Tinyimpfu Ta Yehovha Ti Lava Ku Khathaleriwa Hi Musa

“Mi pfumela leŝaku yena Yehova i Šikwembu! . . . Hi tiko ra yena, ni ntlhambi lowu a wu risaka.”—PISALEMA 100:3.

1. Xana Yehovha u ma khoma njhani malandza ya yena?

YEHOVHA i Murisi Lonkulu. Loko hi ri malandza ya yena, u hi languta tanihi tinyimpfu ta yena naswona u hi khathalela hi musa. Tata wa hina wa le tilweni wa hi chavelela ni ku hi phyuphyisa a tlhela a hi yisa “e tindleleni le’to lulama, hikwalaho ka v̌ito ra yena.” (Pisalema 23:1-4) Murisi Lonene, Yesu Kreste, u hi rhandza swinene lerova u nyikete moya-xiviri wa yena hikwalaho ka hina.—Yohane 10:7-15.

2. Xana vanhu va Xikwembu va tikuma va ri exiyin’weni xihi?

² Tanihi vanhu lava khathaleriwaka hi musa, hi nga vula leswi ni mupisalema: “Tirelani Yehova hi ku ṭaka, mi ta e mahlweni ka yena hi ku ṭaka lo’kukulu! Mi pfumela leŝaku yena Yehova i Šikwembu! Hi yena l’a nga hi endla, a hi hina; hi tiko ra yena, ni ntlhambi lowu a wu risaka.” (Pisalema 100:2, 3) Ina, hi tsakile naswona hi sirhelelekile. Swi fana ni loko hi hlayisekile eka swikanyana swo biha, hi ri entlhambini wa tinyimpfu lowu pfaleriweke hi makhumbi ya maribye yo tiya.—Tinhlayo 32:16; 1 Samuwele 24:3; Sofoniya 2:6.

Varisi Vo Tirhandzela Va Ntlhambi

3. Xana vakulu va Vakreste lava vekiweke va wu khoma njhani ntlhambi wa Xikwembu?

³ A swi hlamarisi leswi hi nga tinyimpfu ta Xikwembu leti tsakeke! Vakulu lava hlawuriweke va hi rhangela. A va ‘tiendli tihosi,’ va hi fuma, kumbe va ringeta ku lawula ripfumelo ra hina. (Tinhlayo 16:13; Matewu 20:25-28; 2 Vakorinto 1:24; Vaheveru 13:7) Ematshan’weni ya sweswo, i varisi va rirhandzu lava tirhisaka ndzayo ya muapostola Petro leyi nge: “Risani ntlhambi wa Xikwembu lowu nge hansi ka n’wina, mi wu hlayisa ku nga ri hi ku sindzisiwa, kambe ku ri hi ku swi rhandza, hilaha Xikwembu xi swi lavaka hakona, naswona ku nga ri hi ku langutela bindzu leri khomisaka tingana, kambe hi ku hiseka. Mi nga tshuki mi fuma lava mi nga nyikiwa vona ku va risa, kambe mi boxela ntlhambi entila lowunene.” (1 Petro 5:2, 3) Muapostola Pawulo u byele vakulu-kulobye a ku: “Tilanguteleni ke, mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona; risani [vandlha ra, NW] Xikwembu, le[ri] xi nga tikumela [r]ona hi rifu ra N’wana wa xona wa xiviri.” Kunene tinyimpfu ti tsakile hikuva vavanuna lava lava hlawuriweke hi moya lowo kwetsima va “tsetselel[a] ntlhambi”!—Mintirho 20:28-30.

4. Xana Charles T. Russell a a tiviwa swinene a ri ni vuxaka bya njhani ni ntlhambi?

⁴ Yesu u nyike vandlha “tinyiko ta vavanuna,” van’wana tanihi “vaphasta,” kumbe varisi, lava khomaka ntlhambi wa Yehovha hi ndlela ya musa. (Vaefesa 4:8, 11; King James Version) Un’wana wa vavanuna lava a ku ri Charles T. Russell, muungameri wo sungula wa Sosayiti ya Watch Tower. A a vitaniwa Phasta Russell hikwalaho ka mintirho ya yena ya rirhandzu ni ya ntwela-vusiwana loko a risa ntlhambi lowu nga hansi ka Murisi Lonkulu, Yesu Kreste. Namuntlha, vakulu va Vakreste va hlawuriwa hi Huvo leyi Fumaka ya Timbhoni ta Yehovha, naswona ku xiyisisiwa leswaku marito yo tanihi “phasta,” “nkulu,” kumbe “mudyondzisi” ya nga tirhisiwi tanihi swithopo. (Matewu 23:8-12) Kambe, vakulu va siku ra namuntlha va endla ntirho wa vuphasta kumbe wa vurisi leswaku va pfuna tinyimpfu leti nge madyelweni ya Yehovha.

