Mintirho Leyi Engeteriweke Hi Nkarhi Wa Vukona Bya Kreste
“Hi laha Hosi yi nga ta byela lava nge vokweni ra yona ra xinene yi ku: ‘Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.’”—MATEWU 25:34.
1. Pa·rou·siʹa ya Kreste yi fana kahle ni ‘masiku ya Nowa’ hi ndlela yihi?
VUKONA bya Kreste—i xiendlakalo lexi ku nga khale xi yimeriwile! Nkarhi lowu fanaka ni ‘masiku ya Nowa,’ lawa Yesu a vulavuleke ha wona mayelana ni “ku hela ka minkarhi,” wu fike hi lembe ra 1914. (Matewu 24:3, 37) Kambe xana vukona bya Kreste, kumbe pa·rou·siʹa, a byi ta vula yini eka masalela lama totiweke ya “nandza la tshembekaka, wo tlhariha”? (Matewu 24:45) Kavula, sweswo a swi ta vula leswaku a va fanele ku ya emahlweni va hiteka tanihi vabyarhi va ku vonakala! A ku ta humelela swilo swo hlamarisa! A ku ta sungula ntirho wo hlengeleta lowu nga si tshamaka wu va kona.
2. I ku basisa kwihi loku humeleleke hi ku hetiseka ka Malakiya 3:1-5?
2 Hambi swi ri tano, xo sungula Vakreste lava va totiweke a va fanele ku basisiwa. Hi laha Malakiya 3:1-5 yi vhumbheke ha kona, Yehovha Xikwembu ni ‘murhumiwa wa yena wa ntwanano,’ Yesu Kreste, u tile leswaku a ta kambela tempele ya moya hi ximun’wana xa 1918. Ku avanyisa a ku ta sungulahi “yindlu ya Xikwembu.” (1 Petro 4:17) Malakiya 3:3 yi vhumbhe leswi: “[Yehovha] o ta ṭhama, a ri kari a ṅwokisa, a basisa silver; o ta basisa v̌ana v̌a Levi, a v̌a tengisa e ku fana ni nsuku ni ku kotisa silver.” A ku ri nkarhi wa ku tengisa ni ku basisa.
3. Ha yini a swi fanela leswaku ku va ni ku basisiwa hi tlhelo ra moya?
3 Loko va ri karhi va hundza eka ku avanyisa loku, loku chaputeke hi 1918, masalela ya ntlawa wa nandza ma basisiwile eka thyaka ra misava ni ra vukhongeri. Ha yini Yehovha a va basisile? Hikuva tempele ya yena ya moya a yi khumbeka. Leri i lunghiselelo ra vugandzeri leri fanaka ni tempele ya Yehovha exisekelweni xa gandzelo ra ndzivalelo ra Yesu Kreste. Yehovha a lava leswaku tempele ya yena yi va exiyin’weni lexi baseke leswaku loko vagandzeri lavo tala lava nga ni mintshembo ya le misaveni va tisiwe eka yona, va ta kota ku kuma ndhawu leyi vuhosi byakwe bya vuako hinkwabyo byi xiximiwaka eka yona, laha vito ra yena ra vukwembu ri kwetsimisiwaka kona, ni laha milawu ya yena leyo lulama yi yingisiwaka kona. Xisweswo, a va ta tlangela Yehovha ivi va hlanganyela eku twariseni ka swikongomelo swa yena leswinene.
Malunghelo Lama Engetelekeke
4, 5. (a) Xana xivutiso xa Yesu Kreste xi tlhontlha un’wana ni un’wana wa lava va ntlawa wa nandza hi ndlela yihi namuntlha? (b) Xana swiga leswi nge “nandza lowo tshembeka, wa vutlharhi” na “malandza ya yona” swi fanele swi twisisiwa hi ndlela yihi? (c) Yesu u nyike nandza ntirho wihi?
