Xikwembu Xa Ku Khathalela

MARY, wansati wa Mukreste eku heleni ka malembe ya yena ya va-40, u xaniseke ngopfu evuton’wini bya yena. Ku oswa ka nuna wakwe ku yise eku dlayeni ka vukati ku tlula malembe ya khume lama hundzeke. Endzhakukasweswo, Mary u tikarhatele ku hetisisa xiphemu xakwe tanihi mutswari la nga yexe wa vana va mune. Kambe na sweswi wa ha ri yexe, naswona minkarhi yin’wana xivundza lexi xi languteka xi nga tiyiseleki. Mary wa tivutisa, ‘Xana leswi swi vula leswaku Xikwembu a xi na mhaka na mina kumbe vana va mina lava nga hava tatana?’

Hambiloko u tshame u humeleriwa hi maxangu lama fanaka kumbe e-e, entiyisweni u nga rila na Mary emaxangwini ya yena. Hinkwerhu ka hina hi tshame hi langutana ni swiyimo leswi ringaka, naswona hi nga ha va hi tivutise leswaku xana Yehovha u ta hi pfuna rini naswona njhani. Man’wana ya maxangu lawa ya vangiwa hikwalaho ka leswi hi namarhelaka milawu ya Xikwembu swinene. (Matewu 10:16-18; Mintirho 5:29) Man’wana ya vangiwa hi leswi hi nga hetisekangiki tanihi vanhu naswona hi hanyaka emisaveni leyi fumiwaka hi Sathana. (1 Yohane 5:19) Muapostola Pawulo u tsarile: “Swivumbiwa hinkwaswo swa konya hi ku vaviseka.”—Varhoma 8:22.

Hambiswiritano, ku va u langutane ni ndzingo lowukulu a swi vuli swona leswaku Yehovha u ku fularherile kumbe a nga na mhaka ni vuhlayiseki bya wena. Xana u nga tiyiseka njhani hi leswi? I yini lexi kombisaka leswaku Xikwembu xa khathala hi wena?

Xikombiso Xa Khale

Bibele yi nyikela vumbhoni lebyi nga erivaleni bya leswaku Yehovha wa khathala hi munhu un’wana ni un’wana. Anakanya hi Davhida. Yehovha a a ri ni nkhathalelo wa xiviri eka murisi loyi lontsongo, u n’wi teke tanihi loyi a “ranḍiwaka hi yena.” (1 Samuwele 13:14) Endzhakunyana, loko Davhida a sungula ku fuma tanihi hosi, Yehovha u n’wi tshembisile a ku: “Hinkwako lomu u yaka kona ndzi ta va na wena.”—2 Samuwele 7:9, NW.

Xana leswi swi vula leswaku Davhida a “sirhelelekile” evuton’wini bya yena, a ri hava ku nonon’hweriwa kwihi na kwihi? E-e, Davhida u langutane ni miringo leyikulu hi nkarhi wa ku fuma ka yena ni le mahlweni ka kona. Hi malembe yo hlaya emahlweni ko va hosi, u hlongorisiwe ngopfu hi Hosi Sawulo wa mudlayi. Enkarhini lowu wa vutomi, Davhida u tsarile a ku: “Moya wa mina wu le šikari ka tinghala; . . . e šikari ka v̌anhu lav̌a meno ya v̌ona ma nga matlhari ni misev̌e.”—Pisalema 57:4.

Hambiswiritano, emaxangwini lawa hinkwawo, Davhida a tiyiseka hi nkhathalelo wa Yehovha lowukulu. U khongele eka Yehovha a ku: “U ṭala ku v̌alanga hikwaku ka mina.” Ina, eka Davhida onge hi loko Yehovha a tsale maxangu hinkwawo ebukwini. Kutani Davhida u engeterile a ku: “Hlengeleta mihloti ya mina e khuwaneni ra wena; a yi ṭariwanga e bukwini ya wena šana?”a (Pisalema 56:8) Hi ku tirhisa xikombiso lexi, Davhida u phofule ntshembo wa leswaku Yehovha a nga xiyi ntsena xiyimo kambe ni leswi u titwisaka swona.

Loko a ri kusuhi ni ku fa, Davhida u tsale hi ntokoto wa yena n’wini a ku: “Yehova o tiyisa mikonḍo ya munhu lo’nene, kutani o ṭakisiwa hi ndlela ya yena. Loko a khunguv̌anyeka, a nga ka a nga weri makumo, hikuv̌a Yehova o ṅwi khomile hi v̌oko.” (Pisalema 37:23, 24) Na wena u nga tiyiseka leswaku hambiloko miringo ya wena yi nga heli naswona yi ri leyi hambetaka, Yehovha wa swi vona naswona ku tiyisela ka wena u ku languta ku ri ka nkoka. Pawulo u tsarile: “Xikwembu a xi na mona, xi nga ka xi nga rivali ntirho wa n’wina ni rirhandzu leri mi ri kombeke hi vito ra xona, hi ku tirhela vahlawuriwa va xona, hilaha mi swi endlaka hakona nisweswi.”—Vaheveru 6:10.

