Xana Wa N’wi Pfuna N’wana Wa Wena Leswaku A Hlawula Yehovha?

JAHA rin’wana ri te: “Ndzi vone onge ku hlaya Bibele a swi lolohisa ni ku nghena ematsolweni. Ndzi tibyerile embilwini ya mina leswaku a ndzi nge vi un’wana wa Timbhoni ta Yehovha loko ndzi kurile.” Hambi leswi handle ko kanakana vana vo tala emindyangwini ya Vukreste va nga hlawulaka ku gandzela Yehovha hi ku helela, vana van’wana vo tanihi yena swi nga ha va nonon’hwela ku hlawula Yehovha tanihi Xikwembu xa vona.

Vatswari minkarhi yin’wana a va tiyiseki leswaku va nga dyondzisa vana va vona hi ndlela yihi leyi humelelaka. Va tikambisisa swinene, ku fana ni tatana loyi a karhatekeke, loyi a tshameke a ku: “Kahle-kahle, a ku ri na minkarhi leyi a ndzi languta xikandza lexi tsaneke xa vana va mina, mihloti ya gome ya ha ri emarhameni ya vona, ivi ndzi tivutisa loko a ndzi nga fanelanga ndzi ve ni tintswalo letikulu.” Majaha ya yena mambirhi ma kurile naswona ma hlawule ku tirhela Yehovha.

Hambi swi ri tano ku ni vana lava tshikaka Yehovha ni vandlha ra Vukreste hikwalaho ka misava ya Sathana. Hikwalaho vatswari va nga humelela hi ndlela yihi ku pfuna vana va vona leswaku va hlawula Yehovha? Ku hlamula xivutiso lexi, a hi sunguleni hi kuma leswaku hikwalaho ka yini vana van’wana va tshika Yehovha kasi vatswari va vona hi ku hiseka va lava leswaku va tshama na yena.

Lexi Endlaka Vana Van’wana Va Tshika Yehovha

Yin’wana ya tinhla to tala leti tolovelekeke hi leswaku vana van’wana a va n’wi tivi Yehovha kumbe tindlela ta yena hi laha ku heleleke. Hambi leswi va vaka kona emihlanganweni ya Vukreste ku sukela evutsongwanini bya vona, vo va kona ntsena ku hetisisa nawu, kambe a va n’wi lavisisi Yehovha hi xiviri. (Esaya 55:6; Mintirho 17:27) Jaha leri boxiweke laha henhla a ri lolohisiwa hi mihlangano ya Vukreste hikuva a ri nga swi twisisi leswi xivulavuri a xi swi vula exitejini.

Timbewu ta ntiyiso ta byariwa eka van’wana, kambe va pfumelela timbilu ta vona leswaku ti kokiwa hi mahanyelo lama vonakaka ma tsakisa, ya ku hlongorisa swilo leswi vonakaka swa misava ya Sathana. Van’wana a va swi koti ku lwisana ni ku navela lokukulu ka ku lava ku va swin’we ni tintangha ta vona ni ku lava ku fana na tona.—1 Tikronika 28:9; Luka 8:12-14; 1 Vakorinto 15:33.

Hambi swi ri tano, emisaveni hinkwayo vana vo tala emidyangwini ya Vukreste va hlawule ku yima etlhelweni ra Yehovha. Xana swi kona leswi swi nga dyondziwaka eka goza lerinene leri vatswari va vona va ri tekeke?

Sungula Ka Ha Ri Ni Nkarhi

Xa nkoka ngopfu eku pfuneni ka vana va wena leswaku va hlawula Yehovha i ku sungula ka ha ri ni nkarhi. Hi minkarhi yo tala, minsusumeto leyi kumiweke ni tidyondzo leti dyondziweke loko mbilu yi tsakile, yi ri ni ku yingisa ti ta tshama nkarhi wo leha. (Swivuriso 22:6) Hikwalaho sungula ka ha ri ni nkarhi ku byela vana va wena hi vunene bya Yehovha, hi rirhandzu ra yena ni xichavo xa yena, u lwela ku aka etimbilwini ta vona rirhandzu eka Yehovha ni ku tlangela leswi Yehovha a va endleleke swona. Ku hetisisa leswi, vatswari vo tala va ye emahlweni va tirhisa swihloko swo tala leswi vulavuka hi ntumbuluko wa Yehovha leswi kumekaka etibukwini ta Sosayiti ya Watchtower.

