Xana Xikwembu I Xo Sungula eNdyangwini Wa Wena?
“Rhandza Hosi Xikwembu xa wena hi mbilu ya wena hinkwayo.”—MARKA 12:29, 30.
1. I swa nkoka hi ndlela yihi leswaku hi rhandza Yehovha?
MUTSARI u vutise Yesu a ku: “Nawu lowo rhanga eka milawu hinkwayo hi wihi xana?” Ematshan’weni yo nyika mavonelo yakwe, Yesu u hlamule xivutiso xa yena hi ku tshaha eRitweni ra Xikwembu eka Deteronoma 6:4, 5. U hlamule a ku: “Nawu lowo rhanga hi lowu nge: ‘Yingisa we Israele, Hosi Xikwembu xa hina i Hosi yi ri yoxe, a ku na yin’wana. Rhandza Hosi Xikwembu xa wena hi mbilu ya wena hinkwayo, ni moya wa wena hinkwawo, ni ku anakanya ka wena hinkwako, ni matimba ya wena hinkwawo.’”—Marka 12:28-30.
2. (a) I nkaneto wihi lowu Yesu a a fanele ku langutana na wona? (b) I yini leswi minkarhi yin’wana swi nga endlaka swi tika ku tsakisa Yehovha?
2 Ku yingisa leswi Yesu a swi vuleke nawu lowo rhanga—wa nkoka swinene—swi lava leswaku nkarhi hinkwawo hi endla leswi tsakisaka Yehovha. Yesu u n’wi tsakisile, hambi leswi eka khamba rin’wana muapostola Petro a kaneteke ndlela ya Yesu, naswona eka khamba rin’wana maxaka ya yena n’wini ya le kusuhi ma endle tano na wona. (Matewu 16:21-23; Marka 3:21; Yohane 8:29) Ku vuriwa yini loko u tikuma u ri exiyin’weni lexi fanaka? A hi nge swirho swa ndyangu swi lava leswaku u tshika dyondzo ya wena ya Bibele ni ku tihlanganisa ka wena ni Timbhoni ta Yehovha. Xana u ta rhangisa Xikwembu hi ku endla leswi swi xi tsakisaka? Xana Xikwembu i xo sungula, hambi loko swirho swa ndyangu swi lwisana ni matshalatshala ya wena yo xi tirhela?
Ntlhamu Wa Nkaneto Wa Le Ndyangwini
3. (a) Xana vuyelo bya tidyondzo ta Yesu byi nga ha va byihi endyangwini? (b) Xana swirho swa ndyangu swi nga kombisa njhani leswaku hi wihi loyi swi n’wi rhandzaka ngopfu?
3 Yesu a nga ma tekelanga ehansi maxangu lama nga ha vaka kona loko van’wana endyangwini va kaneta xirho lexi amukelaka tidyondzo ta yena. Yesu u te: “Va ndyangu wa munhu va ta va valala va yena.” Kambe, ku nga khathariseki vuyelo byebyo lebyi nga tsakisiki, Yesu u kombise leswaku i mani a faneleke ku ta ku sungula hi ku vula leswi: “La rhandzaka tata wa yena kumbe mana wa yena ku tlula mina, a swi n’wi fanelanga ku va wa mina; swi tano ni loyi a rhandzaka n’wana wa yena wa xinuna kumbe wa xisati ku tlula mina.” (Matewu 10:34-37) Hi rhangisa Yehovha Xikwembu hi ku landzela tidyondzo ta N’wana wa yena, Yesu Kreste, loyi a “tekelele[ke] leswi Xikwembu xi nga swona hi xiviri xa xona.”—Vaheveru 1:3; Yohane 14:9.
4. (a) Xana Yesu u vule leswaku i yini leswi katsekaka hi ku va mulandzeri wa yena? (b) Xana Vakreste va fanele ku venga swirho swa ndyangu hi ndlela yihi?
