Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w94 12/15 matl. 8-13
  • Yehovha A Nga Ku Tiyisa

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Yehovha A Nga Ku Tiyisa
  • Xihondzo xo Rindza Xi Huwelela Mfumo Wa Yehovha—1994
  • Swihloko
  • Tinhlokomhaka Tin'wana Leti Yelana Na Yona
  • Matimba Lama Kombisiwaka Hi N’wana Wa Xona
  • Ku Tiyisiwa eKolosa
  • Ku Tiyisiwa Ni Namuntlha
  • Hi Tiyiseriwa Xikongomelo Xihi?
  • Buku Ya Bibele Ya Vu-51—Vakolosa
    “Matsalwa Hinkwawo Ma Huhuteriwe Hi Xikwembu Naswona Ma Pfuna”
  • Pfuna Van’wana Leswaku Va Famba Hi Mukhuva Lowu Fanelaka Eka Yehovha
    Xihondzo xo Rindza Xi Huwelela Mfumo Wa Yehovha—2000
  • “Lavisisani Yehovha Ni Ntamu Wakwe”
    Xihondzo xo Rindza Xi Huwelela Mfumo Wa Yehovha—2000
  • “Yehovha U . . . Ni Matimba Lamakulu”
    Tshinela Eka Yehovha
Vona Swo Tala
Xihondzo xo Rindza Xi Huwelela Mfumo Wa Yehovha—1994
w94 12/15 matl. 8-13

Yehovha A Nga Ku Tiyisa

“O nyika l’a kareleke matimba ya yena, o pfuša l’a heleke mbilu.”—ESAYA 40:29.

1, 2. Hi byihi vumbhoni byin’wana bya matimba lamakulu ya Yehovha?

YEHOVHA i Xikwembu xa ‘matimba lamakulu.’ Hi kota ku vona vumbhoni bya “matimba ya xona lama nga heriki ni vukwembu bya xona” Xikwembu, eka vukulu bya swivumbiwa swa xona leswi vonakaka. Lava alaka ku amukela vumbhoni byo tano bya Vuvumbi bya xona va hava xo tilandzula ha xona.—Pisalema 147:5; Varhoma 1:19, 20.

2 Matimba ya Yehovha ma ya emahlweni ma vonaka tanihi leswi vativi va sayense va kambisisaka vuako hinkwabyo hi vuenti, kun’we ni swirimele swa byona swa ntsandza-vahlayi leswi tekaka madzana ya timiliyoni ta malembe-nseve. Evusikwini lebyi nga ni xinyama lebyi nga riki na mapapa, languta ematilweni kutani u vona loko u ta ka u nga titwi ku fana ni mupisalema: “Loko nḍi hlalela matilo, e ntiro wa tintiho ta wena, ni ṅhweti, ni tinyeleti leti u ti lungiseke; nḍi ku: Munhu wa-ku-fa [i] yini, leŝaku u ṅwi anakanya?” (Pisalema 8:3, 4) Naswona Yehovha u va khathalele kahle swinene vanhu, ku nga hina! U endlele wanuna ni wansati vo sungula kaya ro saseka ra laha misaveni. Misava ya kona a yi ri ni matimba—yo mirisa swimilana, yo humesa swakudya leswi akaka, leswi nga thyakangiki. Vanhu ni swiharhi va kuma matimba ya nyama endleleni leyi Xikwembu xi kombisaka matimba ya xona ha yona.—Genesa 1:12; 4:12; 1 Samuwele 28:22.

