‘Hi Milomu Ya Vana’
LOKO Samuwele a ha ri xifanyetana, u namarhele swinene misinya ya milawu leyinene, ku nga khathariseki ku homboloka ka vana va Muprista Lonkulu Heli. (1 Samuwele 2:22; 3:1) Emasikwini ya Elixa, wanhwana wa Muisrayele loyi a veke hlonga eSiriya u nyikele vumbhoni lebyi tiyeke eka n’wini wa yena. (2 Tihosi 5:2-4) Loko Yesu a ri ni malembe ya 12 hi vukhale, u vulavule hi xivindzi ni vadyondzisi va Israyele, a va vutisa swivutiso ni ku va hlamula hi ndlela leyi hlamariseke vahlaleri. (Luka 2:46-48) Ematin’wini hinkwawo, Yehovha u tirheriwe hi ku tshembeka hi vagandzeri va yena lava ha riki vatsongo.
Xana vantshwa namuntlha va kombisa moya lowu fanaka wa ku tshembeka? Ina, hakunene! Swiviko leswi humaka etihofisini ta rhavi ta Sosayiti ya Watch Tower, swi kombisa leswaku vana vo tala lava pfumelaka va ‘tinyikerile hi ku tirhandzela’ entirhweni wa Yehovha. (Pisalema 110:3) Mimbuyelo leyinene ya matshalatshala ya vona yi khutaza Vakreste hinkwavo, lavatsongo ni lavakulu, ‘ku nga karhali ku endla leswinene.’—Vagalatiya 6:9.
Xikombiso lexinene i xa Ayumi, xinhwanyatana xa Mujapani lexi veke muhuweleri loko xi ri ni malembe ya tsevu hi vukhale, ivi xi tiendlela pakani ya ku veka vumbhoni eka un’wana ni un’wana etlilasini ya xona. Xi kume mpfumelelo wo veka tibuku to hlayanyana elayiburari ya le tlilasini, ni ku tilunghisela ku hlamula swivutiso swihi na swihi leswi vadyondzi-kulobye va xona va nga ha swi vutisaka. Vadyondzi-kulobye va xona vo tala ku katsa ni mudyondzisi wa yena va sungule ku tolovelana ni tibuku leti. Emalembeni ya yena ya tsevu a ri exikolweni xa le hansi, Ayumi u lunghiselele tidyondzo ta Bibele ta 13. U khuvuriwe loko a ri eka ntangha mune, ivi un’wana wa vanghana va yena loyi a dyondzeke na yena a khuvuriwa loko a ri eka ntangha tsevu. Tlhandla-kambirhi, mana wa xichudeni lexi xa Bibele ni vamakwavo lavakulu va xona va xisati va dyondzile na vona, ivi va khuvuriwa.
Mahanyelo Lamanene Ma Veka Vumbhoni
“Hanyani hi mukhuva lowo saseka exikarhi ka vamatiko,” ku vule muapostola Petro, kutani Vakreste lavantshwa va teka xileriso lexi xi ri xa nkoka. (1 Petro 2:12) Xisweswo, mahanyelo ya vona lamanene ma tala ku nyikela vumbhoni lebyinene. Etikweni ra le Afrika le Cameroon, a ku ri ra vumbirhi wanuna un’wana a ta emihlanganweni ya vandlha ya Timbhoni ta Yehovha, kutani a tikuma a tshame etlhelo ka xinhwanyatana xin’wana. Loko xivulavuri xi kombela vayingiseri ku languta tsalwa ro karhi eBibeleni, wanuna loyi u xiye leswaku xinhwanyatana lexi xi kuma ndzimana eBibeleni ya xona hi ku hatlisa ivi xi landzelerisisa kahle loko ku hlayiwa. Endlelo ra xinhwanyatana lexi ri tsakise wanuna loyi lerova emakumu ka mihlangano a ya eka xivulavuri kutani a ku: “Xinhwanyatana lexi xi endle leswaku ndzi lava ku dyondza na n’wina Bibele.”
