“Lav̌ani Yehova, Ṅwina, V̌atiṭongahati Hikwav̌o”

“LAV̌ANI Yehova, ṅwina, v̌atiṭongahati hikwav̌o v̌a tiko, lav̌a endlaka hi ku lerisa ka yena, lav̌ani ku lulama, mi lav̌a ku tiṭongahata; kumbe mi ta tifihla e sikwini ra v̌ukari bya Yehova.”—Sofoniya 2:3.

Muprofeta Sofoniya a kongomise marito wolawo eka ‘vatitsongahati va misava,’ naswona u va khongotele leswaku va “lav̌a ku tiṭongahata” leswaku va ta kota ku hlayiseka “e sikwini ra v̌ukari bya Yehova.” Hi ndlela leyi nga erivaleni swi komba leswaku ku titsongahata i xilaveko xa leswaku u pona. Kambe ha yini?

Ha Yini U Lava Ku Titsongahata?

Ku titsongahata i mfanelo ya ku va la rhuleke, ku pfumala ku tikukumuxa kumbe ku titiva. Ku fambisana swinene ni timfanelo letin’wana ta vunene, to tanihi ku tiveka ehansi, ni ku rhula. Leswi swi nga tano, vanhu lava titsongahataka va dyondziseka naswona va tiyimisele ku amukela ndzayo leyi humaka evokweni ra Xikwembu, hambi loko yi languteka yi vavisa swa xinkarhana.—Pisalema 25:9; Vaheveru 12:4-11.

Ku titsongahata a swi fambisani ni dyondzo ya munhu kumbe xiyimo xa vutomi. Hambi swi ri tano, lava dyondzekeke kumbe ku humelela hi ndlela ya misava va titwa va fanelekile ku tiendlela swiboho eka xin’wana ni xin’wana, hambi ku ri etimhakeni ta vugandzeri. Leswi swi nga va sivela ku pfumelela munhu un’wana a va dyondzisa swin’wana kumbe ku amukela ndzayo na ku endla ku cinca loku faneleke evuton’wini bya vona. Van’wana lava fuweke hi tlhelo ra leswi vonakaka va nga ha va na mianakanyo leyi hoxeke ya leswaku nsirhelelo wa vona wu titshege hi rifuwo ra vona ra leswi vonakaka. Hikwalaho, a va voni xilaveko xa rifuwo ra moya leri humaka eRitweni ra Xikwembu, Bibele.—Matewu 4:4; 5:3; 1 Timotiya 6:17.

Tsundzuka vatsari, Vafarisi ni vaprista lavakulu va siku ra Yesu. Siku rin’wana loko malandza ma rhumiwile ku ya khoma Yesu kutani va nga vuyi na yena, Vafarisi va te: “Xana na n’wina mi xiseteriwile xana? I mani eka vakulukumba ni le ka Vafarisi loyi a tshamaka a pfumela eka yena xana? Kambe loko va ri vanhu va ntshungu wolowo, lava nga tiviki Nawu, va rhukaniwile.” (Yohane 7:45-49) Hi marito man’wana, hi ku ya hi vona, vanhu lava nga tiviki nchumu ni lava nga dyondzekangiki hi vona ntsena lava a va ta pfumela eka Yesu.

Hambi swi ri tano, Vafarisi van’wana va amukele ntiyiso, naswona va tlhele va lwela Yesu ni Vakreste. Exikarhi ka vona a ku ri na Nikodema na Gamaliyele. (Yohane 7:50-52; Mintirho 5:34-40) Endzhaku ka rifu ra Yesu, “vaprista lavo tala va tinyiketa eku pfumeleni.” (Mintirho 6:7) Handle ko kanakana xikombiso lexi xiyekaka swinene a ku ri xa muapostola Pawulo. U dyondzise hi Gamaliyele naswona u ve museketeri lonkulu wa Vuyuda la hetisekeke ni la xiximiwaka swinene. Hambi swi ri tano, hi ku famba ka nkarhi u amukele xirhambo xa Kreste Yesu hi ku titsongahata naswona u ve mulandzeri wakwe la hisekaka.—Mintirho 22:3; 26:4, 5; Vagalatiya 1:14-24; 1 Timotiya 1:12-16.