4 Hi 1919 ntlawa wa nandza la basisiweke a wu kota ku langutela mintirho leyi nga ta hambeta yi andzisiwa. Le ndzhaku hi 1914, Yesu Kreste, N’wini wa vona, u kume Mfumo wa le tilweni. Loko a tlhelela eka lava nga va yindlu yakwe leswaku a ya kambela “malandza” ya yena hinkwawo, a ri ni xindzhuti xa vuhosi, lexi a a nga ri na xona loko a ha ri la misaveni. Xana u kume yini? Xana ntlawa wa nandza a wu ri karhi wu hiteka wu khathalela swilaveko swa N’wini? Hi laha ku tsariweke ha kona eka Matewu 24:45-47, Yesu u vutise xivutiso lexi tlhontlhaka un’wana ni un’wana wa vadyondzisiwa lava leswaku a kambela ku tinyiketela ka yena n’wini eka Mesiya wa Yehovha: “Xana nandza la tshembekaka, wo tlhariha, hi wihi xana? Hi loyi n’wini wa yena a n’wi vekeke ku hlayisa malandza laman’wana la mutini, a ma phamela swakudya hi nkarhi wa kona? Ku katekile nandza loyi a nga ta kumiwa a ri karhi a endlisa sweswo, siku n’wini wa yena a vuyaka. Ndzi tiyisile ndzi ri ka n’wina, ú ta vekiwa mulanguteri wa rifuwo hinkwaro ra n’wini wa yena.”
5 Swi le rivaleni, nhlamuselo ya Yesu ya nandza loyi wo tshembeka a yi vuli munhu wo karhi. Doo, kambe yi vula vandlha hinkwaro ra vatotiwa va Kreste lavo tshembeka, tanihi ntlawa. Malandza i valandzeri va Kreste lava totiweke ha un’we-un’we. Yesu a a swi tiva leswaku a a ta xava vatotiwa lava hi ngati ya yena, kutani u vulavule ha vona hi ndlela leyi faneleke tanihi nandza wakwe. Vakorinto wo Sungula 7:23 loko yi vulavula ha vona yi ri: “Mi xaviwile hi nxavo lowukulu; mi nga vi mahlonga ya vanhu.” Yesu u lerise ntlawa wakwe wa malandza leswaku wu endla ku vonakala ka vona ku voninga leswaku va ta kota ni ku endla vadyondzisiwa van’wana naswona va ya emahlweni va phamela malandza hi ku va nyika swakudya swa moya hi nkarhi wa kona.
6. Nandza u hakeriwe njhani endzhaku ka ku kambela ka Yesu?
6 Ku sukela ro sungula loko vukona bya Kreste byi sungula ku ta fika hi 1918, ntlawa wa nandza, ku nga khathariseki leswaku a wu nga tiviwi ngopfu, ku xanisiwa, ku katsa ni ku pfilunganyeka ko karhi, wu ye emahlweni wu lava ku phamela malandza swakudya hi nkarhi wa kona. Leswi hi leswi N’wini a swi kumeke loko ku kambela ka yena ku sungula. Hosi Yesu swi n’wi tsakisile, naswona hi 1919 u vule leswaku ku katekile ntlawa wa nandza loyi la tshembekeke la hlawuriweke. Xana hi yihi hakelo ya nandza leyi tsakisaka hikwalaho ka leswi a endleke leswi N’wini a n’wi rhumeke ku swi endla? U tlakusiwile! Ina, u nyikiwe vutihlamuleri lebyi engetelekeke leswaku a tlakusa swilaveko swa N’wini. Tanihi leswi enkarhini lowu N’wini a ri Hosi ya le tilweni, kutani ke, ha yini rifuwo ra yena ra le misaveni ri ve ra risima ku tlurisa.
7, 8. (a) Xana “rifuwo hinkwaro” ra N’wini i yini? (b) Xana ku laveka leswaku nandza a endla yini loko a langutela rifuwo leri?
7 Kutani, i yini ‘rifuwo ra yena hinkwaro’? Leswi i swilo hinkwaswo swa moya leswi nga emisaveni leswi nga hundzuka nhundzu ya Kreste mayelana ni vulawuri bya yena tanihi Hosi ya le tilweni. Entiyisweni leswi swi katsa ntirho wa ku endla vadyondzisiwa va Kreste, ni lunghelo lerikulu ra ku tirha tanihi vayimeri va Mfumo wa Xikwembu lowu simekiweke ematikweni hinkwayo ya misava.
8 Ku tlakusiwa ko tano leswaku a langutela rifuwo hinkwaro ra N’wini a swi lava leswaku ntlawa wa nandza wu nyikela nkarhi ni nyingiso lowu engetelekeke leswaku wu endla ntirho wa Mfumo naswona, phela wu aka ni miako leyikulu ya ntirho wolowo. Sweswi wu ni ndhawu leyikulu swinene ya ku tirha—misava hinkwayo leyi akiweke.
