Hlayisa Vutshembeki Kutani U Hanya!

“RUKANA Šikwembu, u fa!” Xifunengeto xa magazini wa hina xi kombisa nsati wa Yobo, loyi a n’wi hlaseleke hi marito wolawo. Sweswo swi humelele kwalomu ka malembe ya 3 600 lama hundzeke. Kambe nhlaselo wolowo wa marito eka nandza lowo tshembeka wa Xikwembu, wu kandziyisa mphikamakaneta leyi vanhu va langutaneke na yona ku fikela namuntlha. Yobo la tshembekaka u lahlekeriwe swinene—swifuwo swa yena, kaya ra yena ni vana va yena va khume. Miri wa yena sweswi wu karhi wu xanisiwa hi vuvabyi lebyi nga tshungulekiki, byi n’wi ringa ku ya fika eka mpimo wa ku tiyisela ka yena. Xivangelo a xi ri xihi? Nala lonkulu wa Xikwembu ni vanhu, Sathana Diyavulosi, a a yisa emahlweni ntlhontlho wa leswaku munhu a nge byi hlayisi vutshembeki eka Xikwembu ehansi ka ndzingo lowukulu.—Yobo 1:11, 12; 2:4, 5, 9, 10.

Tanihi le sikwini ra Yobo, namuntlha “misava hinkwayo yi le hansi ka matimba ya Lowo biha,” Sathana Diyavulosi. (1 Yohane 5:19) Ina, leswi swi tano hakunene namuntlha, hikuva “[loyi a] vuriwaka Diyavulosi kumbe Sathana, Mukanganyisi wa misava hinkwayo”; u hlongoriwile ematilweni, a cukumeteriwa emisaveni. (Nhlavutelo 12:9) Leswi hi swona swi vangaka makhombo lamakulu lama xanisaka vanhu enkarhini wa hina. Nyimpi yo sungula ya misava leyi tlhekekeke hi 1914 yi funghe “ku sungula ka mahlomulo” lama yeke emahlweni ku ta fikela eka lembe-xidzana leri ra vu-20.—Matewu 24:7, 8.

Emisaveni leyi leyi onhakeke ya lunya, xana u titwa u fikelele eka mpimo wo hetelela wa ku tiyisela loku munhu a nga vaka na kona? Xana u tshame u tivutisa u ku ‘Xana vutomi byi ni xikongomelo ke?’ Yobo a nga ha va a titwe hi ndlela yoleyo, kambe a nga tshikanga ku pfumela eka Xikwembu hambi leswi a a swi endla swihoxo. U phofule ku tiyimisela ka yena hi marito lawa: “Nḍi ta tiya nḍi tiv̌ula l’a pfumalaka nanḍu nḍi konḍa nḍi fa.” A a ri na ntshembo wa leswaku Xikwembu xi ta ‘kuma leswaku u hava nandzu.’—Yobo 27:5; 31:6.

Yesu Kreste N’wana wa Xikwembu, na yena a a fanele a tiyisela miringo loko a ha ri laha emisaveni. Sathana u hlasele Yesu hi tindlela to hambana-hambana. U tirhise swilaveko swa nyama swa Yesu a tlhela a lava ku vona leswaku U titshega ku fikela kwihi hi Rito ra Xikwembu, tanihi le ntshaveni leyi a nga ringiwa ka yona. (Matewu 4:1-11) U karhate Yesu hi ku endla leswaku vatsari lava gwineheke, Vafarisi ni valandzeri va vona, va n’wi xanisa, va n’wi hehla hi ndzhukano, va tlhela va khira ku n’wi dlaya. (Luka 5:21; Yohane 5:16-18; 10:36-39; 11:57) Va khome Yesu hi ndlela yo biha ku tlula leswi vachaveleri lavaya vanharhu va mavunwa va n’wi khomiseke xiswona Yobo.—Yobo 16:2; 19:1, 2.