EAfrika Dzonga ku ni xikolo lexi swichudeni swa 25 swi nga vana va Timbhoni ta Yehovha. Mahanyelo ya swona lamanene ma endle leswaku Timbhoni ta Yehovha ti va ni ndhuma leyinene. Mudyondzisi un’wana u byele mutswari la nga Mbhoni leswaku a nga swi twisisi leswaku Timbhoni ti swi kotisa ku yini ku letela vana va tona hi ndlela leyinene swonghasi, ngopfu-ngopfu leswi kereke ya yena yi tsandzekaka ku pfuna vantshwa. Mudyondzisi un’wana lontshwa u tile ku ta pfuna exikolweni lexi, ivi hi ku hatlisa a xiya mahanyelo lamanene ya vana va Timbhoni. U vutise un’wana wa vafana lava va nga Timbhoni leswaku u fanele ku endla yini leswaku a va un’wana wa Timbhoni ta Yehovha. Mufana u hlamusele leswaku u fanele a va ni dyondzo ya Bibele, naswona u hlele leswaku vatswari va yena va landzelela ku tsakela loku.
Le Costa Rica, Rigoberto u twe ntiyiso loko vadyondzi-kulobye vambirhi va tirhise Bibele ku hlamula swivutiso swa yena malunghana ni Vunharhu-un’we, moya-xiviri ni ndzilo wa tihele. Leswi va swi vuleke swi ve ni nkucetelo lowunene eka yena, hayi hikwalaho ka vuswikoti bya vona byo tirhisa Matsalwa, kambe na hi leswi mahanyelo ya vona lamanene swinene a ma hambanile ni lawa a ma voneke etikerekeni ta Vujagana. Ku nga khathariseki ku kanetiwa hi ndyangu wa yena, Rigoberto u ya emahlweni ni dyondzo ya yena ya Bibele hi ndlela leyinene.
Le Spain Timbhoni timbirhi ta Yehovha—un’wana wa tona wa malembe ya kaye hi vukhale—ti endzele wanuna loyi a a vuriwa Onofre. Loko Mbhoni leya ntswatsi yi ri karhi yi vulavula, Mbhoni leyitsongo yi hlaye Matsalwa hi mbilu naswona yi tshaha matsalwa man’wana ya Bibele hi nhloko, loko Mbhoni leya ntswatsi yi ri karhi yi ma hlayela ehenhla. Onofre swi n’wi tsakise ngopfu. U vule leswaku u lava ku dyondza Bibele endhawini leyi xifanyetana lexi xi dyondzeke eka yona ku tirhisa Matsalwa hi ndlela leyinene swonghasi. Kutani ke, mixo wa Sonto leyi landzeleke, u ye eHolweni ya Mfumo. U boheke ku tshama ehandle ku kondza ku va ndzhenga, loko Timbhoni ti ta emihlanganweni ya tona. Ku suka kwalaho ku ya emahlweni, u endle nhluvuko lowunene naswona wa ha ku kombisa ku tinyiketela ka yena hi nkhuvulo wa mati.
Timbhoni Letintshwa Leti Tirhaka
Ina, Yehovha u tirhisa lavatsongo ku katsa ni lavakulu ku fikelela timbilu ta vanhu lavanene. Swoleswo swi voniwe eka ntokoto lowu humaka eHungary. Muongori wa le xibedlhele xa kwalaho u xiye leswaku loko vaendzi va ta vona muvabyi un’wana wa malembe ya khume hi vukhale, a va n’wi tela ni swohlaya ku katsa ni swakudya. Hi ku nyanyuriwa hi leswi, u tivutise leswaku xinhwanyatana lexi xi nga va xi hlaya yini, kutani a kuma leswaku a xi hlaya Bibele. Muongori u vulavule na xona ivi endzhakunyana a ku: “Ku sukela loko xi fikile, a xi ndzi dyondzisa hakunene.” Loko xinhwanyatana lexi xi humile exibedlhele, xi rhambe muongori loyi ku va kona entsombanweni, kambe muongori loyi u ale xirhambo lexi. Endzhakunyana u pfumerile ku va kona eka Ntsombano wa Muganga wa “Ririmi Leri Tengeke.” Endzhakunyana ka kwalaho, u sungule ku dyondza Bibele, ivi endzhaku ka lembe a khuvuriwa—hinkwaswo leswi i vuyelo bya xinhwanyatana lexi nkarhi wa xona xi wu tirhiseleke ku hlaya tibuku ta Bibele exibedlhele.