4 Enkarhini wun’wana loko Yesu a vulavula hi leswi hakunene swi katsekaka hi ku va mulandzeri wa yena wa ntiyiso, u te: “Loko un’wana a ta ka mina, kambe a nga vengi tata wa yena ni mana wa yena ni nsati ni vana ni vamakwavo va xinuna ni vamakwavo va xisati, ina, hambi kuri moya-xiviri wa yena n’wini, a nge vi mudyondzisiwa wa mina.” (Luka 14:26, NW) Handle ko kanakana, Yesu a a nga vuli swona leswaku valandzeri vakwe va fanele va venga swirho swa ka vona swa ndyangu, hikuva u lerise vanhu ku rhandza hambi lava nga valala va vona. (Matewu 5:44) Ematshan’weni ya sweswo, Yesu laha a a vula leswaku valandzeri vakwe va fanele ku rhandza Xikwembu ku tlula swirho swa ka vona swa ndyangu. (Ringanisa Matewu 6:24.) Mayelana ni mongo wolowo, Bibele yi vula leswaku Yakobo a a rhandza Rahele, Leya a a “v̌engiwa,” leswi a swi vula leswaku Leya, a a nga n’wi rhandzi ku fana ni makwavo wa yena wa xisati, Rahele. (Genesa 29:30-32) Yesu u vule leswaku, hambi wu ri “moya-xiviri” (NW) kumbe vutomi bya hina, hi fanele ku swi venga kumbe hi nga swi rhandzi ku tlula Yehovha!
5. Xana Sathana u onha lunghiselelo ra ndyangu hi vutlhari hi ndlela yihi?
5 Tanihi Mutumbuluxi ni Munyiki wa Vutomi, malandza ya Yehovha hinkwawo ma fanele ma tinyiketela hi laha ku heleleke eka yena. (Nhlavutelo 4:11) Muapostola Pawulo u tsarile a ku: “Ndzi nkhinsama hi matsolo emahlweni ka Tatana, loyi ndyangu wun’wana ni wun’wana, ematilweni ni la misaveni, wu vuriwaka ‘wa tatana’ hikwalaho ka yena.” (Vaefesa 3:14, 15) Yehovha u vumbe lunghiselelo ra ndyangu hi ndlela leyi hlamarisaka lerova swirho swa ndyangu swi rhandzana hi rirhandzu ra ntumbuluko. (1 Tihosi 3:25, 26; 1 Vatesalonika 2:7) Hambi swi ri tano, Sathana Diyavulosi hi vuxisi u tirhisa rirhandzu leri ra ntumbuluko ra ndyangu, leri katsaka ku navela ku tsakisa varhandziwa. U pfurhetela malangavi ya nkaneto wa le ndyangwini, naswona vo tala va kuma ku ri ntlhontlho ku yimela ntiyiso wa Bibele va tiyile loko va langutane na wona.—Nhlavutelo 12:9, 12.
Ku Langutana Ni Ntlhontlho Hi Laha Ku Humelelaka
6, 7. (a) Xana swirho swa ndyangu swi nga pfuniwa njhani ku twisisa nkoka wa dyondzo ya Bibele ni minhlangano ya Vukreste? (b) Xana hi nga swi kombisa njhani swirho swa ndyangu wa ka hina leswaku ha swi rhandza hakunene?
6 Xana u ta endla yini loko u sindzisiwa ku endla nhlawulo exikarhi ka ku tsakisa Xikwembu kumbe ku tsakisa xirho xa ndyangu? Xana u ta pfumela ku hluriwa hi ku vula leswaku Xikwembu a xi langutelanga leswaku hi hlaya Rito ra xona ni ku tirhisa misinya ya milawu ya rona loko sweswo swi vanga ku nga twanani endyangwini? Kambe ehleketa ha swona. Loko u swi pfumelela ivi u tshika dyondzo ya wena ya Bibele kumbe ku tihlanganisa ka wena ni Timbhoni ta Yehovha, xana vanhu lava u va rhandzaka va ta swi tivisa ku yini leswaku vutivi lebyi kongomeke bya Bibele i mhaka leyi vulaka vutomi ni rifu ke?—Yohane 17:3; 2 Vatesalonika 1:6-8.
