Va Endle Ku Rhandza Ka Yehovha

Hi Ku Yingisa Marito Yo Lela Ya Yesu

HI MADYAMBU ya Nisan 14, 33 C.E., Yesu Kreste ni vaapostola vakwe lavo tshembeka va 11 va hlengeletane etafuleni endlwini ya le henhla eYerusalema. Hi ku xiya leswaku a ri kusuhi ni ku fa, u va byele a ku: “Ndza ha ta va na n’wina nkarhinyana.” (Yohane 13:33) Entiyisweni, Yudasi Iskariyota ana se a ri endleleni yo ya endla xikhiri ni vavanuna lavo biha lava a va lava ku dlaya Yesu.

Ku hava na un’we wa lava a va ri endlwini ya le henhla loyi a xiyeke xiyimo xa xihatla ku tlula ndlela leyi Yesu a xi xiyeke ha yona. A a swi tiva kahle leswaku a ri kusuhi ni ku xaniseka. Nakambe Yesu a a swi tiva leswaku vaapostola vakwe a va ta n’wi siya vusiku byebyo. (Matewu 26:31; Zakariya 13:7) Tanihi leswi lowu a wu ri nkarhi wo hetelela wa leswaku Yesu a vulavula ni vaapostola vakwe a nga si fa, hi nga tiyiseka leswaku marito yakwe layo lela ma kongomisiwe etimhakeni ta nkoka swinene.

“Endlani Leswi Hi Ku Ndzi Anakanya”

A ri ni vaapostola va yena lavo tshembeka, Yesu u simeke nkhuvo lowuntshwa lowu a wu ta siva Paseka ya Vayuda. Muapostola Pawulo u wu vitane “Xilalelo xa Hosi.” (1 Vakorinto 11:20) Loko a teka xinkwa xo ke comela, Yesu u khongerile. Kutani u pheme xinkwa a xi nyika vaapostola va yena. A ku: “Tekani mi dya, leswi i miri wa mina.” Kutani a teka xinwelo xa vhinyo, a nkhensa kutani a nyika vaapostola, a ku: “Nwelani ka xona hinkwenu; hikuva leswi i ngati ya mina, ngati ya ntwanano leyi halateriwaka lavo tala leswaku va rivaleriwa swidyoho.”—Matewu 26:26-28.

Xana a wu ri wihi nkoka wa xiendlakalo lexi? Hilaha Yesu a swi kombiseke ha kona, xinkwa a xi yimela miri wa yena lowu nga hava xidyoho. (Vaheveru 7:26; 1 Petro 2:22, 24) Vhinyo yi fanekisela ngati ya Yesu leyi halatiweke, leyi endlaka swi koteka ku rivaleriwa swidyoho. Ngati ya yena ya gandzelo yi tlhela yi tiyisa ntwanano exikarhi ka Yehovha Xikwembu ni lava 144 000, vanhu lava eku heteleleni va nga ta fuma na Yesu etilweni. (Vaheveru 9:14; 12:22-24; Nhlavutelo 14:1) Hi ku rhamba vaapostola va yena leswaku va ya dya swakudya leswi, Yesu a kombisa leswaku va ta va na yena eMfun’weni wa le tilweni.

Mayelana ni nkhuvo lowu wa swakudya, Yesu u lerisile: “Endlani leswi hi ku ndzi anakanya.” (Luka 22:19) Ina, Xilalelo xa Hosi xi fanele xi va xiendlakalo xa lembe na lembe, hilaha Paseka a yi ri hakona. Tanihileswi Paseka yi tlangeriweke hikwalaho ka ku ponisiwa ka Vaisrayele evuhlongeni a Egipta, Xilalelo xa Hosi a xi ta hlamusela ku ntshunxiwa lokukulu—lokuya ka vanhu lava ponisekaka evuhlongeni bya xidyoho ni rifu. (1 Vakorinto 5:7; Vaefesa 1:7) Kutlulakwalaho, lava dyaka xinkwa ni ku nwa vhinyo yo fanekisela va ta tsundzuxiwa hi malunghelo ya vona ya nkarhi lowu taka yo va tihosi ni vaprista eMfun’weni wa Xikwembu wa le tilweni.—Nhlavutelo 20:6.

Rifu ra Yesu Kreste a xi ri xiendlakalo xa nkoka hakunene ematin’wini ya vanhu. Lava tlangelaka leswi Yesu a swi endleke va yingisa xileriso xa malunghana ni Xilalelo xa Hosi: “Endlani leswi hi ku ndzi anakanya.” Timbhoni ta Yehovha ti tlangela rifu ra Yesu lembe na lembe hi siku leri fambelanaka na Nisan 14. Hi 1996 siku leri ri wela eka April 2, endzhaku ka ku pela ka dyambu. Wa rhambiwa hi malwandla leswaku u va kona eHolweni ya Mfumo endhawini ya ka n’wina.

“Ndzi Mi Nyika Nawu Lowuntshwa”

Handle ko simeka Xilalelo xa Hosi, Yesu a ri ni ndzayo yin’wana yo lela eka vaapostola va yena. Kungakhathariseki vuleteri bya vona lebyinene, vavanuna lava a va ri ni swo tala swo swi dyondza. A va nga xi twisisi swinene xikongomelo xa Xikwembu ha Yesu, ha vona vini, kumbe hi vumundzuku. Kambe Yesu a nga ringeti ku va vekela timhaka leti hinkwato erivaleni hi nkarhi lowu. (Yohane 14:26; 16:12, 13) Ematshan’weni ya sweswo, u vulavule hi nchumu wun’wana wa nkoka swinene. U te, “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina.” Kutani Yesu u engeterile: “Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:34, 35.

Xana lowu a wu ri “nawu lowuntshwa” hi ndlela yihi? Phela, Nawu wa Muxe wu lerisile: “U ta ranḍa warikwenu kukotisa loko u tiranḍa.” (Levhitika 19:18) Hambiswiritano, Yesu u khutaze valandzeri va yena leswaku va kombisa rirhandzu ro tinyikela leri a ri ta fikela laha munhu a nyikelaka vutomi byakwe hikwalaho ka Vakreste-kulobye. Kavula, ‘nawu wa rirhandzu’ wu nga tirha ni le ka swiyimo leswi nga vuliki nchumu. Eswiyin’weni hinkwaswo mulandzeri wa Yesu Kreste u ta teka goza ro sungula eku kombiseni ka rirhandzu hi ku pfuna van’wana hi tlhelo ra moya ni swin’wana.—Vagalatiya 6:10.

Evusikwini lebyi byo hetelela eka vutomi bya Yesu emisaveni, rirhandzu ri susumetele Yesu ku khongelela vadyondzisiwa va yena eka Yehovha Xikwembu. Hi ku komisa u khongerile: “Va laha misaveni, kutani ndzi ta kwaleyo ka wena. Tatana la kwetsimeke, va hlayise hi matimba ya vito ra wena, leri u ndzi nyikeke rona, leswaku va va un’we ku fana na hina.” (Yohane 17:11) Lexi xiyekaka hi leswi eka xikombelo lexi yaka eka Tata wakwe, Yesu a khongeleleke valandzeri vakwe leswaku va va ni vun’we lebyi nga ni rirhandzu. (Yohane 17:20-23) A va fanele va ‘rhandzana hilaha Yesu a endleke ha kona.’—Yohane 15:12.

Vaapostola lavo tshembeka va yingise marito ya Yesu yo lela. Na hina hi fanele hi fambisana ni swileriso swa yena. ‘Emasikwini lawa yo nonon’hwa ya makumu,’ rirhandzu ni vun’we exikarhi ka vagandzeri va ntiyiso i ra nkoka swinene ku tlula eku sunguleni. (2 Timotiya 3:1, NW) Kunene, Vakreste va ntiyiso va yingisa swileriso swa Yesu ni ku kombisa rirhandzu ra vumakwerhu. Leswi swi katsa xileriso xa yena xo tlangela Xilalelo xa Hosi.