Xana U Ta Ri Amukela Rirhandzu Ra Yesu?
“Rirhandzu ra Kriste ra hi fambisa.”—2 VAKORINTO 5:14.
1. Rirhandzu ra Yesu ri nga hlamuseriwa njhani?
ENTIYISWENI, ri hlamarisa swonghasi rirhandzu ra Yesu! Loko hi xiya ndlela leyi a nga xaniseka ha yona hi laha ku nga hlamuselekiki loko a tinyikela tanihi nkutsulo, leswaku hi kuma vutomi lebyi nga heriki, hakunene timbilu ta hina ti susumeteleka ku n’wi tlangela! Yehova Xikwembu na Yesu hi yexe hi vona va nga rhanga va teka goza. Hi vona va sunguleke va hi rhandza, loko ha ha ri vadyohi. (Varhoma 5:6-8; 1 Yohane 4:9-11) Muapostola Pawulo u tsarile a ku, ku tiva ‘rirhandzu ra Kriste swi tlula vutivi.’ (Vaefesa 3:19) Hakunene, rirhandzu ra Yesu ri tlula vutivi bya nhloko lebyi tlakukeke. Ri tlula xilo xin’wana ni xin’wana lexi tshameke xi voniwa kumbe ku kumiwa hi vanhu.
2. I yini lexi nga taka xi nga siveli Yesu leswaku a hi rhandza?
2 Loko a tsalela Vakriste eRhoma, Pawulo u vutisile: “I mani loyi a nga ta hi hambanisa ni rirhandzu ra Kriste? Xana ma nga va maxangu, kumbe nhlomulo, kumbe ku xanisiwa, kumbe ndlala, kumbe vusweti, kumbe makhombo, kumbe fumo xana?” Ku hava ni xin’we xa sweswo lexi nga sivelaka Yesu leswaku a hi rhandza. Pawulo u ya emahlweni: “Ndzi kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu Hosi ya hina.”—Varhoma 8:35-39.
3. Hi xihi xilo lexi nga endlaka leswaku Yesu ni Tata wa yena va hi tshika?
3 Rirhandzu ra Yehova Xikwembu na Yesu i rikulu swinene eka wena. Ku ni xilo xin’we ntsena lexi nga va sivelaka leswaku va ku rhandza, naswona xexo i ku papalata ka wena rirhandzu ra vona hi ku ala ku endla leswi va swi lavaka. Muprofeta wa Xikwembu u tshame a hlamusela hosi ya Yuda a ku: “Yehova o na n’wina loko mi ri na yena; kungaku loko mi n’wi lav̌a, o ta pfumela ku kumiwa hi ṅwina; kambe loko mi ṅwi ṭhika, o ta ṭhika.” (2 Tikronika 15:2) I mani exikarhi ka hina loyi a nga lavaka ku tshika vanghana lavanene, va tintswalo vo tanihi Yehova Xikwembu na N’wana wa xona, Yesu Kriste?
Ku Amukela Rirhandzu Ra Yesu Kahle
4, 5. (a) Rirhandzu ra Yesu eka hina ri fanele ri byi khumbisa ku yini vuxaka bya hina ni vanhu-kulorhi? (b) I mani un’wana loyi hi susumetelekaka ku n’wi rhandza tanihi leswi Yesu a hi rhandzeke?
4 Xana wena hi wexe u khumbekisa ku yini hi rirhandzu ra Yesu leri nga hikiwangiki? Xana u fanele u va njhani? Yesu u kombise ndlela leyi xikombiso xa yena xa rirhandzu xi faneleke ku khumba vuxaka bya hina ni vanhu-kulorhi ha yona. Endzhaku ko hlantswa milenge ya vadyondzisiwa va yena hi ku titsongahata, Yesu u te: “Hikuva ndzi mi vekele ntila, leswaku na n’wina mi endlisa leswi ndzi nga endlisa swona eka n’wina.” U engeterile: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina.” (Yohane 13:15, 34) Vadyondzisiwa va yena va dyondzile naswona va susumeteleke ku ringeta ku endla hi laha a endleke ha kona. Muapostola Yohane u tsarile: “Hi nga tiva leswi rirhandzu ri nga swona loko hi tiva Kriste, loyi a nyiketeleke vutomi bya yena hikwalaho ka hina. Kutani na hina swa hi fanela ku nyiketa vutomi bya hina hikwalaho ka vamakwerhu.”—1 Yohane 3:16.