Le El Salvador, a ku ri lembe ra vumbirhi Ana Ruth a ri exikolweni xa le henhla. A a ri na mukhuva wo siya tibuku ta Bibele ehenhla ka desika ra yena leswaku van’wana va ta hlaya loko va swi lava. Loko a vona leswaku tibuku ta yena a ti nyamalala ivi endzhaku ka nkarhi ti humelela, Ana Ruth u kume leswaku mudyondzi-kulobye, Evelyn a a ti hlaya. Endzhakunyana ka nkarhi, Evelyn u amukele dyondzo ivi a sungula ku hlanganyela mihlangano ya vandlha. Eku heteleleni, u khuvuriwile, kutani sweswi u tirha tanihi phayona ro pfuna ra nkarhi hinkwawo. Ana Ruth i phayona ra nkarhi hinkwawo.
Le Panama makwerhu wa xisati u sungule dyondzo ni wansati loyi nuna wa yena a sunguleke ku kaneta ntiyiso ku kondza a lava ku tshika ku dyondza. Hambi swi ri tano, wanuna loyi u sungule ku ka a nga ha kaneti. Endzhakunyana ka nkarhi, buti wa yena, loyi a nga Mbhoni u n’wi kombele leswaku a ya n’wi vekela bele ya swigevenga endlwini ya yena. Loko a ri karhi a vekela bele, xinhwanyatana xa buti wa yena, xa malembe ya kaye hi vukhale, xi vuye ekaya xi languteka xi ri ni gome swinene. U xi vutise leswaku swilo yini, ivi xi vula leswaku xona na sesi wa xona a va ya fambisa dyondzo ya Bibele, kambe munhu wa kona a va n’wi kumangi ekaya, kutani a xi n’wi endlelanga nchumu Yehovha siku rero. Tata wa xona lontsongo u te: “Ha yini u nga chumayeli mina? Kutani u ta va u endlele Yehovha xo karhi.” Xinhwanyatana xa buti wakwe xi tsutsume hi ntsako xi ya teka Bibele ya xona kutani dyondzo yi sunguriwa.
Mana wa xona (sikoni wa nuna loyi) a a yingiserile. A anakanya leswaku dyondzo leyi a ku ri ntlango, kambe nkarhi hinkwawo loko wanuna loyi a ya endlwini ya sikoni wa yena a a kombela xinhwanyatana xa buti wa yena leswaku xi n’wi dyondzela Bibele. Loko manana loyi a vona leswaku namu wa yena a a tiyimiserile naswona a a ri ni swivutiso swo tika, u anakanye ku fambisa dyondzo yoleyo hi yexe, xinhwanyatana xa yena xi ri kona. U sungule ku dyondza kambirhi hi vhiki ivi a endla nhluvuko hi ku hatlisa. U endle nhluvuko lowukulu, a hetelela hi ku tinyiketela ivi a khuvuriwa enhlengeletanweni, hi siku rin’we ni nsati wakwe—hikwalaho ka langutelo lerinene ra xinhwanyatana xa buti wa yena.
Xivindzi Xa Lavantshwa Xi Nyikela Vumbhoni Lebyinene
Bibele yi ri: “U ṭhama u tiya; mbilu ya wena a yi tiye! U tiṭhembela Yehova!” (Pisalema 27:14) Marito lawa ma tirha eka malandza hinkwawo ya Xikwembu, naswona lavantshwa ku katsa ni lavakulu va ma tirhisile lembe leri hundzeke. Le Australia, loko n’wana wa malembe ya ntlhanu hi vukhale a ya exikolweni lexintshwa, mana wa yena u ye exikolweni a ya hlamusela mudyondzisi hi ripfumelo ra Timbhoni ta Yehovha. Mudyondzisi u te: “Se ndza swi tiva leswaku mi pfumela yini. Xinhwanyatana xa wena xi ndzi hlamusele hinkwaswo.” Xinhwanyatana lexi a xi nga chavi ku tshinelela mudyondzisi wa xona xi n’wi hlamusela hi ripfumelo ra xona.