Kutlulakwalaho, Yehovha a nga ku pfuna hi ku ku nyika matimba leswaku u tiyisela xihinga xin’wana ni xin’wana lexi u hlanganaka na xona. Davhida u tsarile: “Makhombo ya l’a lulameke ma tele ngopfu, kambe Yehova o ṅwi humesa ka wona hikwawo.” (Pisalema 34:19) Entiyisweni, Bibele yi hi byela leswaku mahlo ya Yehovha “ma famba-famba e misav̌eni hikwayo e ku tiyisa la’v̌a nga v̌a yena hi timbilu hikwato ta v̌ona.”—2 Tikronika 16:9.

Yehovha U Ku Vitanile

Vumbhoni lebyi engetelekeke bya nkhathalelo wa Yehovha lowukulu byi nga kumeka emaritweni ya Yesu. “A ku na munhu la nga taka ka mina, loko a nga kokeriwi ka mina hi Tatana la ndzi rhumeke.” (Yohane 6:44) Ina, Yehovha u pfuna vanhu ha un’we-un’we leswaku va vuyeriwa hi ndlela leyi humelelaka egandzelweni ra Kreste. Hi ndlela yihi? Hi ndlela leyikulu, i ntirho wo chumayela hi Mfumo. Entiyisweni, ntirho lowu wu nyikela “vumbhoni eka vanhu va matiko hinkwawo,” naswona wu fikelela vanhu hi ku ya hi swilaveko swa vona ha un’we-un’we. Ku yingisa ka wena ni ku angula ka wena eka rungula ra mahungu lamanene i vumbhoni bya xiviri bya ku khathala ka Yehovha ha wena.—Matewu 24:14.

Hi ku tirhisa moya lowo kwetsima, Yehovha u kokela vanhu eka N’wana wakwe ni le ka ntshembo wa vutomi lebyi nga heriki. Leswi swi pfuna un’wana ni un’wana leswaku a twisisa ni ku tirhisa mintiyiso ya swa moya ku nga khathariseki ku tsana ka ntumbuluko ni ku nga hetiseki loku a nga na kona. Entiyisweni, munhu a nge swi twisisi swikongomelo swa Xikwembu handle ka mpfuno wa moya wa Xikwembu. (1 Vakorinto 2:11, 12) Hilaha Pawulo a tsaleleke Vatesalonika ha kona, “a hi hinkwavo lava nga ni ku pfumela.” (2 Vatesalonika 3:2) Yehovha u nyikela moya wa yena ntsena eka lava kombisaka leswaku va rhandza ku kokiwa hi yena.

Yehovha u koka vanhu hikuva wa va rhandza tanihi vanhu naswona u lava leswaku va ponisiwa. Mayana vumbhoni lebyi tiyeke bya nkhathalelo wa Yehovha lowukulu! Yesu u te: “A hi ku rhandza ka Tata wa n’wina la nge matilweni leswaku ku lahleka na un’we wa lavatsongo lava.” (Matewu 18:14) Ina, munhu un’wana ni un’wana i wa nkoka emahlweni ka Xikwembu naswona u hlawulekile. Hi swona leswi vangeleke Pawulo ku tsala a ku: “Xi rihisela un’wana ni un’wana hi ku ya hi mintirho ya yena.” (Varhoma 2:6) Naswona muapostola Petro u te: “Xikwembu a xi yi hi nghohe; kambe, ematikweni hinkwawo, loyi [munhu ha un’we-un’we] a xi chavaka a vuya a endla leswi lulameke, xa n’wi tsakela.”—Mintirho 10:34, 35.

Masingita Ya Yesu

Leswaku Xikwembu xa khathala hi vanhu swi kombisiwe kahle hi masingita lama endliweke hi N’wana wa xona, Yesu. Ku hanyisa loku a ku endliwa hi mintlhaveko leyi enteke. (Marka 1:40, 41) Tanihi leswi Yesu “a nga tisungule[riki] a endla xilo hi yexe; ú endla ntsena lexi a xi voneke xi endliwa hi Tata wa yena,” tintswalo ta yena ti kombisa rirhandzu ra Yehovha leri khumbaka mbilu eka un’wana ni un’wana wa malandza yakwe.—Yohane 5:19.