3. Handle ka swilo leswi vonakaka swa vuako hinkwabyo, i yini swin’wana leswi kombisaka matimba ya Xikwembu?

3 Ku engetela eka leswi hi nyanyuriwaka hi matilo ni leswi swimilana ni swiharhi swa misava swi hi tsakisaka, swi hi kombisa matimba ya Xikwembu. Muapostola Pawulo u tsarile: “Hi mpfhuka misava yi tumbuluka, leswi nga vonakiki swa Xikwembu, ma nga matimba ya xona lama nga heriki ni vukwembu bya xona, swa vonaka swinene loko ku anakanyiwa mintirho ya xona.” (Varhoma 1:20) Kambe ku ni xikombiso xin’wana xa matimba ya xona lexi hi faneleke ku xi xiyisisa ni ku xi tlangela. U nga ha vutisa u ku, ‘I yini lexi nga kombisaka matimba ya Xikwembu ku tlula vuako?’ Nhlamulo ya kona i Yesu Kreste. Entiyisweni, ehansi ka ku huhuteriwa muapostola Pawulo u vula leswaku Kreste la beleriweke i “matimba ya Xikwembu ni vutlhari bya xona.” (1 Vakorinto 1:24) U nga ha vutisa u ku, ‘Ha yini swi ri tano? Naswona xana swi byi khumba njhani vutomi bya mina sweswi?’

Matimba Lama Kombisiwaka Hi N’wana Wa Xona

4. Xana matimba ya Xikwembu ma kombisiwe njhani malunghana ni N’wana wa xona?

4 Matimba ya Xikwembu ma kombisiwe ro sungula loko xi vumba N’wana wa xona la velekiweke a ri swakwe, la endliweke hi xifaniso xa xona. N’wana loyi wa moya u tirhele Yehovha tanihi ‘mutirhi lonkulu’ hi ku tirhisa matimba lamakulu ya Xikwembu eku vumbeni ka swilo leswin’wana hinkwaswo. (Swivuriso 8:22, 30) Pawulo u tsalele vamakwavo va Vakreste eKolosa a ku: “Ha yena, Xikwembu xi tumbuluxile swilo hinkwaswo, ematilweni ni la misaveni, swilo leswi vonekaka ni leswi nga vonekiki . . . Hinkwaswo swi tumbuluxiwile ha yena, naswona swi tumbuluxeriwe yena.”—Vakolosa 1:15, 16.

5-7. (a) Enkarhini lowu hundzeke, xana vanhu a va katseka njhani eku kombisiweni ka matimba ya Xikwembu? (b) Hi xihi xivangelo lexi nga kona xo pfumela leswaku matimba ya Xikwembu ma nga kombisiwa eka Vakreste namuntlha?

5 Hina hi xiphemu xa ‘swilo leswi vumbiweke emisaveni.’ Kutani xana hina vanhu hi nga nyikiwa matimba ya Xikwembu? Ina, eku tirhisaneni ka Xikwembu ni vanhu lava nga hetisekangiki, Yehovha minkarhi yin’wana u nyike malandza yakwe matimba leswaku ma hetisisa xikongomelo xakwe. Muxe a a swi tiva leswaku, hakanyingi, vanhu va hanya malembe ya 70 kumbe 80. (Pisalema 90:10) Ku vuriwa yini hi Muxe hi byakwe? U hanye malembe ya 120, kambe “mahlo ya yena a ma nga ṭananga, ni matimba ya yena ma nga helanga.” (Deteronoma 34:7) Hambi leswi sweswo swi nga vuliki swona leswaku Xikwembu xi endla nandza un’wana ni un’wana wa xona leswaku a hanya nkarhi wo lehisa xisweswo kumbe leswaku a va ni ntamu wo tano, swi kombisa leswaku Yehovha a nga va tiyisa vanhu.

6 Xin’wana lexi kombisaka vuswikoti bya Xikwembu byo tiyisa vavanuna ni vavasati hi leswi xi swi endleke eka nsati wa Abrahama. “Sara hi xiviri xa yena ú kotile ku va a tika hambileswi a a ri mhika, a hundzeriwile hi nkarhi, hikuva ú tivile leswaku loyi a n’wi tshembiseke wa tshembeka.” Kumbe anakanya hi ndlela leyi Xikwembu xi tiyiseke ha yona vaavanyisi ni van’wana eIsrayele: “Hi ta Gidiyoni, na Baraka, na Samsoni, na Yefta, ni ta Davhida na Samiele, ni ta vaprofeta . . . va kuma matimba va ri lava tsaneke.”—Vaheveru 11:11, 32-34.