5 Hambi swi ri tano, a hi ta va hi lahlekeriwe hi xikongomelo xa vutomi ni vutirheli bya Yesu loko a hi susumetiwe hi xikombiso xa yena ntsena leswaku hi rhandza ni ku tirhela swilaveko swa vanhu-kulorhi. Xana rirhandzu ra Yesu eka hina a ri faneli ku hi vangela leswaku na hina hi n’wi rhandza naswona ngopfu-ngopfu ku rhandza Tata wa yena, loyi a n’wi dyondziseke hinkwaswo leswi a swi tivaka? Xana u ta ri amukela rirhandzu ra Kriste ivi u tirhela Tata wa yena hi laha a endleke ha kona?—Vaefesa 5:1, 2; 1 Petro 1:8, 9.
6. Muapostola Pawulo u khumbekise ku yini hi rirhandzu leri Yesu a a ri na rona eka yena?
6 Xiya mhaka ya Sawulo, loyi endzhakunyana a tiviweke tanihi Pawulo. Enkarhini wun’wana u xanise Yesu, “a a hisekela ku chavisa ni ku dlaya vadyondzisiwa.” (Mintirho 9:1-5; Matewu 25:37-40) Kambe loko Pawulo a fike laha a nga tiva Yesu, a tsakile swinene loko a kume ku rivaleriwa lerova a tiyimisela ku xaniseka hikwalaho ka Yesu ni ku tiyimisela ku n’wi fela. U tsarile: “Kutani ndzi vambiwile na yena, a nga ha ri mina la hanyaka . . . sweswi, loko ndzi hanya emirini, ndzi hanya hi ku pfumela, ku nga ku pfumela eka n’wana wa Xikwembu loyi a ndzi rhandzeke, a va a tinyiketa hikwalaho ka mina.”—Vagalatiya 2:20.
7. Rirhandzu ra Yesu ri fanele ri hi susumetela ku endla yini?
7 Rirhandzu leri Yesu a hi rhandzaka ha rona ri fanele ri va matimba lama susumetaka evuton’wini bya hina! Pawulo u tsalele Vakorinto a ku: “Rirhandzu ra Kriste ra hi fambisa,” ‘leswaku hi nga tihanyeli kambe hi hanyela loyi a hi feleke a tlhela a pfuxiwa.” (2 Vakorinto 5:14, 15) Hakunene, ku tlangela rirhandzu ra Yesu ro nyikela vutomi bya yena hikwalaho ka hina ku fanele ku hi susumetela ku endla swin’wana ni swin’wana leswi a hi kombelaka swona. Hi ku endla leswi ntsena hi nga kombisa leswaku hakunene ha n’wi rhandza. Yesu u te: “Loko mi ndzi rhandza, mi ta hlayisa milawu ya mina. Loyi a amukeleke milawu ya mina, kutani a yi hlayisa, hi yena loyi a ndzi rhandzaka.”—Yohane 14:15, 21; ringanisa 1 Yohane 2:3-5.
8. Rirhandzu ra Yesu ri byi khumbe njhani vutomi bya vadyohi vo tala?
8 Endzhaku ka loko va dyondzile milawu ya Yesu, vaoswi, timbhisa, vasodoma, vayivi, swidakwa ni lava dyelelaka va le Korinto wa khale va amukele rirhandzu ra Yesu hi ku tshika mikhuva yoleyo. Pawulo u tsale hi ta vona a ku: “Mi basisiwile . . . mi endliwile lava hlawulekeke ni lava lulameke, hi vito ra Hosi Yesu Kriste.” (1 Vakorinto 6:9-11) Hi laha ku fanaka, rirhandzu ra Yesu ri susumetele vo tala namuntlha leswaku va endla ku cinca lokukulu evuton’wini bya vona. N’wamatimu John Lord u tsarile: “Ku hlula ka ntiyiso ka Vukriste ku vonakile hi ku endla vavanuna lavanene eka lava va vulaka leswaku va amukela tidyondzo ta byona. Hi ni vumbhoni eka vutomi bya vona lebyi pfumalaka xisandzu, eka mahanyelo ya vona lamanene, eka vuaki bya vona lebyinene ni le ka tintswalo ta vona ta Vukriste.” I ku cinca lokukulu swinene loku tidyondzo ta Yesu ti ku endleke!
