Ha Yini Hinkwerhu Hi fanele Hi Dzunisa Xikwembu?

ALELUYA! Rito leri ri tiviwa ngopfu hi vanhu vo tala lava nga vangheni va kereke va Vujagana. Van’wana va vona va ri bokoxela eswikhongelweni swa vona swa Sonto. Hambiswiritano, i vangani lava hakunene va tivaka leswaku rito leri ri vula yini? Kahle-kahle, i rito ra Xiheveru leri vulaka leswaku “Dzunisani Jah!” I ku dzunisa Muvumbi hi ntsako lowukulu, loyi vito ra yena a nga Yehovha.a

Rito leri nge, “Aleluya” ri humelela ko tala eBibeleni. Hikwalaho ka yini? Hikuva ku ni swivangelo swo tala swinene swa ku dzunisa Xikwembu. Jah (Yehovha) i Muvumbi ni Muhlayisi wa vuako hinkwabyo lebyi byikulu. (Pisalema 147:4, 5; 148:3-6) U simeke mafambiselo ya vutomi lama endlaka vutomi byi va kona emisaveni. (Pisalema 147:8, 9; 148:7-10) Nakambe u rhandza ngopfu vanhu. Loko hi endla ku rhandza ka yena, wa hi katekisa ni ku hi seketela eka vutomi lebyi naswona u hi nyika ntshembo lowu tiyeke wa vutomi lebyinene bya nkarhi lowu taka. (Pisalema 148:11-14) Hi yena Jah (Yehovha) loyi a huhuteleke marito lawa: “La’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:29.

Hikwalaho, xikhutazo lexi xi kongomisiwa eka vanhu hinkwawo: “Aleluya!” “Dzunisani Jah!” (Pisalema 104:35; nhlamuselo ya le hansi ya NW) Hambiswiritano, lexi vavisaka a hi un’wana ni un’wana loyi a angulaka kahle. Namuntlha vanhu va vona maxangu. Vo tala va sika, va vabya kumbe va ni ntshikilelo. Nhlayo leyikulu yi tiyisela ku dya mbitsi hikwalaho ka matirhiselo yo biha ya swidzidzirisi kumbe xihoko kumbe hikwalaho ka ntshovelo wa mahanyelo ya vona layo biha kumbe ku xandzuka. Xana xi kona xivangelo xa leswaku vanhu vo tano va fanele ku dzunisa Xikwembu?

‘I Yehovha Ntsena Loyi A Nga Ndzi Nyikaka Ntshembo’

Ina, xona xi kona. Yehovha u rhamba hinkwavo handle ko hlawula leswaku va n’wi tiva, va dyondza ku endla ku rhandza ka yena kutani va kuma mikateko leyi endlaka vanhu va lava ku n’wi dzunisa. Naswona vo tala va angula kahle. Hi xikombiso, anakanya hi Adriana wa le Guatemala. Loko Adriana a ri ni nkombo wa malembe, mana wa yena u file. Endzhakunyana ka sweswo tata wa yena u fambe a n’wi siya. Loko a ri ni khume ra malembe, u sungule ku tirha leswaku a ta kota ku tihanyisa. Tanihi leswi mana wa yena a a n’wi byele ku tirhela Xikwembu ni kereke, Adriana u tihlanganise ni mintlawa yo hambana-hambana ya Khatoliki, kambe loko a ri ni 12 wa malembe, va n’wi heta matimba ivi a tihlanganisa ni ntlawa wa madlakuta ya xitarata. U sungule ku dzaha, ku tirhisa swidzidzirisi ni ku yiva. Xinhwanyetana xo tanihi lexi a xi ta swi lavela yini ku dzunisa Xikwembu?

Makwavo wa xisati wa Adriana u sungule ku dyondza Bibele ni Timbhoni ta Yehovha, kambe Adriana a n’wi hlekula. Kutani hahani wa vona u file. Enkosini wa hahani wa yena, Adriana a a pfilunganyiwa hi swivutiso leswi tikaka. Xana hahani wa yena u ye kwihi? Xana se a a ri etilweni? Xana u ye etiheleni leti pfurhaka? A swi pfilunganya swinene, naswona Adriana u ye endlwini ya xikhongelo leyi nga exilahlweni leswaku a ya khongelela mpfuno hi ku tirhisa vito ra Xikwembu, Yehovha, hilaha makwavo wakwe wa xisati a n’wi dyondziseke hakona.