7 Matimba yo tano ma nga tirha ni le ka hina. Ina, a hi nge languteli ku kuma vana hi hlori, naswona a hi nge vi na matimba yo fana ni ya Samsoni. Kambe hi nga va ni matimba, hi laha Pawulo a vuleke ha kona eka vanhu lava tolovelekeke eKolosa. Ina, Pawulo u tsalele vavanuna, vavasati ni vana, vo fana ni lava va nga kona emavandlheni namuntlha, naswona u vule leswaku a va “tiyisiwa swinene hi matimba.”—Vakolosa 1:11.

8, 9. Eka lembe-xidzana ro sungula, matimba ya Yehovha ma kombisiwe njhani eka vanhu vo fana na hina?

8 Enkarhini wa vutirheli bya Yesu bya laha misaveni, Yehovha u swi veke erivaleni leswaku matimba ya yena a ma tirha hi N’wana wakwe. Hi xikombiso, enkarhini lowu mintshungu yi khitikaneleke eka Yesu eKapernawume, “a ri karhi a hanyisa lava vabyaka, hikuva Xikwembu a xi n’wi nyikile matimba walawo.”—Luka 5:17.

9 Endzhaku ka ku pfuka kakwe eku feni, Yesu u tiyisekise valandzeri vakwe leswaku a va ta ‘kuma matimba loko moya lowo kwetsima wu fike ehenhla ka vona.’ (Mintirho 1:8) Leswi a ku ri ntiyiso hakunene! N’wamatimu un’wana u vika hi leswi endlekeke emasikwini ma nga ri mangani endzhaku ka Pentekosta ya 33 C.E.: “Vaapostola a va tiyisa hi matimba lamakulu vumbhoni bya ku pfuka ka Hosi Yesu eku feni.” (Mintirho 4:33) Pawulo hi byakwe hi yena loyi a tiyisiweke leswaku a endla ntirho lowu Xikwembu xi n’wi rhumeke leswaku a wu endla. Endzhaku ka ku hundzuka kakwe ni ku tlhela a vona kahle, “a a ri karhi a engeteleriwa matimba, a miyeta Vayuda lava akeke Damaska, hi ku va kombisa leswaku Yesu i Mesiya.”—Mintirho 9:22.

10. Xana matimba lama humaka eka Xikwembu ma n’wi pfune njhani Pawulo?

10 I ntiyiso leswaku Pawulo a a lava matimba lama engetelekeke, loko hi anakanya hi ntamu wa moya ni wa mianakanyo lowu a wu laveka leswaku a endla maendzo manharhu ya vurhumiwa a famba magidi ya tikhilomitara. Naswona u tiyiselele maxangu yo hambana-hambana, a khotsiwa ni ku dlawela ripfumelo. Njhani? U hlamule a ku: “Hosi yi yimile na mina yi ndzi tiyisa, leswaku ndzi kota ku vula Rito ndzi heta.”—2 Timotiya 4:6-8, 17; 2 Vakorinto 11:23-27.

11. Malunghana ni matimba ya Xikwembu, hi wihi ntshembo lowu Pawulo a vulavuleke ha wona eka malandza-kulobye ya le Kolosa?

11 Kutani, a swi hlamarisi leswi Pawulo loko a tsalela “vamakw[avo] lava tshembekaka eka Kriste” eKolosa, a va khorwiseke leswaku va nga “tiyisiwa swinene hi matimba, hi ku ya hi ntamu wa [Yehovha] wo twakala, [va] kota ku tiyisela swinene, ni ku leha mbilu [va] tsakile.” (Vakolosa 1:2, 11) Hambi leswi marito wolawo a ma kongomisiwe swinene eka Vakreste lava totiweke, hinkwavo lava landzaka mikondzo ya Kreste va nga vuyeriwa swinene eka leswi Pawulo a swi tsaleke.

Ku Tiyisiwa eKolosa

12, 13. Hi xihi xisekelo xa papila leri yaka eka Vakolosa, naswona ri nga ha va ri amukeriwe hi ndlela yihi?

