‘Ha Va Lava Vanhu Lava Tshembekeke’

VUTSHEMBEKI bya kala emisaveni ya namuntlha. Hambiswiritano, i xilaveko xa nkoka eka Vakreste. Pawulo u tsarile: “Hi navela ku endla leswi lulameke minkarhi hinkwayo.” (Vaheveru 13:18) Leswi hi leswi Wilma, un’wana wa Timbhoni ta Yehovha eFaenza, le Italy a laveke ku swi endla.

Phepha-hungu leri nge Il Resto del Carlino ri vula leswaku loko a kume xipaci lexi nga ni mali yo tala ehandle ka vhengele edorobeni-nkulu ra ka vona, u xi yise emaphoriseni “handle ko kanakana” leswaku xi ta tlheriseriwa eka n’wini wa xona.

Loko meyara yi twe mhaka leyi, hi ku hatlisa yi rhumele xipapilana xo nkhensa eka Wilma. U tsarile a ku: “Hi vito ra Doroba-nkulu, ndzi ku nkhensa hi mbilu ya mina hinkwayo hikwalaho ka xiendlo xa wena lexinene. Doroba-nkulu ra hina ro hlawuleka ra Faenza ri lava vanhu lavanene ni lava tshembekeke.”

Hambi swiendlo leswinene swa tiviwa kumbe a swi tiviwi, minkarhi hinkwayo hi fanele hi lwela ku tshembeka. Hilaha Matsalwa yo Kwetsima ma khutazaka hakona, “hi ringeta ku endla leswinene ku nga ri emahlweni ka Xikwembu ntsena kambe ni le mahlweni ka vanhu.”—2 Vakorinto 8:21, The Jerusalem Bible.