Ku Tshika Swo Tala Hikwalaho Ka Nchumu Wa Nkoka

HI KU VULA KA JULIUS OWO BELLO

Ku ringana malembe ya 32 a ndzi ri Mualadura.a A a ndzi tshemba leswaku ku hanyisa hi ripfumelo ni hi swikhongelo a swi ta lulamisa swiphiqo swa mina hinkwaswo ni ku horisa mavabyi hinkwawo. A ndzi kalanga ndzi xava mirhi hambi ku ri swilo leswi dlayaka xitlhavi. Hi malembe wolawo, ku hava ni un’we endyangwini wa mina la tshameke a yisiwa exibedlhele. Loko wihi na wihi wa vana va mina a vabya, a a ndzi va khongelela vusiku ni nhlikanhi ku kondza va hlakarhela. A ndzi tshemba leswaku Xikwembu a xi hlamula swikhongelo swa mina ni ku ndzi katekisa.

ANDZI ri xirho xa Egbe Jolly, ku nga ntlawa wa vutihungasi lowu dumeke le Akure, doroba leri nga eNigeria vupela-dyambu. Vanghana va mina a va ri van’wankumi tlhelo vanhu lava nga ni vulawuri etikweni. Deji, hosi ya Akure, hakanyingi a ndzi endzela ekaya ra mina.

Nakambe a ndzi teke tshengwe, a ndzi ri ni vasati va tsevu ni tinhlantswa to tala. Bindzu ra mina a ri famba kahle. Swilo hinkwaswo a swi ndzi fambela kahle. Hambiswiritano, ku fana ni muxavi la tekaka riendzo eka xifaniso xa Yesu xa dayimani, ndzi kume nchumu wun’wana lowu nga wa risima lerova ndzi tshika vasati va mina va ntlhanu, tinhlantswa ta mina, kereke, ntlawa wa vutihungasi ni ndhuma ya misava hikwalaho ka wona.—Matewu 13:45, 46.

Ndlela Leyi Ndzi Veke Mualadura Ha Yona

Ndzi sungule ku twa hi ta Maaladura hi 1936, naswona a ndzi ri ni malembe ya 13 hi vukhale. Munghana wa mina loyi a vitaniwaka Gabriel, u ndzi byerile a ku: “Loko wo endzela Kereke ya Vaapostola va Kreste, u ta twa Xikwembu xi vulavula.”

Ndzi n’wi vutisile ndzi ku: “Xana Xikwembu xi vulavula njhani?”

U te: “Tana, u ta swi vona.”

A ndzi swi navela ngopfu ku yingisela Xikwembu. Hikwalaho vusiku byebyo, ndzi fambe na Gabriel ekerekeni. Xiyindlwana xa kona a xi tele hi vagandzeri va kona. Vandlha ri sungule ku tlhokovetsela ri ku: “N’wina vanhu, tanani! Laha hi kona laha Yesu a nga kona!”

Hi nkarhi wa ku tlhokovetsela loku, munhu un’wana u huwelerile a ku: “Xika moya lowo kwetsima!” Munhu un’wana u be xingelengele, kutani vandlha ri miyela. Endzhaku ka sweswo, wansati un’wana u sungule ku jakatseka hi ku tlatlarhuka, a vulavula swilo swo ka swi nga twali. Hi xitshuketa u huwelerile a ku: “Oho n’wina vanhu, yingisani rungula ra Xikwembu! Hi leswi leswi Xikwembu xi swi vulaka: ‘Khongelelani vahloti leswaku va nga dlayi vanhu!’” Vanhu hinkwavo a va khumbekile emintlhavekweni.

Ndzi tshembile leswaku Xikwembu xi vulavule hi ku tirhisa yena, hikwalaho lembe leri landzeleke ndzi khuvuriwile tanihi xirho xa Kereke ya Vaapostola va Kreste.

