wa Timbhoni ta Yehova kumbe ku twa ‘mahungu lamanene ya mfumo.’ Naswona leswaku nhlayo ya “ntshungu lowukulu” yi ta kurisa ku yini emahlweni ka ‘nhlomulo lowukulu,’ a hi swi tivi. Kambe entiyisweni swa ha koteka leswaku vo tala va lava ni ku kuma Yehova Xikwembu enkarhini lowu saleke, nkarhi wu nga si va siya. Xivutiso sweswi xi ri, Xana hi nga endla yini leswaku hi pfuna vo tala leswaku va kuma Xikwembu?—Matewu 24:14; Nhlavutelo 7:9, 14.
4, 5. Eku lavisiseni ka vona xikwembu, vo tala va lava yini?
4 Namuntlha vanhu vo tala emisaveni va lavisisa, kambe va lavisisa yini? A hi vangani lava entiyisweni va lavaka Xikwembu xin’we xa ntiyiso, Yehova. Vo tala va lava xikwembu lexi pfumelelanaka ni ku navela ni rivengo ra vona ra munhu hi xiyexe. Hi laha mulawuri wa nhlawulo wa le U.S. George Gallup, Jr., a vuleke ha kona: “Hakunene a ku na ku hambana lokukulu exikarhi ka vanhu lava nghenaka kereke ni lava va nga ngheniki emhakeni ya ku xisa, ku nga hakeli ndzuvo ni ku yiva, swi tele swinene hikuva ku na vukhongeri byo tala lebyi tolovelekeke.” U engetela leswaku “van’wana va hlanganisa vukhongeri ntsena leswaku bya va tsakisa ni ku va nyanyula . . . un’wana u byi vule vukhongeri byo tihlawulela hi ku ya hi mukhuva wa wena (à la carte).”
5 Van’wana va ta ku, “Vukhongeri bya mina byi kahle ngopfu eka mina.” Kavula, xivutiso hakunene xi nga ku, “xana vukhongeri bya wena byi kahle ngopfu eka Xikwembu?” I ntiyiso, vo tala eka Vujagana ni le ka Vuhindu va tsakisiwa hi ku gandzela swifaniso ni swikwembu swa vona swa hava. Vo tala, va lava tivulaka Vakriste, va pfumela eka xikwembu xa Vunharhu-un’we lexi xi nga hava vito, va anerisiwa hi swona. Naswona Mamoslemu lama tlulaka 900 wa timiliyoni ma pfumela eka xa wona, Allah. Hi tlhelo rin’wana, timiliyoni ta lava nga pfumeriki vukona bya Xikwembu ti ri a ku na Xikwembu.
Lava Lavaka Mpfuno
6. Vo tala va vahlayi va Xihondzo xo Rindza va kume yini?
6 Kambe ku vuriwa yihi hi van’wana va hina lava hlayaka magazini lowu nkarhi na nkarhi? Hi lavisise Xikwembu xa ntiyiso naswona hi xi kumile. Hi tiyise marito ya Yakobo 4:8 lama nge: “Tshinelelani Xikwembu, kutani xi ta mi tshinelela.” Hi ku chivirikela ku hlanganyela ni bandlha ra Vukriste, hi tshinele eku sukuhi na Xikwembu, naswona hi tokote hi hexe ndlela leyi Yehova a tshinelaka eka hina ha yona.—Yohane 6:44, 65.
