Swivutiso Swa Vahlayi

◼ Yohane 18:15 yi boxa mudyondzisiwa loyi a tiviwaka hi muprista lonkulu. Xana ka ha ri yena mudyondzisiwa loyi emahlweninyana a tsutsumeke “a nga mbalanga,” hi laha swi vikiweke ha kona eka Marka 14:51, 52?

E-e, swi tikomba onge munhu loyi a a tiviwa hi muprista lonkulu a ku ri muapostola Yohane, kasi la nga tsutsuma “a nga mbalanga” i mudyondzisiwa Marka.

Ku xiyisisa swiendlakalo leswi hi ku ya hi nkarhi wa swona, hi sungula Entangeni wa Getsemani. Vaapostola a va tshukile loko Yesu Kriste a khomiwa. “Hinkwavo va n’wi tshika, va tsutsuma.” Ndzimana leyi landzelaka eka mhaka ya Marka yi kombisa ku hambana: “[Kambe] jaha rin’wana a ri landza Yesu, ri funengele nkumba ntsena; kutani va ri khoma; kambe rona ri chupuka ri siya nkumba, ri tsutsuma ri nga mbalanga nchumu.”—Marka 14:50-52.

Xisweswo, angulo wo sungula wa vaapostola lava va 11 wu yelanisiwa ni lowuya wa mudyondzisiwa loyi a nga vuriwangiki vito, kutani swa twala leswaku a nga ri un’wana wa vaapostola. Xiendlakalo lexi xi rhekhodiwe ntsena eka Evhangeli leyi nga tsariwa hi mudyondzisiwa Yohane Marka, makwavo wa Barnaba. Hikwalaho ke, ku na xivangelo xo pfumela leswaku Marka a a ri “jaha rin’wana” leri nga landzelela Yesu loko a khomiwile kambe ri tlhela ri tsutsuma ri nga ri na nguvu ya rona yo funengela loko ntshungu wu lave ku khoma na yena.—Mintirho 4:36; 12:12, 25; Vakolosa 4:10.

Evusikwini byolebyo hi nkarhi wun’wana, muapostola Petro na yena u landzelela Yesu, a ri ekulenyana. Emhakeni leyi ku na ku yelana; mudyondzisiwa lontsongo (Marka) u sungula ku landzela Yesu kambe a yima, kasi endzhaku vambirhi va vaapostola lava nga tsutsuma va tlhele va landzelela N’wini wa vona la khomiweke. Eka Evhangeli ya muapostola Yohane, ha hlaya: “Simoni Petro ni mudyondzisiwa un’wana va landza Yesu; mudyondzisiwa wa kona a a tiviwa hi muprista lonkulu, kutani a nghena ehubyeni ya yindlu ya muprista lonkulu na Yesu.”—Yohane 18:15.

Muapostola Yohane u tirhisa vito “Yohane” loko a kombetela eka Yohane Mukhuvuri kambe yena n’wini a nga tivuli hi vito. Hi xikombiso, u vulavula hi “mudyondzisi[wa] la vulaka vumbhoni bya timhaka leti, kutani ú titsarile.” Hi ku fanana: “Loyi a swi voneke, ú vula vumbhoni, vumbhoni bya yena byi tiyile, kutani wa swi tiva leswaku ú vula ntiyiso.” (Yohane 19:35; 21:24) Xiya na Yohane 13:23: “Un’wana wa vadyondzisiwa, loyi Yesu a a n’wi rhandza, a a tshamile hi tlhelo ra xinene ra Yesu.” Kwalaho hi le mahlweninyana ka ku khomiwa ka Yesu. Endzhakunyana hi siku rolero Yesu loko a beleriwile u hlawule mudyondzisiwa un’we, loyi Yohane a n’wi hlamuselaka hi ndlela leyi fanaka: “Yesu a vona mana wa yena, a vona ni mudyondzisiwa loyi a n’wi rhandza a yimile kusuhi na yena, kutani a ku ka mana wa yena: “Manana, vona, n’wana wa wena hi loyi!”—Yohane 19:26, 27; ringanisa Yohane 21:7, 20.

Mhaka leyi fanaka ya ku nga tivuli hi yexe yi vonaka eka Yohane 18:15. Ku tlula kwalaho, Yohane na Petro va hlanganisiwa emhakeni ya le ndzhaku ka ku pfuxiwa eka Yohane 20:2-8. Swikombiso leswi swi hi kombisa leswaku muapostola Yohane a a ri “mudyondzisiwa [loyi] a a tiviwa hi Muprista lonkulu.” Bibele a yi humesi vuxokoxoko bya xisekelo bya leswaku (Yohane) muapostola wa Mugaleliya swi endlekise ku yini leswaku a tiva ni ku tiviwa hi muprista lonkulu. Kambe ku tiviwa ka yena hi va yindlu ya muprista lonkulu swi pfune Yohane leswaku a pfumeleriwa hi murindzi va nyangwa ku hundza a ya ehubyeni a tlhela a kota ku nghenisa na Petro.