Ku Hlangana Ni Timbhoni Ta Yehovha Ro Sungula

Hi 1951, ndzi amukele kopi ya magazini wa Xihondzo xo Rindza leyi a yi huma eka Mbhoni leyi vitaniwaka Adedeji Boboye. Magazini lowu a a wu tsakisa, hikwalaho ndzi endle xikhokhelo xa wona ivi ndzi hambeta ndzi wu hlaya nkarhi na nkarhi. Hi 1952, ndzi ve kona entsombanweni wa muganga wa masiku ya mune wa Timbhoni ta Yehovha, le Ado Ekiti.

Leswi ndzi swi voneke entsombanweni swi ndzi tsakise ngopfu. Ndzi anakanyisise swinene hi ku va un’wana wa Timbhoni ta Yehovha kambe mianakanyo leyi ndzi yi bakanyela etlhelo. Xiphiqo xa mina a ku ri leswaku hi nkarhi wolowo se a ndzi ri ni vasati vanharhu ni nhlantswa yin’we. A ndzi anakanya leswaku a ndzi nge swi koti ku hanya ni nsati un’we ntsena.

Loko se ndzi tlhelele le Akure, ndzi byele Adedeji leswaku a nga ha ndzi endzeli, naswona xikhokhelo xa mina xa Xihondzo xo Rindza a ndzi xi pfuxetanga. Ndzi sungule ku hiseka ngopfu ekerekeni ya mina. Ku tlula kwalaho, a ndzi anakanya leswaku Xikwembu xi ndzi katekisile ku sukela loko ndzi nghene Kereke ya Vaapostola va Kreste. Ndzi teke vasati vanharhu ndzi tlhela ndzi tswala vana vo tala. Se a ndzi ake ni yindlu ya mina. A ndzi nga si tshama ndzi yisiwa exibedlhele. Leswi a swi tikomba leswaku Xikwembu xi hlamula swikhongelo swa mina, ha yini ndzi fanele ndzi cinca vukhongeri bya mina?

Ndhuma Leyikulu Leyi Fambisaneke Ni Ku Pfilunganyeka

Ndzi sungule ku nyikela mali yo tala ekerekeni. Hi ku hatlisa ndzi endliwe nkulu wa kereke, ku nga xikhundlha lexi ndzi endleke ndzi kota ku hlometela vundzeni bya matirhelo ya kereke. Leswi ndzi swi voneke swi ndzi nyenyetsile. Mufundhisi ni “vaprofeta” a va rhandza ngopfu mali; makwanga ya vona ma ndzi tseme nhlana.

Hi xikombiso, hi March 1967, ndzi velekeriwe vana vanharhu hi vasati vo hambana. A ku ri mukhuva ekerekeni ku va ni nkhuvo wa ku thyiwa ka n’wana vito. Hikwalaho ndzi teke tinyiko—tinhlampfi, juzi ya malamula ni tinamuneti leti nga emabodlheleni—ndzi ti yisa eka mufundhisi leswaku ku ta lunghiseleriwa nkhuvo.

Hi siku ra ntirho wa kereke, mufundhisi u vulavule emahlweni ka vandlha hinkwaro a ku: “Vanhu lava fuweke ekerekeni leyi va ndzi hlamarise ngopfu. Va lava nkhuvo wo thya vito, kambe leswi va tisaka swona ko va tinamuleti ni tinhlampfi ntsena. A ku na nyama! A ku na mbuti! Ndzi voniseni! Kayini u humesele Xikwembu gandzelo hi mintsumbula leyikulu, kambe Xikwembu a xi ri amukelanga gandzelo rolero hikuva a ri nga ri na ngati. Xikwembu xi lava swilo leswi nga ni ngati. Avele u humese xiharhi, naswona gandzelo ra yena ri amukeriwile.”

Hi ku twa sweswo, ndzi suke ndzi yima ivi ndzi humela ehandle hi ku hlundzuka. Hambiswiritano, ndzi hambete ndzi ya ekerekeni. Sweswi nkarhi wo tala ngopfu-ngopfu a a ndzi wu heta eku titsakiseni ni ku va kona eminhlanganweni ya ntlawa wa mina. Minkarhi yin’wana a ndzi va kona eminhlanganweni eHolweni ya Mfumo, kutani ndzi pfuxeta xikhokhelo xa mina xa Xihondzo xo Rindza. Hambiswiritano, a ndzi nga si tiyimisela ku va un’wana wa Timbhoni ta Yehovha.