7. Hi swi tiva njhani leswaku ku na vanhu vo tala lava va ha tsakelaka ku va lava gingiritekaka entiyisweni?
7 Hambi swi ri tano, ha swi tiva leswaku ka ha ri na vo tala lava swi tsakelaka ku hlanganyela ni vanhu va Yehova hi minkarhi kambe a va si teka goza lerinene ro tshinela ekusuhi na Yehova hi ku tinyiketela ni nkhuvulo. Hi swi tivisa ku yini leswi? Hi 1990 ku lava ku va vanhu va timiliyoni ta khume va ve kona eXitsundzuxweni xa rifu ra Yesu. Kambe i vangani lava huwelelaka mahungu lamanene ya Mfumo hi laha ku humelelaka? Va tlula mune wa timiliyoni ntsena. Leswi vulaka leswaku hi na kwalomu ka vanghana va timiliyoni ta tsevu va ntiyiso lava minkarhi yin’wana va swi tsakelaka ku hlanganyela na hina kambe lava nga siki sungulaka ku bumabumela ririmi leri tengeke ra ntiyiso hi ku chumayela mahungu lamanene ya Mfumo. Handle ko kanakana, eka swiendlakalo swa xiwelo vo tala va vulavula hi Yehova ni ku fuma ka Mfumo wa yena. Hambi swi ri tano, a va si tikombisa tanihi Timbhoni ta Yehova. Lava na vona, hi lava ku va pfuna.—Sofonia 3:9; Marka 13:10.
8, 9. (a) Yehova u hi khutaza ku endla yini? (b) Ha yini ku nga ri vutlhari ku honisa ndzayo ya Yehova?
8 Hi lava ku va khutaza leswaku va va Timbhoni ta Yehova leti tsakeke, leti gingiritekaka eku chaputeni ka ntirho lowukulu lowu sweswi wu hetisisiwaka emisaveni hinkwayo. Hi kombela mi xiya xirhambo xa Yehova eka Swivuriso 1:23: “Hunḍukani hi ku tshinya ka mina! Maŝiv̌o, nḍi ta mi tšhelela moya wa mina, nḍi mi dyonḍisa timhaka ta mina.” (Ringanisa Yohane 4:14.) Swi khutaza swonghasi ku tiva leswaku Yehova u ta angula loko hi teka magoza lama kongomeke yo tixaxameta ni vito ni vugandzeri bya yena! Entiyisweni, a hi swi lavi ku katsiwa exikarhi ka lava hlamuseriweke eka Swivuriso 1:24, 25: “Ku nga ku loko nḍi v̌itana, mi ala ku yingisa, nḍi konḍa nḍi ṭhambuluta v̌oko ra mina, ku nga ri na munhu l’a ṭunḍukaka. Mi munyile ku ṭunḍuša ka mina, a mi yingisanga ku tshinya ka mina.”
9 Lava honisaka xitsundzuxo xa Yehova leswaku va n’wi lava loko a ha kumeka ni lava nga endliki swiboho swa vona ku kondza kahle-kahle va vona nhlomulo lowukulu va ta kuma leswaku va hlwerile. Ndlela yo tano a yi ta kombisa ku pfumala ripfumelo ni vutlhari ni ku honisa musa lowu nga fanelangiki wa Yehova.—2 Vakorinto 6:1, 2.
10. Ha yini ku kaneta ni ku nga tsakeli swi ri ni khombo?
10 Ku kombisa xilaveko xa goza ra xihatla, xana a a wu ta landzela xitsundzuxo lexinene xa dokodela loko se u ri na switlhavi leswi phindiweke kambirhi ntsena? Kumbe, ematshan’wini ya sweswo, loko u xiya swikombiso swo sungula swa vuvabyi? Kutani ha yini wa ha rindzile u nga tihambanisi ni misava leyi vabyaka ya Sathana ivi u yima na Yehova ni Timbhoni ta yena? Mimbuyelo ya ku pfumala ku tsakela, vuhomboloki ni ku honisa yi vekiwe erivaleni eka Swivuriso 1:26-29: “Na mina, nḍi ta hleka e makhombyeni ya ṅwina, nḍi sanḍa siku mi humelelaka hi ku tšhav̌a . . . e nkarini wolowo v̌a ta v̌itana ka mina, kambe nḍi nga ka nḍi hlamuli; v̌a ta nḍi lav̌a, kambe v̌a nga ka v̌a nga nḍi kumi. Hikuv̌a v̌a v̌engile v̌utiv̌i, a v̌a tihlawulelanga ku tšhav̌a Yehova.” Hi nga tshuki hi kumeka hi ‘lava Yehova’ loko nkarhi wu nga ha ri kona!
