“A Hi Vulavurisani!”

MICHAEL, gqweta, a fanele a va xivulavuri. Ntirho wakwe a wu lava sweswo. Kambe endzhaku ka malembe ya 16 a tekile, Michael u boheke ku xiya leswaku loko a vuya ekaya eka nghamu yakwe, Adrian, vutshila byakwe byo vulavula a byi vonaka byi nyamalala. Michael u ri: “Mina na Adrian minkarhi hinkwayo a hi holova, hi hoxana hi marito, hi n’unun’uta, naswona ndzi anakanye leswaku sweswo a swi ta hi phirha. Ndzi kanakanile loko sweswo ku ri byona vukati, ku nga eneriseki loku hambetaka ni ku hlundzukisana. Loko sweswo a swi ta va xivilelo xa hina evuton’wini bya hina hinkwabyo, ndzi lave ku dlaya vukati—a ndzo tlanga. A ndzi nga ta swi kota ku hanya malembe ya 20, 30, 40 ya muxaka wolowo wa ku hlundzukisana ni timholovo.”

Mianakanyo yo fana ni leyi ya Michael na Adrian a hi ya vona ntsena. Ya humelela eka mimpatswa yo tala leyi vuxaka bya yona byi vaka ni timholovo ni ku pfa ti yimanyana. Ku vulavurisananyana swi pfuxa mholovo. Va “twa” swilo leswi nga vuriwangiki. Va vula swilo leswi va nga laviki ku swi vula. Va hlaselana ni ku lumbetana, ivi swi vanga ku miyela hikwalaho ko hlundzuka. A va hambani, kambe a hi “nyama yin’we.” (Genesa 2:24) Vuxaka bya kona i nyimpi leyi nga heriki. Ku ya endzhaku swi ta vula ku hambana; ku ya emahlweni swi ta vula ku nga twanani loku hambetaka. Leswaku va swi papalata mimpatswa leyi yi tihanyela vutomi byo hambana leswaku yi nga karhatani emintlhavekweni.

Mimpatswa yo tano yi faneriwa hi ku ‘kuma nkongomiso wa vutlharhi’ evukatini bya yona. (Swivuriso 1:5) Vutlharhi lebyi byi kona eRitweni ra Xikwembu, ku nga Bibele. Papila ra vumbirhi ra Pawulo eka Timotiya ri pfumela leswaku Bibele ya “pfuna ku dyondzisa, ni ku laya, ni ku ololoxa.” (2 Timotiya 3:16) Leswi swi tikomba swi ri tano eku tshunguleni ka ku vulavurisana loku tsemekaka, hi laha hi nga ta swi vona ha kona.