Chavela Eka Yehovha
“Yehova, nḍi [chavela] ka wena.”—PISALEMA 31:1.
1. Pisalema 31 yi swi phofula njhani ku tiyiseka hi vuswikoti bya Yehovha byo sirhelela?
RITO ro xonga ri yimbelela hi wanuna loyi hambi a karhele emianakanyweni ni le mirini, a chavelaka eka Yehovha. Ripfumelo ra hlula, ku vula marito ya risimu rero ro hlawuleka. Wanuna loyi u chavela emavokweni lama pfulekeke ya Lowa Matimba Hinkwawo, loko a hlongorisiwa hi vaxanisi. Pisalema yi ri: “Yehova, nḍi [chavela] ka wena: Nḍi nga khomiwi hi tingana, ni siku riṅwe! Nḍi nṭhunše e ku lulameni ka wena!”—Pisalema 31:1.
2. (a) Hi nga tshemba Yehovha tanihi khokholo ra hina leri sekeriweke eka tiphuphu tihi timbirhi? (b) Yehovha i Xikwembu xa muxaka muni?
2 Mupisalema u ni vuchavelo byin’we ntsena—lebyinene ngopfu! Hambi ku nga endleka yini, ntiyiso lowu salaka hi leswaku: Yehovha i khokholo rakwe, i vuchavelo byakwe. U tshemba tiphuphu timbirhi leto tiya. Yo sungula i ripfumelo ra yena, leri Yehovha a nga ta ka a nga ri khomisi tingana, ya vumbirhi i ku lulama ka Yehovha, leswi vulaka leswaku A nge n’wi tshikeli makumu nandza Wakwe. Yehovha a hi Xikwembu lexi khomisaka malandza ya xona layo tshembeka tingana; a nga hluleki ku hetisisa leswi a swi tshembiseke. Ku ri na sweswo, i Xikwembu xa ntiyiso ni muhakeri wa lava va xi tshembaka hi ku helela. Eku heteleleni, ripfumelo ri ta kuma hakelo! Ku pona ku ta va kona!—Pisalema 31:5, 6.
3. Mupisalema u n’wi dzunisa njhani Yehovha?
3 Loko a qambha vuyimbeleri byakwe hi mpfumawulo lowu cinca-cincaka, hi rito leri phofulaka ku titshandza ni maxangu lamakulu ni leri phofulaka ku tiyiseka lokukulu, mbilu ya mupisalema ya tiyisiwa. U dzunisa Yehovha hikwalaho ka rirhandzu Rakwe lerikulu. Wa yimbelela: “A ku ḍuniwe Yehova! Hikuv̌a o nḍi kombisile nsov̌o wa yena, kukotisa loko ngi nḍi v̌ekiwe khokholweni.”—Pisalema 31:21.
Vunyingi Lebyikulu Bya Vahuweleri Va Mfumo
4, 5. (a) Hi byihi vunyingi lebyikulu lebyi dzunisaka Yehovha namuntlha, naswona byi tirhe njhani eka lembe ra ntirho lera ha ku hundzaka? (Vona chati eka matluka 12-15.) (b) Nhlayo ya lava veke kona eXitsundzuxweni yi swi kombisa njhani leswaku ku ni vanhu lava engetelekeke lava tiyimiseleke ku tihlanganisa ni ntshungu wa vahuweleri va Mfumo? (Vona chati.) (c) Hi wihi ntlawa wa vandlha ra ka n’wina lowu kumbexana wu lunghekeleke ku tihlanganisa ni ntshungu lowu?