9. Ku yingisela Yesu swi katsa yini?
9 Entiyisweni, a ku na dyondzo leyi nga dyondziwaka hi munhu namuntlha leyi nga ya nkoka ku tlula ya vutomi ni vutirheli bya Yesu Kriste. Pawulo u khutazile: “Langutani swinene eka . . . Yesu, hakunene, n’wi xiyeni hi vukheta.” (Vaheveru 12:2, 3, NW) Enkarhini wa ku hundzuriwa ka Yesu, Xikwembu hi xoxe xi lerisile mayelana ni N’wana wa xona xi ku: “N’wi yingiseleni.” (Matewu 17:5) Hambi swi ri tano, swi fanele swi tiyisisiwa leswaku ku yingisa Yesu swi katsa swo tala ku tlula ku twa ntsena leswi a swi vulaka. Swi vula ku yingisa swileriso swa yena, ina, ku n’wi tekelela hi ku endla leswi a swi endleke hi ndlela leyi a swi endleke ha yona. Hi amukela rirhandzu ra Yesu hi ku n’wi amukela tanihi xikombiso xa hina, hi ku landzelela minkondzo ya yena swinene.
Leswi Yesu A Lavaka Leswaku Hi Swi Endla
10. Yesu u letele vamani naswona hikwalaho ka xikongomelo xihi?
10 Ntirho wa Yesu lowu humaka eka Xikwembu a ku ri ku chumayela hi Mfumo wa Tata wa yena, naswona u letele valandzeri va yena ku endla ntirho lowu fanaka. U byele vadyondzisiwa va yena vo sungula a ku: “A hi yeni kun’wana emitini leyi nge kusuhi, leswaku na kona ndzi ta twarisa Evhangeli, hikuva ndzi tele swona.” (Marka 1:38; Luka 4:43) Endzhaku ko letela vadyondzisiwa va yena va 12 hi vukheta, Yesu u va lerisile: “Kutani loko mi ri karhi mi famba, twarisani mhaka leyi nge: ‘Mfumo wa matilo wu le kusuhi.’” (Matewu 10:7) Endzhaku ka tin’hwetinyana, endzhaku ko letela van’wana va 70, u va rhumile hi xileriso lexi: “Mi ku ka vona: ‘Mfumo wa Xiikwembu wu mi tshinelele.’” (Luka 10:9) Entiyisweni, Yesu u lave leswaku valandzeri va yena va va vachumayeri ni vadyondzisi.
11. (a) Vadyondzisiwa va Yesu a va ta endla ntirho wo tlula lowu a wu endleke hi ndlela yihi? (b) Ku humelele yini hi vadyondzisiwa endzhaku ka loko Yesu a dlayiwile?
11 Yesu u ye emahlweni ni ku letela vadyondzisiwa va yena entirhweni lowu. Evusikwini byo hetelela emahlweni ka rifu rakwe, u va khutaze hi marito lawa: “La pfumelaka ka mina, na yena ú ta endla mintirho leyi ndzi yi endlaka; ú ta endla ni leyi tlulaka yoleyi.” (Yohane 14:12) Mintirho ya valandzeri va yena a yi ta va leyikulu ku tlula ya yena hikuva evutirhelini bya vona a va ta fikelela vanhu vo tala endhawini leyikulu naswona hi nkarhi wo leha. Kambe, endzhaku ka loko Yesu a dlayiwile, vadyondzisiwa va yena a va tsanile hikwalaho ko chava. Va tumberile naswona a va yanga emahlweni ni ntirho lowu a va leteleke leswaku va wu endla. Van’wana va tlhelele entirhweni wo phasa tinhlampfi. Hambi swi ri tano, hi ndlela leyi nga rivalekiki u byele lava nkombo leswi a a lava leswaku va swi endla, kun’we ni valandzeri va yena hinkwavo.
12. (a) I hlori rihi leri Yesu a ri endleke eLwandle ra Galeliya? (b) Kahle-kahle, Yesu a a vula yini loko a vutise Petro loko a a n’wi rhandza “ku tlula leswi hinkwaswo”?