Hi ku hatlisa u sungule ku dyondza Bibele ni Timbhoni ta Yehovha ni ku va kona eminhlanganweni ya tona ya Vukreste. Leswi swi n’wi pfune leswaku a va ni langutelo lerintshwa hilaha ku heleleke hi vutomi, naswona hi xivindzi u herise vuxaka bya yena ni mintlawa ya madlakuta ya xitarata. Adriana, loyi sweswi a nga ni malembe lama nga exikarhi ka va-20, u ri: “I rirhandzu ro rhandza Yehovha ntsena leri ndzi endleke leswaku ndzi tshika ndlela yo tano leyo biha ya vutomi. I Yehovha ntsena hi nsovo wa yena lowukulu a ndzi nyikeke ntshembo wa vutomi lebyi nga heriki.” Ku nga khathariseki ndlela yo tika leyi Adriana a sunguleke vutomi ha yona, u ni swivangelo leswinene swa ku dzunisa Xikwembu.

Xiyimo xin’wana lexi nga tshembisiki nikatsongo xi vikiwile ku suka le Ukraine. Wanuna un’wana loyi a tshameke ekhotsweni u rindzele ku avanyiseriwa rifu. Xana u tiputa vusiwana? Xana u ni gome? E-e, a swi tano. Tanihi leswi a a hlangane ni Timbhoni ta Yehovha sweswinyana ni ku va a kume vutivi byo karhi hi Yehovha, u kombele leswaku ti endzela mana wakwe. Sweswi wa ti tsalela hikwalaho ka leswi a tweke leswaku ti endle xikombelo xa yena. U ri: “Ndza nkhensa leswi mi endzelaka mana wa mina. A ma ri mahungu lama tsakisaka swinene ku tlula hinkwawo lawa ndzi ma kumeke n’wexemu.”

Loko a vulavula hi leti khumbaka yena ni vakhotsiwa-kulobye lava a nyikeleke vumbhoni eka vona, wa tsala a ku: “Sweswi hi ni ripfumelo eka Xikwembu naswona hi ringeta ku hanya hi ku pfumelelana ni ripfumelo ra hina.” Papila rakwe u ri gimeta hi ndlela leyi: “Ndza mi nkhensa leswi mi hi pfuneke ku dyondza leswi rirhandzu ri nga swona ni ku va hi kume ripfumelo. Loko ndza ha hanya, na n’wina ndzi ta mi pfuna. Ndzi nkhensa Xikwembu hikwalaho ka leswi mi nga kona nileswi mi nga eku pfuneni ka van’wana leswaku va rhandza Xikwembu ni ku pfumela eka xona.” Wanuna loyi u endle xikombelo mayelana ni xigwevo xa yena xa rifu. Kambe hambiloko o dlayiwa kumbe a heta malembe yo tala ekhotsweni, u ni xivangelo lexi twalaka xo dzunisa Xikwembu.

‘Hambiloko Ndzi Ri Bofu, Ndza Vona’

Sweswi anakanya hi nhwanyana wa migingiriko wa malembe ya kondlo-a-ndzi-dyi loyi hi xitshuketa a hundzukeke bofu. Leswi hi leswi humeleleke Gloria loyi a tshamaka le Argentina. Swi nga languteriwanga, Gloria u hundzuke bofu loko a ri na 19 wa malembe hi vukhale, naswona a nga ha tlhelanga a vona. Loko a ri na 29 wa malembe hi vukhale, u rhandzane ni wanuna un’wana naswona endzhakunyana u tikile. Sweswi a a kuma vutomi bya yena byi ri ni xikongomelo. Kambe loko a feriwe hi n’wana, u sungule ku vutisa swivutiso. U tivutisile a ku, ‘Ha yini ndzi humeleriwa hi leswi? Xana ndzi endle yini? Xana Xikwembu xi kona hakunene?’