7 Hi nga ha kombisa xiyimo lexi hi ndlela leyi: Kumbexana xirho xa ndyangu xi rhandza ngopfu jomela. Xana ku honisa kumbe ku xi ba hi makatla xiphiqo xa yena xa ku nwa swi nga n’wi pfuna hakunene? Xana swi nga antswa ku timela ndzilo hi ku swi tiyiselela ivi mi nga endli nchumu hi xiphiqo xa yena? E-e, kumbexana wa pfumela leswaku swi ta va swi ri swinene ku ringeta ku n’wi pfuna ku hlula xiphiqo xa yena xo nwa, hambi loko swi vula ku langutana ni vukarhi ni minxungeto ya yena. (Swivuriso 29:25) Hi ku fanana, loko hakunene u rhandza swirho swa ndyangu wa wena u nge ma pfumeleli matshalatshala ya swona yo ku tshikisa ku dyondza Bibele. (Mintirho 5:29) Loko u yima u tiyile u nga va pfuna ku twisisa leswaku ku hanya hi tidyondzo ta Kreste swi vula leswaku hi ta hanya kumbe hi lova.
8. Xana hi pfuneka njhani emhakeni ya leswaku Yesu u endle ku rhandza ka Xikwembu hi ku tshembeka?
8 Minkarhi yin’wana ku rhangisa Xikwembu swi nga ha tika. Kambe tsundzuka, Sathana na yena u tikisele Yesu loko a fanele a endla ku rhandza ka Xikwembu. Kambe Yesu a nga tshikanga; u tiyisele hambi ku ri nhlomulo wa mhandzi ya nxaniso hikwalaho ka hina. Bibele yi ri: “Yesu Kriste [i] Muponisi wa hina.” “Ú hi ferile.” (Tito 3:6; 1 Vatesalonika 5:10) Xana a swi hi tsakisi leswi Yesu a nga wu pfumelelangiki nkaneto? Hikwalaho ka leswi a tiyiseleleke rifu ra gandzelo, hi ku kombisa ripfumelo engatini ya yena leyi halatiweke hi ni ntshembo wa vutomi lebyi nga heriki emisaveni leyintshwa leyi nga ni ku rhula ya ku lulama.—Yohane 3:16, 36; Nhlavutelo 21:3, 4.
Hakelo Leyikulu Leyi Nga Ha Kumiwaka
9. (a) Xana Vakreste va nga va ponisa njhani van’wana? (b) Xana xiyimo xa ndyangu wa ka va Timotiya a xi ri xihi?
9 Xana wa swi xiya leswaku na wena u nga hlanganyela eku poniseni ka van’wana, ku katsa ni maxaka lama rhandzekaka? Muapostola Pawulo u khutaze Timotiya a ku: “Tiya eka swona [swilo leswi u swi dyondzisiweke], hikuva loko u endlisa sweswo, u ta tiponisa ni ku ponisa vayingisi va wena.” (1 Timotiya 4:16, xiitaliki i xerhu.) Timotiya a a tshama endyangwini lowu avaneke, tata wa yena wa Mugriki a a nga ri mupfumeri. (Mintirho 16:1; 2 Timotiya 1:5; 3:14) Hambi leswi hi nga swi tiviki leswaku tata wa Timotiya u hetelele a ve mupfumeri kumbe e-e, ntshembo wa leswaku a nga ha va a ve yena wu tiyisiwa swinene hi mahanyelo ya ku tshembeka ya nsati wakwe Yunika, ni ya Timotiya.
10. Xana Vakreste va nga va endlela yini vanghana va vona lava nga pfumeriki?
10 Matsalwa ma paluxa leswaku vavanuna ni vavasati lava seketelaka ntiyiso wa Bibele hi laha ku tiyeke va nga hoxa xandla eku poniseni ka vanghana va vona lava nga riki Vakreste hi ku va pfuna leswaku va va vapfumeri. Muapostola Pawulo u tsarile: “Loko makwerhu un’wana eHosini a ri ni nsati la nga riki mupfumeri, kutani loko nsati loyi a nkhensa ku ya emahlweni a hanya na yena, nuna wa kona a nga n’wi tshiki; ni loko wansati a ri ni nuna la nga riki mupfumeri, kutani nuna loyi a nkhensa ku ya emahlweni a hanya na yena, nsati wa kona a nga tshiki nuna. Hikuva wena nsati, u swi tivisa ku yini, kumbexana u nga ponisa nuna wa wena? Na wena nuna, u swi tivisa ku yini, kumbexana u nga ponisa nsati wa wena?” (1 Vakorinto 7:12, 13, 16) Muapostola Petro u hlamusele ndlela leyi vavasati va nga ponisaka vavanuna va vona ha yona, a khutaza a ku: “Titsongahateni eka vanuna va n’wina, leswaku van’wana va nga kokiwa hi mahanyelo ya n’wina vasati va vona, hambiloko va nga yingisi Rito.”—1 Petro 3:1.