4 Namuntlha, marito ya pisalema yoleyo ma ni nkoka lowukulu nakambe. Tinsimu leti dzunisaka Yehovha ti nge kavanyetiwi hi mukaneti wihi na wihi wa nsele, hambi ku ri mhangu yihi na yihi ya ntumbuluko, kumbe xiphiqo xihi na xihi xa ikhonomi; kunene, Yehovha u ve ni tintswalo letikulu swinene eka vanhu vakwe. Lembe leri hundzeke ra ntirho, emisaveni hinkwayo, vunyingi lebyikulu lebyi fikaka eka 4 709 889 ematikweni ya 231, byi twarise rungula ra Mfumo wa Xikwembu. Hulumendhe ya Yehovha ya le tilweni leyi lawuriwaka hi Kreste Yesu i vuchavelo lebyi tshembekaka eka vona. Lembe leri nga hundza, vahuweleri lava va Mfumo lava humaka emavandlheni ya 73 070 va hete ntsengo wa tiawara ta 1 057 341 972 entirhweni wo vula evhangeli. Vuyelo bya ntirho lowu hi leswaku vanhu va 296 004 va kombise ku tinyiketela ka vona eka Xikwembu hi nkhuvulo wa mati. Naswona hinkwavo lava veke kona eka Ntsombano wa Matiko Hinkwawo wa Dyondzo Ya Xikwembu lowu khomeriweke eKiev, le Ukraine hi August la hundzeke va vone xihlamariso lexikulu. Va vone xiendlakalo xa nkoka swinene ematin’wini, ku nga ntshungu lowukulu eka hinkwayo leyi tshameke yi khuvuriwa ya Vakreste va ntiyiso leyi rhekhodiweke! Hi laha swi profetiweke ha kona eka Esaya 54:2, 3, vanhu va Xikwembu va engeteleka hi tinhlayo letikulu swinene.
5 Hambi swi ri tano, ka ha ri ni vafumiwa van’wana va Mfumo wa Xikwembu lava na vona va lungheleke ku tihlanganisa ni ntshungu lowu. Lembe leri nga hundza, lava veke kona eXitsundzuxweni xa rifu ra Yesu va endle ntsengo lowu hlamarisaka wa 1 865 765. Hi tshemba leswaku vo tala va vona va ta fanelekela ku yimbelela risimu ra Mfumo hi yindlu na yindlu eka lembe leri ra ntirho. Ntshembo wolowo wu fanele wu n’wi hlundzukisa swinene nala wa ntiyiso, ku nga Sathana Diyavulosi!—Nhlavutelo 12:12, 17.
6, 7. Hlamusela ndlela leyi wanuna la tsakelaka a hluleke ku karhatiwa hi mademona ha yona hi mpfuno wa Yehovha.
6 Sathana u ta ringeta ku sivela van’wana leswaku va nga hlanganyeli eku yimbeleleni ka risimu rero. Hi xikombiso, le Thailand vahuweleri va kuma vanhu vo tala lava karhatiwaka hi mademona. Hambi swi ri tano, vo tala lava nga ni timbilu letinene va ntshunxiwile hi mpfuno wa Yehovha. Wanuna un’wana a a lawuriwa hi mademona hi malembe ya khume, endzhaku ka loko a ye emungomeni, a ya hlahluva. U ringete ku hambana na wona hi mpfuno wa mufundhisi, kambe a swi pfunanga nchumu. Mutirheli wa nkarhi hinkwawo wa Timbhoni ta Yehovha u sungule dyondzo ya Bibele ni wanuna loyi, a n’wi dyondzisa hi Bibele, ndlela yin’we ntsena yo hambana ni matimba ya mademona—ku nga ku va ni vutivi lebyi kongomeke bya ntiyiso, a tshemba Yehovha Xikwembu, a vulavula na yena hi xikhongelo.—1 Vakorinto 2:5; Vafilipiya 4:6, 7; 1 Timotiya 2:3, 4.
7 Ni vusiku, endzhaku ka bulo leri, wanuna loyi u lorhe tata wakwe la feke, a n’wi byela leswaku u ta nghena ekhombyeni loko a nga tlheli a va mungoma. Ndyangu wakwe wu sungule ku xaniseka. Handle ko pfumelela ku hambukisiwa, wanuna loyi u ye emahlweni ni tidyondzo takwe ta Bibele, a sungula ni ku va kona eminhlanganweni. Eka yin’wana ya tidyondzo teto, phayona ri hlamusele leswaku minkarhi yin’wana swilo leswi tirhiseriwaka vungoma swi nga pfulela mademona ndlela yo karhata vanhu lava ringetaka ku tihambanisa ni matimba ya wona. Wanuna loyi u tsundzuke leswaku u na mafurhanyana lama a a ma tirhisa tanihi xitshungulo. Kutani u swi vonile leswaku u fanele ku ma cukumeta. Ku sukela loko a ma cukumetile, a nga tlhelanga a karhatiwa hi mimoya leyo biha. (Ringanisa Vaefesa 6:13; Yakobo 4:7, 8.) Yena na nsati wakwe va endla nhluvuko lowunene edyondzweni ya vona, naswona va va kona nkarhi na nkarhi eminhlanganweni ya dyondzo ya Bibele.