Ku yingisa ni xichavo eka Yehovha ni vugandzeri bya yena hi tin’wana ta timfanelo leti faneleke ku dyondziwa ka ha ri ni nkarhi evuton’wini. Swi nyika matimba ku vona vana lavatsongo emihlanganweni ya Vukreste va tikarhatela ku teka tinhla to olova ni ku languta matsalwa eTibibeleni ta vona kumbe va famba ni vatswari va vona evuhlambelweni ku ya hlamba swikandza swa vona hi mati yo titimela loko va khomiwa hi vurhongo. Leswi i swilo leswi olovaka, kambe i swa nkoka swinene eku pfuneni ka vana ku xiya leswaku xichavo ni ku titsongahata swi fanele ku kombisiwa eka Yehovha!

Nkongomiso wa nkoka wa munhu hi xiyexe wa Bibele na wona wu fanele ku sungula ka ha ri ni nkarhi. Loko majaha ya vona ma ri ni malembe mambirhi hi vukhale, mpatswa wun’wana wu sungule ku hlaya na vona buku leyi nge Listening to the Great Teacher.a Endzhakunyana, loko majaha ya vona ma sungule xikolo, a va pfuka mixo wun’wana ni wun’wana va dyondza ni mana wa vona tibuku leti nge Buku Yanga Ya Timhaka Ta Bibele na U Nga Hanya Hi Masiku aParadeyisini eMisaveni.* Leswi a swi landzeriwa hi bulo ra ndzimana ya siku leri fambisiwaka hi tatana ku nga si fihluriwa. Matshalatshala ya vatswari ma vuyeriwe swinene loko endzhakunyana vana va vona va hlawule ku tirhela Yehovha, va kombisa ku tinyiketela ka vona hi ku khuvuriwa ematini va ri ni malembe ya 10 na 11.

Jaha lerinene leritsongo leri tirhaka eka hofisi ya rhavi ra Sosayiti ya Watch Tower eJapani ri vule leswaku loko ra ha ri ritsongo swinene, mana wa rona u ri pfunile ku kurisa vuxaka na Yehovha hi ku tshama etlhelo ka rona ni vusiku, a ri pfuna ku khongela. A ri yi rivalanga dyondzo leyi ri dyondzisiweke yona—ku nga khathariseki leswaku ri le kwini kumbe ri endla yini, Yehovha a tshama a ri kusuhi na rona ni ku tshama a lunghekele ku ri pfuna.

Vatswari lava humelelaka va xiya mimboyamelo leyo biha leyi vaka kona hikwalaho ka ku nga hetiseki loku vana va tswariweke na kona, naswona vatswari va fanele ku sungula ka ha ri ni nkarhi ku pfuna vana va vona ku lulamisa mimboyamelo leyi. (Swivuriso 22:15) Mimboyamelo ya vutianakanyi vutiarisi, ku tikurisa, ku xopaxopa ngopfu van’wana, yi fanele ku kambisisiwa ka ha ri ni nkarhi. Loko swi nga ri tano, mbewu yo tano yi ta kula yi xandzukela Xikwembu, ni tindlela ta xona endzhakunyana. Hi xikombiso, vatswari lava nga ni swikongomelo leswinene, lava hi tlhelo va tshikaka vana va vona va tilawula hakanyingi va endla leswaku va kula va ri ni vutianakanyi. Vana volavo va kuma swi nonon’hwa ku xixima vatswari va vona hambi Yehovha, va fana ni ‘lava nga khensiki’ lava vuriweke eBibeleni. (Swivuriso 29:21) Hi tlhelo rin’wana, vana lava nyikiweke mintirho ya le kaya ni lava dyondzisiweke ku xalamukela swilaveko swa van’wana va va lava khensaka vatswari va vona kun’we na Yehovha.