Hi nkarhi lowu, Timbhoni ta Yehovha timbirhi ti fike ekaya ra yena. U sungule ku dyondza Bibele naswona u dyondze hi xitshembiso xa yona xa leswaku emisaveni leyintshwa mabofu, ma ta tlhela ma vona. (Esaya 35:5) Mayana ku langutela lokunene swonghasi loku Gloria a nga na kona! A a tsake swinene, ngopfu-ngopfu loko nuna wakwe a pfumerile ku tsarisa vukati bya vona enawini. Endzhaku ka sweswo nuna wakwe u humeleriwe hi khombo ivi a lamala, a boheka ku tirhisa xitulu xa swigulani. Namuntlha wansati loyi wa bofu u boheka ku tirha hi matimba leswaku va ta kuma swo tihanyisa ha swona. Ku engetela kwalaho, u endla mintirho hinkwayo ya le kaya ni ku tlhela a khathalela nuna wakwe. Hambiswiritano, Gloria u dzunisa Yehovha! Hi ku pfuniwa hi vamakwavo va xinuna ni va xisati va Vukreste, u dyondza Bibele ya Braille, naswona minhlangano ya Vukreste eHolweni ya Mfumo ya n’wi khutaza swinene. U ri: “Swa ndzi tikela ku hlamusela, kambe hambileswi ndzi nga bofu, swi fana niloko ndzi vona.”

Minkarhi yin’wana vanhu va xanisiwa loko va dzunisa Xikwembu. Wansati un’wana wa le Croatia, a a tsakile loko a dyondze mayelana ni Xikwembu, kambe nuna wakwe a kanetana ni vupfumeri byakwe lebyintswa naswona u n’wi hlongorile, ivi nuna a teka xinhwanyetana xa vona xa lembe rin’we hi vukhale. Loko a ri eku tsendzelekeni hikwalaho ka leswi a tshikiwe hi nuna ni ndyangu, a nga ri na kaya, ntirho, kumbe hambi ku ri n’wana wakwe, eku sunguleni a ri ni gome. Kambe ku rhandza ka yena Xikwembu ku n’wi pfunile hambileswi a vonana ni n’wana wakwe swa nkarhinyana ku fikela loko xihlangi xi kurile. Wansati loyi u kume “dayimani . . . ya nxavo lowukulu” naswona a nge yi tshiki yi n’wi lahlekela. (Matewu 13:45, 46) Xana u swi kotise ku yini ku tshama a tsakile hi minkarhi leyi yo nonon’hwa? U ri: “Ntsako i mbhandzu wa moya wa Xikwembu. Wu nga hlakuleriwa ku nga khathariseki swiyimo leswi nga kona ehandle, tanihi leswi swimilana swi kotaka ku kula endlwini ya vuhlayiselo bya swimilana ku nga khathariseki leswi maxelo ma nga xiswona ehandle.”

Le Finland, Markus, loyi a nga ni tsevu wa malembe hi vukhale, loko a pomporiwa u kumiwe a ri ni vuvabyi bya misiha lebyi nga tshungulekiki. Endzhakunyana u boheke ku tirhisa xitulu xa swigulani. Endzhaku ka malembe ma nga ri mangani, mana wakwe u fambe na yena eka Mupentekosta loyi a sungula ku va ni ndhuma leyikulu hi ku vula leswaku wa swi kota ku hanyisa vanhu lava vabyaka. Kambe ku hanyisa hi singita a ku endlekanga. Hikwalaho ka leswi, Markus a a nga ha xi tsakeli Xikwembu naswona u nghenele tidyondzo ta sayense ni tidyondzo tin’wana ta misava. Kutani, kwalomu ka malembe ya ntlhanu lama hundzeke, wansati un’wana loyi a a tirhisa xitulu xa swigulani loyi a a famba ni jaha rin’wana u fike endlwini leyi Markus a tshama eka yona. A va ri Timbhoni ta Yehovha. Sweswi Markus a a ala vukona bya Xikwembu, kambe a a nga ali ku bula hi vukhongeri, hikwalaho u va amukerile endlwini.