8, 9. Hi swihi swihinga swin’wana leswi vahuweleri van’wana va Mfumo va swi hluleke?
8 Swihinga swin’wana swi nga kavanyeta ku twarisiwa ka mahungu lamanene. Hikwalaho ka xiyimo xo nonon’hwa swinene xa ikhonomi le Ghana, vatirhi va tshikisiwe mintirho ya vona. Minxavo yi tlakukile swinene, kutani swa nonon’hwa swinene ku kuma swilaveko swa xisekelo evuton’wini. Xana vanhu va Yehovha va langutane njhani ni xiyimo lexi? Va langutane na xona hi ku tshemba Yehovha, hayi ku titshemba. Hi xikombiso, siku rin’wana wanuna un’wana u siye mvhilopho leyi pfariweke etafuleni ra ndhawu yo amukela vaendzi ehofisini ya rhavi. Endzeni ka mvhilopho leyi a ku ri na $200 (R660), kumbe muholo wa tin’hweti tinharhu eka vanhu lava tolovelekeke. Loyi a nyikeleke mvhilopho leyi a a nga tiveki, kambe eka xifunengeto xa yona a ku tsariwe marito lawa: “Ndzi lahlekeriwe hi ntirho, kambe Yehovha u ndzi nyike wun’wana. Ndza n’wi tlangela swinene kun’we ni N’wana wakwe, Kreste Yesu. Eka mvhilopho leyi ndzi nghenisa munyikelo wa mina lowu nga nyawuriki, leswaku wu hoxa xandla eku hangalaseni ka mahungu lamanene ya Mfumo, makumu ma nga si fika.”—Ringanisa 2 Vakorinto 9:11.
9 Ku va kona eminhlanganweni swi pfuna ku letela lava tihlanganisaka ni ntshungu lowukulu lowu dzunisaka Yehovha. (Ringanisa Pisalema 22:22.) Hi xikombiso, le dzongeni wa Honduras, ku na vandlha ra El Jordán. Xana i yini lexi hlamarisaka hi ntlawa lowu wutsongo? I ku va kona ka vona eminhlanganweni hi ku tshembeka. Vahuweleri va 12 eka va 19, va pela nambu lowo anama loko va ya eminhlanganweni vhiki na vhiki. Leswi a hi xiphiqo hi nkarhi wo pfumaleka ka timpfula, tanihi leswi va kotaka ku pela nambu hi le maribyeni. Hambi swi ri tano, hi nkarhi wa timpfula, swiyimo swa hundzuka. Mati lawa hi nkarhi wo pfumaleka ka timpfula a ma nga nyawuli se ma va boboma leri khukhulaka xin’wana ni xin’wana lexi nga endleleni ya wona. Leswaku va langutana ni xihinga lexi, vamakwerhu va fanele ku hlambela hi vutshila. Va nga si pela, va teka swiambalo leswi va yaka ha swona enhlanganweni va swi veka endzeni ka tina (xibye xa nsimbhi xo hlambela eka xona), va yi phutsela hi pulasitiki. Muhlamberi la nga ni matimba swinene u tirhisa tina leyi papamarisaka, kutani a koka ntlawa wu pela. Loko va fike entsungeni hi ku hlayiseka, va tisula mati, va ambala, kutani va fika eHolweni ya Mfumo va tsakile naswona va base kahle!—Pisalema 40:9.
Vuchavelo Lebyi Hi Nga Tshamaka Eka Byona
10. Ha yini hi fanele ku hundzulukela eka Yehovha hi minkarhi yo nonon’hwa?
10 Yehovha a nga va khokholo ra wena, hambi u hlaseriwa hi ku kongoma hi mademona kumbe u tshikileriwa hi swilo swin’wana. Huwelela eka yena hi xikhongelo. U yingisela swinene, hambi loko vanhu va yena va konya swi nga twali. Mupisalema u kume mhaka yoleyo yi ri ntiyiso, kutani a tsala a ku: “Wa nga nḍi yingisa, u hatlisa ku nḍi ponisa! U v̌a ribye ra mina ra šitšhav̌elo, ni khokholo laha nḍi nga tšhav̌elaka kona. Hikuv̌a hi wena ribye ra mina ni khokholo ra mina; hikwalaho ka v̌ito ra wena, u ta nḍi komba ndlela, u nḍi fambisa, u ta nḍi nṭhunša e ntlhaṅwini lowu v̌a nḍi lungiseleke wona; hikuv̌a hi wena šitšhav̌elo ša mina.”—Pisalema 31:2-4.