12 Yesu u ambale miri wa nyama kutani a humelela eLwandle ra Galeliya. Vaapostola va nkombo a va ri ebyatsweni kambe va tsandzeke ku phasa nhlampfi hambi ku ri yin’we vusiku hinkwabyo. Yesu a huwelela a ri ribuweni a ku: “Hoxelani rikoka hi tlhelo ra xinene ra byatso, mi ta phasa.” Hi hlori rikoka ri tala hi tinhlampfi lerova ri lava ku handzuka, lava a va ri ebyatsweni va xiya leswaku i Yesu loyi a a ri eribuweni, kutani va hatlisela laha a a ri kona. Endzhaku ko va fihluta, Yesu, kumbexana a langute eka tinhlampfi to tala leti va ti phaseke, a ku ka Petro: “Simoni n’wana Yohane, xana wa ndzi rhandza ku tlula leswi hinkwaswo ke?” (Yohane 21:1-15) Handle ko kanakana Yesu a a vula leswaku, Xana u khomelele ngopfu eka ntirho wo phasa tinhlampfi ematshan’wini ya ntirho wo chumayela lowu ndzi ku lunghiseleleke wona leswaku u wu endla?
13. Yesu u yi tiyisekise njhani ndlela leyi valandzeri va yena a va fanele ku amukela rirhandzu ra yena ha yona?
13 Petro u angurile: “Ina, Hosi, wa swi tiva leswaku ndza ku rhandza.” Yesu a ku ka yena: “Risa swinyimpfana swa mina.” Yesu a vutisa ra vumbirhi a ku: “Simoni, n’wana Yohane, xana wa ndzi rhandza xana?” Handle ko kanakana, Petro u angurile hi ripfumelo leri tiyeke a ku: “Ina, Hosi, wa swi tiva leswaku ndza ku rhandza.” Nakambe Yesu a lerisa a ku: “Hlayisa tinyimpfu ta mina.” Yesu a vutisa ra vunharhu a ku: “Simoni, n’wana Yohane, xana wa ndzi rhandza xana?” Enkarhini lowu Petro a a khomiwe hi gome. Masiku ma nga ri mangani lama hundzeke, a a landzurile ka nharhu leswaku u tiva Yesu, kutani a nga ha va a ti vutisile leswaku kumbexana Yesu a a kanakana vutshembeki bya yena. Hikokwalaho, ra vunharhu, Petro u angurile, kumbe xana hi marito yo titsongahata: “Hosi, u tiva hikwaswo, wa swi tiva leswaku ndza ku rhandza.” Yesu hi ku olova u hlamurile: “Risa tinyimpfu ta mina.” (Yohane 21:15-17) Xana swa kanakanisa leswaku i yini leswi Yesu a a lava leswaku Petro ni vanghana va yena va swi endla? Vona ndlela leyi a va tiyiseke ha yona—ni le ka hinkwavo lava nga ta va vadyondzisiwa vakwe namuntlha—leswaku loko va n’wi rhandza, va ta hlanganyela entirhweni wo endla vadyondzisiwa!
14. Eka swiendlakalo swin’wana, Yesu u yi kombisise ku yini ndlela leyi vadyondzisiwa va yena a va fanele va amukela rirhandzu ra yena ha yona?
14 Masiku ma nga ri mangani endzhaku ka ku burisana koloko eribuweni ra lwandle, Yesu u humelerile entshaveni eGaleliya kutani a dyondzisa ntsombano wa valandzeri lava tsakeke va kwalomu ka 500: “Hikokwalaho, yanani eka vamatiko hinkwavo, mi va endla vadyondzisiwa va mina . . . mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20; 1 Vakorinto 15:6) Anakanya ha swona! Vavanuna, vavasati ni vana hinkwavo va amukele ntirho lowu lowu fanaka. Hambi swi ri tano, a nga si tlhandlukela etilweni, Yesu u byele vadyondzisiwa va yena a ku: “Kutani mi ta va timbhoni ta mina . . . ku ya fika emakun’wini ya misava.” (Mintirho 1:8) Endzhaku ka xitsundzuxo lexi, a swi hlamarisi leswi endzhaku ka malembenyana, Petro a nga te: “[Yesu] ú hi lerisile ku twarisa Evhangeli etikweni ni ku tiyisa vumbhoni.”—Mintirho 10:42.
15. I yini lexi nga kanakanisiki?
15 A yi kanakanisi ndlela leyi hi fanelaka ku amukela rirhandzu ra Yesu ha yona. Hi laha a byeleke vaapostola va yena ha kona: “Loko mi hlayisa milawu ya mina, mi ta tshama erirhandzwini ra mina . . . Mi vanakulori loko mi endla leswi ndzi mi lerisaka swona.” (Yohane 15:10-14) Xivutiso hi leswaku, Xana u ta kombisa ku tlangela rirhandzu ra Yesu hi ku yingisela xileriso xa yena xo hlanganyela eka ntirho wo endla vadyondzisiwa? I ntiyiso, leswi swi nge ku oloveli hikwalaho ka swivangelo swo hambana-hambana. Kambe a swi nga olovi ni le ka Yesu. Xiya ku cinca loku a ku laveka eka yena.