12 Vandlha ra le Kolosa, leri a ri ri exifundzheni xa Rhoma eAsia, swi tikomba onge ri vumbiwe hikwalaho ka ku chumayela ka Mukreste wo tshembeka la vitaniwaka Epafrasi. Swi tikomba onge loko a twa hi ta ku khotsiwa ka Pawulo eRhoma kwalomu ka 58 C.E., Epafrasi a tiyimisele ku endzela muapostola ni ku n’wi khutaza hi xiviko lexinene xa rirhandzu ni ku tiya ka vamakwavo va le Kolosa. Epafrasi swi le rivaleni leswaku u vike xiviko xo tshembeka malunghana ni swiphiqo swin’wana evandlheni ra le Kolosa leswi a swi lava ku tlhantlhiwa. Kutani, Pawulo u titwe a susumeteleka ku tsalela vandlha papila ra xikhutazo ni xitsundzuxo. Na wena u nga ha kuma xikhutazo lexikulu eka ndzima 1 ya papila rero, hikuva yi kombisa ndlela leyi Yehovha a nga tiyisaka malandza yakwe ha yona.

13 U nga anakanya ndlela leyi vamakwerhu va xinuna ni va xisati va le Kolosa va faneleke va titwe ha yona loko Pawulo a va hlamusela tanihi “vamakwerhu lava tshembekaka eka Kriste.” A va fanele ku bumabumeriwa hi ‘ku rhandza ka vona vakwetsimi hinkwavo’ ni ku ‘humesa mihandzu ya mahungu lamanene’ ku sukela enkarhini lowu va veke Vakreste ha wona! Xana marito lama fanaka ma nga vuriwa evandlheni ra hina, ni le ka hina hexe?—Vakolosa 1:2-8.

14. Xana Pawulo a navela yini malunghana ni Vakolosa?

14 Pawulo u tsakisiwe swinene hi xiviko lexi a xi kumeke lerova u byele Vakolosa leswaku a nga tshikanga ku va khongelela ni ku kombela leswaku va “[tala] hi vutivi bya ku rhandza ka [Xikwembu], evutlharini hinkwabyo ni ku twisiseni hinkwako loku nyikiwaka hi Moya; hi ndlela leyi, [va] ta hanya vutomi lebyi fanekelaka emahlweni ka Hosi.” U va khongelele leswaku va “tswala mihandzu hi ku tirha mintirho leyinene ya tinxaka-xaka, [va] ya [va] kula hi tlhelo ra ku tiva Xikwembu. Mawaku loko [va] nga tiyisiwa swinene hi matimba, hi ku ya hi ntamu wa xona wo twakala, [va] kota ku tiyisela swinene, ni ku leha mbilu [va] tsakile.”—Vakolosa 1:9-11.

Ku Tiyisiwa Ni Namuntlha

15. Hi nga ri kombisa njhani langutelo leri fanaka ni leri kombisiweke eka leswi Pawulo a swi tsaleleke Vakolosa?

15 Mawaku xikombiso lexinene swonghasi lexi Pawulo a hi vekeleke xona! Vamakwerhu emisaveni hinkwavo va lava swikhongelo swa hina leswaku va tiyisela ni ku hlayisa ntsako wa vona ku nga khathariseki ku xaniseka ka vona. Ku fana na Pawulo, hi fanele hi vulavula hi ku kongoma eswikhongelweni swa hina loko hi twa timhaka ta leswaku vamakwerhu va vandlha rin’wana, kumbe va tiko rin’wana, va xaniseka. Swi nga ha endleka leswaku vandlha ra le kusuhi ri khumbekile hi mhangu ya ntumbuluko kumbe ku nonon’hweriwa ko karhi ka moya. Kumbe swi nga ha endleka leswaku Vakreste va hanya etikweni leri nga ni nyimpi ya xin’wana-manana kumbe ku dlayana ka vanhu va swivongo swo hambana. Loko hi khongela, hi fanele hi kombela Xikwembu leswaku xi pfuna vamakwerhu ‘leswaku va famba hi laha ku faneleke eka Yehovha,’ va hambeta va tswala mihandzu ya Mfumo eku tiyiseleni ka vona, ni ku kula hi vutivi. Hi ndlela leyi malandza ya Xikwembu ma kuma matimba ya moya wa xona, ma “tiyisiwa swinene hi matimba.” U nga tiyiseka leswaku Tata wa wena u ta ku twa a tlhela a ku hlamula.—1 Yohane 5:14, 15.