Ku Hlengeleta Tinyimpfu
9. Vuyelo bya ku andzisiwa ka mintirho ya nandza byi ve byihi?
9 Kutani, hi ku titsongahata ntlawa wa nandza lowo tshembeka, wa vutlharhi, wa Kreste wu kurise mintirho ya wona. Vuyelo byi ve byihi? Lavo hetelela lava totiweke va lava 144 000 va hlengeletiwile. Kutani xivono xa Yohane hi laha xi rhekhodiweke ha kona eka Nhlavutelo 7:9-17 xi ve nchumu wa xiviri lowu nyanyulaka lowu tsakisaka mbilu. Ngopfu-ngopfu ku sukela hi 1935, ntlawa wa nandza wu tiphine hi ku vona ku hetiseka ka xivono lexi loku yaka emahlweni ku paluxeka. “Ntshungu lowukulu” lowu humaka emisaveni hinkwayo wa timiliyoni sweswi wu khitikanela eswivandleni swa tempele ya Yehovha ya moya tanihi vagandzeri vakwe. Ntsumi ya Yehovha yi byele Yohane leswaku a ku nga ri na munhu la kotaka ku hlaya ntshungu lowu lowukulu. Sweswo swi vula leswaku nhlayo ya vanhu lava ntlawa wa nandza wu faneleke wu va tisa etempeleni ya Yehovha ya moya a yi hikiwanga. Ntsendze loko ndlela ya ha pfulekile, ntirho wa ku va hlengeleta wu ta hambeta wu ya emahlweni.
10. Nandza u endla ntirho wihi wa rirhandzu namuntlha?
10 Ntlawa wa nandza la tshembekaka wu ni vutihlamuleri lebyikulu bya ku hambeta wu khathalela nhlayo leyi yi yaka yi andza ya “tinyimpfu tin’wana,” wu ri karhi wu tiva leswaku vanhu lava va fanaka ni tinyimpfu lava humaka ematikweni hinkwawo N’wini wa vona Yesu u va rhandza ngopfu. Kahle-kahle i ntlhambi wa yena. (Yohane 10:16; Mintirho 20:28; 1 Petro 5:2-4) Kutani leswi ntlawa wa nandza wu rhandzaka N’wini ni tinyimpfu, wu khathalela swilaveko swa ntshungu lowukulu swa moya hi ntsako.
11-13. Muungameri wa Sosayiti ya Watch Tower wa nkarhi wolowo u nyikele nhlamuselo yihi leyi fanelaka mayelana ni ntirho wa nandza?
11 Ina, xiphemu lexikulu xa ntirho wa nandza wa ku byarha ku vonakala xi katsa ku hlengeleta vafumiwa lava va nge misaveni va Mfumo wa Xikwembu. Loko a bula hi mintirho leyi yaka emahlweni ya nandza la tshembekaka, F. W. Franz, loyi hi nkarhi wolowo a ri muungameri wa Sosayiti ya Watch Tower, emahlweni ka rifu ra yena hi December 1992 u te:
12 “Yesu Kreste u tirhise nhlengeletano hi ndlela leyi hlamarisaka swinene nkarhi hinkwawo, hi ku ya hi malembe ya mina ya 99 ya ntokoto wa vutomi. A hi munhu ntsena loyi a kongomisaka nhlengeletano leyi, kambe ku fanele ku ri Hosi Yesu Kreste. Hikuva yi tirhe kahle ngopfu ni hi laha ku hlamarisaka ku tlula leswi a hi swi ehleketile. Namuntlha hi ni nhlengeletano leyi tateke misava hinkwayo. Yi tirha eka Hafu ya Misava N’walungu ni le ka Hafu ya Misava Dzonga, eVuxeni ni le Vupela-dyambu. Ko va munhu un’we ntsena loyi a nga langutelaka ku kula loku loku xiyekaka—ku nga N’wana wa Xikwembu, loyi a langutelaka ntlawa wa nandza la tshembekaka ni wa vutlharhi. U fanelekela vutihlamuleri byakwe, naswona sweswo hi swona leswi vangaka ku andza loku lokukulu loku hi ku vonaka.