Xin’wana xa nkoka i ku veka pakani ya ntirho wa mfumo wa Xikwembu leyi n’wana a nga yi fikelelaka hi ku olova. Loko leswi swi nga endliwi hi nkarhi na hi ku phindha-phindha, van’wana va nga chela tipakani to hambana-hambana emianakanyweni ni le mbilwini ya yena. Ku hlaya Bibele hinkwayo, ku va ni dyondzo ya munhu hi xiyexe hi ku tirhisa yin’wana ya tibuku leti humesiwaka hi Sosayiti ya Watchtower, ku hlanganyela eXikolweni xa Vutirheli bya le Tilweni, ku va muhuweleri wa mahungu lamanene, na ku khuvuriwa swi fanele swi katsiwa eka tipakani toleto.

Takafumi u hlamusela leswaku mana wa yena u n’wi tolovete ku hlaya timagazini ta Xihondzo xo Rindza na Xalamuka! hi ku n’wi endlela swivutiso swo olova ivi a swi siya exitangeni leswaku a ta swi kuma kona loko a vuya exikolweni. Yuri u tsundzuka leswaku ku tshama masikunyana ni maphayonab a pfuna laha xilaveko xa vatirheli va Vukreste xi kuleke kona, ku famba na vona evutirhelini, ku va vona va sweka swakudya swa kahle, ni ku xiya ntsako ni ku hiseka ka vona swi kucetele swinene ku navela ka yena ku tirhela Yehovha hi ndlela leyi fanaka. Vana vo tala va vula leswaku vatswari va vona a va va tisa eBethele nkarhi na nkarhi, hi laha yindlu-nkulu ni marhavi ya Sosayiti ya Watch Tower swi vitaniwaka ha kona, laha va nga vonaka majaha ni vanhwana va tirhela Yehovha hi ntsako. Vo tala lava endzeke loko va ha ri vana sweswi va tirha eTibethele emisaveni hinkwayo.

Nyika Vana Va Wena Nkarhi

Nhlayo ni nkoka wa nkarhi lowu u wu hetaka ni vana va wena wu tava ni nsusumeto lowu kongomeke wa leswaku va hlawula ku tirhela Yehovha kumbe e-e. Va hatlisa ku vona nkarhi lowu u wu tirhisaka ni mukhuva lowu u lunghiselelaka ha wona dyondzo ya Bibele leyi u yi fambisaka na vona. Loko u nga ha tsundzuki laha mi yimeke kona eka dyondzo leyi hundzeke kumbe u tlurisa dyondzo hikwalaho ka swivangelo leswi nga twaliki, u kombisa mianakanyo ya leswaku dyondzo a hi ya nkoka ngopfu. Hambi swi ri tano, loko va vona vatswari va vona va tinyiketela edyondzweni, va yi lunghiselela kahle naswona va fambisa dyondzo nkarhi na nkarhi ku nga khathariseki ku kavanyeta loku nga humelelaka, sweswo swi ta kombisa mianakanyo leyi hambaneke ni leyo sungula hi ku helela. Hambi leswi swi nga riki xilaveko, vamanana van’wana va ambala hi ndlela ya kahle loko va dyondza ni vana va vona, ku fana ni loko va ya emihlanganweni kumbe va fambisa dyondzo ya Bibele ni muakelani. Yinhla leyi nyikeriwaka hi leswaku vugandzeri bya Yehovha i bya nkoka.

Nkarhi wo tala ni matshalatshala swi ta laveka ku endla dyondzo ya Bibele ya vana va wena yi tsakisa, yi fikelela timbilu ta vona. Vana lavatsongo ngopfu-ngopfu va tsaka loko va vona swilo leswi va dyondzisiweke swona swi endliwa emahlweni ka vona. Hi xikombiso, tatana un’wana u pfune vana va yena ku vona ku pfuxiwa ka vafi hi ku encenyeta leswi Bibele yi swi vulaka hi ku pfuka ka Lazaro eku feni. U nghene exiyindlwanini ivi a huma ku fana na Lazaro loyi a pfuxiweke.—Yohane 11:17-44.