Leswi hinkwaswo swi kombisa leswaku ku nga khathariseki leswaku munhu u kulele kwihi kumbe leswaku u titwisa ku yini hi rungula ra Bibele, marito ya Sofoniya ma ha tirha eka yena. Loko munhu a lava ku amukeriwa hi Xikwembu naswona a kongomisiwa hi Rito ra xona, ku titsongahata swa laveka.

Lava ‘Lavaka Ku Titsongahata’ Namuntlha

Timiliyoni ta vanhu emisaveni hinkwayo ti amukela mahungu lamanene ya Mfumo. Timbhoni ta Yehovha ti fambisa tidyondzo ta Bibele to tlula mune wa timiliyoni vhiki na vhiki emakaya ya vanhu lava. Lava va kulele etindhawini to tala to hambana-hambana eka swiyimo swo hambana swa ikhonomi na matshamelo. Kambe, lexi va fanaka ha xona hi leswaku va amukela rungula ra Bibele hi ku titsongahata leri un’wana a va yiselaka rona emakaya ya vona kumbe kun’wana. Vunyingi bya vona byi endla nhluvuko lowunene hikuva va tiyimisele ku rhangisa matshalatshala yo hlula swirhalanganya evuton’wini bya vona. Ina, va le xikarhi ka ‘vatitsongahati va misava’ namuntlha.

Hi xikombiso, xiya Maria wa le Mexico. U dyondze nawu eyunivhesiti naswona a yime kahle hi tlhelo ra swa timali hikwalaho ka ndzhaka leyi a a yi kumile. Emhakeni leyi, u sungule ku va ni mianakanyo ya ntshunxeko leyi n’wi cinceke, a va munhu la “xandzukaka, la pfumalaka xichavo, a va ni xikulela naswona a va la alaka vukona bya Xikwembu.” Maria wa tsundzuka: “Ndzi sungule ku ehleketa leswaku xin’wana ni xin’wana xi nga lulamisiwa hi mali naswona Xikwembu a xi nga ri xa nkoka. Entiyisweni, a ndzi ehleketa leswaku a xi kona.” U engeterile: “Hi ku ya hi mina kereke a ku ri nchumu lowu yisaka munhu ehansi, naswona lowu ngo va nawu wa tiko ntsena.”

Endzhaku Maria u vone ku cinca ka malume wakwe endzhaku ka loko a ve un’wana wa Timbhoni ta Yehovha. Maria u hlamuserile: “A chavisa swinene, kambe sweswi i munhu wo rhula ni lowo lulama. Maxaka ma vule leswaku a a chumayela naswona a a hlaya Bibele, hi yona mhaka leyi endleke leswaku a tshika ku nwa ni ku hlongorisana ni vavasati. Kutani ndzi lave leswaku a ta a ta ndzi hlayela Bibele hikuva a ndzi ehleketa leswaku leyi hi yona ndlela leyi yi nga ta ndzi yisa eku rhuleni ni ku kuma ku lulama loku a ndzi ku lava swinene.” Eku heteleleni Mariya u amukele dyondzo ya Bibele ni mpatswa wa Timbhoni.

A ri na swilo swo tala leswi a a fanele ku swi tshika, naswona a swi n’wi nonon’hwela swinene ku amukela nsinya wa Bibele wa vunhloko leswaku a titsongahata eka nuna wa yena. Kambe u hundzuke swinene evuton’wini ni le ka langutelo rakwe. U te: “Ndzi anakanya leswaku mpfhuka vamakwerhu va ndzi endzela laha kaya na ku ndzi tisela mpfuno wa Yehovha, ntsako, ku rhula ni mikateko ya Xikwembu swi kona ekaya ra mina.” Namuntlha, Maria i Mbhoni ya Yehovha leyi tinyiketeleke, ni leyi khuvuriweke.