13 “Ntirho lowu a wu endliwi hi munhu a ri un’we. Hi ni nhlengeletano ya le tilweni, naswona yi tirha hi ndlela ya le tilweni, hi fambiselo leri kongomisiwaka hi Xikwembu. Ku hava munhu ni un’we, hambi ku ri musunguri wa Watch Tower Bible and Tract Society, la nga vulaka leswaku u nyikiwe vutihlamuleri bya leswi hetisisiweke hi ndlela leyi katsaka misava hinkwayo. Hakunene swa hlamarisa.” Xana hinkwavo lava va ntshungu lowukulu a va pfumelelani hi mbilu hinkwayo ni marito wolawo ya Makwerhu Franz? Hakunene, swi tano, va yi khensa swinene mintirho leyi andzisiweke ya nandza la tshembekaka.
Vafumiwa Va Mfumo
14, 15. (a) Xana Yesu u kombise yini eka xifaniso xa titalenta (Matewu 25:14-30)? (b) Hi laha ku faneleke i yini lexi landzelaka eka Matewu ndzima 25?
14 Eka Matewu ndzima 25, xifaniso xa Yesu xa tinyimpfu ni timbuti xi hlamusela ntirho lowu lowukulu wa ku hlengeleta vafumiwa va laha misaveni va Mfumo wa Xikwembu. Eka xifaniso xa le mahlweni ka xona, lexiya xa titalenta, Yesu u kombise leswaku vadyondzisiwa lavo tshembeka lava nga ni ntshembo wo fuma na yena eMfun’weni wa yena wa le tilweni va fanele va tirhela ku engetela rifuwo ra yena ra la misaveni. Kutani hi laha ku fanelekaka, eka xifaniso xakwe lexi landzelaka, Yesu u boxa swilo leswi lavekaka eka lava lavaka ku va vafumiwa va Mfumo wakwe wa le tilweni.
15 Xiya marito yakwe eka Matewu 25:31-33: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. U ta yisa tinyimpfu evokweni ra yena ra xinene, timbuti tona eka lera ximatsi.”
16. Xana matiko ma hlengeletiwa njhani naswona vanhu va hambanisiwa hi ndlela yihi?
16 Yesu u fike eku kwetsimeni ka yena hi 1914. Loko a hlasela, yena a ri ni tintsumi ta yena, u hlasele ni ku hlongola valala vakwe hinkwavo va mademona etilweni. Lexi landzelaka eka xifaniso xa yena, xi hi pfuna ku twisisa leswaku ku tshama ka Yesu ehenhla ka xiluvelo lexi vangamaka swi fanekisela xiyimo xa ku avanyisa eka vukona bya yena. Ku hlengeletiwa ka matiko hinkwawo emahlweni ka yena swi vula leswaku Yesu u amukela matiko hinkwawo tanihi ntlhambi wa yena, hi ndlela yo fanekisela. I ntlhambi lowu vumbiwaka hi tinyimpfu ni timbuti. Hambi leswi ku hlawula tinyimpfu eka timbuti eka ntlhambi wa xiviri swi nga tekaka xiphemu xa siku, ku hlawuriwa ka vanhu va misava hinkwayo lava tihlawulelaka swi teka nkarhi wo leha. Leswi swi vangiwa hi leswi ku hlawula ku titshegeke hi mahanyelo ya munhu.
17. Ha yini xiyimo namuntlha xi chavisa eka vanhu hinkwavo?
17 Exifanisweni, Hosi leyi nga Murisi yi veka lava fanaka ni tinyimpfu evokweni ra yona ra xinene naswona lava fanaka ni timbuti yi va veka evokweni ra yona ra ximatsi. Tlhelo ra xinene i ku avanyisa loku nga ni vuyelo lebyinene—vutomi lebyi nga heriki. Tlhelo ra ximatsi ri kombisa ku avanyisa loku nga ni vuyelo byo biha—ku heriseriwa makumu. Ku tiyimisela ka Hosi emhakeni leyi ku ni vuyelo lebyi chavisaka.
18. Ha yini ku nga vonakali ka Hosi ku nga nyiki munhu xivangelo xo titsetselela?
18 Ku va N’wana wa munhu a fuma a nga vonaki eka vukona byakwe, kumbe pa·rou·siʹa, leswi a swi nyiki munhu xivangelo xo titsetselela. Vo tala swinene namuntlha lava fanaka ni tinyimpfu va hlanganyela ni ntlawa wa nandza eku chumayeleni ka mahungu lamanene ya Mfumo wa Xikwembu emisaveni hinkwayo leswaku va voningisa ku vonakala ka vona. Hakunene, ku vula ka vona vumbhoni ku fikelele swiphemu hinkwaswo swa misava.—Matewu 24:14.