5. Hikwalaho ka yini vanhu lavantshwa va fanele va tolovelana ni vakulu lava hlawuriweke evandlheni ra Vukreste?

⁵ Tanihi varisi, vakulu va hoxa xandla swinene hi tlhelo ra nhluvuko wa moya wa lavantshwa. Hikwalaho, buku leyintshwa leyi nge Vutivi Lebyi Yisaka eVuton’wini Lebyi Nga Heriki yi vula leswi eka tluka 168: “Tolovelana ni vakulu lava vekiweke evandlheni. Va ni ntokoto lowukulu eku tirhiseni ka vutivi bya Xikwembu, hikuva va fikelele timfanelo ta valanguteri leti andlariweke eBibeleni. (1 Timotiya 3:1-7; Tito 1:5-9) U nga kanakani ku ya eka un’wana wa vona loko u lava mpfuno wa moya leswaku u hlula mukhuva lowu nga fambisaniki ni swilaveko swa Xikwembu. U ta xiya leswaku vakulu va landzelela xitsundzuxo xa Pawulo: ‘Mi tiyisa lava helaka ntamu; pfunani lava tsaneke, mi lehisela hinkwavo timbilu.’—1 Vatesalonika 2:7, 8; 5:14.”

Loko Lavantshwa Va Lava Ku Chumayela

6. Hi rihi endlelo leri landzeleriwaka loko xichudeni xa Bibele xi lava ku va muhuweleri wa Mfumo?

⁶ Endzhaku ka loko xichudeni xa Bibele xi kume vutivi naswona se xi hlanganyele emihlanganweni swa xinkarhana, xi nga ha lava ku va muhuweleri wa Mfumo, muchumayeri wa mahungu lamanene. (Marka 13:10) Loko swi ri tano, Mbhoni leyi fambisaka dyondzo ya Bibele na xona yi fanele yi vulavula ni mulanguteri la ungamelaka, loyi a nga ta hlela ni un’wana wa vakulu va Komiti ya Ntirho ya Vandlha ni nkulu un’wana leswaku va hlangana ni xichudeni xa Bibele ni mudyondzisi wa xona. Bulo ra kona ri ta va ri sekeriwe ebukwini leyi nge Ku Hleleriwa Ku Hetisisa Vutirheli Bya Hina, matluka 98 na 99. Loko vakulu lavambirhi va vona leswaku munhu loyi lontshwa wa pfumela eka tidyondzo ta xisekelo ta Bibele naswona u pfumelelana ni misinya ya milawu ya Xikwembu, u ta byeriwa leswaku wa fanelekela ku hlanganyela evutirhelini bya le rivaleni.a Loko a vika vutirheli bya yena hi ku byi tsala exivikweni xa ntirho wa nsimu, byi ta tsariwa ekhadini ra Rhekhodo ra Muhuweleri ra Vandlha leri tsariweke vito ra yena. Kutani ke, munhu loyi lontshwa a nga ha vika ntirho wa yena wo veka vumbhoni xikan’we ni timiliyoni ta van’wana leti ‘huwelelaka rito ra Xikwembu’ hi ntsako. (Mintirho 13:5) Ku ta endliwa xitiviso evandlheni xa leswaku i muhuweleri la nga khuvuriwangiki.

7, 8. Xana muhuweleri la nga khuvuriwangiki a nga pfunisiwa ku yini evutirhelini hi tindlela leti fanelaka?

⁷ Muhuweleri la nga khuvuriwangiki u lava mpfuno wa vakulu ni Vakreste van’wana lava vupfeke. Hi xikombiso, nhluvuko wa yena wa moya i mhaka leyi tsakisaka mufambisi wa Dyondzo ya Buku ya Vandlha leyi a hlanganyelaka eka yona. Muhuweleri loyi lontshwa a nga ha kuma swi n’wi tikela ku vulavula kahle entirhweni wa yindlu na yindlu. (Mintirho 20:20) Kutani a nga ha amukela mpfuno, ngopfu-ngopfu lowu humaka eka loyi a a dyondzaka na yena tidyondzo ta Bibele hi buku leyi nge Vutivi. Mpfuno wo tano lowu tirhaka wu fanerile, hikuva Yesu Kreste u lulamisele vadyondzisiwa va yena vutirheli.—Marka 6:7-13; Luka 10:1-22.