11. Hlamusela leswaku ha yini khokholo ra Yehovha ri nga ri nxaxa.
11 Yehovha a ngo lunghiselela nxaxa, kambe u lunghiselela vuchavelo lebyi tiyeke lebyi hi nga tshamaka eka byona hi sirhelelekile. Vurhangeri ni vukongomisi byakwe a byi hlulekanga ku fambisa vanhu vakwe. Marhengu hinkwawo ya Sathana ni mianakanyo yakwe ma ta endliwa swa hava hi matimba ya Xikwembu. (Vaefesa 6:10, 11) Loko hi tshemba Yehovha hi timbilu ta hina hinkwato, u ta hi tlhengusela ekule ni mintlhamu ya Sathana. (2 Petro 2:9) Eka malembe ya mune lama hundzeke, ntirho wo chumayela wa Timbhoni ta Yehovha wu pfumeleriwe ximfumo ematikweni ya kwalomu ka 35. Nakambe, ematikweni lawa swiyimo swa ntshamisano, ikhonomi kumbe swa politiki swi sivelaka ku chumayeriwa ka mahungu lamanene, vanhu van’wana lava fanaka ni tinyimpfu va rhurhele laha va nga fikeleriwaka hi ku olova swinene. Rin’wana ra matiko yo tano i Japani.
12. Phayona rin’wana eJapani ri n’wi endlise ku yini Yehovha a va khokholo ra rona?
12 Vanhu vo tala lava humaka entsungeni wa malwandle va khitikanele le Japani, kutani ku vumbiwe mavandlha yo tala ya tindzimi timbe. Ntokoto wa makwerhu un’wana wa le vandlheni ra le Japani wu kombisa ndlela leyi nsimu leyi ya tindzimi timbe yi tswalaka mihandzu ha yona. A a lava ku ya tirha laha xilaveko xi kuleke kona. Hambi swi ri tano, ana se a a fambisa tidyondzo ta Bibele ta khume laha a a ri kona. Un’wana wa vanghana vakwe u vule hi ku vungunya a ku: “Loko u ya laha xilaveko xi kuleke kona, u ta fanela ku fambisa tidyondzo ta 20 ta Bibele!” U kume xiavelo ivi a ya le Hiroshima. Hambi swi ri tano, endzhaku ka tin’hweti ta mune, a a ri ni dyondzo yin’we ntsena ya Bibele. Siku rin’wana u fike eka wanuna loyi a a huma eBrazil, loyi a a vulavula Xiputukezi ntsena. Tanihi leswi makwerhu a a nga swi koti ku vulavula ni wanuna loyi, u xave buku-mpfuno ya Xiputukezi. Endzhaku ko dyondza marito ma nga ri mangani yo olova eku vulavuleni, u tlhele a endzela wanuna loyi. Loko makwerhu loyi a n’wi xeweta hi ririmi ra Xiputukezi, wanuna loyi u hlamarile, kutani a n’wi pfulela rivanti hi ku n’wayitela lokukulu, a n’wi byela leswaku a nghena. Ku sunguriwe dyondzo ya Bibele. Endzhakunyana makwerhu loyi a a fambisa tidyondzo ta 22, ta 14 hi Xiputukezi, tsevu hi Xipaniya na timbirhi hi Xijapani!
