Ku Tshovela Vagandzeri

MUAPOSTOLA Yohane u nyikiwe xivono xa swiendlakalo leswi tsekatsekisaka misava, leswi a swi ta humelela ‘esikwini ra Hosi.’ U vone Yesu Kriste, Hosi ya le tilweni, yi ya lwa nyimpi ya ku lulama, leyi fanekiseriweke hi hanci yo basa—“kukota nhenha leyi yaka eku hluleni.” U sungula hi ku hlongola Sathana, nala wa Xikwembu, ematilweni a n’wi lahlela la misaveni. Sathana u tlherisela hi ku hlasela vanhu hi mafu, ndlala ni mavabyi lama nga si tshamaka ma va kona, leswi fanekiseriwaka hi vagadi vo fanekisela ni tihanci ta vona—hi mivala yo tshwuka, ya ntima ni yo kwalala. (Nhlavutelo 1:10; 6:1-8; 12:9-12) Makhombo lawa ma sungule ku hangalaka hi lembe ra 1914 naswona ma ye ma andza ku sukela hi nkarhi wolowo. Ku nga ri khale, ma ta chaputiwa hi leswi Yesu a swi hlamuselaka tanihi ‘nhlomulo lowukulu lowu nga si tshamaka wu va kona ku sukela misava yi va kona ku ta fikela sweswi, ni lowu nga taka wu nga ha vi kona.’—Matewu 24:3-8, 21.

Xana vagandzeri va Yehova va ta hanyisa ku yini enkarhini wolowo? Nhlavutelo ndzima 7, tindzimana 1 ku ya eka 10, yi vulavula hi vuthu ra tintsumi “ti sivela” timheho ta ndzoviso ku kondza vagandzeri lava va hlengeletiwa. Ku sukela hi 1914, lavo hetelela va Israyele wa moya emisaveni, va 144 000, va hlengeletiwa. Kutani ke, “languta, kutani ndzi vona ntshungu lowukulu wa vanhu; a ku nga ri na un’we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Ntshungu lowu lowukulu ana se wu hlayiwa hi timiliyoni. Wa amukeleka emahlweni ka xiluvelo xa Xikwembu hi mhaka ya leswi wu kombisaka ripfumelo engatini leyi kutsulaka ya Yesu, loyi a dlayiweke tanihi xinyimpfana lexi nga hava nandzu. “A va huwelela hi rito leri tlakukeke va ku: ‘Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!’” Vagandzeri lava lava gingiritekaka va hambeta va ku “Tana!” eka van’wana, lava na vona va hlengeleteriwaka ku pona ‘nhlomulo lowukulu.’—Nhlavutelo 7:14-17; 22:17.

“Emisaveni Hinkwayo”

Malunghana ni vagandzeri lava, lava tinyiketeleke, ku nga vuriwa leswaku: “Ku dyondzisa ka vona ku twakele emisaveni hinkwayo, ni marito ya vona ma fikile emakun’wini ya misava.” (Varhoma 10:18) Ku tirha ka vona hi matimba ku katekisiwe hi mihandzu leyi xiyekaka. Hi xikombiso:

Mexico sweswi ri vika vagandzeri va Yehova lava chivirikaka va 335 965, ku andza ka kwalomu ka dzana ra magidi hi malembe manharhu ntsena! Ha yini ku ri ni ku andza konghasi? Mhaka leyi landzelaka yi nga pfuna ku hlamusela leswi. Jaha leri vuriwaka Aurelio a ri ri mulanguteri wa kamara ra swilo swo kwetsima ekerekeni ya Khatoliki. Nkarhi wun’wana ni wun’wana loko Timbhoni ta Yehova ti nghena eximutanini lexi, a a ba tinsimbi ta kereke leswaku a kucetela vanhu leswaku va nga ti yingisi. Hi ku famba ka nkarhi u xave Jerusalem Bible ya Khatoliki ivi a sungula ku yi hlaya, kambe a a nga yi twisisi. Kutani siku rin’wana u vone munghana wakwe a ri ni kopi ya New World Translation ekhwapeni rakwe. Hi loko Aurelio a sola munghana wakwe, a n’wi byela leswaku Bibele yakwe yi hoxile, ivi a famba na yena ekaya rakwe ku ya n’wi komba Bibele “yinene.” Munghana wakwe u te: “Hlaya Eksoda 20,” kutani a suka a famba.

Mulanguteri wa swilo swo kwetsima u sungule eka ndzima 1, a hlaya Eksoda ku kondza a ya fika eka ndzima 20, ndzimana 4 na 5. U hlamarisiwe swinene hi leswi Bibele yakwe ya Khatoliki yi swi vulaka hi swifaniso. Endzhaku ka Xilalelo xa Khatoliki hi Sonto leyi tlhandlamaka, u ye eka muprista ni matsalwa lama vulavulaka hi swifaniso. Eku sunguleni muprista u vule leswaku swifaniso, yena, wo swi xixima ntsena; kambe a nga swi gandzeli. Hi ku vona leswaku Aurelio a nga aneriseki hi nhlamulo leyi, muprista u n’wi hehlile a ku swi vula leswaku u sungule ku dyondza ni Timbhoni ta Yehova. Aurelio u kanetile kambe a engetela a ku, “Sweswi, ndzi ta dyondza na tona!”