11. I mpfuno wihi lowu nga kona wa lava lavaka ku tirhela Xikwembu?
11 Van’wana lava hlayaka magazini lowu va nga va va ha ri entileni wa ku lavisisa Xikwembu xa ntiyiso. Ha tsaka hikuva ma phikelela eku laviseni ka n’wina. Hi khongelela leswaku vutivi bya n’wina bya Bibele byi mi susumetela ku teka goza lerinene leri engetelekeke ro yima mi tiyile entiyisweni. Tiyisekani leswaku bandlha rin’wana ni rin’wana ra Timbhoni ta Yehova ri lunghekele ku mi pfuna eku laviseni ka n’wina.—Vafilipiya 2:1-4.
Nkarhi Wa Ku Chivirika Ni Ku Tirha
12, 13. Ha yini hi fanele ku teka goza malunghana ni vugandzeri bya ntiyiso?
12 Ha yini swi ri swa nkoka leswaku hinkwerhu ka hina hi tixaxameta na Yehova Xikwembu ni vugandzeri bya yena bya ntiyiso? Hi mhaka ya leswi swiendlakalo swa misava swi yaka eku chaputeni ka swona. Matluka ya matimu ma pfuleka hi xihatla ku tlula ndlela leyi munhu a nga ma hlayaka ha yona. Sweswi a hi wona nkarhi wo kanakana kumbe ku hola. Yesu u swi veke erivaleni swinene: “Loyi a nga yimiki na mina, u lwa na mina; kutani loyi a nga hlengeletiki na mina, wa hangalasa.” Nakambe u te: “La khomiwaka hi tingana hikwalaho ka mina ni marito ya mina, N’wana-wa-Munhu na yena u ta khomiwa hi tingana hikwalaho ka munhu loyi, siku a vuyaka eku kwetsimeni ka yena, a ri na Tata wa yena ni tintsumi leto hlawuleka.”—Matewu 12:30; Luka 9:26.
13 Sweswi i nkarhi wo chivirika ni wo tirha! Ha ku tiva laha swiendlakalo leswi swa misava swi kongomeke kona, naswona Armagedoni yi tshinele. Hikwalaho, xirhambo hi lexi nge, hi lava Yehova sweswi ‘emahlweni ka siku ra vukari bya yena,’ loko a ha kumeka. Hi nkarhi wa nhlomulo lowukulu, nkarhi a wu nge he vi kona.—Sofonia 2:2, 3; Varhoma 13:11, 12; Nhlavutelo 16:14, 16.
14. I swivangelo swihi leswi hi nga na swona swo lava Xikwembu?
14 Hakunene, vanhu hinkwavo va fanele va lava tintswalo ta Xikwembu sweswi. Muapostola Pawulo u swi phofule kahle eka Mintirho 17:26-28, BX: “Kambe [Xikwembu] ši endlile vanhu va tinšaka hikwato hi ngati yin’we, ku aka henhla ka misav̌a hikwayo; ši lerisile tinguva le’ti hlawuriweke hi šona ni minḍilakana ya ku aka ka v̌ona, ŝi ri leŝaku v̌a lav̌a Šikwembu, leŝaku kumbe šana v̌a nga ši ambamba, ni ku ši kuma, hambi ši nga ri kule eka uṅwana ni uṅwana wa hina; hikuv̌a e ka yena hi ni v̌utomi, ni ku famba-famba, ni ku hanya.” Xiga xexo xo hetelela lexi nge, “Hikuv̌a eka yena hi ni v̌utomi, ni ku famba-famba, ni ku hanya,” xi hi nyika xivangelo lexi aneleke xo lava Xikwembu. Hikwalaho ka titswalo leti nga fanelangiki ta Yehova, ha hanya eka xivandlanyana lexi xa misava. Xana a hi fanelanga hi tlangela Hosi Leyikulu ya vuako? Naswona xana a hi fanelanga hi kombisa ku tlangela ka hina eka xona hi ndlela leyi vonakaka?—Mintirho 4:24.