Loko vana va ya va kula, swi teka nkarhi wo tala ni vutshila ku langutana ni mitlhaveko, mikanakano, ni mivilelo yo tala leyi va hlanganaka na yona. Nkarhi lowu vekiwaka etlhelo hi vatswari lava nga ni rirhandzu ni ku twisisa eka xiyimo lexi i swa nkoka ngopfu loko vana va ta kurisa ntshembo wa vona eka Yehovha. Tatana un’wana loyi a humeleleke wa vana va mune u hlamusele leswaku loko vana va yena va hlangana ni swirhalanganya swo hambana-hambana, a a kambisisa ni ku bula na vona hi mhaka leyi humesiweke eminkandziyisweni ya Watchtower siku na siku ku fikela loko swiphiqo swi hluriwile.

Manana wa migingiriko wa phayona loyi a ri na vana vambirhi u xiye leswaku nhwanyana wa yena a a sungula ku ntlhetlha ni ku pfumala ntsako emintirhweni ya swa le tilweni. Kutani manana yoloye u hlele ku va ekaya loko n’wana wa yena a vuya exikolweni nhlikani wun’wana ni wun’wana, a vulavurisana ni nhwanyana wa yena va ri karhi va nwa tiya. Eka bulo ra xinghana ra manana ni nhwanyana, nhwanyana loyi u kume mpfuno lowu a wu lava. Sweswi, endzhaku ka ku thwasa exikolweni xa le henhla, u sungule ku hlanganyela ni mana wakwe entirhweni wa vuphayona.—Swivuriso 20:5.

Vunghana Lebyinene Ni Xikombiso

Ku engetela eku va nyikeni ka nkarhi wa vona, vatswari va fanele va va ni vunghana lebyinene ni vana va vona. Swivuriso 13:20 yi ri: “L’a fambaka ni tintlhari o ta tlhariha. Kambe l’a tolovelaka ŝihunguki o ta onhaka.”

Vatswari vo tala lava humelelaka va wu xiya ntiyiso wa sweswo. Tatana loyi a nga na vana va mune u ri: “Loko ndzi ehleketa hi leswi hundzeke, ndzi vona onge a ku ri ntlawa lowukulu wa vanghana va vana va hina lowu a wu ri entiyisweni lowu hi pfuneke ku va tisa va ta tirhela Yehovha. Ndzi va khutaze ku endla vanghana emavandlheni man’wana ku katsa ni vanghana va hina ni ku hlakulela vunghana byebyo.” Nkulu wa Vukreste loyi a tirheke eBethele malembe yo hlaya u tsundzuka leswi: “Loko ndza ha ri ntsongo, a hi tshama exiyindlwanini, kambe nkarhi hinkwawo a xi tirhisiwa tanihi vutshamo bya mulanguteri wa xifundzha. Ku engetela kwalaho, maphayona yo hlawuleka evandlheni ra ka hina nkarhi hinkwawo a ma dya swakudya na hina. A va hlamba endlwini ya ka hina naswona va tihlanganisa na hina. Ku twa mintokoto ya vona ni ku vona ntsako wa vona swi ndzi pfune ku hlakulela ku tlangela ntirho wa nkarhi hinkwawo.”

Vunghana lebyinene byi pfuna lava hlanganaka ni ku tikeriwa. Manana loyi n’wana wa yena wa jaha a veke ni ku nonon’hweriwa u vulavurisane ni mulanguteri la famba-fambaka wa Timbhoni ta Yehovha hi xiphiqo lexi. U ringanyete leswaku a famba ni n’wana wa yena wa jaha ensin’wini. Mulanguteri u te: “Loko u swi endla, vumoya bya yena ni swiphiqo swin’wana swa yena swi ta antswa.” Wa vika: “Evandlheni ra ka hina a ku ri ni lunghiselelo ra ku chumayela ni madyambu, naswona vana vo tala lava nghenaka xikolo, van’wana ku ri maphayona lama kuleke ya nkarhi hinkwawo, na un’wana wa vakulu va hlanganyerile eka rona. Eku sunguleni a ku ri nyimpi ku endla leswaku n’wana wa mina wa jaha a huma nkarhi na nkarhi, kambe sweswo swi cince hi ku hatlisa tanihi leswi loko a vuya ekaya nkarhi na nkarhi a a va a tsakile ngopfu ni ku khutazeka hi vunghana lebyinene. Loko a ha ri xichudeni exikolweni xa le henhla, u khuvuriwile naswona a tirha tanihi phayona ra nkarhinyana n’hweti yin’wana ni yin’wana, naswona loko a thwasile u ve phayona ra nkarhi hinkwawo.” Vunghana lebyinene ni ku endla ku rhandza ka Yehovha swi tise vuyelo lebyinene.