19. I timfanelo tihi ta ntlawa wa tinyimpfu leti kombisiwaka eka xifaniso xa tinyimpfu ni timbuti?
19 Ha yini Hosi leyi yi nga Murisi yi hakela lava va ntlawa wa tinyimpfu hi vumundzuku lebyinene? Swi hikwalaho ka nseketelo wa vona wa mbilu hinkwayo eka ntirho lowu wa ku chumayela hi Mfumo ni tintswalo leti va tikombiseke vamakwavo wa vona lava totiweke, leti Yesu a kombisaka leswaku ti endleriwe yena hi yexe. Kutani ke, N’wana wa munhu la fumaka u ri eka vona: “Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.”—Matewu 25:34; 28:19, 20.
Ku Pfuna Hosi
20, 21. Xana tinyimpfu ti nyikela vumbhoni byihi lebyi kombisaka leswaku ti yima etlhelweni ra Mfumo?
20 Xiya leswaku loko Hosi yi vitana tinyimpfu leti leswaku ti ta dya ndzhaka ya misava ya Mfumo wa Xikwembu, ta hlamala. Ta yi vutisa: ‘Hosi, xana hi ku endlele swilo leswi rini’? Wa hlamula: “Ndzi tiyisile ndzi ri ka n’wina, loko mi tshame mi endla swilo leswi eka un’wana wa vamakwerhu lavatsongo lava, mi swi endlele mina.” (Matewu 25:40) Loko Yesu a humelela eka Mariya Magdala hi siku leri a nga pfuxiwa ha rona, u vulavule hi vamakwavo vakwe va moya loko a n’wi byele leswi: “Yana eka vamakwerhu.” (Yohane 20:17) Hi nkarhi wa vukona bya yena lebyi nga vonakiki, Yesu a ri ni masalela lamatsongo ya vamakwavo wa yena wa moya lava 144 000 lava a va ha hanya emisaveni.
21 Tanihi leswi Yesu a nga vonakiki le matilweni, vanhu lava fanaka ni tinyimpfu a va swi endlelanga yena hi ku kongoma swilo leswi swa rirhandzu. Va kota ntsena ku n’wi vona a ri exiluvelweni xa yena hi mahlo ya vona ya ripfumelo. Yesu u tlangela matshalatshala hinkwawo lawa va ma endlaka ku pfuna vamakwavo wa yena va moya, lava va nga ta va vadyandzhaka na yena etilweni. Leswi swi endleriwaka vamakwavo wa yena u swi teka tanihi leswi endleriweke yena hi ku kongoma. Vanhu lava va fanaka ni tinyimpfu va endlele vamakwavo wa Kreste leswinene hi ku swi rhandza hikwalaho ka leswi va va tekaka tanihi yena. Va swi vona leswaku vamakwavo wa Yesu va moya i vayimeri va Mfumo wa Yehovha, naswona va lava ku nyikela vumbhoni lebyi tiyeke bya leswaku va yima na vona etlhelweni ra Mfumo wolowo.
22. Ntlawa wa tinyimpfu wu hakeriwa hi ndlela yihi? (Ringanisa Nhlavutelo 7:14-17.)
22 Yehovha u swi vone ka ha ri emahlweni leswaku ntlawa lowu wa lava fanaka ni tinyimpfu a wu ta humelela enkarhini lowu wa vukona bya N’wana wakwe, kutani u va vekele hakelo leyinene swonghasi! Ntshungu lowukulu wu ta dya ndzhaka ya mikateko ya ku rhula laha misaveni hi nkarhi wa Ku Fuma ka Gidi ra Malembe leri tsakisaka hi Hosi ya Yehovha, Yesu Kreste.
23. Tinyimpfu ti pfuna vamakwavo va Hosi ti ri karhi ti swi tiva, hi tindlela tihi?
23 Loko hi kambisisa vuprofeta bya Bibele lebyi tirhaka enkarhini wa vukona bya Kreste, kun’we ni xifaniso xa Yesu xa tinyimpfu ni timbuti, xana hi vona yini? Hi vona leswi: Leswi swi endlaka munhu a va nyimpfu leyi nga ni xiyimo xo lulama emahlweni ka Xikwembu ni Hosi ya xona a hi ku endlela un’wana wa vamakwavo va Hosi leswinene handle ko swi xiya kumbe hi mpaxeko. Lava va ntlawa wa tinyimpfu va swi tiva leswi va swi endlaka, hambi loko va nga yi voni Hosi ya vona leyi fumaka hi mahlo ya vona ya xiviri. Va ringeta ku pfuna vamakwavo va Hosi ku nga ri hi ndlela ya nyama ntsena kambe ni ya moya. Njhani? Hi ku va pfuna eku chumayeleni ka mahungu lamanene ya Mfumo wa Xikwembu ni hi ku fambisa tidyondzo ta Bibele leswaku va kota ku endlela Kreste vadyondzisiwa. Xisweswo, namuntlha ku na vahuweleri va Mfumo wa Xikwembu lava tlulaka mune wa timiliyoni.