Tsundzuka mhaka ya singita leri endliweke hi Yesu, leyi rhekhodiweke eka Marka 7:31-37. Laha Yesu u hanyise wanuna loyi a a fe tindleve naswona a ri mbheveve. A “n’wi [wanuna] tekela etlhelo,” ku hlamusela Bibele. Kutani, “a languta ehenhla tilweni, a hefemuteka, a ku ka munhu loyi: ‘Efata!’ hileswaku: ‘Pfuleka!’”

Hikwalaho ka yini Yesu a suse wanuna loyi exikarhi ka ntshungu? Phela, swi tolovelekile leswaku munhu loyi a nga twiki naswona a ri mbheveve a titwa a khomiwa hi tingana emahlweni ka vahlaleri. Yesu a nga ha va a ku xiyile ku titwa a nga ntshunxekanga ka wanuna loyi naswona hi yona mhaka leyi a nga hlawula ku n’wi hanyisa exihundleni. Xidyondzi xin’wana xa Bibele xa xiya: “Mhaka hinkwayo, yi hi hlamusela kahle leswaku Yesu a nga langutanga xiyimo xa vuvabyi bya wanuna loyi ntsena; u n’wi langute tanihi munhu. Wanuna loyi a a ri ni xilaveko xo hlawuleka naswona a ri ni xiphiqo lexi nga tolovelekangiki, naswona hi ntwela-vusiwana Yesu u tirhisane na yena hi ndlela leyi hlayiseke mintlhaveko yakwe ni hi ndlela leyi a koteke ku yi twisisa.”

Mhaka leyi yi kombisa leswaku Yesu a a ri ni nkhathalelo lowukulu hi vanhu. U nga tiyiseka leswaku wa ku khathalela na wena. Hakunene, rifu rakwe ra gandzelo i xikombiso xa rirhandzu xa misava hinkwayo ya vanhu lava lavaka nkutsulo. Kambe u fanele u amukela xiendlo xexo hi wexe, hilaha Pawulo a endleke ha kona loko a tsala a ku: “N’wana wa Xikwembu . . . [u ndzi rhandzile, NW] a va a tinyiketa hikwalaho ka mina.” (Vagalatiya 2:20, xiitaliki i xerhu.) Naswona tanihileswi Yesu a vuleke leswaku “loyi a [n’wi] voneke, ú vonile Tatana,” hi nga tiyiseka leswaku Yehovha u ni ku tsakela loku fanaka eka un’wana ni un’wana wa malandza ya yena.—Yohane 14:9.

Yehovha U Ta Va Muhakeri

Ku nghenisa vutivi hi Xikwembu swi katsa ku tiva xiphemu xin’wana ni xin’wana xa vumunhu bya yena hilaha swi paluxiweke ha kona eBibeleni. Vito leri nge Yehovha ri vula leswaku “Loyi A Vangelaka Leswaku Swi Va Kona,” leswi kombaka leswaku Yehovha u vangela xin’wana ni xin’wana leswaku xi va kona leswaku a hetisisa ku rhandza ka yena. Ematin’wini hinkwawo, u faneriwe hi swimunhuhatwa swo hambana-hambana, swo tanihi Muvumbi, Tatana, Hosi Leyikulu, Murisi, Yehovha wa tinyimpi, Muyingisi wa xikhongelo, Muavanyisi, Muleteri Lonkulu ni Mukutsuri.b

Leswaku hi tiva nhlamuselo leyi heleleke ya vito ra Xikwembu, hi fanele hi tiva Yehovha tanihi Muhakeri. Pawulo u tsarile: “Ehandle ka ku pfumela a swi endleki ku tsakisa Xikwembu. Un’wana ni un’wana loyi a lavaka ku tshinelela Xikwembu ú fanele ku pfumela leswaku xi kona, ni leswaku xi hakela lava va xi lavaka.”—Vaheveru 11:6.

Yehovha u tshembisa lava namuntlha va hlawulaka ku n’wi tirhela hi mbilu hinkwayo vutomi lebyi nga heriki aparadeyisini emisaveni. A hi vutianakanyi ku langutela ku hetiseka ka xitshembiso xolexo lexikulu, naswona a hi vutikukumuxi ku anakanya u ri un’wana la hanyaka kona. Muxe “a a langutela hakelo leya ha taka.” (Vaheveru 11:26) Hilahakufanaka, Pawulo a a langutele hi mahlo-ngati ku hetiseka ka xitshembiso xa Xikwembu eka Vakreste lava tshembekeke lava totiweke. U tsarile: “Kutani ndzi tsutsuma ndzi kongomile swa le mahlweni leswaku ndzi ta kuma hakelo, ku nga ku vitana ka Xikwembu ha Kriste Yesu, loku ha kona xi hi vitanelaka evutomini bya le henhla.”—Vafilipiya 3:14.