⁸ Leswaku vutirheli bya hina byi humelela, ku lunghiselela lokunene ka ha ri emahlweni i ka nkoka. Hikwalaho, vahuweleri havambirhi va nga ha hlangana ku sungula leswaku va lunghiselela swingheniso leswi ringanyetiweke eka minkandziyiso ya n’hweti na n’hweti ya Vutirheli Bya Hina Bya Mfumo. Loko va sungula ntirho wa vona wa nsimu, loyi a nga ni ntokoto ku antswa a nga ha vulavula emutini wo sungula kumbe ni le ka wa vumbirhi. Endzhaku ka ku pfuxelana ka xinghana, vahuweleri havambirhi va nga ha nyikela vumbhoni. Ku tirha swin’we evutirhelini mavhiki ma nga ri mangani swi nga tswala maendzo yo vuyela lamanene hambi ku ri dyondzo ya Bibele hi buku leyi nge Vutivi Lebyi Yisaka eVuton’wini Lebyi Nga Heriki. Muhuweleri la nga ni ntokoto swinene a nga ha fambisa dyondzo swa xinkarhana ivi a yi nyika muhuweleri lontshwa wa Mfumo. Mawaku ndlela leyi vahuweleri havambirhi va nga ta tsaka ha yona loko xichudeni xa Bibele xi kombisa ku tlangela vutivi bya Xikwembu!

9. Hi wahi malunghiselelo lama endliwaka loko muhuweleri a navela ku khuvuriwa?

⁹ Loko muhuweleri la nga khuvuriwangiki a ri karhi a endla nhluvuko wa moya, a nga ha tinyiketela eka Xikwembu hi xikhongelo ivi a lava ku khuvuriwa. (Ringanisa Marka 1:9-11.) U fanele a tivisa mulanguteri wa vandlha la ungamelaka leswaku u navela ku khuvuriwa kutani yena u ta hlela leswaku vakulu va pfuxeta swivutiso leswi nga eka matluka 175 ku ya eka 218 swa buku leyi nge Ku Hleleriwa Ku Hetisisa Vutirheli Bya Hina ni muhuweleri loyi. Swiyenge leswa mune leswi swivutiso leswi swi avanyisiweke ha swona swi nga ha hlanganisiwa hi makhamba manharhu hi vakulu vanharhu loko swi koteka. Loko va pfumelelana leswaku muhuweleri la nga khuvuriwangiki u ti twisisa kahle tidyondzo ta Bibele naswona wa faneleka hi tindlela to karhi, va ta n’wi byela leswaku a nga ha khuvuriwa. Hikwalaho ka ku tinyiketela ka yena ni ku khuvuriwa, u va la ‘fungheriweke’ ku pona.—Ezekiyele 9:4-6.

Ku Khathalela Swilaveko Swo Hlawuleka

10. Endzhaku ko heta ku dyondza buku leyi nge Vutivi naswona se a khuvuriwile, xana munhu a nga engetela vutivi bya yena bya Matsalwa hi ndlela yihi?

¹⁰ Endzhaku ka loko munhu a hetile dyondzo ya yena ya Bibele ebukwini leyi nge Vutivi naswona se a khuvuriwile, a swi nge he bohi leswaku u fambisa dyondzo leyi hleriweke na yena hi buku ya vumbirhi, yo tanihi Vun’we Eku Gandzeleni Ka Xikwembu Xi Ri Xin’we Xa Ntiyiso.b Phela, munhu loyi a ha ku khuvuriwaka u ta dyondza swo tala loko a ri karhi a lunghiselela minhlangano ya Vukreste ni loko a va kona eka yona nkarhi na nkarhi. U ta tlhela a kuma vutivi lebyi engetelekeke loko torha ra yena ro lava ntiyiso ri n’wi susumetela ku hlaya ni ku dyondza tibuku ta Vukreste a ri yexe ni ku bula hi timhaka ta Matsalwa ni vapfumeri-kulobye. Kambe ku vuriwa yini hi loko ku va ni swilaveko swo hlawuleka?

11. (a) Xana Apolosi u pfuniwe hi Prisila na Akwila hi ndlela yihi? (b) Hi yihi ndlela leyi munhu la kulekenyana la ha ku khuvuriwaka loyi a ehleketaka ku nghenela vukati a nga pfuniwaka ha yona?

