“U Ta Va Na Mina eParadeyisini”
LOKO xa ha hayekiwile emhandzini ya nxaniso, xi fa hi ku xaniseka, xigevenga xi kombela wanuna loyi a a ri etlhelo ka xona: “Yesu, ndzi anakanye, loko u nghena emfun’weni wa wena.” Hambi leswi na yena Yesu a a ri karhi a fa hi ku vava lokukulu, u hlamurile: “Kunene ndzi ri ka wena namuntlha, U ta va na mina eParadeyisini.” (Luka 23:42, 43, NW) Mawaku ntshembo lowu chavelelaka swonghasi ku wu nyikela eka munhu la faka!
Hambi swi ri tano, xana u swi xiyile leswaku New World Translation—ku hundzuluxela loku tshahiweke eka ndzimana leyi hundzeke—yi veka xihikahato endzhaku ka rito “namuntlha” loko yi hundzuluxela marito lawa ya Yesu? Leswi swi tisa mianakanyo ya leswaku hambi ku ri esikwini ra ku fa ka yena, Yesu u swi kotile ku tshembisa vutomi eParadeyisini eka xigevenga lexiya. Hi tlhelo rin’wana, The New English Bible yi hikahata marito ya Yesu hi ndlela leyi: “Ndzi ri eka wena: namuntlha u ta va na mina eParadeyisini.” Ku hundzuluxela ko tala ku pfumelelana ni The New English Bible, ku hundzisela mianakanyo ya leswaku Yesu ni xigevenga lexi faka a va ya eParadeyisini hi rona siku rero. Ha yini ku ri na ku hambana? Naswona ku hikahata loku nga kunene hi kwihi?
Entiyisweni, a ku nga ri na xihikahato eka matsalwa yo sungula ya Bibele ya Xigriki. Xisweswo, loko ku hikahata ku sungurile, vakopi va Bibele ni vahundzuluxeri a a va fanele ku tinghenisela swona hi ku ya hi ku twisisa ka vona ka ntiyiso wa Bibele. Kutani ke, xana ku hundzuluxela ka ndhavuko ku lulamile? Xana Yesu na xidyohi va ye eParadeyisini hi siku leri va feke ha rona?
Doo, hi ku ya hi Bibele, va ye endhawini leyi hi Xigriki yi vitaniwaka Haʹdes naswona hi Xiheveru Sheʹol, lawa ha mambirhi ma kombetelaka eka sirha ra vanhu leri tolovelekeke. (Luka 18:31-33; 24:46; Mintirho 2:31) Malunghana ni lava va nga endhawini yoleyo, Bibele yi ri: “Kambe v̌afi a v̌a tiv̌i ntšhumu, . . . hikuv̌a šiv̌andleni ša v̌afi [Xigriki, Haʹdes] laha u yaka kona, a ka ha ri na ntiro, hambi makungu, ni ku tiva, hambi v̌utlhari.” Laha a ku nge vi eParadeyisini!—Eklesiasta 9:5, 10.
Yesu a nga pfuxiwanga eHades kukondza ku va siku ra vunharhu. Kutani, hi kwalomu ka mavhiki ya tsevu u humelele ko hlayanyana eka valandzeri va yena etikweni hinkwaro ra Palestina. Eka xin’wana xa swiendlakalo sweswo, Yesu u byele Mariya: “A ndzi si tlhandlukela eka Tatana.” (Yohane 20:17) Kutani ke, hambi hi nkarhi wolowo a a nga si fika endhawini leyi nga vitaniwaka paradeyisi.—Nhlavutelo 2:7.
Eka lembe xidzana ra vunharhu C.E.—loko ku hlanganisiwa ka dyondzo ya Vukriste ni filosofi ya Xigriki ku ri karhi ku humelela hakatsongo-tsongo—Origen u tshahe Yesu a ri karhi a ku: “Namuntlha u ta va na mina eParadeyisini ya Xikwembu.” Eka lembe xidzana ra vumune C.E., vatsari va le kerekeni va lwisane ni ku vekiwa ka xihikahato endzhaku ka “namuntlha.” Leswi swi komba leswaku ndlela ya ndhavuko ya ku hlaya marito ya Yesu yi na matimu yo leha. Kambe yi komba ni leswaku hambi ku ri eka lembe xidzana ra vumune C.E., van’wana a va hlaya marito ya Yesu hi ndlela leyi ma hundzuluxeriweke ha yona eka New World Translation.
Ni namuntlha, hambi leswi vahundzuluxeri vo tala va hikahataka Luka 23:43 hi ku ya hi ndhavuko wa kereke, van’wana va yi hikahata tanihi New World Translation. Hi xikombiso, eka ku hundzuluxela ka Xijarimani hi Profesa Wilhelm Michaelis, marito ya Yesu ma hlayekisa xileswi: “Hakunene, ndzi ku nyika xitiyisekiso lexi hambi ku ri namuntlha: U ta va kun’we na mina (siku rin’wana) eParadeyisini ya Xikwembu.”
Kutani ke, xana marito ya Yesu a ma vula yini eka mudyohi? A nga ha va a twe timhaka ta leswaku Yesu i Hosi leyi tshembisiweke. Handle ko kanakana a a yi tiva nhloko-mhaka leyi nge “Loyi i Hosi ya Vayuda” leyi Pilato a leriseke leswaku yi tsariwa ivi yi hayekiwa ehenhla ka nhloko ya Yesu. (Luka 23:35-38) Hambi leswi varhangeri va vukhongeri hi ku tiomisa tinhloko va landzuleke Yesu, mudyohi loyi la tisolaka u kombise ripfumelo ra yena, a ku: “Yesu, ndzi anakanye loko u nghena emfun’weni wa wena.” A a nga anakanyi ku fuma na Yesu, kambe a a lava ku pfuneka eku fumeni ka Yesu. Hikwalaho, hambi hi siku rero ro nonon’hwa swinene, Yesu u tshembise mudyohi yoloye leswaku u ta va na yena eParadeyisini.
Eka paradeyisi yihi? EBibeleni, Paradeyisi yo sungula a yi ri ntanga wa Edeni lowu fanaka na phaka leyi vatswari va hina vo sungula va yi lahleke. Bibele yi tshembisa leswaku Paradeyisi yoleyo ya le misaveni yi ta vuyeteriwa ehansi ka Mfumo wa Xikwembu, laha Yesu a nga Hosi. (Psalma 37:9-11; Mikea 4:3, 4) Hikwalaho, Yesu u ta va ni mudyohi luya ni vafi van’wana lava nga hlayekiki loko a va pfuxa esirheni ku ya evuton’wini emisaveni ya paradeyisi ni ku kuma nkarhi wa ku dyondza ku endla ku rhandza ka Xikwembu ni ku hanya hi laha ku nga heriki.—Yohane 5:28, 29; Nhlavutelo 20:11-13; 21:3, 4.