11, 12. (a) I hakelo yihi leyi magidi ya Vakreste ma yi kumeke, naswona va endle yini leswaku va yi kuma? (b) Hlamusela ntokoto wa xirho xa ndyangu lexi hakeriweke hikwalaho ko tiyisela hi ku tshembeka.
11 Emalembeni ya sweswinyana magidi yo tala ma ve Timbhoni ta Yehovha endzhaku ko heta tin’hweti hambi ku ri malembe va kaneta ntirho wa Vukreste wa maxaka ya vona ya Timbhoni. Mawaku hakelo yonghasi leyi Vakreste lava yimeke va tiyile va yi kumeke, naswona mawaku nkateko wonghasi eka khale ka vakaneti! Hi ntlhaveko eritweni ra yena, nkulu wa Mukreste wa 74 wa malembe hi vukhale u te: “Hakanyingi ndzi nkhensa nsati wa mina ni vana va mina hikwalaho ko namarhela entiyisweni emalembeni lawa a ndzi va kaneta.” U vule leswaku u hete malembe manharhu hi ku sihalala a ala hambi ku ri ku pfumelela nsati wakwe a vulavula na yena hi Bibele. U te: “Kambe u vulavule na mina hi vutlhari, kutani u sungule ku ndzi vekela vumbhoni loko a ri karhi a ndzi chukucha milenge. Kunene ndza tsaka swinene leswi a nga pfumelelangiki nkaneto wa mina wu n’wi hlula!”
12 Wanuna un’wana loyi a kaneteke ndyangu wa yena u tsarile a ku: ‘A ndzi ri nala lonkulu wa nsati wa mina hikuva endzhaku ka loko a kume ntiyiso, ndzi n’wi xungetile, naswona a hi tshama hi holova siku rin’wana ni rin’wana; hi leswaku, a ku ri mina nkarhi hinkwawo la sungulaka timholovo. Kambe hinkwaswo a swi nga pfuni nchumu; nsati wa mina u namarhele eBibeleni. Xisweswo ku hundze malembe ya 12 ndzi ri karhi ndzi lwisana swinene ni ntiyiso ni nsati ni n’wana wa mina. Eka vona havambirhi, a ndzi ri ximunhuhato xa Diyavulosi.’ Eku heteleleni wanuna loyi u sungule ku kambisisa mahanyelo ya yena. U te: ‘Ndzi yi xiyile ndlela leyi a ndzi leva ha yona. Ndzi hlaye Bibele, naswona hi ku pfuniwa hi swiletelo swa yona, sweswi ndzi Mbhoni leyi khuvuriweke.’ Anakanya hi hakelo leyi leyikulu ya wansati loyi, ina, u pfunetile eku ‘poniseni ka nuna wa yena’ hi ku tiyiselela nkaneto wa yena a tshembekile ku ringana 12 wa malembe!
Ku Dyondza Eka Yesu
13. (a) I dyondzo yihi leyikulu leyi vavanuna ni vavasati va faneleke va yi dyondza hi vutomi bya Yesu? (b) Xana vanhu lava swi va tikelaka ku titsongahatela ku rhandza ka Xikwembu va nga pfuneka njhani eka xikombiso xa Yesu?