Loko Yesu a ri kusuhi ni ku ringiwa ka yena lokukulu entangeni wa Getsemane, u byele vadyondzisiwa va yena a ku: “Moya wa mina wu khomiwa hi gome lerikulu, gome ra ku fa.” Kutani “a wa hi mombo, a ri karhi a khongela a ku: ‘Tatana, loko swi nga endleka, xinwelo lexi a xi fambele kule na mina! Ntsena ku nga endliwi ku rhandza ka mina, kambe a ku endliwe ku rhandza ka wena!’” Eku heteleleni, emhandzini ya nxaniso, loko ku hetiseka marito ya vuprofeta ya Pisalema 22:1, Yesu u huwelerile a ku: “Šikwembu ša nga! Šikwembu ša nga! U nḍi ṭhikele yini?” Kambe Xikwembu a xi n’wi tshikanga Yesu, hikuva Yesu u hlayise vutshembeki lebyi hetisekeke eka xona, a vekela Vakreste hinkwavo va ntiyiso ntila lowu va faneleke va wu landzela. Yehovha u hakele Yesu hikwalaho ko hlayisa vutshembeki hi ku n’wi pfuxa ni ku n’wi tlakusela ematilweni ya le henhla-henhla. (Matewu 26:38, 39; 27:46; Mintirho 2:32-36; 5:30; 1 Petro 2:21) Hi laha ku fanaka Xikwembu xi ta hakela hinkwavo lava hlayisaka vutshembeki eka xona.

Vutshembeki bya Yesu a byi nyikelanga nhlamulo leyi heleleke eka ntlhontlho wa Sathana kambe gandzelo ra vutomi bya yena lebyi hetisekeke ri tise nkutsulo, lowu exisekelweni xa wona vanhu lava hlayisaka vutshembeki va nga ha kumaka vutomi lebyi nga heriki ha rona. (Matewu 20:28) Xo sungula, Yesu u hlengeleta “ntlhambinyana” lowu totiweke lowu wu vaka vadyandzhaka na yena eMfun’weni wa matilo. (Luka 12:32) Endzhaku ka sweswo, “ntshungu lowukulu” wu hlengeleteriwa ku pona ‘nhlomulo lowukulu,’ ku ya kuma vutomi lebyi nga heriki eMfun’weni wa Xikwembu emisaveni.—Nhlavutelo 7:9, 14-17.

Muhlayisi wa vutshembeki Yobo u ta va exikarhi ka vanhu va magidi ya timiliyoni lava feke, lava nga ta pfuxeriwa ku va xiphemu xa vandla ra “misava leyintshwa” leyi rhuleke. (2 Petro 3:13; Yohane 5:28, 29) Tanihi laha swi kombisiweke ha kona exifunengetweni xa magazini wa hina, vutshembeki bya Yobo byi hakeriwile esikwini ra yena loko Yehovha a “katekisa mahetelelo ya Yobo e ku tlurisa ku sungula ka yena.” U kume matimba ya moya tanihi munhu loyi a ‘nga dyohangiki hi nomu wa yena.’ Xikwembu xi engetele vutomi bya yena hi malembe ya 140. Xi andzisele Yobo kambirhi hi swilo swa nyama hinkwaswo leswi a a ri na swona, naswona Yobo a tlhela “a kuma v̌ana v̌a v̌av̌anuna v̌a ntlhanu na v̌ambiri, ni v̌anhwanyana v̌anharu,” lava a va vuriwa vo saseka ngopfu etikweni hinkwaro. (Yobo 2:10; 42:12-17) Kambe rifuwo leri hinkwaro a ri ri xikombiso xa mikateko leyi vahlayisi va vutshembeki va nga ta yi tsakela “emisaveni leyintshwa” ya Paradeyisi. Na wena u nga hlanganyela entsakweni wolowo, hi laha matluka lama landzelaka ma nga ta hlamusela ha kona!

[Xifaniso lexi nga eka tluka 4]

Yesu u veke xikombiso lexi hetisekeke tanihi muhlayisi wa vutshembeki