16, 17. (a) Hi laha Pawulo a tsaleke ha kona, hi fanele hi nkhensa yini? (b) Xana vanhu va Xikwembu va ntshunxiwile ni ku rivaleriwa hi mukhuva wihi?

16 Pawulo u tsale leswaku Vakolosa va fanele va ‘nkhensa Tatana loyi a va endleke va fanelekela ku hlanganyela eka ndzhaka ya vakwetsimi eku vonakaleni.’ Na hina a hi nkhenseni Tata wa hina wa le tilweni hikwalaho ka ndhawu leyi hi nga na yona elunghiselelweni rakwe, exivandleni xa le tilweni kumbe xa laha misaveni xa Mfumo wa yena. Xana Xikwembu xi va endlise ku yini vanhu lava nga hetisekangiki leswaku va faneleka emahlweni ka xona? Pawulo u tsalele vamakwavo lava totiweke a ku: “Ú hi humesile ematimbeni ya munyama, a hi rhurhisela eku fumeni ka N’wana wa yena loyi a rhandzekaka, loyi eka yena hi nga ni ku rivaleriwa ka swidyoho ni ku kutsuriwa.”—Vakolosa 1:12-14.

17 Ku nga khathariseki leswaku ntshembo wa hina hi wihi, i wa le tilweni kumbe i wa laha misaveni, hi nkhensa Xikwembu siku na siku hi ku kutsuriwa emafambiselweni lawa yo biha ya munyama, loku tisiweke hi ripfumelo ra hina elunghiselelweni ra risima ra gandzelo ra nkutsulo ra N’wana wa Yehovha la rhandzekaka. (Matewu 20:28) Vakreste lava totiweke hi moya va vuyeriwile eka nkutsulo lowu tirhisiweke eka vona hi ndlela yo hlawuleka leswaku va ‘yisiwa emfun’weni wa N’wana loyi a rhandziwaka hi Xikwembu.’ (Luka 22:20, 29, 30) Kambe “tinyimpfu tin’wana” na tona ta vuyeriwa eka nkutsulo hambi sweswi. (Yohane 10:16) Ti nga kuma ndzivalelo wa Xikwembu leswaku ti ta va ni xiyimo xo lulama emahlweni ka xona tanihi vanghana va xona. Ti ni xiphemu lexikulu eku huweleleni ka ‘mahungu lawa lamanene ya mfumo’ enkarhini lowu wa makumu. (Matewu 24:14) Ku tlula kwalaho, va ni ntshembo wo tsakisa wa ku va lavo lulama hi ku helela ni ku hetiseka emirini, eku heleni ka ku Fuma ka Kreste ka Gidi ra Malembe. Loko u hlaya nhlamuselo leyi nga eka Nhlavutelo 7:13-17, vona loko u nga pfumeli leswaku leswi swi ta va xikombiso xa ku kutsuriwa ni ku katekisiwa.

18. Hi kwihi ku vuyelelana loku boxiweke eka Vakolosa loku Xikwembu xa ha ku endlaka?

18 Papila ra Pawulo ri hi pfuna ku lemuka swilo swa risima swinene leswi nghwazi leyi tshameke yi hanya yi hi endleleke swona. Xana Xikwembu a xi hetisisa yini hi Kreste? “[A ku ri] leswaku, ha yena, swilo hinkwaswo swi vuyelelana na xona hikuva hi yena Kriste la tiseke ku rhula hi ku fa ka yena [emhandzini ya nxaniso, NW]; hinkwaswo, hambi la misaveni, hambi le matilweni.” Xikongomelo xa Xikwembu i ku tlherisela swivumbiwa hinkwaswo eka ntwanano lowu heleleke na xona, hi laha a swi ri ha kona emahlweni ka ku xandzuka aEdeni. Loyi a tirhisiweke ku vumba swilo hinkwaswo ka ha ri yena Loyi sweswi a tirhiseriwaka ku tisa ku vuyelelana loku.—Vakolosa 1:20.