15. (a) I yini lexi n’wamatimu Arnold Toynbee a xi voneke xi ri xikongomelo xa vukhongeri lebyi tlakukeke? (b) I yini lexi hi faneleke ku xi endla leswaku hi kota ku dzunisa Xikwembu?
15 N’wamatimu Arnold Toynbee u tshame a tsala a ku: “Xikongomelo-nkulu xa vukhongeri lebyi tlakukeke i ku hangalasa switsundzuxo swa moya ni mintiyiso leswi nga mongo wa byona, swi ya eka mimoya-xiviri yo tala hi laha swi nga kotekaka ha kona, leswaku wun’wana ni wun’wana wa mimoya-xiviri leyi wu ta kota ku hetisisa ntirho lowu faneleke wa Munhu. Pakani ya munhu ya ntiyiso i ku kwetsimisa Xikwembu ni ku xi tsakela hi laha ku nga heriki.” (An Historian’s Approach to Religion, matluka 268-9) Leswaku hi kwetsimisa Xikwembu, hi fanele hi sungula hi xi lava ivi hi kuma vutomi lebyi kongomeke ha xona ni swikongomelo swa xona. Xisweswo, xirhambo xa Esaya xi fanerile swinene: “Lav̌ani Yehova loko a ha kumeka; huwelelani ka yena, loko a ha ri kusuhi! Lo’wo biha a a ṭhike ndlela ya yena, ni wa lunya emeehleketo ya yena; a a tlhelele ka Yehova, la nga ta ṅwi twela v̌usiwana; ni ka Šikwembu ša hina, leši riv̌alelaka, ku nga ri hi mpimo.”—Esaya 55:6, 7.
I Mpfuno Wihi Lowu Tirhaka Lowu Hi Nga Wu Nyikelaka?
16. (a) I ntlhontlho wihi lowu langutaneke ni bandlha ra Vukriste? (b) I ndlela yihi leyi tirhaka leyi hi nga pfunaka van’wana ku tirhela Yehova ha yona?
16 Timiliyoni ta vanhu lava tsakelaka leti ti nga siki vaka vahuweleri lava humelelaka ti vanga ntlhontlho eka hina hinkwerhu. Xana i yini leswi hi swi endlaka tanihi vakulu, malandza ya vutirheli, maphayona ni vahuweleri ku pfuna lava va tsakela ntiyiso leswaku va hlanganyela hi ku chivirika evugandzerini kun’we na hina? Ndlela yin’wana yo nyikela mpfuno lowu humelelaka laha swi lavekaka kona i ku va endzela emakaya ya vona ni ku va teka hi famba na vona eminhlanganweni eHolweni ya Mfumo leswaku na vona va tsakela mimbuyelo ya moya wa Yehova nkarhi na nkarhi. Xitsundzuxo xa Pawulo lexi yaka eka Vaheveru, eka ndzima 10, tindzimana 24 na 25, i xa xihatla namuntlha hi laha a xi ri ha kona hi nkarhi wolowo: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana, kukota leswi van’wana va toloveleke ku endla swona, kambe hi khongotelana, ngopfu-ngopfu leswi mi vonaka leswaku siku ra Hosi ri ya ri tshinela.” Hi khutaza hinkwavo lava tsakelaka ku tokota tintswalo ta Yehova ku hlanganyela ni Timbhoni ta Yehova nkarhi na nkarhi eka Holo ya vona ya Mfumo ya kwalaho.
17. Loko hi ta pfuna swichudeni swa Bibele leswaku swi hluvuka eku laveni ka swona Yehova, i swivutiso swihi leswi faneleke ku hlamuriwa?