Xiboho Xo Tirhela Yehovha

Ku cinca ka vutomi bya mina ku sungule hi 1968. Siku rin’wana ndzi sungule ku hlaya xihloko xin’wana xa Xihondzo xo Rindza lexi a xi hlamusela hi ku xanisiwa ka Timbhoni ta Yehovha hi tihanyi letikulu le Malawi. A xi vulavula hi nhwanyana wa malembe ya 15 hi vukhale, loyi a boheleriweke ni murhi ivi a pfinyiwa ka tsevu hikwalaho ka leswi a aleke ku landzula ripfumelo ra yena. Hi ku tsemiwa nhlana hi mhaka leyi, ndzi veke magazini wa kona ehansi, kambe ndzi hambete ndzi anakanyisisa ha wona. Ndzi swi xiyile leswaku ku hava nhwanyana ni un’we ekerekeni ya mina loyi a nga kombisaka ripfumelo ra muxaka lowu. Ni madyambu ndzi teke magazini lowu ivi ndzi tlhela ndzi hlaya tluka ra kona.

Ndzi sungule ku dyondza Bibele hi ku tiyimisela. Loko ndzi ri karhi ndzi kula hi vutivi, ndzi sungule ku vona ndlela leyi kereke yi hi kanganyiseke ha yona. Hilaha a swi ri hakona eminkarhini ya khale, vaprista va hina a “v̌a endla hi mona.” (Hosiya 6:9) Vanhu lavo tano, hi van’wana va vaprofeta va mavunwa lava Yesu a tsundzuxeke mayelana na vona! (Matewu 24:24) A ndzi nga ha pfumeli eka swivono ni mintirho ya vona ya masingita. Ndzi bohe ku tshika vukhongeri bya mavunwa ni ku pfuna van’wana leswaku va endla leswi fanaka.

Matshalatshala Yo Ndzi Sivela Ku Tshika Kereke

Loko vakulukumba va kereke va xiye leswaku ndzi tiyimisele ku tshika kereke, va rhumele vayimeri leswaku va ta ndzi xavelela. A va nga lavi ku lahlekeriwa hi xihlovo xa risima lexi nghenisaka mali. Va ndzi tshembise ku ndzi endla Baba Egbe, ku nga xikhundlha xa mulanguteri wa yin’wana ya tikereke ta Vaapostola va Kreste le Akure.

Ndzi arile, naswona ndzi tlhela ndzi va byela xivangelo xa kona. Ndzi te: “I khale kereke yi hi xisa. Va vula leswaku hinkwavo vanhu lavanene va ta ya etilweni. Kambe mina ndzi hlaye Bibele, naswona ndza tiyiseka leswaku i vanhu va 144 000 ntsena lava yaka etilweni. Vanhu van’wana lavo lulama va ta hanya emisaveni ya paradeyisi.”—Matewu 5:5; Nhlavutelo 14:1, 3.

Mufundhisi wa kereke u ringete ku hlohlotela vasati va mina leswaku va ndzi lwisa. U va byele ku sivela Timbhoni ta Yehovha leswaku ti nga ha ti ekaya ra hina. Un’wana wa vasati va mina u ndzi chelele chefu eswakudyeni. Vambirhi va ndzi tsundzuxe hi xivono lexi va xi voneke ekerekeni. Xivono lexi xi kombise leswaku ndzi ta fa loko ndzi tshika kereke. Hambiswiritano, ndzi hambete ndzi nyikela vumbhoni eka vasati va mina, ndzi va rhamba leswaku hi famba swin’we eminhlanganweni. Ndzi te: “Mi ta kuma van’wana vavanuna kwale.” Hambiswiritano, ni un’we wa vona a nga kombisanga ku tsakela, naswona va ye emahlweni va ringeta ku ndzi heta matimba.