Landzela Xikombiso Xa Yesu
16. I xikombiso xihi lexinene lexi Yesu a xi nyikeleke?
16 N’wana wa Xikwembu la nga un’we u tiphine hi xikhundla xa le henhla xa ku dzuneka ka le tilweni eka tintsumi hinkwato. A a fuwile hakunene! Hambi swi ri tano, hi ku swi rhandza u titshikile, a velekiwa tanihi xirho xa ndyangu wa swisiwana, kutani a kula a rhendzeriwe hi vanhu lava vabyaka ni ku fa. U endle leswi hikwalaho ka hina, hi laha muapostola Pawulo a hlamuseleke ha kona: “Ma ti tiva tintswalo ta Hosi ya hina Yesu Kriste: A a fumile, hambiswiritano ú hundzukile xisiwana hikwalaho ka n’wina, leswaku mi endliwa swifumi hi vusiwana bya yena.” (2 Vakorinto 8:9; Vafilipiya 2:5-8) Mawaku xikombiso xonghasi! Mawaku xikombiso xonghasi xa rirhandzu! Ku hava ni un’we la nga tshama a tinyiketa kumbe a xanisekela van’wana. Naswona ku hava na un’we la nga endla swi koteka eka van’wana leswaku va tiphina hi rifuwo lerikulu, ina, vutomi lebyi nga heriki hi ku hetiseka!
17. I ndlela yihi leyi vekiweke emahlweni ka hina, naswona vuyelo bya ku yi landzela byi ta va byihi?
17 Hi nga landzela xikombiso xa Yesu kutani hi pfuna van’wana hi laha ku fanaka. Hi ku phindha-phindha, Yesu u khutaze vanhu leswaku va va valandzeri va yena. (Marka 2:14; Luka 9:59; 18:22) Entiyisweni, Petro u tsarile: “Mi vitaneriwe swona, hikuva Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landzela.” (1 Petro 2:21) Xana u amukela rirhandzu ra Kriste ku fikela eka xiyimo lexi u nga xanisekaka leswaku u tirhela Tata wa yena hi laha a endleke ha kona? Ndlela yoleyo yi nga va pfuna swinene van’wana! Hakunene, hi ku landzela xikombiso xa Yesu, hi ku tirhisa hi xitalo tidyondzo leti a ti kumeke eka Tata wa yena, “u ta tiponisa ni ku ponisa vayingisi va wena.”—1 Timotiya 4:16.
18. (a) Hi xihi xikombiso lexi Yesu a xi vekeke malunghana ni langutelo ra yena evanhwini? (b) Vanhu va byi xiye njhani vumunhu bya Yesu?
18 Leswaku hi pfuna vanhu swinene, hi fanele hi titwa hi ndlela leyi Yesu a titweke ha yona hi vona. Vuprofeta byi vule leswi malunghana na yena: “[U] ta ṭeṭelela šisiwana ni l’a nge khombyeni.” (Psalma 72:13) Valandzeri va yena a va swi xiya leswaku Yesu a ri ni “rirhandzu” eka lava a nga vulavula na vona ni leswaku entiyisweni a a lava ku va pfuna. (Marka 1:40-42; 10:21) Bibele yi ri: “Loko a vona mintshungu ya vanhu, a va twela-vusiwana, hikuva a va karhele, va tshamile ehansi, va fana ni tinyimpfu leti nga riki na murisi.” (Matewu 9:36) Hambi ku ri vadyohi hikwavo va ri xiyile rirhandzu ra yena naswona va tshinelele eka yena. Hi mpfumawulo wa rito ra yena, mahanyelo, mukhuva lowu a dyondzisaka ha wona, va titwe va ntshunxekile. Hikwalaho, hambi ku ri valuvisi lavo kala xichavo ni vaoswi va n’wi lavile.—Matewu 9:9-13; Luka 7:36-38; 19:1-10.