Ku Chumayela Hi Xivindzi
13. Ha yini ku nga fanelanga ku va ni munhu loyi a ringetaka ku hi sindzisa leswaku hi tirhela Yehovha?
13 Vanhu va Yehovha va yimbelela risimu ra Mfumo hi ripfumelo lerikulu ra leswaku Yehovha i khokholo ra vona. (Pisalema 31:14) A va nge khomiwi hi tingana—Yehovha a nge va khomisi tingana, hikuva u ta hetisisa rito rakwe. (Pisalema 31:17) Lava nga ta khomiwa hi tingana i Diyavulosi ni vanghana vakwe va mademona. Tanihi leswi vanhu va Yehovha va rhumiwaka ku chumayela rungula leri nga khomisiki tingana, a ku na munhu la va sindzisaka ku chumayela. Yoleyo a hi yona ndlela leyi Yehovha kumbe N’wana wakwe a khutazaka vanhu ku N’wi gandzela ha yona. Loko timbilu ta vanhu ti ri ni ripfumelo ni ku tlangela lokukulu ka vunene ni nsovo wa Yehovha, milomu ya vona yi susumetiwa hi xiyimo lexinene xa timbilu ta vona leswaku yi vulavula. (Luka 6:45) Xisweswo, nkarhi wihi na wihi lowu hi wu hetaka entirhweni wa nsimu n’hweti yin’wana ni yin’wana i wunene, a wu khomisi tingana, ngopfu-ngopfu loko wu kombisa leswaku hi endle leswi hi nga swi kotaka. Xana malinyana ya noni a yi tlangeriwanga swinene hi Yesu na Tata wakwe?—Luka 21:1-4.
14. U nga hlamusela yini malunghana ni ntirho wa vuphayona? (Nakambe vona chati.)
14 Eka nhlayo leyi engetelekaka ya vahuweleri, ku endla vugandzeri bya vona hi mbilu hinkwayo swi katsa ku tirha tanihi maphayona—laha nhlohlorhi ya lembe leri nga hundza a yi ri 890 231! Loko nhluvuko wa lembe leri nga hundza wu nga tsani, swi nga endleka leswaku nhlayo leyi yi hundza 1 000 000. Ntokoto lowu landzelaka wu kombisa ndlela leyi makwerhu wa xisati le Nigeria a ngheneleke ntirho wa vuphayona ha yona. Wa tsala: “Loko ndzi ri kusuhi ni ku heta xikolo xa le henhla, ndzi ye ndzi ya pfuna ku swekela lava a va ri kona exikolweni xa vuphayona xa Timbhoni ta Yehovha. Kwalaho ndzi hlangane ni vamakwerhu vambirhi va xisati lava a va tlula kokwa wa mina wa xisati hi vukhale. Loko ndzi twe leswaku a va ri maphayona lama a ma te exikolweni, ndzi tivutisile, ‘Loko vamakwerhu lava vambirhi va kota ku phayona, mina ndzi nga tsandziwa hi yini?’ Kutani endzhaku ko heta xikolo, na mina ndzi ve phayona ra nkarhi hinkwawo.”
15. Ku nyikela vumbhoni hi xitshuketa ku nga swi endla njhani leswaku van’wana va chavela eka Yehovha?
15 A hi hinkwavo lava nga kotaka ku phayona, kambe hinkwavo va nga kota ku nyikela vumbhoni. Le Belgium, makwerhu wa xisati wa malembe ya 82 hi vukhale u ye a ya xava nyama. U xiye leswaku nsati wa n’wini wa buchara a a karhatekile swinene hi mpfilumpfilu wa politiki lowu a wa ha ku endleka. Kutani makwerhu u fambise xiphephana lexi nge Xana Timbhoni Ta Yehovha Ti Pfumela Yini? kun’we ni mali ya maphepha loko a hakela. Loko makwerhu a tlhelele ebucharini, nsati wa n’wini wa buchara, handle ko tipfinyinga u vutise leswi Bibele yi swi vulaka malunghana ni loko nyimpi ya vunharhu ya misava yi ta va kona. Makwerhu u n’wi yisele buku leyi nge Ku Rhula Ka Ntiyiso Ni Nsirhelelo—U Nga Swi Kuma Njhani? Endzhaku ka masiku ma nga ri mangani, loko makwerhu wa xisati la dyuhaleke a nghena ebucharini, nsati wa n’wini wa buchara a a n’wi khomele swivutiso leswi engetelekeke. Makwerhu u twele wansati loyi vusiwana; u tinyiketele ku dyondza na yena Bibele, ivi a pfumela. Sweswi, nsati wa n’wini wa buchara u lava ku khuvuriwa. Ku vuriwa yini hi n’wini wa buchara hi byakwe? U hlaye xiphephana lexi, naswona sweswi na yena u dyondza Bibele.