Ku nga ha va ku nga ri na vana endhawini ya ka n’wina lava nga vaka ni nsusumeto lowunene eka vana va wena, kambe leswi kumiwaka hi ku phindha-phindha hi vana vo tala lava hlawuleke ku tirhela Yehovha swi khumba swikombiso swa vatswari va vona. Vana vo tala a va navela leswi endliwaka hi vatswari va vona naswona a va lava ku tekelela vona. Yuri u tsundzuka malwandla ya mana wa yena ni ndlela leyi a pfuneke van’wana ha yona, a va bela riqingo naswona a endlela vavabyi swakudya. Tatsuo, loyi a ri xirho xa ndyangu wa majaha ya mune, lawa sweswi ma kuleke naswona ma tirhelaka Yehovha, u te: “Manana a a nga swi koti ku dyondza na hina nkarhi wo tala hikuva Tatana a a nga ri mupfumeri naswona a a kanetiwa ngopfu hi maxaka. Kambe hi ku xiya ku yima ka yena entiyisweni ni ntsako wa yena entirhweni wa Yehovha swi ndzi khumbile swinene. Naswona a ti yimisele ku tshama ku fikela ku va matakuxa ku hi pfuna hi swiphiqo swa hina.” Marito ya vutswari ya vutlharhi ma ni matimba loko ma seketeriwa hi mintirho ya ripfumelo. Yoichiro u vulavule hi vatswari va yena a ku: “A ndzi tsundzuki ni kan’we laha va nga tshama va hleva van’wana hi ndlela yo biha evandlheni; hambi ku pfumelela hina vana ku vulavula hi swihoxo swa van’wana.”—Luka 6:40-42.

Ntsako Wa Ku Vona Vana Va Hlawula Yehovha

A ku na ntshembo lowu tiyeke wa leswaku u nga pfuna vana va wena ku hlawula Yehovha. Ku ta va ni minkarhi yo tala yo nonon’hwa. Kambe, tatana loyi a karhatekeke loyi a boxiweke eku sunguleni u te: “Tanihi vatswari minkarhi hinkwayo hi ringete hi matimba ku landzelela swiringanyeto swa nhlengeletano ya Yehovha leyi vonakaka. Lowu a ku ri mpfuno lowukulu wo hlula swiphiqo.” Matshalatshala ya vona ma humelerile.

Ina, hi ku endla hi matimba ya wena hinkwawo ku landzela minkongomiso ya Bibele, u dyondzisa vana va wena swivangelo leswi twalaka swa ku rhandza Yehovha, leswi sekeriwaka hi xikombiso xa wena xa ku tshembeka ni matshalatshala yo tiyimisela ku pfuna, na wena eku heteleleni u nga humelela. Xana wa ri tsundzuka jaha leri boxiweke eku sunguleni, leri kaneleke ku ka ri nga vi un’wana wa Timbhoni ta Yehovha? Hambi swi ri tano, endzhaku ka loko mana wa rona a ri pfune hi laha ku humelelaka eka malembe ya rona layo tika, ri te: “Ndza tsaka hikuva a nga helanga matimba!” U nga ha va ni vuyelo lebyi fanaka hi vana va wena.—Vagalatiya 6:9.

[Tinhlamuselo ta le hansi]

[Xifaniso lexi nga eka tluka 30]

Xana u nga va ni ntsako loko u tsundzuka malembe lawa vana a va ha kula eka wona?