19. Pawulo u tekelele Yesu hi ndlela yihi, naswona byi ta va byihi vuyelo loko hi endla leswi fanaka?
19 Vadyondzisiwa va Yesu va lembe xidzana ro sungula va tekelele xikombiso xa yena xa rirhandzu. Pawulo u tsalele van’wana lava a nga va chumayela a ku: “Hi hanyisene na n’wina hi moya wa musa, kukotisa manana la hlayisaka swinene vana va yena . . . ma swi tiva leswaku hi hlayisile un’wana ni un’wana wa n’wina tanihi loko tatana a hlayisa vana va yena.” (1 Vatesalonika 2:7-11) Xana u na wona nkhathalelo wa xiviri eka lava va nga ensin’wini ya wena, lowu vatswari lava nga ni rirhandzu va nga na wona eka vana va vona lava rhandzekaka? Ku kombisa ku khathalela ko tano hi mpfumawulo wa rito ra wena, hi ku languteka ka wena ni swiendlo swa wena swi ta endla leswaku rungula ra Mfumo ri tsakisa eka lava fanaka ni tinyimpfu.
20, 21. Hi swihi swikombiso swa manguva lawa swa vanhu lava landzeleke xikombiso xa Yesu xa rirhandzu?
20 Siku rin’wana ro titimela le Spain, Timbhoni timbirhi ti hlangane ni mukhegula loyi a fambaka hi nxongotelo loyi yindlu ya yena a a yi titimela ngopfu hikuva tihunyi a ti nga ri kona. A a yimele n’wana wa yena a vuya entirhweni leswaku a ta tsema tihunyi tin’wana. Timbhoni ti tseme tihunyi teto, naswona ti tlhele ti n’wi siyela timagazini leswaku a ti hlaya. Loko n’wana a vuya, u tsakisiwe swinene hi rirhandzu ra Timbhoni ro khathalela mana wa yena lerova a hlaya tibuku teto, u sungule ku dyondza Bibele, a khuvuriwa naswona hi ku hatlisa u nghenele ntirho wa vuphayona.
21 Le Australia, wanuna un’wana ni nsati va hlamusele Timbhoni leti endzeke leswaku va hava mali yo pfuna ndyangu wa vona. Mpatswa wa Timbhoni wu fambile kutani wu vuya ni swakudya, kun’we ni swiwitsi swa vana. Vatswari va ririle, va vula leswaku a va hele matimba lerova a va ehlekete ni ku tidlaya. Ha vambirhi va sungule ku dyondza Bibele naswona sweswinyana wansati u khuvuriwile. Wansati un’wana le United States loyi a venga Timbhoni ta Yehova u vikile endzhaku ka loko a hlangane na yin’wana ya tona: “Kahle-kahle a ndza ha tsundzuki leswi hi vulavuleke ha swona, kambe lexi ndzi xi tsundzukaka i musa lowu a a ri na wona eka mina, naswona a a ri na malwandla ni ku titsongahata swinene. Ndzi titwe ndzi kokeriwa eka yena tanihi munhu. Ndzi rhandza xinghana xa yena ku fikela namuntlha.”
22. Endzhaku ko kambisisa vutomi bya Yesu, hi hetelela hi ku vula yini malunghana na yena?
22 Loko hi amukela rirhandzu ra Yesu hi ku endla ntirho lowu a wu endleke, hi ndlela leyi a wu endleke ha yona, mawaku mikateko leyi hlamarisaka swonghasi leyi hi nga yi kumaka! Vukulukumba bya Yesu byi le rivaleni naswona i byikulu. Hi susumeteleka ku phindha marito ya mufumi wa Rhoma Pontiyo Pilato: ‘Vonani, hi yoloye wanuna!’ Ina, ‘Wanuna,’ nghwazi leyi tshameke yi hanya hakunene.—Yohane 19:5.
U Nga Hlamula Njhani?
◻ Rirhandzu ra Yesu i rikulu hi ndlela yihi?
◻ Rirhandzu ra Yesu ri fanele ri hi endla leswaku hi rhandza mani naswona rirhandzu ra yena ri fanele ri hi susumetela ku endla yini?
◻ Hi wihi ntirho lowu Yesu a lavaka leswaku hi wu endla?
◻ Yesu a a fuwe hi ndlela yihi, naswona hikwalaho ka yini a ve xisiwana?
◻ Hi fanele hi n’wi tekelela njhani Yesu hi ndlela leyi a dyondziseke vanhu ha yona?
[Xifaniso lexi nga eka tluka 15]
Yesu u siye xikombiso xo kombisa rirhandzu
[Xifaniso lexi nga eka tluka 17]
Yesu u yi kombise hi matimba ndlela leyi vadyondzisiwa va yena a va fanele va n’wi rhandza ha yona