Andrea wa malembe ya ntlhanu hi vukhale wa le Romania na yena u kombise xivindzi. Loko mana wa yena a tshike vukhongeri bya Orthodox leswaku a ta va Mbhoni, vaakelani va yena va ale ku n’wi yingisa. Siku rin’wana eka Dyondzo ya Buku ya Vandlha, Andrea u twe mulanguteri wa ntirho a kandziyisa xilaveko xo chumayela vaakelani. U anakanyisise kahle hi mhaka leyi, ivi loko a fika ekaya a byela mana wa yena a ku: “Endzhaku ka loko u ta va u ye entirhweni, ndzi ta pfuka, ndzi hoxa tibuku ta mina enkwameni tanihi laha u endlaka hakona Manana, ivi ndzi khongela eka Yehovha leswaku a ndzi pfuna ku vulavula ni vaakelani va hina hi ntiyiso.”
Siku leri landzelaka Andrea u endle hi laha a tshembiseke ha kona. Kutani, ku tiyisa xivindzi xa yena, u be bele ya le nyangweni wa vaakelani. Loko muakelani loyi a hlamurile enyangweni, xinhwanyatana lexi xi te: “Ndza swi tiva leswaku ku sukela loko manana a ri Mbhoni a mi n’wi rhandzi. U ringetile ku vulavula na n’wina mikarhi yo tala, kambe a mi lavi ku n’wi yingisa. Swa n’wi karhata, kambe ndzi lava mi swi tiva leswaku ha mi rhandza.” Kutani Andrea a ya mahlweni a nyikela vumbhoni lebyinene. Hi siku rin’we u fambise tibuku ta tsevu, timagazini ta tsevu, swibukwana swa mune ni swiphephana swa mune. Ku sukela kwalaho a a va kona nkarhi na nkarhi entirhweni wa nsimu.
Le Rwanda vamakwerhu va hina a va fanele va va ni xivindzi lexikulu hikwalaho ka madzolonga ya kwalaho. Hi nkarhi wun’wana ndyangu wa Timbhoni wu nghenisiwe ekamareni leri masocha a ma lunghekele ku va dlayela eka rona. Ndyangu lowu wu kombele mpfumelelo wo khongela ku sungula. Va pfumeleriwile, kutani hinkwavo va khongele hi mbilu, handle ka xinhwanyatana xa vona Deborah. Hi ku ya hi xiviko, Deborah u khongele hi ku huwelela a ku: “Yehovha, mina na papa vhiki leri hi fambise ntlhanu wa timagazini. Xana hi ta swi kotisa ku yini ku tlhelela eka vanhu lava hi va dyondzisa ntiyiso ni ku va pfuna leswaku va kuma vutomi? Naswona, xana sweswi ndzi ta swi kotisa ku yini ku va muhuweleri? A ndzi lava ku khuvuriwa leswaku ndzi ta ku tirhela.” Loko ri twa swoleswo socha ri te: “A hi nge mi dlayi hikwalaho ka xinhwanyatana lexi.” Deborah u hlamule a ku: “Inkomu.” Ndyangu wu va wu ponile.
Loko Yesu a nghena eYerusalema hi ku nghena loku hlulaka ekusuhi ni makumu ya vutomi bya yena bya laha misaveni, u huweleriwe hi mintshungu leyikulu, leyi tsakeke. Ntshungu lowu a wu ri wa vana ku katsa ni vanhu lavakulu. Hi ku ya hi rhekhodo, swifanyetana “[a] [swi] [huwelela] eTempeleni [swi] ku: ‘Hozana eka N’wana Davhida!’” Loko vaprista lavakulu ni vatsari va lwisana ni mhaka leyi, Yesu u va hlamule a ku: “Xana a mi si hlaya rito leri nge: ‘U dzunisiwile hi ndlela leyo hetiseka hi milomo ya vana ni ya lava mamaka’ xana?”—Matewu 21:15, 16.
Xana a swi nyanyuli ku vona leswaku hambi ku ri namuntlha marito ya Yesu ma ha ri ntiyiso ke? ‘Hi milomo ya vana ni ya lava mamaka’—naswona hi nga ha engetela, vana va kondlo-a-ndzi-dyi, majaha ni vavasati—Yehovha u dzunisiwile. Entiyisweni ku dzunisa Yehovha a ku na vukulu.—Yuwele 2:28, 29.