Eku lweleni ka vugandzeri bya ntiyiso, ku ni ndhawu yin’wana laha vutitsongahati kumbe vutikukumuxi swi endlaka xiphemu xa nkoka. Hakanyingi, wansati endyangwini u amukela ntiyiso naswona a lava ku tirhela Xikwembu, kambe wanuna wa sihalala. Kumbexana swa nonon’hwa eka vavanuna ku amukela mhaka ya leswaku ku ni un’wana nakambe—Yehovha Xikwembu—loyi nsati wakwe a faneleke ku n’wi yingisa sweswi. (1 Vakorinto 11:3) Wansati wa le Chihuahua le Mexico, u kombele dyondzo ya Bibele naswona hi ku famba ka nkarhi yena ni vana vakwe va nkombo va nghene entiyisweni. Eku sunguleni nuna wakwe a kaneta. Ha yini? Hikuva a a nga lavi leswaku ndyangu wakwe wu ya chumayela hi yindlu na yindlu, ni ku fambisa tibuku ta Bibele. Handle ko kanakana a vona onge leswi swi n’wi yisa ehansi. Hambi swi ri tano, ndyangu wakwe wu yime wu tiyile eka xiboho xa wona xo tirhela Xikwembu. Kutani wanuna u sungule ku vona nkoka wa ku amukela malunghiselelo ya Xikwembu. Kambe ku hundze malembe ya 15 a nga si tinyiketela eka Yehovha.

Le Mexico hinkwaro, ka ha ri na tindhawu to tala leti nga toxe laha vaaki va kwalaho va vulavulaka Xiindiya naswona va ni mikhuva ya vona. Rungula ra Bibele ri fikelela vanhu lava naswona ri va pfuna ku antswisa xiyimo xa vona xa ndhavuko, naswona van’wana va dyondza ku hlaya ni ku tsala loko va ri karhi va dyondza ntiyiso. Hambi swi ri tano, ku va vanhu va ri ni dyondzo ya le hansi ni swilo swi nga ri swingani leswi vonakaka a swi vuli swona leswaku va ta wu amukela ntiyiso. Minkarhi yin’wana ku titeka mi ri rixaka ro antswa ni ku khomelela eka mindhavuko ya vakokwana swi endla leswaku ku amukela ntiyiso swi nonon’hwa. Nakambe leswi swi hlamusela mhaka leyi ha yona eswimitanini swin’wana swa Maindiya, lava va amukelaka ntiyiso va talaka ku karhatiwa hi vaaki van’wana. Hikwalaho ku titsongahata ku hi tindlela to tala.

Angula Hi Ku Titsongahata

Ku vuriwa yini hi wena? Xana wa wu amukela ntiyiso wa Rito ra Xikwembu? Kumbexana swa ku nonon’hwela ku amukela mintiyiso yin’wana ya Bibele? Kumbexana u nga lava ku tikambisisa ku vona lexi ku sivelaka. Xana u siveriwe hikwalaho ka leswi vunyingi bya lava amukelaka ntiyiso byi humaka eswiyin’weni swa le hansi? Xana ku tinyungubyisa ka wena ku lawula ni mianakanyo ya wena? I swinene ku ehleketa hi marito ya muapostola Pawulo lama nge: “Kambe Xikwembu xi hlawurile leswi misava yi swi vonaka swi ri ‘swa vuhunguki’, ku khomisa tintlhari etingana. Xikwembu xi hlawurile leswi misava yi swi vonaka swi ri ni ku tsana, ku khomisa leswi nga ni matimba etingana, Xikwembu xi hlawurile leswi misava yi swi langutelaka ehansi ni ku swi sola, leswi ni ku va kona swi nga riki kona, eku herisa leswi nga kona, leswaku ku nga vi na munhu ni un’we loyi a tidzunisaka emahlweni ka xona.”—1 Vakorinto 1:27-29.

Xana u nga ala rifuwo hikwalaho ka leswi u ri kumaka exibyeni lexi nga nyawuriki? A swi tano hakunene! Kambe, hi yona ndlela leyi Xikwembu xi yi tirhiseke ku nyika Rito ra xona ra ntiyiso leri hlayisaka vutomi, hi laha muapostola Pawulo a hlamuselaka ha kona: “Kambe hina hi nyikiweke ku rhwala xuma lexi, hi fana ni timbita ta vumba; swi komba leswaku matimba lamakulu lawa, lama tlulaka hinkwaswo, ma huma eka Xikwembu, a ma humi eka hina.” (2 Vakorinto 4:7) Ku titsongahata ni ku tiveka ehansi swi ta hi pfuna ku vona nkoka wa ntiyiso wa rifuwo leri, ku nga ri “timbita ta vumba,” kumbe vanhu lava hi tiselaka rona. Hi ku endla tano, hi antswisa lunghelo ra hina ra ku va van’wana lava nga ta “tifihla e sikwini ra v̌ukari bya Yehova” ni ku va exikarhi ka vatitsongahati lava nga ta “dya ndzhaka ya misava.”—Sofoniya 2:3; Matewu 5:5.