13 Dyondzo leyikulu leyi vavanuna ni vavasati va faneleke ku yi dyondza eka ndlela ya vutomi bya Yesu i ya ku yingisa Xikwembu. Yesu u te: “Masiku hinkwawo ndzi endla leswi swi n’wi tsakisaka.” “A ndzi lavi ku endla ku rhandza ka mina, kambe ku rhandza ka Loyi a ndzi rhumeke.” (Yohane 5:30; 8:29) Hambi loko Yesu eka khamba rin’wana a nga xi tsakelangiki xivumbeko xo karhi xa ku rhandza ka Xikwembu, u titsongahatile. U khongerile: “Loko u swi rhandza, xinwelo lexi xi tshinete kule na mina!” Kambe hi ku hatlisa u engeterile: “Ntsena ku nga endliwi ku rhandza ka mina, kambe a ku endliwe ku rhandza ka wena.” (Luka 22:42) Yesu a nga kombelangi leswaku Xikwembu xi hundzula ku rhandza ka xona; u kombise leswaku a a xi rhandza Xikwembu hakunene hi ku titsongahata hi ku yingisa eka xin’wana ni xin’wana lexi a xi ri ku rhandza ka Xikwembu ha yena. (1 Yohane 5:3) Ku rhangisa ku rhandza ka Xikwembu minkarhi hinkwayo, hi laha Yesu a endleke ha kona, i swa nkoka swinene leswaku u humelela ku nga ri ntsena evuton’wini bya le handle ka vukati kambe ni bya le vukatini ni le vuton’wini bya ndyangu. Xiya leswi endlaka u humelela.
14. Xana Vakreste van’wana va anakanya njhani hi ndlela leyi nga fanelangiki?
14 Hi laha swi kombisiweke ha kona eku sunguleni, loko vapfumeri va rhangisa Xikwembu, va lava ku tshama ni vanghana va vona lava nga pfumeriki, naswona hakanyingi va kota ni ku va pfuna leswaku va fanelekela ku ponisiwa. Hambi loko vanghana havambirhi va ri vapfumeri, vukati bya vona byi nga ha va byi nga tsakisi ni switsongo. Hikwalaho ka mimboyamelo ya vudyoho, vavanuna ni vavasati a va vi ni mianakanyo yo rhandzana minkarhi hinkwayo. (Varhoma 7:19, 20; 1 Vakorinto 7:28) Van’wana va fika ni le yinhleni yo lava munghana un’wana, kambe va nga ri na xisekelo xa Matsalwa xa ku dlaya vukati. (Matewu 19:9; Vaheveru 13:4) Va anakanya leswaku leswi swa antswa eka vona, ni leswaku ku rhandza ka Xikwembu eka vavanuna ni vavasati leswaku va tshama swin’we ka tika swinene. (Malakiya 2:16; Matewu 19:5, 6) Leyi handle ko kanakana i yin’wana ndlela ya maanakanyelo ya vanhu ematshan’weni ya ku anakanya hi ndlela ya Xikwembu.
15. Ha yini ku rhangisa Xikwembu xi ri xisirhelelo?
15 Kunene, ku rhangisa Xikwembu swa sirheleta! Mimpatswa leyi tekaneke leyi endlaka tano yi ta ringeta ku namarhelana ni ku tlhantlha swiphiqo swa yona hi ku tirhisa ndzayo ya Rito ra Xikwembu. Xisweswo va papalata mixaka hinkwayo leyi vavisaka mbilu leyi nga vaka kona loko ku honisiwa ku rhandza ka xona. (Pisalema 19:7-11) Leswi swi kombisiwe hi mpatswa lowuntshwa, lowu loko wu ri kusuhi ni ku dlaya vukati, wu ehleketeke ku landzela ndzayo ya Bibele. Endzhaku ka malembe yo tala loko wansati a anakanya hi ntsako lowu a veke na wona evukatini byakwe, u te: “Ndzi tshama ehansi ndzi rila loko ndzi anakanya leswaku a ndzi ta va ndzi hambane ni nuna wa mina malembe lawa hinkwawo. Kutani, ndzi khongela Yehovha Xikwembu ndzi n’wi nkhensa hikwalaho ka ndzayo ni nkongomiso wa yena lowu hi hlanganiseke evuxakeni byo tano lebyi tsakisaka.”
Vavanuna, Vavasati—Tekelelani Kreste!