‘Rifuwo Ra Vunene’
16. Yehovha u va hlayisele njhani vanhu vakwe rifuwo ra vunene?
16 Eminkarhini leyi ya makumu leyi tshikilelaka, xana Yehovha a nga wu ‘kombisanga nsovo lowukulu’ eka lava va chaveleke eka yena? Yehovha u hlayisele vana vakwe va laha misaveni rifuwo ra vunene, tanihi tatana wa rirhandzu, la sirhelelaka. A a ri karhi a tisa ntsako ehenhla ka vona, swi ri karhi swi voniwa hi vanhu hinkwavo, hi laha mupisalema a vulaka ha kona a ku: “Ku kurile ŝonghasi e ku kateka ka wena lo’ku u v̌ekelaka la’v̌a ku tšhav̌aka, loku u tiraka ha kona e mahlweni ka v̌ana v̌a vanhu, ni ku pfuna la’v̌a tšhav̌elaka ka wena.”—Pisalema 31:19, 21.
17-19. Le Ghana, i vuyelo byihi lebyinene lebyi veke kona hikwalaho ka mukhalabye la tsariseke vukati byakwe?
17 Hikwalaho, vanhu va misava va ku vona hi mahlo ya vona ku tshembeka ka lava va gandzelaka Yehovha, kutani va hlamala. Hi xikombiso, le Ghana, mukhalabye wa malembe ya 96 u ye ehofisini ya mutsarisi wa vukati, a kombela leswaku vukati byakwe bya malembe ya 70 lebyi nga riki enawini byi tsarisiwa byi va enawini. Mutsarisi wa vukati a a hlamarile, ivi a vutisa a ku: “Xana a wo tlanga ke? Xana u lava ku tsarisa u ri ni malembe yo tano ke?”
18 Wanuna loyi u hlamuserile a ku: “Ndzi lava ku va un’wana wa Timbhoni ta Yehovha, ndzi ta hlanganyela entirhweni wa nkoka swinene makumu ya misava ma nga si fika—ku nga ntirho wo chumayela mahungu lamanene ya Mfumo wa Xikwembu. Ntirho lowu wu yisa evuton’wini lebyi nga heriki. Timbhoni ta Yehovha ta wu yingisa nawu wa tiko, ku katsa ni nawu wa ku tsarisa vukati. Kutani ndzi kombela leswaku u tsarisa vukati bya mina.” Mutsarisi u sale a hlamarile. U tsarise vukati, kutani mukhalabye a famba a tsakile tanihi leswi se vukati byakwe a byi tsarisiwile.—Ringanisa Varhoma 12:2.
19 Endzhaku ka sweswo, mutsarisi wa vukati u anakanyisise hi swilo leswi a swi tweke. “Timbhoni ta Yehovha . . . ntirho wa nkoka swinene . . . makumu ya misava . . . Mfumo wa Xikwembu . . . vutomi lebyi nga heriki.” Hi ku hlamarisiwa hi mhaka leyi leswi hinkwaswo swi vulaka swona evuton’wini bya mukhalabye wa malembe ya 96, u endle xiboho xo famba a lava Timbhoni leswaku a ya emahlweni a kambisisa mhaka leyi. U amukele dyondzo ya le kaya ya Bibele, kutani a endla nhluvuko hi xihatla. Namuntlha, mutsarisi loyi wa vukati i Mbhoni leyi khuvuriweke. Kutani loko hi yingisa Yehovha ni le ka timhaka leti van’wana va nga ti xiyaka tanihi leti nga nyawuriki, swi nga tisa nkateko lowu nga hlamuselekiki eka hina ni le ka lava va nga timbhoni leti vonaka mahanyelo ya hina hi mahlo.—Ringanisa 1 Petro 2:12.
20. Le Myanmar, ku tshembeka ka makwerhu un’wana lontsongo wa xisati ku yi pfule njhani ndlela leyinene yo nyikela vumbhoni?
