Swivutiso Swa Vahlayi
I langutelo rihi leri faneleke ku kombisiwa enkhuvulweni wa Vukreste?
Xexo i xivutiso lexi tsakisaka, hikuva hambi leswi vunyingi bya vahlayi va hina ana se byi khuvuriweke, bya katseka, ku fana ni vanhu lava khuvuriwaka. A hi rhangeni hi vulavula hi lava khuvuriwaka, lava nyuperisiwaka hi ku helela. Xana langutelo ra vona ri fanele ri va rihi?
Eka Matewu 28:19, 20, Yesu u byele valandzeri vakwe leswaku va famba va endla vanhu vadyondzisiwa, va va dyondzisa ni ku va khuvula. A nga vulavulanga hi nkhuvulo tanihi nchumu lowu fambisanaka ni nyanyuko lowu hundzeletiweke, xiendlo lexi vangiwaka hi nyanyuko wa nkarhinyana. I goza ra ntikelo, tanihi laha hi vonaka ha kona exikombisweni xa Yesu. Luka 3:21 (BX) yi ri: “Na yena Yesu, a khuv̌uriwa; kambe loko a a ri kari a khongela; matilo ma pfuleka.” Ina, Xikombiso xa hina xi teke nkhuvulo wu ri wa nkoka, hi xikhongelo. A hi kali hi swi anakanya leswaku endzhaku ka ku huma ka yena ematini, u endle swikombiso leswi yimelaka ku hlula, a vula marito yo phata kumbe a ndzuluta mavoko yakwe a ma tlakusela ehenhla, hambi leswi van’wana va swi endleke sweswinyana. E-e, a ri na Yohane Mukhuvuri ntsena, Yesu u hundzulukele eka Tata wa yena hi xikhongelo.
Hambi swi ri tano, Bibele a yi vuli swona leswaku nkhuvulo wu fanele wu va xiendlakalo lexi hetaka matimba kumbe lexi nga tsakisiki, lexi lavaka xiyimo xo hlawuleka kumbe ku vula swin’wana hi nkarhi wa nkhuvulo, hi laha tikereke tin’wana ta Vujagana ti rhandzaka ku endla ha kona namuntlha. Phela, anakanya hi siku ra Pentekosta, loko magidi ya Vayuda ni vanhu ntsena va nghenela nkhuvulo wa Vukreste. Ana se a va dyondzile hi Nawu wa Xikwembu naswona a va ri ni vuxaka na xona. Kutani a va lava ntsena ku dyondza ni ku amukela Mesiya, Yesu. Loko va swi endlile sweswo, a va ta khuvuriwa.
Mintirho 2:41 (BX) ya vika: “La’v̌a amukeleke rito ra yena hi ku ṭaka, v̌a khuv̌uriwa.” Vuhundzuluxeri bya Bibele bya Weymouth byi hlayekisa xileswi: “Hikwalaho lava amukeleke rito ra yena hi ntsako, va khuvuriwa.” Va tsakisiwe hi mahungu lama nyanyulaka ya Mesiya naswona entiyisweni ntsako wolowo wu ve kona ni hi nkarhi wa nkhuvulo, nkhuvulo wu endleriwe emahlweni ka madzana-dzana ya vahlaleri lava tsakeke. Hambi tintsumi etilweni a ti hlalerile, ti tsaka. Tsundzuka marito ya Yesu: “Ndza mi byela leswaku, hi mukhuva wolowo, tintsumi ta Xikwembu ta tsaka swinene loko mudyohi hambi a ri un’we a hundzuka.”—Luka 15:10.
Ku ni tindlela to hambana-hambana leti ha tona un’wana ni un’wana wa hina a nga kombisaka nkoka ni ntsako wa nkhuvulo. Etikerekeni tin’wana lava khuvuriwaka va ambala tinguvu to basa kumbe ta ntima. Entiyisweni Matsalwa a ma xi seketeri xilaveko xo tano. Hambi swi ri ti tano, swiambalo leswi manyaka kumbe leswi vonikelaka a swi nge faneleki, hambi eka wanuna kumbe eka wansati. Naswona hi laha swi kombisiweke ha kona, loko a huma ematini, Mukreste la ha ku khuvuriwaka a nga fanelanga a tlula-tluleka kumbe a khana onge hi loko a hlurile. Vamakwerhu hinkwavo va Vukreste va tsaka leswi loyi lontshwa a khuvuriweke. U fanele ku xiya leswaku xikombiso lexi xa ripfumelo ko va goza ro sungula endleleni yo leha ya vutshembheki leswaku a ta amukeriwa hi Xikwembu.—Matewu 16:24.
Hina tanihi vahlaleri eka nkhuvulo wa le rivaleni, ha tsaka eka xiendlakalo lexi, ngopfu-ngopfu loko xaka kumbe loyi hi dyondzeke na yena Bibele a khuvuriwa. Hambi swi ri tano, leswaku hi hlanganyela hi xitalo, hi fanele hi yingisela nkulumo hinkwayo swin’we ni lava yaka eku khuvuriweni, hi va twa loko va hlamula swivutiso erivaleni ni ku hlanganyela exikhongelweni. Ku endla tano swi ta hi pfuna leswaku hi languta nkhuvulo hi ndlela leyi faneleke; hi ta wu languta hi langutelo ra Xikwembu. Endzhaku ka nkhuvulo, ntsako wa hina a wu lavi leswaku hi endla nkhuvo onge hi loko hi hlurile, hi hanana swiluva kumbe hi endlela loyi a khuvuriweke xinkhubyana. Kambe hi nga tshinelela makwerhu lontshwa wa xinuna kumbe wa xisati hi kombisa ntsako wa hina hikwalaho ka goza lerinene leri a ri tekeke ni ku n’wi amukela hi mandla mambirhi eka vumakwerhu bya hina bya Vukreste.
Kutani hi ku komisa, hinkwerhu ku katsa ni lava nyuperisiweke ematini, hi fanele ku teka nkhuvulo tanihi nchumu wa nkoka. A hi nkarhi wa ku tiphofula, wa swinkhubyana kumbe wa ku titsakisa. Naswona a hi karhi wo dyisa mbitsi kumbe ku karhateka. Handle ko kanakana ha tsaka leswi lavantshwa va tihlanganisaka na hina endleleni ya vutomi lebyi nga heriki. Naswona hi ntsako hi nga amukela vamakwerhu lavantshwa va xinuna ni va xisati.
[Xifaniso lexi tataka tluka hinkwaro lexi nga eka tluka 31]