16. I xikombiso xihi lexi Yesu a xi vekeleke vavanuna ni vavasati?
16 Yesu, loyi nkarhi hinkwawo a rhangiseke Xikwembu, u veke xikombiso lexi hlamarisaka a vekela vavanuna ni vavasati, naswona va endla kahle loko va nyikela nyingiso wa vukheta eka xona. Vavanuna va khutaziwa ku tekelela ndlela leyi Yesu a kombiseke vunhloko bya rirhandzu eka swirho swa vandlha ra Vukreste ha yona. (Vaefesa 5:23) Naswona vavasati va Vakreste va nga dyondza eka xikombiso lexi hetisekeke xa Yesu xo titsongahata eka Xikwembu.—1 Vakorinto 11:3.
17, 18. Xana Yesu u vekele vavanuna xikombiso lexinene hi ndlela yihi?
17 Bibele ya lerisa: “N’wina vavanuna, rhandzani vasati va n’wina kukota leswi Kriste na yena a nga rhandza [vandlha], kutani ú nyiketile vutomi bya yena hikwalaho ka [r]ona.” (Vaefesa 5:25) Ndlela ya nkoka leyi Yesu a kombiseke rirhandzu ra yena ro rhandza vandlha ra valandzeri va yena a ku ri ku va munghana wa vona wa le kusuhi. Yesu u te: “Ndzi mi vurile vanakulorhi, hikuva ndzi mi tivisile hinkwaswo leswi ndzi swi tweke eka Tata wa mina.” (Yohane 15:15) Anakanya hi nkarhi hinkwawo lowu Yesu a wu heteke a ri karhi a vulavula ni vadyondzisiwa va yena—mabulo layo tala ya yena na vona—ni ndlela leyi a a va tshemba ha yona! Xana xolexo a hi xikombiso lexinene ngopfu eka vavanuna?
18 Yesu a a va tsakela hakunene vadyondzisiwa va yena naswona a a va rhandza hakunene. (Yohane 13:1) Loko tidyondzo ta yena va nga ti twisisi, hi ku lehisa mbilu u va hlamusele timhaka exihundleni. (Matewu 13:36-43) Vavanuna, xana vuhlayiseki bya vumoya bya vasati va n’wina i bya nkoka lowu fanaka eka n’wina? Xana u heta nkarhi u ri na yena, mi tiyiseka leswaku havambirhi ka n’wina mi nghenisa mintiyiso ya Bibele emianakanyweni ni le timbilwini ta n’wina? Yesu a a famba ni vaapostola va yena evutirhelini, kumbexana a a va dyondzisa ha un’we-un’we. Xana u famba ni nsati wa wena evutirhelini, u hlanganyela na yena eka maendzo ya yindlu na yindlu ni le ku fambiseni ka tidyondzo ta Bibele?
19. Xana ndlela leyi Yesu a tirhisaneke ni vaapostola vakwe ha yona hi ku phindha-phindha ka swihoxo swa vona, na yona yi vekela vavanuna xikombiso hi ndlela yihi?
19 Yesu u vekele vavanuna xikombiso lexinene ngopfu-ngopfu loko a langutane ni ku nga hetiseki ka vaapostola vakwe. Enkarhini wa swakudya swa yena swo hetelela ni vaapostola vakwe, u xiye leswaku moya wa ku phikizana a wu tlhele wu vuya. Xana u va sole hi tihanyi? E-e, kambe u hlantswe milenge ya un’wana ni un’wana hi ku titsongahata. (Marka 9:33-37; 10:35-45; Yohane 13:2-17) Xana u kombisa ku lehisa mbilu ko tano eka nsati wa wena? Ematshan’weni yo tshamela ku vilela hi swihoxo swa yena, xana u ringeta ku n’wi pfuna hi ku lehisa mbilu ni ku fikelela mbilu ya yena hi xikombiso xa wena? Swi le rivaleni leswaku vavasati va ta angula hikwalaho ka ntwela-vusiwana wolowo wa rirhandzu, hi laha vaapostola eku heteleleni va endleke ha kona.