17 Loko hi dyondza Bibele ni un’wana loyi a vaka kona eminhlanganweni nkarhi na nkarhi, xana hi nga pfuna munhu yoloye leswaku a faneleka tanihi muhuweleri wa mahungu lamanene? (Vona Organized to Accomplish Our Ministry, matluka 97-9.) Naswona loko yena a va muhuweleri la nga khuvuriwangiki, xana xirhambo xa endliwa leswaku a famba na hina nkarhi na nkarhi entirhweni wa le rivaleni wo chumayela kumbe eka tidyondzo ni maendzo ya hina yo vuyela? (Vona nkandziyiso wa Xihondzo xo Rindza, xa December 1, 1989, tluka 31.) Hi marito man’wana, loko vanhu vo tano va faneleka, xana ha va khutaza hi ku endla leswaku va byi vona hi voxe vuyelo byin’wana lebyinene bya ntirho wa hina wo chumayela?—Matewu 28:19, 20.
Yehova U Faneriwa Hi Ku Laviwa
18. Yehova u kombise tintswalo ta yena eka vanhu hi ndlela yihi?
18 Hikwalaho ka gandzelo ra nkutsulo ra Kriste Yesu, Yehova a nga swi hlayisi swidyoho swa hina swa nkarhi lowu hundzeke loko hi tisola ivi hi kombisa ripfumelo. Xiya marito ya Davhida: “A nga hi endlelanga hi mpimo wa ku dyondza ka hina, a nga hi rihisanga hi mpimo wa milanḍu ya hina. Hikuv̌a hi laha matilo ma tlakukeke henhla ka misav̌a, hi ŝeŝo nsov̌o wa yena wu kurile henhla ka la’v̌a n’wi tšhav̌aka; hi laha v̌uša byi hambaneke ni v̌upeladyambu, o hambanisile ŝeŝo e ku dyoha ka hina kule na hina. Hi laha tatana a nga ni tintŝalo e ka v̌ana v̌a yena, hi ŝeŝo Yehova o ni tintŝalo eka lava n’wi tšhavaka. Hikuv̌a wa tiv̌a leši hi endliweke ha šona, wa ṭunḍuka leŝaku hi nṭhuri ntsena.”—Psalma 103:10-14; Vaheveru 10:10, 12-14.
19. I xikhutazo xihi lexi nga kona xa lava va nga vaka va wile entiyisweni?
19 Yehova i Xikwembu lexi hananaka ni xa musa hakunene. Loko hi ya eka yena hi ku titsongahata ni ku hundzuka, wa tsetselela a tlhela a rivala. A nga veki ku vilela loku nga heriki ka ku xanisiwa hi ndzilo wa tihele hi laha ku nga heriki tanihi vuyelo. E-e, swi hi laha muprofeta a vuleke ha kona: “Hi mina, hi mina nṭena loyi a hlangulaka ku dyoha ka wena hikwalaho ka mina, kutani nḍi nga ka nḍi nga ha anakanyi ŝidyoho swa wena.” Mawaku xikhutazo xonghasi lexi leswi swi nga xona eka lava weke entiyisweni naswona va honiseke vuxaka bya vona na Yehova! Na vona va khutaziwa ku lavisisa Yehova sweswi ivi va tlhela va hlanganyela hi ku chivirika ni vanhu va vito ra yena.—Esaya 43:25.
20, 21. (a) I xikombiso xihi lexi khutazaka lexi hi nga na xona hi Yuda wa khale? (b) Vaaki va Yuda a va fanele ku endla yini leswaku va kuma mikateko ya Yehova?
20 Emhakeni leyi hi ni xikombiso lexi khutazaka xa Hosi Asa wa Yuda wa khale. U suse vugandzeri bya mavunwa emfun’weni wa yena, kambe vuthala bya vugandzeri bya vuhedeni a bya ha ri kona. Mhaka leyi nga eka 2 Tikronika 15, tindzimana 2 ku ya ka 4, yi hi byela leswi muprofeta Azariya a swi vuleke eka Asa tanihi xitsundzuxo: “Yehova u na ṅwina loko mi ri na yena; ku nga ku loko mi ṅwi lav̌a, u ta pfumela ku kumiwa hi ṅwina; kambe loko mi ṅwi ṭhika, u ta mi ṭhika. E nkarini lo’wo leha, Israel o pfumarile Šikwembu le’ši nga šona . . . kambe loko v̌a ri ku tšhav̌eni, v̌a hunḍukile ka Yehova, Šikwembu ša Israel, v̌a ṅwi lav̌ile, kutani v̌a ṅwi kumile.”