¹¹ Hambi a ri Apolosi, loyi a a “[ma tiva] ngopfu Matsalwa” ni la dyondzisiweke hi Yesu, la n’wi dyondziseke swilo hi laha swi nga ha kona, u pfunekile loko Prisila na Akwila ku nga Vakreste lava nga ni ntokoto “va n’wi rhurhela, va n’wi hlamusela swinene-nene Ndlela ya Xikwembu.” (Mintirho 18:24-26; ringanisa Mintirho 19:1-7.) Hikwalaho, a hi nge munhu la ha ku khuvuriwaka la kulekenyana u anakanya hi ku gangisana ni ku nghenela vukati. Mukreste la nga ni ntokoto swinene a nga ha n’wi pfuna ku kuma rungula leri vulavulaka hi timhaka toleto etibukwini ta Watch Tower. Hi xikombiso, ku ni rungula leri pfunaka leri vulavulaka hi timhaka toleto ebukwini leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Xiyenge 7.c Muhuweleri loyi a fambiseke dyondzo ya Bibele na yena a nga ha bula hi mhaka leyi ni munhu loyi lontshwa, hambi leswi dyondzo ya nkarhi na nkarhi yi nga ta ka yi nga katseki.

12. Hi yihi ndlela leyi vanghana va vukati lava ha ku khuvuriwaka lava nga ni swiphiqo va nga pfuniwaka ha yona?

¹² Xiya xikombiso xin’wana. Kumbexana vanghana va vukati lava ha ku khuvuriwaka va ni swiphiqo eku tirhiseni ka misinya ya milawu ya Xikwembu. Va nga ha vulavula ni nkulu, loyi a nga ha hetaka madyambu yo hlayanyana a kanela Matsalwa na vona ni ku va komba rungula leri kumekaka etibukwini ta Watch Tower. Hambi swi ri tano, nkulu loyi a nge sunguli, ehansi dyondzo ya nkarhi na nkarhi ya Bibele ni mpatswa lowu.

Loko Loyi Lontshwa A Dyoha

13. Ha yini vakulu va vandlha va fanele va n’wi komba tintswalo munhu la ha ku khuvuriwaka loyi a dyohaka kambe a tisola?

¹³ Vakulu va tekelela Murisi Lonkulu, Yehovha, la nge: “Tinyimpfu ta mina ti ta risiwa hi mina, . . . nḍi bohelela le’yi ṭhov̌ekeke, nḍi tiyisisa le’yi v̌abyaka.” (Ezekiyele 34:15, 16; Vaefesa 5:1) Hi ku fambisana ni sweswo, mudyondzisiwa Yuda u khutaze leswaku vatotiwa va Vakreste lava kanakanaka kumbe lava weleke xidyohweni va khomiwa hi tintswalo. (Yuda 22, 23) Tanihi leswi hi languteleke swo tala swinene eka Vakreste lava nga ni ntokoto, hakunene tintswalo ti fanele ti kombisiwa eka munhu loyi a ha ku khuvuriwaka—loyi mbuyangwana a nga nyimpfu—loyi a dyoheke kambe a tisolaka. (Luka 12:48; 15:1-7) Hikwalaho, vakulu, lava ‘avanyiselaka Yehovha,’ va khathalela tinyimpfu toleto hi musa ni ku tiololoxa hi moya wo rhula.—2 Tikronika 19:6; Mintirho 20:28, 29; Vagalatiya 6:1.d

14. I yini lexi faneleke ku endliwa loko muhuweleri la ha ku khuvuriwaka a endla xidyoho lexikulu, naswona a nga pfunisiwa ku yini?

¹⁴ A hi nge muhuweleri loyi a ha ku khuvuriwaka, khale a a ri ni xiphiqo xo nwa, ivi a rhetemuka a nwa ku tlurisa eka khamba rin’we kumbe mambirhi. Kumbexana u hlule mukhuva wo dzaha fole kambe a wela endzingweni a dzaha exihundleni kan’we kumbe kambirhi. Hambi loko makwerhu loyi lontshwa a kombele ku rivaleriwa hi Xikwembu, u fanele a lava mpfuno wa nkulu leswaku xidyoho xi nga vi mukhuva. (Pisalema 32:1-5; Yakobo 5:14, 15) Loko a byela un’wana wa vakulu xidyoho xa yena, nkulu yoloye u fanele a ringeta ku lulamisa munhu loyi lontshwa hi ndlela ya tintswalo. (Pisalema 130:3) Ndzayo ya Matsalwa hi yoxe yi nga swi kota ku n’wi pfuna ku ololoxa tindlela leti a fambaka ha tona. (Vaheveru 12:12, 13) Nkulu loyi u ta vulavurisana ni mulanguteri la ungamelaka wa vandlha mayelana ni xiyimo ku kambisisa leswaku hi wihi mpfuno lowu engetelekeke lowu faneleke wu nyikeriwa.