Mintirho Leyi Andzisiweke
24. I mintirho yihi ya rirhandzu leyi endleke lava va ntlawa wa nandza va va vanhu lava tsakeke ku tlurisa emisaveni namuntlha?
24 A hi longoloxeleni yin’wana ya mintirho leyinene ya ntlawa wa nandza la tshembekaka. Wo sungula, ntlawa lowu wa nandza wu vekiwe ehenhla ka rifuwo hinkwaro ra N’wini—swilaveko swa Mfumo wa yena emisaveni—naswona rifuwo leri ri ya emahlweni ri andza. Wa vumbirhi, ntlawa wolowo a wu wundli malandza lama totiweke hi swakudya swa moya ntsena kambe ni ntshungu lowukulu wa tinyimpfu tin’wana lowu yaka emahlweni wu kula. Wa vunharhu, ntlawa wa nandza wu rhangela eku hangalaseni ka ku vonakala ka Mfumo. Wa vumune, ku andza lokukulu ka mintirho ya wona i ku hlengeletiwa ka ntshungu lowukulu wa tinyimpfu tin’wana, va wu tisa etempeleni ya Yehovha ya moya. Wa vuntlhanu, ntlawa wa nandza a wu ri karhi wu seketeriwa hi lava va fanaka ni tinyimpfu hi mbilu hinkwayo, wu lunghiselela miako leyikulu ya marhavi ya nhlengeletano emisaveni hinkwayo, kun’we ni tindlu-nkulu le United States. Mintirho yo tano ya rirhandzu yi endle leswaku ntlawa wa nandza wu va vanhu lava tsakeke ku tlula hinkwavo emisaveni hinkwayo namuntlha, naswona va tlhele va tsakisa ni vanhu van’wana va timiliyoni. Hinkwavo va khensa Yehovha Xikwembu na Yesu Kreste, lava kongomisaka mintirho yo tano leyi andzisiweke ya nandza lowo tlhariha!
25. Xana tinyimpfu ti nga hambeta ti seketela ntlawa wa nandza hi ndlela yihi, ti ri karhi ti langutela yini?
25 Sweswi ntlawa wa nandza wu tirha swinene ku tlula rini na rini emintirhweni ya wona leyi yi yi nyikiweke hi Xikwembu. Nkarhi lowu seleke leswaku ku sungula “nhlomulo lowukulu” a wa ha ri wungani! (Matewu 24:21) I swa nkoka swonghasi leswaku lava va nga tinyimpfu ta Xikwembu va tshama etlhelweni ra xinene ra vuyelo lebyinene ra Hosi ya xona leyi nga Murisi! Kutani ke, hinkwerhu a hi hambeteni hi chivirika hi seketela nandza lowo tshembekaka, wa vutlharhi. Hikuva loko hinkwavo lava fanaka ni tinyimpfu va endla sweswo ntsena ku nga ri khale va ta swi kota ku twa marito ya ntsako lama nge: “Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.”
Xana U Nga Hlamula?
◻ I ku avanyisa kwihi ko sungula loku veke kona endzhaku ka ku vekiwa ka Hosi exiluvelweni?
◻ Matewu 24:45-47 yi hetiseke hi ndlela yihi esikwini ra namuntlha?
◻ Mayelana ni mintirho leyi andzisiweke, i yini lexi ntlawa wa nandza ni ntshungu lowukulu va xi tlangelaka swinene?
◻ Matewu 25:34-40 yi hetiseka njhani hi nkarhi wa pa·rou·siʹa?
[Xifaniso lexi nga eka tluka 16]
N’wini u veke rifuwo ra yena hinkwaro emavokweni ya nandza lowo tshembeka
[Xifaniso lexi nga eka tluka 18]
Yesu u le xiluvelweni xa yena lexo kwetsima leswaku a avanyisa vanhu