Loko Timbhoni ti tlhela ti ta eximutanini lexi, Aurelio u vulavule na tona ivi a sungula ku dyondza Bibele na tona. U tshikile ku tirha ekerekeni naswona endzhaku ka tin’hweti tinharhu u swi kotile ku fanelekela ku hlanganyela evutirhelini bya le rivaleni swin’we ni Timbhoni ta Yehova. Muti wo sungula lowu a wu endzeleke hi lowuya wa muprista, loyi a a hlamarile ku vona khale ka mulanguteri wa swilo swo kwetsima ekerekeni, a ri un’wana wa lava chumayelaka hi Mfumo. Muprista u n’wi xungete hi leswaku u ta n’wi hlongola ekerekeni, kambe Aurelio u n’wi byele leswaku sweswo a swi nga ha ta pfuna nchumu hikuva ana se u yi tshikile kereke. Ku tiya ka yena ku khutaze vanhu vo tala va le ximutanini, lava ana se a va dyondza ni Timbhoni ta Yehova. Aurelio ni van’wana va 21 vo huma eximutanini va khuvuriwile eka ntsombano wa muganga lowu landzeleke. Ku andza ku kulu swinene endhawini leyi lerova a ku ri na nkulu un’we ntsena wo pfuxeta swivutiso swa lava yaka eku khuvuriweni ni ntlawa lowu.

‘Marito Ya Vona Ma Hangalakile’

Ku chumayela hi Mfumo a ku balekeleki. Mukhatoliki wa le Italy a a tala ku nyenyetsiwa swinene hi Timbhoni ta Yehova loko ti n’wi endzela. Kutani loko khampani ya yena yi n’wi rhumele eSingapore, u vone onge a a nga ha ta karhatiwa hi tona. Kambe lexi n’wi hlamariseke, Timbhoni a a ti ri kona ni kwalaho. Hi loko a xava timbyana timbirhi leti karihaka swinene, leswaku ti ta hlasela Timbhoni leti nga ta tlhela ti ta. Loko Timbhoni timbirhi ti ta ekaya ra yena, hi loko timbyana teto timbirhi ti tlula. Hi ku chava, vavasati va hlanula swirhendze, loko va fika emahambanweni ya ndlela un’wana ni un’wana a teka tlhelo rakwe. Loko mbyana yin’wana yi ri ekusuhi ni Mbhoni yin’wana, hi ku pfumala vuyo, yi humese tibroxara timbirhi enkwameni wa yona ivi yi ti hlohlela enon’wini wa mbyana, lowu a wu pfulekile. Hi loko yi tshika ku n’wi hlongorisa, yi tlhelela ekaya.

Hi vhiki leri landzeleke, Timbhoni leti timbirhi a ti endla riendzo ro vuyela eka yindlu leyi nga eka tlhelo rin’wana ra xitarata. N’wini wa timbyana a a ri entangeni wakwe, kutani, lexi hlamarisaka, u xewete vavasati ivi a va rhamba leswaku va nghena ekaya ra yena. U va byele leswaku a nga si tshama a vulavula ni Timbhoni ta Yehova kumbe ku hlaya tibuku ta vona. Kambe a hlamarile hi ku kuma tibroxara enon’wini wa yin’wana ya timbyana takwe. Hi madyambu ya kona u hlaye tibroxara ta kona naswona ti n’wi tsakisile swinene. Hambi leswi a a ri Mukhatoliki vutomi bya yena hinkwabyo, u phofule ku tsakela ka yena ku dyondza Bibele ni Timbhoni ta Yehova.

Tanihi leswi wanuna loyi a a ta tlhela a tlheriseriwa eItaly, ku endliwe malunghiselelo ya leswaku Timbhoni ta Yehova ti dyondza na yena kwalaho. Loko yena ni nsati wakwe va sungule ku ya eminhlanganweni, muprista wa kwalaho hi ku hlundzuka u va hlasele hi minxungeto. Loko munhu un’wana a hise ntanga wa vona, hi loko mpatswa lowu wu tshika ku ya ekerekeni. Wanuna loyi sweswi u ri: “Ana se a ndzi nyikela vumbhoni eka maxaka ya mina yo tala hi mhaka ya leswi ndzi lavaka ku va tivisa leswaku Yehova hi yena ntsena a nga Xikwembu xa ntiyiso.”