Endzhaku ka kwalaho, mpatswa wun’wana lowu tekaneke wu n’wi endzerile kutani dyondzo ya Bibele yi sunguriwile. Eku heteleleni, matimba ya ntiyiso wa Bibele ya cince langutelo ra Markus, naswona u swi xiyile leswaku ku nga khathariseki vulema bya yena, a a ri na swona swivangelo swa ku dzunisa Xikwembu hakunene. U te: “Ndzi tsake ngopfu hikuva ndzi kume ntiyiso ni nhlengeletano leyi Yehovha a yi tirhisaka. Sweswi vutomi bya mina byi ni xikongomelo. Nyimpfu yin’wana leyi a yi lahlekile yi kumekile naswona a yi swi lavi ku siya ntlhambi wa Yehovha!”—Ringanisa Matewu 10:6.

Hinkwerhu A Hi ‘Dzuniseni Jah’

Leyi ko va mintokoto yi nga ri yingani leyi nga boxiwaka ku kombisa leswaku vanhu namuntlha, ku nga khathariseki leswaku swiyimo swa vona hi swihi, va nga va na xona xivangelo xo dzunisa Xikwembu. Muapostola Pawulo u swi hlamusele hi ndlela leyi: “Vukhongeri byi pfuna hi matlhelo hinkwawo, naswona byi tshembisa vutomi bya nkarhi lowu, ni bya lowu taka.” (1 Timotiya 4:8) Loko hi endla ku rhandza ka Xikwembu, xi ta hetisisa ‘xitshembiso xa vutomi bya nkarhi lowu.’ Ina, a xi nge endli leswaku xisiwana xi va n’wankumi kumbe muvabyi a va la hanyeke kahle eka mafambiselo lawa ya swilo. Kambe moya wa xona xi wu nyika lava xi tirhelaka leswaku va kuma ntsako ni ku eneriseka ku nga khathariseki xiyimo xa vona xa le handle. Ina hambi ku ri eka “vutomi bya nkarhi lowu,” muvabyi, la nga ni ntshikilelo ni xisiwana va nga va na xona xivangelo xo dzunisa Xikwembu.

Kambe ku vuriwa yini hi vutomi ‘bya nkarhi lowu taka’? Phela, ku anakanya sweswo hi swona leswi faneleke swi hi endla hi dzunisa Xikwembu hi ku chivirika lokukulu! Swa hi tsakisa ku anakanya hi nkarhi lowu vusweti byi nga ta ka byi nga ha tiveki; loko “ku nga v̌i na munhu l’a akeke Yerusalem l’a nga ta ku: nḍa v̌abya”; niloko Yehovha Xikwembu a ta “sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” (Esaya 33:24; Nhlavutelo 21:3, 4; Pisalema 72:16) Xana u languta switshembiso leswi swa Xikwembu hi ndlela yihi?

Jaha rin’wana ra le El Salvador ri amukele xiphephana xa Bibele lexi a xi hlamusela swin’wana swa swilo leswi. Ri vule leswi eka Mbhoni leyi nga ri nyika xiphephana, “Manana, leswi xiphephana lexi xi swi vulaka swi vonaka swi nga ri ntiyiso.” Vo tala va angula hi ndlela yoleyo. Kambe, leswi i switsembiso swa Loyi a vumbeke vuako hinkwabyo, loyi a simekeke mindzhendzheleko ya ntumbuluko ya misava ya hina, loyi nakambe a pfunaka hambi xisiwana ni muvabyi leswaku va kuma ntsako. Hi nga swi tshemba leswi a swi vulaka. Jaha leri boxiweke laha henhla ri dyondze Bibele ni Timbhoni ta Yehovha naswona ri kume leswaku lowu i ntiyiso. Loko u nga si swi endla leswi, hi ku khutaza ku endla hilaha ku fanaka. Hikwalaho onge u nga va kona emisaveni leyintshwa loko mafambiselo lama nga kona sweswi ya swilo ma hundzile, naswona swivumbiwa hinkwaswo swi hlanganyela eku huweleleni swi ku: “Aleluya!” “Dzunisani Jah!”—Pisalema 112:1; 135:1, NW.

[Nhlamuselo ya le hansi]

[Xifaniso lexi nga eka tluka 5]

Onge u nga va kona emisaveni leyintshwa loko swivumbiwa hinkwaswo swi hlanganyela eku huweleleni swi ku: “Aleluya!”