Hi Tiyiseriwa Xikongomelo Xihi?

19, 20. Xana ku kwetsima ni ku pfumala xisolo ka hina ku titshege ha yini?

19 Vutihlamuleri byi le henhla ka lava vuyelelanaka ni Xikwembu. Eku sunguleni a hi dyohile naswona hi ri ekule ni Xikwembu. Kambe sweswi, leswi hi vekeke ripfumelo egandzelweni ra Yesu ni leswi mianakanyo ya hina yi nga ha riki kona emintirhweni yo biha, kahle-kahle hi le xiyin’weni ‘xo kwetsima ni lexi nga solekiki,’ ‘hi pfumala xihehlo emahlweni ka Xikwembu.’ (Vakolosa 1:21, 22) Anakanya, tanihi leswi Xikwembu a xi nga ri na tingana hi timbhoni letiya to tshembeka ta khale, kutani a xi na tingana hi hina, leswaku xi vitaniwa Xikwembu xa hina. (Vaheveru 11:16) Namuntlha, a nga kona loyi a nga hi solaka hikwalaho ka ku vitaniwa hi vito ra xona leri hlawulekeke, hambi ku ri hi ku chava ku twarisa vito rero ku ya fika emakun’wini ya misava!

20 Kambe xiya xitsundzuxo lexi Pawulo a xi tsaleke eka Vakolosa 1:23: “Mi fanele ku tiya eku pfumeleni, mi yimile emasungulweni ya kona mi nga tsekatseki, mi nga hambani ni ku tshemba loku mi ku kumeke hi ku twa Evhangeli; Evhangeli leyi yi twarisiwile eka swivumbiwa hinkwaswo leswi nge hansi ka tilo.” Leswi hina hi faneleke ku swi endla i ku tshama hi tshembekile eka Yehovha, hi landzela emikondzweni ya N’wana wakwe la rhandzekaka. Yehovha na Yesu va hi endlele swilo leswikulu ngopfu! Onge hi nga kombisa ku va rhandza hi ku landzelela ndzayo ya Pawulo.

21. Ha yini hi ri ni xivangelo lexikulu xa ku tsaka namuntlha?

21 Vakreste va le Kolosa va fanele va tsakile loko va twa leswaku ‘mahungu lamanene lawa va ma tweke’ se a ma “twarisiwile eka swivumbiwa hinkwaswo leswi nge hansi ka tilo.” Namuntlha swi nyanyula ngopfu ku twa mpimo lowu mahungu lamanene ya Mfumo ma twarisiwaka ha wona hi Timbhoni to tlula timiliyoni ta mune ni hafu ematikweni yo tlula 230. Phela, lembe na lembe vanhu va kwalomu ka 300 000 va le matikweni hinkwawo va vuyelelana ni Xikwembu!—Matewu 24:14; 28:19, 20.

22. Hambi loko hi xaniseka, xana Xikwembu xi nga hi endlela yini?

22 Hambi leswi swi tikombaka onge Pawulo a pfaleriwe ekhotsweni loko a tsala papila ra Vakolosa, a nga vilelanga hi swiphiqo swakwe. Ematshan’weni ya sweswo, u te: “Sweswi ke, ndzi tsaka hileswi ndzi xanisiwaka hikwalaho ka n’wina.” Pawulo a a swi tiva leswaku swi njhani ‘ku tiyisela hi ku helela ni ku lehisa mbilu hi ntsako.’ (Vakolosa 1:11, 24) Kambe a a swi tiva leswaku a nga swi endlanga hi matimba ya yena. Yehovha a a n’wi tiyisile! Swi tano ni namuntlha. Magidi ya Timbhoni leti khotsiweke ni ku xanisiwa a ti lahlekeriwanga hi ntsako wa tona entirhweni wa Yehovha. Ematshan’weni ya sweswo, ti twisise ntiyiso wa marito ya Xikwembu lama kumekaka eka Esaya 40:29-31: “O nyika l’a kareleke matimba . . . La’v̌a ṭhembaka Yehova v̌a engeta v̌a kuma matimba la’mantŝha.”

