Swivutiso Swa Vahlayi

Xana kahle-kahle Faro u n’wi tekile Sara, nsati wa Abrahama hi laha swi humelelaka ha kona eka mahlamuselelo ya Genesa 12:19 eka ku hundzuluxela kun’wana ka Bibele?

A swi tano, Faro u siveriwile ku teka Sara (Sarai) tanihi nsati wa yena. Hikwalaho, ku xiximiwa ni xichavo xa Sara a swi tsan’wiwanga.

Hi pfuniwa ku vona leswi hi ku kambisisa xiyimo hi mongo wa xona. Ndlala yi susumetele Abrahama (Abram) ku ya lava vutshamo aEgipta swa xinkarhana. U chave leswaku vutomi bya yena byi ta va ekhombyeni, hikwalaho ka nsati wa yena wo saseka, Sara. Abrahama a a nga si va na n’wana na Sara, kutani loko o fa aEgipta, nxaxamelo wa Mbewu a wu ta tsemeka, Mbewu leyi mindyangu hinkwayo ya misava a yi ta katekisiwa ha yona. (Genesa 12:1-3) Kutani Abrahama u byele Sara ku tivula makwavo wa yena, hikuva entiyisweni a a ri makwavo wa yena hi tatana.—Genesa 12:10-13; 20:12.

Ku chava ka yena a ku ri ni xisekelo. Mudyondzi August Knobel u hlamuserile: “Abrahama u kombele Sara ku tivula makwavo wa yena aEgipta leswaku a nga dlayiwi. Loko a a voniwe a ri munhu la tekiweke, Muegipta a a ta n’wi kuma ntsena hi ku dlaya nuna ni n’wini wa yena; loko a langutiwa tanihi makwavo, a swi ta koteka ku n’wi kuma eka makwavo wa yena hi ku rhula.”

Hambi swi ri tano, tihosana ta Egipta a ti twanananga na Abrahama emhakeni ya ku va Faro a teka Sara. Va lo yisa Sara wo saseka endlwini ya Faro, naswona mufumi wa Egipta u nyikele tinyiko, eka loyi ku ehleketiwaka leswaku i makwavo wa yena, Abrahama. Kambe endzhaku ka leswi, Yehova u be yindlu ya Faro hi mintungu. Loko xiyimo xa ntiyiso xi paluxekile eka Faro hi ndlela yo karhi leyi nga vuriwangiki, u byele Abrahama a ku: “Ha yini u te, ‘I makwerhu,’ lerova ndzi lava ku n’wi teka tanihi nsati wa mina? Kutani sweswi hi loyi nsati wa wena. N’wi teki u famba!”—Genesa 12:14-19, NW.

The New English Bible ni ku hundzuluxela kun’wana ka Bibele ku hlamusela xiphemu lexi xi nga laha henhla lexi tsariweke hi xiitaliki xa ndzimana leyi xi ku “ndzi ko ndzi n’wi teka tanihi nsati wa mina” kumbe marito lama fanaka. Hambi leswi ku nga ku hundzuluxela loku nga hoxangiki, marito yo tano ma nga ha nyika nhlamuselo ya leswaku kahle-kahle Faro u teke Sara, leswaku vukati a byi ri mhaka leyi tiyeke. Swi nga ha xiyiwa leswaku eka Genesa 12:19 riendli ra Xiheveru leri hundzuluxeriweke va ku “ku teka” ri le ka xiyimo xa ku nga hetiseki, lexi kombisaka xiendlo lexi nga hetisiwangiki. New World Translation yi hundzuluxela riendli leri ra Xiheveru ri twanana ni mongo na hi ndlela leyi xi kombisaka erivaleni xiyimo xa riendli—“lerova ndzi lava ku n’wi teka tanihi nsati wa mina.”a Hambi leswi Faro ‘a a lava ku teka’ Sara tanihi nsati wa yena, a a nga si endla nchumu kumbe nkhuvo wihi na wihi lowu a wu katseka.

Hambi leswi Abrahama hakanyingi a soriweke hi xiendlo xa yena emhakeni leyi, kambe u endle hi ku khathalela Mbewu leyi tshembisiweke ni vanhu hinkwavo.—Genesa 3:15; 22:17, 18; Vagalatiya 3:16.

Eka xiendlo lexi fanaka lexi a xi ri ni khombo, Isaka u endle leswaku nsati wa yena, Rebeka, a papalata ku paluxa xiyimo xa yena xo va la tekiweke. Emhakeni yoleyo, n’wana wa vona Yakobo, loyi ha yena a ku ta huma nxaxamelo wa Mbewu, ana se a a velekiwile naswona a a ri jaha. (Genesa 25:20-27; 26:1-11) Hambi swi ri tano, xikongomelo lexi a xi ri kona eka endlelo leri lerinene xi nga ha va xi ri lexi faneke kahle ni xa Abrahama. Hi nkarhi wa ndlala Isaka ni ndyangu wa yena a va tshama etikweni ra hosi ya Mufilista leyi vuriwaka Abimeleke. Loko a lo xiya leswaku Rebeka u tekiwe hi Isaka, Abimeleke kumbexana a a ta lava ndlela yo dlaya ndyangu hinkwawo wa Isaka, leswi a swi ta va swi vule rifu eka Yakobo. Ni le ka mhaka leyi, Yehova u nghenelerile leswaku a sirhelela malandza ya yena ni nxaxamelo wa Mbewu.

[Nhlamuselo ya le hansi]