15. Etimhakeni tin’wana, i yini lexi nga ha vaka xi fanela loko munhu loyi a ha ku khuvuriwaka a dyoha?

¹⁵ Etimhakeni tin’wana ku nga ha laveka swo tala. Loko a nga ha tisa khombo entlhambini kumbe swiphiqo swin’wana, a ri ni ndhuma yo biha, huvo ya vakulu yi ta avela vakulu vambirhi leswaku va kambisisa mhaka. Loko vakulu lava va kuma leswaku mhaka i yikulu hi laha ku ringaneleke lerova ku laveka komiti ya vuavanyisi, va fanele va tivisa huvo ya vakulu. Huvo ya vakulu yi ta hlawula komiti ya vuavanyisi leswaku yi pfuna mudyohi. Komiti ya vuavanyisi yi fanele yi tirhisana na yena hi ndlela leyinene. Va fanele va lwela ku n’wi lulamisa hi Matsalwa. Loko a angula kahle eka matshalatshala lamanene ya komiti ya vuavanyisi, kutani va nga ha kambisisa loko ku nga va ni mpfuno wo karhi eka ku nga tirhisiwi ka yena eka swiyenge swa le platifomo emihlanganweni eHolweni ya Mfumo kumbe loko a fanele a pfumeleriwa ku hlamula emihlanganweni.

16. Vakulu va nga endla yini leswaku va pfuna la dyoheke?

¹⁶ Loko la dyoheke a angula kahle, nkulu un’we kumbe vambirhi lava nga le ka komiti ya vuavanyisi va nga ha lunghiselela ku endla maendzo ya vurisi hi xikongomelo xo tiyisa ripfumelo ra yena ni ku aka ku tlangela ka yena mimpimanyeto leyinene ya Xikwembu. Un’wana ni un’wana wa vona a nga ha tirha na yena evutirhelini bya nsimu nkarhi na nkarhi. Va nga ha bula na yena hi Matsalwa ma nga ri mangani, kumbexana va tirhisa swihloko swa Xihondzo xo Rindza na Xalamuka! leswi faneleke kambe va nga sunguli dyondzo ya Bibele ya nkarhi na nkarhi. Hi nkhathalelo wo tano wa musa, la dyoheke a nga ha tiyisiwa leswaku a lwisana ni ku tsana ka nyama emasikwini lama taka.

17. Hi wahi magoza lama tekiwaka loko mudyohi la khuvuriweke a nga hundzuki ni ku fularhela ndlela ya yena ya vudyoho?

¹⁷ Kavula, ku va wa ha ku khuvuriwa a hi xivangelo xa leswaku u ta dyoha u nga hundzuki. (Vaheveru 10:26, 27; Yuda 4) Loko mudyohi wihi na wihi la khuvuriweke a nga hundzuki ni ku fularhela ndlela ya yena ya vudyoho u ta hlongoriwa evandlheni. (1 Vakorinto 5:6, 11-13; 2 Vatesalonika 2:11, 12; 2 Yohane 9-11) Loko xiendlo lexi xi fanela, huvo ya vakulu yi ta hlawula komiti ya vuavanyisi. Loko a hlongoriwa, ku ta endliwa xitiviso lexi, xo koma: “. . . u susiwile.”e

Va Pfune Leswaku Va “Kongoma Eku Hetisekeni”

18. Ha yini hi nga tiyisekaka leswaku Vakreste lava ha ku khuvuriwaka ni van’wana va ha fanele ku dyondza swilo swin’wana swo tala nkarhi na nkarhi mayelana na Yehovha ni ku rhandza ka yena?