Na wena u nga langutela hakelo leyi Yehovha a yi tshembisaka lava tiyiselaka. Ku rindzela hakelo yoleyo i xiphemu xa nkoka xa vutivi lebyi u nga na byona hi Xikwembu ni ku tiyisela ka wena entirhweni wa xona. Kutani siku na siku anakanyisisa hi mikateko leyi Yehovha a ku vekeleke yona. Mary, loyi a boxiweke eku sunguleni, u endle matshalatshala lama hlawulekeke leswaku a endla leswi. U ri: “Ro sungula evuton’wini bya mina, a ndza ha ku pfumela leswaku gandzelo ra nkutsulo ra Yesu ra tirha eka mina. Ndzi sungula ku swi twa leswaku Yehovha wa khathala hi mina tanihi munhu. Ndzi ve Mukreste ku tlula 20 wa malembe, kambe hi kona sweswinyana ndzi sunguleke ku swi tshemba.”

Hi ku dyondza Bibele ni ku anakanyisisa ha yona swi huma embilwini, Mary swin’we ni van’wana va timiliyoni, va dyondza leswaku Yehovha wa khathala hi vanhu vakwe ku nga ri hi ntlawa ntsena kambe tanihi munhu ha un’we-un’we. Muapostola Petro a khorwile swinene emhakeni leyi lero a kala a tsala a ku: “Rhulani ku karhateka hinkwako ka n’wina eka [Xikwembu], hikuva xi tikarhatela n’wina.” (1 Petro 5:7) Ina, Xikwembu xa ku khathalela!

[Tinhlamuselo ta le hansi]

[Bokisi leri nga eka tluka 6]

Ku Pfuxiwa Ka Vafi—Xikombiso Xa Leswaku Xikwembu Xa Khathalela

XIKOMBISO lexi khorwisaka xa nkhathalelo wa Xikwembu hi munhu ha un’we-un’we xi kumeka eBibeleni eka Yohane 5:28, 29, (NW) leyi nge: “Nkarhi wa ta lowu hinkwavo lava nga emasirheni ya xitsundzuxo va nga ta twa rito ra [Yesu] naswona va ta huma.”

Lexi tsakisaka, laha ku tirhisiwe rito ra Xigriki leri nge mne·meiʹon (sirha ra xitsundzuxo) ematshan’wini ya taʹphos (sirha). Rito leri nge taʹphos ro kombisa mhaka yo lahliwa ntsena. Kambe mne·meiʹon ri hlamusela leswaku rhekhodo ya vutomi bya loyi a feke ya tsundzukiwa.

Emhakeni leyi, anakanya ntsena hi leswi ku pfuxiwa ka vafi ku nga ta n’wi koxa swona Yehovha Xikwembu. Leswaku a tlherisela munhu evuton’wini, u fanele ku tiva xin’wana ni xin’wana malunghana ni munhu yoloye—ku katsa ni mikhuva-ntekelelo ya yena swin’we ni hinkwaswo leswi nga emianakanyweni ya yena. Hi kona ntsena laha munhu yoloye a nga pfuxiwaka a ri ni xivumbeko lexi fanaka.

Kavula, leswi a swi koteki hi langutelo ra munhu, kambe “Xikwembu xi kota hinkwaswo.” (Marka 10:27) Xi tiva hambileswi nga embilwini ya munhu. Hambiloko munhu a ri ni malembe-xidzana yo tala a file, mikhumbulo ya Xikwembu a yi tsandzeki; a yi heli hakatsongo-tsongo. (Yobo 14:13-15) Xisweswo, loko a vulavula hi Abrahama, Isaka na Yakobo, Yesu u vule leswaku hambileswi ku hundzeke malembe-xidzana endzhaku ka loko va file, Yehovha “a hi Xikwembu xa lava feke, kambe i xa lava hanyaka; hikuva, eka xona, hinkwavo va hanya.” (Xiitaliki i xerhu.)—Luka 20:38.

Xisweswo, magidi ya timiliyoni ta lava feke va le mianakanyweni ya Yehovha Xikwembu hi vuxoko-xoko lebyikulu. Mayana xikombiso lexi hlamarisaka xa leswaku Xikwembu xa khathala hi swilaveko swa vanhu ha un’we-un’we!

[Xifaniso lexi nga eka tluka 7]

Yesu u kombise nkhathalelo lowukulu eka lava a va hanyiseke