“Ma Fikile eMakun’wini Ya Misava”

Ntokoto wun’wana wo huma emakun’wini ya misava wu kombisa ndlela leyi rungula ra Mfumo ri tlangeriwaka ha yona ni ndlela leyi ri pfunaka ha yona ku cinca mahanyelo. Loko yi dyondza tidyondzo ta lava nga ekusuhi ni ku veleka, Mbhoni ya le Australia yi hlangane ni wansati loyi a a ri ni mikhuva yo tala leyo biha, loyi a aleke ku tshika ku dzaha hambi loko a tikile. Mbhoni a a yi karhateka swinene hi langutelo ra yena. Hi xiwelo va kume vana va vona hi nkarhi wun’we naswona va ri eka wadi yin’we, kutani a va ri ni nkarhi wo bula. Swi vonake onge wansati loyi u ve ni swiphiqo swo tala loko a ha ri ntsongo, naswona sweswi vukati bya yena a byi ri ekusuhi ni ku fa. Kutani, loko yi humile exibedlhele, Mbhoni yi endzele wansati loyi ivi yi sungula dyondzo ya Bibele na yena, yi tirhisa buku leyi nge Making Your Family Life Happy.

Wanuna wa nsati loyi a a khongela Xikwembu leswaku a kuma vukhongeri bya ntiyiso, a engetela marito lama nge: “Ntsena ku nga vi Timbhoni ta Yehova!” Hambi swi ri tano, loko a kume leswaku nsati wakwe u dyondza ni Timbhoni, u sungule ku vutisa swivutiso naswona u rhambiwile leswaku a va kona edyondzweni. U ve kona, naswona ku nga ri khale u sungule ku va kona eminhlanganweni ya bandlha. Sweswi, nsati ni nuna va khuvuriwile, swi le rivaleni leswaku ni xiyimo xa vona xa vukati xi antswile swinene.

Tidyondzo ta Bibele ta le kaya, leti sekeriweke eka tibuku to tano, ti endle leswaku ku hlengeletiwa vagandzeri vo tala lavantshwa. Ematikweni laha Timbhoni ta Yehova ti bohekeke ku langutana ni mindzhundzunuko, nyimpi ya xin’wana-manana kumbe minsivelo ya hulumendhe, ntirho wa dyondzo ya le kaya ya Bibele wu andzile. Ku ve ni nyimpi ya xin’wana-manana eAngola hi malembe yo tala, naswona Timbhoni ti tokote nxaniso ni ku nonon’hwa lokukulu. Eku sunguleni ka n’wexemu, swiviko swi komba leswaku hi avhareji; muhuweleri un’wana ni un’wana a a fambisa tidyondzo ta Bibele ta le kaya tinharhu, kambe vahuweleri a va ri ni tibuku leti nga nyawuriki ta Bibele. Valanguteri va swifundza va endzele ntlawa wutsongo siku na siku, va lunghiselela ntirho wa nsimu ni nhlikanhi ni minhlangano madyambu man’wana ni man’wana. Vona ntsako lowu veke kona loko madzolonga ma hela kutani tithani ta 42 ta tibuku ta nkoka ta Bibele ti fika ti huma eAfrika Dzonga! Hakunene, rirhandzu ra vamakwerhu lava ri ta ya “mahlweni ri kula masiku hinkwawo, ri va ni vutivi ni ku twisisa loku hetisekeke,” tanihi leswi sweswi va swi kotaka ku “hlawula leswi nga swinene ku tlula swin’wana.” (Vafilipiya 1:9, 10) Vona xikhutazo xonghasi eka lava nga ni swipfuno swo tala swo dyondza Bibele leswaku va tirhisa lunghiselelo leri, leri Yehova hi ku hanana a ri endleke, hi vutlhari!—1 Timotiya 4:15, 16.

Ntsako wa vagandzeri lava vo tshembeka wu hi tsundzuxa marito ya Yesu eDyondzweni ya le Ntshaveni: “Ku katekile swisiwana emoyeni, hikuva Mfumo wa matilo i wa swona. . . . Ku katekile lava xanisiwaka hikwalaho ka leswo lulama, hikuva Mfumo wa matilo i wa vona. . . . Tsakani, mi tsakisisa, hikuva hakelo ya n’wina i yikulu ematilweni.” (Matewu 5:3-12) Mawaku ntshovelo lowu ana se wu hlengeletiwaka le Angola!

Eswiyengeni swin’wana swa misava, na kona minsivelo entirhweni wa Timbhoni ta Yehova ya karhi ya susiwa. Esikwini rakwe Yesu u te: “Ntshovelo i wukulu, kambe vatirhi a va talanga.” (Matewu 9:37) Vona ndlela leyi leswi swi nga ntiyiso ha yona namuntlha! Xilaveko xa vatirhi lava engetelekeke xi tshama xi ri kona. Ha tsaka leswi vugandzeri bya hina byi katsaka ku hlengeleta ntshovelo. A ku na ntsako lowu nga kumiwaka emisaveni namuntlha ku tlula ntirho wa hina lowu nga ni mihandzu wa ku tinyiketela eka Yehova Xikwembu.

Kambe, i yini lexi susumetelaka vagandzeri va Yehova leswaku va va ni ntsako ni migingiriko yonghasi? Hi ta vona.