20 Vanhu lavakulu lava pfumeleleke ntiyiso wu va hundzula va va vanhu vo tshembeka va vekela vantshwa xikombiso lexinene emisaveni leyi yi nga tshembekiki. Le Myanmar ku ni makwerhu wo tano la ha riki muntshwa. U huma emutini lowu nga evuswetini ni lowu nga nyawuriki, lowu nga ni vana va khume. Tata wakwe, loyi a holaka mali ya mudende, i phayona ra nkarhi hinkwawo. Siku rin’wana exikolweni, makwerhu loyi wa xisati u thumbhe xingwavila xa dayimani, ivi a hatlisa a xi yisa eka mudyondzisi wakwe. Loko tlilasi yi hlangana siku leri landzelaka, mudyondzisi u byele tlilasi leswaku xingwavila lexi xi kumisiwe ku yini ivi xi vuyisiwa leswaku xi tlheriseriwa eka n’wini wa xona. Kutani u kombele makwerhu wa xisati lontsongo leswaku a yima emahlweni ka tlilasi hinkwayo, a hlamusela leswaku ha yini a endle leswi, kasi wa swi tiva leswaku vana van’wana ingi va hlawule ku tshama na xona. Makwerhu loyi u hlamusele leswaku yena i Mbhoni ya Yehovha ni leswaku Xikwembu xa yena a xi swi lavi ku yiva kumbe ku endla xihi na xihi lexi kombisaka ku nga tshembeki. Xikolo hinkwaxo xi twe hi ta mhaka leyi, kutani makwerhu lontsongo a kuma nkarhi lowu n’wi pfulekeleke wo nyikela vumbhoni eka vadyondzisi ni swichudeni.
21. Loko vantshwa va tshemba Yehovha, mahanyelo ya vona ma n’wi khumbisa ku yini?
21 Le Belgium, mudyondzisi un’wana u vulavule marito lama tsakisaka etlilasini malunghana ni Timbhoni ta Yehovha. U xiye mahanyelo ya un’wana wa vana lava a va dyondzisaka, loyi na yena a ku ri makwerhu lontsongo wa xisati, kutani a ku: “Sweswi se ndzi lulamise langutelo ra mina hi Timbhoni ta Yehovha. Xihlawuhlawu xi ndzi susumetele ku anakanya leswaku i vanhu va ximbilwambilwana. Va tikombise va ri vanhu lava lehisaka timbilu swinene, kambe va nga landzuli misinya ya vona ya milawu.” Lembe na lembe vana lava tirheke kahle swinene va nyikiwa sagwadi hi vadyondzisi va vona. Rin’wana ra masagwadi lawa ri nyikiwa vana lava nga ni mahanyelo lamanene. Malembe manharhu hi ku landzelelana, mudyondzisi loyi u nyike vana lava nga Timbhoni ta Yehovha masagwadi manharhu ya xiyimo xa le henhla. Kutani lava va tshembaka Yehovha hi timbilu ta vona hinkwato hakanyingi va kuma hakelo yo tano.—Pisalema 31:23.
22. Hi wahi mahetelelo lama tsakisaka ya Pisalema 31, naswona ma hi pfuna njhani hi nkarhi wa masiku yo hetelela ya mafambiselo lawa ya swilo?
22 Pisalema 31 yi hetelela hi marito yo tsakisa swinene: “[Vanani ni xivindzi]; timbilu ta n’wina a ti tiye, ṅwina hikwenu la’v̌a langutelaka Yehova!” (Pisalema 31:24) Hikwalaho, tanihi leswi hi langutaneke ni masiku yo hetelela ya mafambiselo yo homboloka ya Sathana, Yehovha u ta tshinela swinene eka hina, a hi nyika matimba yakwe, ematshan’wini yo hi tshika. Yehovha u tshembekile naswona a nga hluriwi hi nchumu. I vuchavelo bya hina; i khokholo ra hina.—Swivuriso 18:10.
Wa Tsundzuka Xana?
◻ Ha yini hi fanele hi endla Yehovha khokholo ra hina hi ku tiyiseka?
◻ I vumbhoni byihi lebyi nga kona bya leswaku khorasi leyikulu yi twarisa rungula ra Mfumo hi xivindzi?
◻ Ha yihi hi fanele ku tiyiseka leswaku ntlhamu wa Sathana a wu nge va phasi vanhu va Yehovha?
◻ I rifuwo rihi leri Yehovha a ri hlayiseleke lava chavelaka eka yena?
[Chati leyi nga eka tluka 12-15]
XIVIKO XA NTIRHO WA LEMBE RA 1993 WA TIMBHONI TA YEHOVHA EMISAVENI HINKWAYO
(See bound volume)
[Swifaniso leswi nga eka tluka 16, 17]
Lava chavelaka eka Yehovha va vumba khorasi leyikulu ya vahuweleri va Mfumo—va 4 709 889!
1. Senegal
2. Brazil
3. Chile
4. Bolivia