23, 24. Hi xihi xihundla xo kwetsima lexi boxiweke eka Vakolosa 1:26?

23 Vutirheli bya mahungu lamanene lama khumbaka Kreste a byi ri bya nkoka eka Pawulo. A lava leswaku van’wana va twisisa nkoka wa xiphemu xa Kreste eka xikongomelo xa Xikwembu, kutani u wu hlamusele tanihi “xihundla lexi a xi tumberile malembe ni malembe, eka tinxaka hinkwato.” Kambe a xi nga ta tshama xi ri xihundla. Pawulo u engeterile a ku: “Sweswi xi pfuleteriwile eka vahlawuriwa va Xikwembu.” (Vakolosa 1:26) Loko ku xandzuka ku humelela aEdeni, Yehovha u nyike xitshembiso xa swilo swo antswa leswi a swi ta ta, a vhumbha leswaku ‘mbewu ya wansati a yi ta faya nhloko ya nyoka.’ (Genesa 3:15) Xana leswi a swi vula yini? Etinxakeni, hi madzana ya malembe lama hundzeke, a swi ri xihundla. Kutani Yesu a ta, ivi a “humesela erivaleni vutomi lebyi nga onhakiki, hi matimba ya Evhangeli.”—2 Timotiya 1:10.

24 Ina, “xihundla” lexi xi khumba Kreste ni Mfumo wa Vumesiya. Pawulo u vulavule hi ‘swilo leswi nga etilweni,’ a kombetela eka lava nga ta hlanganyela evulawurini bya Mfumo swin’we na Kreste. Va ta hoxa xandla lexikulu eku tiseni ka mikateko eka ‘swilo hinkwaswo swa laha misaveni,’ lava nga ta tiphina laha hi paradeyisi leyi nga heriki. Kutani, u nga vona hi laha a swi fanele ha kona leswaku Pawulo a vulavula hi “rifuwo ra xihundla lexi, ni ku kwetsima ka xona.”—Vakolosa 1:20, 27.

25. Hi laha swi kombisiweke ha kona eka Vakolosa 1:29, hi fanele hi va ni langutelo rihi sweswi?

25 Pawulo a a langutele ku kuma xivandla xakwe eMfun’weni. Kambe u lemuke leswaku a ku nga ri nchumu lowu a fanele ku khondla mavoko ni ku va ni ntshembo eka wona ntsena. “Hi swona leswi ndzi tikarhatelaka swona, ndzi ri karhi ndzi lwa hi ntamu wa yena lowu a wu pfuxaka hi matimba endzeni ka mina.” (Vakolosa 1:29) Xiya leswaku Yehovha, hi Kreste, u tiyise Pawulo leswaku a kota ku endla vutirheli lebyi ponisaka vutomi. Yehovha a nga hi endlela leswi fanaka namuntlha. Kambe hi fanele ku tivutisa, ‘Xana ndzi na wona moya wo vula evhangeli lowu a ndzi ri na wona loko ndzi sungula ku dyondza ntiyiso?’ Nhlamulo ya wena hi yihi? I yini lexi nga pfunaka un’wana ni un’wana wa hina leswaku a ya emahlweni a ‘tirha hi matimba ni ku tikarhata hi ku ya hi matirhelo ya matimba ya Yehovha’? Xihloko lexi landzelaka xi ta bula hi mhaka leyi.

Xana U Swi Xiyile?

◻ Ha yini hi nga tiyisekaka leswaku Yehovha a nga kombisa matimba yakwe evanhwini?

◻ Hi xihi xisekelo xa marito ya Pawulo eka Vakolosa ndzima 1?

◻ Xana Xikwembu xi ku endlisa ku yini ku vuyelelana loku ku vulavuriwaka ha kona eka Vakolosa 1:20?

◻ Hi matimba ya yena, xana Yehovha a nga hetisisa yini hi hina?

[Mepe/Xifaniso lexi nga eka tluka 8]

(Leswaku u vona rungula leri hleriweke hi ku helela, vona nkandziyiso wa kona)

KOLOSA

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela