Swivutiso Swa Vahlayi

Minkarhi yin’wana hi twa vamakwerhu va vulavula kumbe va khongelela Mfumo wa Xikwembu leswaku wu ta emisaveni. Xana mavulavulelo lawa ma lulamile?

Hi ku kongoma, leyi a hi ndlela ya Matsalwa yo hlamusela swilo. Mfumo wa Xikwembu i wa le tilweni. Xisweswo, muapostola Pawulo u tsarile: “Hosi yi ta ndzi vutla ni le ku biheni hinkwako, yi ndzi ponisa leswaku ndzi ta kuma Mfumo wa yona wa le matilweni. Eka yona a ku ve ku dzuneka hilaha ku nga heriki. Amen.”—2 Timotiya 4:18; Matewu 13:44; 1 Vakorinto 15:50.

Mfumo lowu wu simekiwe etilweni hi 1914, naswona wu nga ka wu nga rhurhisiwi wu tisiwa emisaveni leyi kondleteriweke ya Paradeyisi kumbe endhawini yin’wana. Yesu Kreste i Hosi ya Mfumo lowu. Leswi a nga Hosi, Yesu u ni matimba ehenhla ka tintsumi. Hikwalaho, ndhawu ya yena leyi faneleke yo fuma yi le vokweni ra xinene ra Xikwembu ematilweni. Vakreste lava totiweke va hlanganyela na yena tanihi tihosi ni vaprista etilweni.—Vaefesa 1:19-21; Nhlavutelo 5:9, 10; 20:6.

Kutani, xana leswi swi vula leswaku a ha ha fanelanga hi phofula eka Xikwembu swikombelo swa hina leswi kumekaka eka xiphemu xa Xikhongelo xa Hosi lexi nge: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni”? (Matewu 6:10) Ku hambana ni sweswo, xikhongelo lexi xi fanerile naswona xa ha ri ni nhlamuselo leyi twalaka.

Mfumo wa Xikwembu wa ha ta teka goza ro hetelela malunghana ni misava leyi, naswona leswi hi leswi hi nga na swona emianakanyweni loko hi khongela ni ku tirhisa marito lama fanaka ni marito ya Xikhongelo xa Hosi. Hi xikombiso, Daniyele 2:44 yi vhumbha leswaku Mfumo lowu wu ta “ta” wu ta herisa matiko hinkwawo naswona wu ta lawula misava leyi. Nhlavutelo 21:2 yi vulavula hi Yerusalema Lontshwa loyi a xikaka hi le tilweni. Yerusalema Lontshwa u vumbiwe hi Vakreste lava totiweke va 144 000 lava nga ta va mutekiwa wa Kreste. Naswona va tlhela va va vadyandzhaka swin’we na Yesu eMfun’weni. Hikwalaho, Nhlavutelo 21:2 yi hlamusela ku yisa ka vona nyingiso emisaveni, hi ku tisa mikateko leyikulu eka vanhu lava tshembekaka.—Nhlavutelo 21:3, 4.

Ku fikela loko vuprofeta lebyi ni byin’wana lebyi hlamarisaka byi hetisekile, swi ta tama swi ri swa risima ku khongela Yehovha Xikwembu hi ku pfumelelana ni marito ya Yesu lama nge, “A ku te ku fuma ka wena.” Kambe hi fanele ku tsundzuka leswaku Mfumo wu nga ka wu nga ti eka pulanete leyi ya Misava hi xiviri. Hulumendhe ya Mfumo lowu yi le tilweni, hayi emisaveni.

[Laha Xifaniso Xi Humaka Kona eka tluka 31]

Earth: Based on NASA photo