Eku heteleleni, hi February 2, 1970, loko ndzi tlhelele ekaya ndzi huma edorobeni ra le kusuhi, ndzi kume leswaku yindlu a yi nga ri na munhu. Vasati va mina hinkwawo a va fambe ni vana.

Ku Namarhela Nsati Un’we

Ndzi anakanye ndzi ku, ‘Sweswi ndzi ta lulamisa xiyimo xa mina xa vukati.’ Ndzi kombele Janet, nsati wa mina lonkulu leswaku a vuya ekaya. U pfumerile. Hambiswiritano, ndyangu wa ka vona a wu nga lavi ku twa nchumu hi mhaka leyi. Loko vasati va mina lavan’wana va twe leswaku ndzi kombele Janet leswaku a vuya, va ye ekaya ka tata wakwe ivi va ringeta ku n’wi ba Janet. Va ka vona va ndzi vitanile leswaku hi va ni nhlengeletano.

Eka nhlengeletano leyi a ku ri ni vanhu va 80. Papa-ntsongo wa Janet, loyi a ku ri yena nhloko ya ndyangu, u te: “Loko u lava ku tlhela u teka n’wana wa hina, u fanele u landza ni vasati lavan’wana. Kambe loko u lava ku landzelela vukhongeri bya wena lebyintshwa ni ku tshama ni nsati un’we, u ta boheka ku lava nsati un’wana. Loko u teka Janet, vasati va wena lavan’wana va ta n’wi dlaya, naswona a hi lavi ku dlayeriwa n’wana.”

Endzhaku ka loko hi vulavule ngopfu hi mhaka leyi, va ndyangu lowu va swi xiyile leswaku a a ndzi tiyimiserile ku va ni nsati un’we ntsena. Eku heteleleni va hi ntshunxile. Papa-ntsongo u te: “A hi nge ku tekeli nsati wa wena. U nga famba na yena.”

Hi May 21, 1970, mina na Janet hi tekane hi nawu. Endzhaku ka masiku ya kaye, ndzi khuvuriwile leswaku ndzi va un’wana wa Timbhoni ta Yehovha. Hi December ya lembe rero, Janet u khuvuriwile na yena.

Ku Kuma Mikateko Ya Yehovha

Swirho swa khale ka kereke ya hina swi profete leswaku loko hi va Timbhoni, hi ta fa. Sweswo swi humelele emalembeni ya 30 lama nga hundza. Loko sweswi ndzo fa, xana swi ta va swi vangiwa hikwalaho ka leswi ndzi veke un’wana wa Timbhoni ta Yehovha? Loko nsati wa mina o fa sweswi, xana u kona la nga vulaka leswaku ku ta va ku ri hikwalaho ka leswi a veke un’wana wa Timbhoni ta Yehovha?

Ndzi tikarhatele ku komba vana va mina va 17 ndlela ya ntiyiso. Hambileswi vo tala va vona se a va kurile hi nkarhi lowu ndzi veke Mbhoni ha wona, ndzi va khutaze ku dyondza Bibele ndzi tlhela ndzi famba na vona eminhlanganweni ni le mintsombanweni. Ndza tsaka leswi ntlhanu wa vona va tirhelaka Yehovha swin’we na mina. Un’wana wa vona i nkulu loyi hi tirhaka swin’we evandlheni. Un’wana i nandza wa vutirheli evandlheni rin’wana leri nga ekusuhi na hina. Vana va mina van’wana vambirhi i maphayona ya nkarhi hinkwawo.

Loko ndzi languta endzhaku, ndzi hlamarisiwa hi tintswalo leti nga fanelangiki ta Yehovha, hi ku ndzi pfuna ndzi va nandza wa yena. Vona ndlela leyi marito ya Yesu ma nga ntiyiso ha yona: “A ku na munhu la nga taka ka mina, loko a nga kokeriwi ka mina hi Tatana la ndzi rhumeke”!—Yohane 6:44.

[Nhlamuselo ya le hansi]