20. I yini lexi vavasati va Vakreste va nga fanelangiki ku xi rivala, naswona i mani a va vekeleke xikombiso?
20 Vavasati na vona va fanele va xiya Yesu, loyi a nga kalangiki a rivala leswaku “Xikwembu i nhloko ya Kriste.” Nkarhi hinkwawo a a titsongahatela Tata wakwe wa le tilweni. Hi ku fanana, vavasati a va fanelanga va rivala leswaku “wanuna i nhloko ya wansati,” ina, leswaku vavanuna va vona i tinhloko ta vona. (1 Vakorinto 11:3; Vaefesa 5:23) Muapostola Petro u khutaze vavasati va Vakreste ku xiya xikombiso xa “vavasati lavo hlawuleka” va le minkarhini ya khale, ngopfu-ngopfu xa Sara, loyi “a yingiseke Abrahama, a n’wi vula ‘Hosi yanga.’”—1 Petro 3:5, 6.
21. Ha yini vukati bya Abrahama na Sara byi humelerile kambe bya Lota ni nsati wakwe byi tsandzekile?
21 Entiyisweni Sara u siye kaya lerinene etikweni leri fuweke a ya tshama ematendeni etikweni rimbe. Hikwalaho ka yini? Xana a ku ri hikwalaho ka leswi a a tsakela vutomi byo tano? Nikatsongo. Hikwalaho ka leswi nuna wakwe a n’wi kombeleke ku famba ke? Swi le rivaleni leswaku xolexo a ku ri xona xivangelo xa kona, tanihi leswi Sara a a rhandza ni ku xixima Abrahama hikwalaho ka timfanelo ta yena to chava Xikwembu. (Genesa 18:12) Kambe xivangelo-nkulu xa leswaku a famba ni nuna wa yena a ku ri rirhandzu ra yena ro rhandza Yehovha ni ku navela ka yena loku humaka embilwini ko landzela nkongomiso wa Xikwembu. (Genesa 12:1) U kume ntsako hi ku yingisa Xikwembu. Hi hala tlhelo, nsati wa Lota u kanakane ku endla ku rhandza ka Xikwembu xisweswo a languta endzhaku a navela swilo leswi a swi siyeke etikweni ra rikwavo ra Sodoma. (Genesa 19:15, 25, 26; Luka 17:32) Vona makumu lama nga tsakisiki ya vukati byolebyo—hinkwaswo swi vangiwe hikwalaho ka ku nga yingisi ka yena Xikwembu!
22. (a) I ku tikambela kwihi ka vutlhari loku swirho swa ndyangu swi nga ta ku endla? (b) I yini leswi hi nga ta swi kambisisa edyondzweni ya hina leyi landzelaka?
22 Kutani tanihi wanuna kumbe wansati, i swa nkoka leswaku u tivutisa, ‘Xana Xikwembu i xo sungula endyangwini wa hina? Xana ndzi lwela ku hetisisa xiphemu xa ndyangu lexi Xikwembu xi ndzi nyikeke xona? Xana ndzi endla matshalatshala hinkwawo yo rhandza munghana wa mina ni ku n’wi pfuna ku kuma kumbe ku hlayisa vuxaka lebyinene na Yehovha?’ Emindyangwini yo tala na kona ku ni vana. Enkarhini lowu taka hi ta xiya xiphemu xa vatswari ni xilaveko xa vona ni vana va vona xo rhangisa Xikwembu.
Wa Tsundzuka Xana?
◻ Xana vuyelo bya tidyondzo ta Yesu byi nga ha va byihi emindyangwini yo tala?
◻ I hakelo yihi leyi magidi ya Vakreste lava tiyeke ma yi kumeke?
◻ I yini lexi nga ta pfuna vanghana va vukati leswaku va papalata ku tikhoma loko biha ni ku dlaya vukati?
◻ I yini leswi vavanuna va nga swi dyondzaka eka xikombiso xa Yesu?
◻ Xana vavasati va nga hoxa xandla njhani eka vukati lebyi tsakeke?
[Xifaniso lexi nga eka tluka 10]
Xana Sara u hoxe xandla hi ndlela yihi leswi endleke vukati byakwe byi humelela?