21 Yehova a nga tlanganga xitumbelelana na Hosi Asa kambe ‘u tiendle a kumeka.’ Xana hosi yi angurise ku yini eka rungula leri? Eka ndzima leyi fanaka, tindzimana 8 na 12 ta hlamula: “Asa, ku te loko a yingisile marito lawa . . . a tiya mbilu, kutani a susa manyala ya tiko hikwaro . . . a pfuša ni altari ya Yehova leyi ngi yi ri mahlweni ka nyangwa ya Yehova. Kutani [Yuda ri] tiboha e ku lav̌a Yehova, Šikwembu ša v̌atata wa v̌ona, hi timbilu hikwato ta v̌ona ni mimoya hikwayo ya v̌ona.” Ina va lave Yehova hi ku hiseka “hi timbilu hikwato ta v̌ona ni mimoya hikwayo ya v̌ona.” Vuyelo byi ve byihi etikweni? Ndzimana 15 ya hi byela: “V̌a-Yuda v̌a ṭakela ku hlambanya loku hikuv̌a, a v̌a hlambanyile hi timbilu hikwato ta v̌ona, kutani v̌a lav̌ile [Yehova] hi ku ranḍa ka v̌ona, kutani v̌a ṅwi kumile; Yehova a v̌a nyikile ku wisa e matlhelweni hikwawo.”
22. I yini lexi hi khutazaka leswaku hi hiseka sweswi entirhweni wa Yehova?
22 Sweswi, xana lexi a hi xikhutazo eka hina hinkwerhu xo teka goza leri kongomeke malunghana ni vugandzeri lebyi tengeke bya Yehova? Ha swi tiva leswaku ku na timiliyoni leti kotaka ku dzunisa Yehova. Handle ko kanakana vo tala va lava va hundzuka evuton’wini bya vona leswaku va kota ku hlangavetana ni swilaveko swa Matsalwa ya ntirho wa Yehova. Van’wana va kula hi vutlhari ni ripfumelo, va lava Yehova, kutani hi ku hatlisa va ta susumeteleka ku avelana ririmi leri tengeke ni van’wana hi ku va byela ku twisisa loku enteke ka ntiyiso hi Yehova ni Mfumo wa yena. Naswona ha yini swi ri swa nkoka leswaku hina hinkwerhu hi lavisisa Yehova sweswi loko a ha kumeka? Hikuva tiko ra yena ra xitshembiso ri tshinele!—Esaya 65:17-25; Luka 21:29-33; Varhoma 10:13-15.
Wa Tsundzuka Xana?
◻ I vamani lava kombisaka ku nga tsakeli ehenhleni ka Xikwembu xa ntiyiso, Yehova?
◻ Xana vukhongeri hakanyingi byi khumba mahanyelo ku fikela eka mpimo wihi ke?
◻ I ntshembo wihi lowu nga kona wa ku engeteleka eka Timbhoni leti tirhaka?
◻ Ha yini sweswi ku ri nkarhi wa ku chivirika?
◻ Ha yini Yehova a faneriwa hi ku laviwa?
[Xifaniso lexi nga eka tluka 10]
Vanghana vo tala va Timbhoni ta Yehova lava veke kona eXitsundzuxweni i malandza ya Xikwembu ya nkarhi lowu taka
Nhlayo ya lava veke kona eXitsundzuxweni xa 1990: 9 950 058
Nhlohlorhi ya vahuweleri ya 1990: 4 017 213
[Xifaniso lexi nga eka tluka 12]
Esikwini ra Hosi Asa, tiko ri hundzukele eka Yehova