¹⁸ Vunyingi lebyikulu bya malandza ya Xikwembu byi ta sala entlhambini. Nakambe lexi tsakisaka, un’wana ni un’wana wa hina u ta swi kota ku tshinela ekusuhi swinene ni Tata wa hina wa le tilweni hikuva nkarhi hinkwawo hi ta swi kota ku dyondza swo tala mayelana na yena ni ku rhandza ka yena. (Eklesiasta 3:11; Yakobo 4:8) Magidi lama khuvuriweke hi Pentekosta ya 33 C.E. handle ko kanakana a ma ha fanele ku dyondza swilo swo tala. (Mintirho 2:5, 37-41; 4:4) Ni Vamatiko lava a va nga ri ni xisekelo xa Matsalwa a va ha fanele va endlisa sweswo. Hi xikombiso, ni lava khuvuriweke endzhaku ka nkulumo ya Pawulo eAreyopago le Atena a va ha fanele va endla tano. (Mintirho 17:33, 34) Ni namuntlha, vanhu lava ha ku khuvuriwaka va ha ri ni swo tala leswi va faneleke va swi dyondza, naswona va lava nkarhi ni mpfuno wo tiyisa ku tiyimisela ka vona leswaku va ya emahlweni va endla leswi lulameke emahlweni ka Xikwembu.—Vagalatiya 6:9; 2 Vatesalonika 3:13.

19. Xana lava khuvuriwaka va nga pfuniwa njhani leswaku va “kongoma eku hetisekeni”?

¹⁹ Lembe rin’wana ni rin’wana magidi ma khuvuriwa, naswona ma lava mpfuno leswaku ma “kongoma eku hetisekeni.” (Vaheveru 6:1-3) Hi rito, xikombiso ni mpfuno lowu tirhaka ensin’wini, u nga ha kota ku pfuna van’wana ku ambala vumunhu lebyintshwa ni ku “ya emahlweni va famba entiyisweni.” (3 Yohane 4, NW; Vakolosa 3:9, 10) Loko u ri muhuweleri la nga ni ntokoto, vakulu va nga ha ku khutaza leswaku u pfuna mupfumeri-kulobye lontshwa entirhweni wa nsimu kumbe leswaku u bula na yena hi tinhla to karhi ta Matsalwa mavhiki ma nga ri mangani leswaku u tiyisa ripfumelo ra yena eka Xikwembu, ku tlangela ka yena minhlangano ya Vukreste, ni swin’wana. Vuxaka bya varisi ni ntlhambi byi fana ni lebyiya bya tatana la khongotelaka ni manana la nga ni musa. (1 Vatesalonika 2:7, 8, 11) Kambe, vakulu va nga ri vangani ni malandza ya vutirheli va nge khathaleli xin’wana ni xin’wana lexi lavekaka evandlheni. Hinkwerhu ka hina hi fana ni swirho swa ndyangu leswi pfunanaka. Hinkwerhu ka hina hi nga pfuna vagandzeri-kulorhi hi ndlela yo karhi. Wena hi wexe u nga ha swi kota ku nyikela xikhutazo, ku chavelela lava karhatekeke ni ku seketela lava tsaneke.—1 Vatesalonika 5:14, 15.

20. I yini lexi u nga xi endlaka ku hangalasa vutivi bya Xikwembu ni ku khathalela tinyimpfu ta le madyelweni ya Yehovha hi musa?

²⁰ Vanhu va lava vutivi bya Xikwembu, naswona tanihi Mbhoni ya Yehovha, u nga ha hlanganyela hi ntsako eku byi hangalaseni. Tinyimpfu ta Yehovha ti lava nkhathalelo wa musa, naswona u nga hoxa xandla hi ndlela ya rirhandzu u ti nyika khathalelo lowu. Onge Yehovha a nga katekisa vutirheli bya wena, naswona onge a nga ku hakela hikwalaho ka matshalatshala ya wena yo huma embilwini leswaku u pfuna tinyimpfu ta madyelo ya yena.

[Tinhlamuselo ta le hansi]

A Wu Ta Hlamurisa Ku Yini?

◻ Xana Yehovha u ti khoma njhani tinyimpfu ta yena?

◻ I yini lexi endliwaka loko vanhu lavantshwa va lava ku chumayela?

◻ Xana vapfumeri-kulorhi va nga va pfunisa ku yini vanhu lavantshwa lava nga ni swilaveko swo hlawuleka?

◻ Hi wihi mpfuno lowu vakulu va nga wu nyikelaka eka lava dyohaka kambe va hundzuka?

◻ Xana u nga n’wi pfunisa ku yini munhu la ha ku khuvuriwaka ku “kongoma eku hetisekeni”?

[Xifaniso lexi nga eka tluka 16]

Charles T. Russell a a tiveka swinene tanihi murisi wa rirhandzu wa ntlhambi

[Xifaniso lexi nga eka tluka 18]

Varisi lava nga ni ntwela-vusiwana va khoma ntlhambi wa Xikwembu hi rirhandzu