A Hi Namarheleni Swinene Eka Ripfumelo Ra Hina Ra Risima!
“Ndzi tsalela lava nyikiweke ku pfumela loku ringanaka hi xiyimo ni ku pfumela ka hina.”—2 PETRO 1:1.
1. I yini leswi Yesu a swi vuleke loko a tsundzuxa vaapostola va yena, kambe Petro a a tinyungubyisa hi yini?
EMADYAMBYINI ya le mahlweni ka rifu ra Yesu, u vule leswaku vaapostola va yena hinkwavo va ta n’wi fularhela. Un’wana wa vona, ku nga Petro, u tibe xifuva a ku: “Hambiloko va nga khunguvanyeka hinkwavo hikwalaho ka wena, mina ndzi nga ka ndzi nga khunguvanyeki, ni siku ni rin’we.” (Matewu 26:33, xiitaliki i xerhu.) Kambe Yesu a a swi tiva leswaku a swi tano. Hi yona mhaka leyi a byeleke Petro eka xiendlakalo xexo a ku: “Ndzi ku khongelerile, leswaku ku pfumela ka wena ku nga tshuki ku titivala. Kutani wena, loko u ta va u hundzukile, u ta tiyisa vamakwenu.”—Luka 22:32.
2. Ku nga khathariseki ku titshemba ka Petro ku tlula mpimo, hi swihi swiendlo swa yena leswi a swi kombisa leswaku ripfumelo ra yena a ri tsanile?
2 Petro, loyi a sunguleke ku tshemba ripfumelo ra yena ku tlula mpimo, u landzule Yesu vusiku byebyo. Minkarhi yinharhu u kanetile leswaku a a n’wi tiva Kreste! (Matewu 26:69-75) U fanele a ma tsundzuke swinene marito ya N’wini wa yena lama nge “loko u ta va u hundzukile, u ta tiyisa vamakwenu.” Evuton’wini bya yena hinkwabyo Petro u fanele a khumbhiwe swinene hi ndzayo yoleyo, hilaha swi kombisiwaka hakona hi mapapila ya yena mambirhi lawa a ma tsaleke, lama kumekaka eBibeleni.
Lexi Endleke Leswaku Petro A Tsala Mapapila Ya Yena
3. Hikwalaho ka yini Petro a tsale papila ra yena ro sungula?
3 Kwalomu ka malembe ya 30 endzhaku ka rifu ra Yesu, Petro u tsale papila ra yena ro sungula, a ri tsalela vamakwavo va le Ponto, Galatiya, Kapadokiya, Asiya na Bitiniya, tindhawu leti sweswi ti vumbaka n’walungu na vupela-dyambu bya Turkey. (1 Petro 1:1) Vayuda lava van’wana va vona kumbexana va veke Vakreste hi Pentekosta ya 33 C.E., a swi kanakanisi leswaku a va ri exikarhi ka lava Petro a va tsaleleke. (Mintirho 2:1, 7-9) Vunyingi bya vona a ku ri Vamatiko lava a va xanisiwa swinene hi vakaneti. (1 Petro 1:6, 7; 2:12, 19, 20; 3:13-17; 4:12-14) Hikokwalaho Petro u tsalele vamakwavo volavo leswaku a va khutaza. Xikongomelo xa yena a ku ri ku va pfuna leswaku va kuma “mihandzu ya ku pfumela ka [vo]na, ku nga ku ponisiwa ka mimoya ya [vo]na.” Xisweswo, eka xikhutazo xakwe xo lelana na vona, u khutazile a ku: “Alelani [Diyavulosi], mi tiya eku pfumeleni ka n’wina.”—1 Petro 1:9; 5:8-10.
4. Hikwalaho ka yini Petro a tsale papila ra yena lera vumbirhi?
4 Endzhakunyana, Petro u tsalele Vakreste lava papila ra yena ra vumbirhi. (2 Petro 3:1) Hikwalaho ka yini? Hikuva a ku ri ni nxungeto lowukulu swinene. Vanhu lava tikhomaka hi ndlela yo biha a va ta ringeta ku thyakisa mahanyelo ya vapfumeri lava, ni ku hambukisa van’wana! (2 Petro 2:1-3) Ku tlula kwalaho, Petro u lemukise hi ta vahlekuri. Epapileni ra yena lero sungula u tsale leswaku “ku hela ka swilo hinkwaswo ku le kusuhi,” naswona sweswi kumbexana van’wana a va ri karhi va hlekula dyondzo yoleyo. (1 Petro 4:7; 2 Petro 3:3, 4) A hi kambisiseni papila ra vumbirhi ra Petro kutani hi vona ndlela leyi ri va tiyiseke ha yona vamakwerhu leswaku va tshama va tiyile eripfumelweni. Exihlokweni lexi xo sungula, hi ta kambisisa 2 Petro ndzima 1.
Xikongomelo Xa Ndzima 1
5. Xana Petro u va lunghiselela njhani vahlayi va yena leswaku a ta bula hi swiphiqo swo karhi?
5 Petro a nga vulavuli xikan’we-kan’we hi swiphiqo leswikulu. Ematshan’weni ya sweswo, u lunghiselela ndlela yo bula hi swiphiqo leswi hi ku engetela ku tlangela ka vahlayi va yena eka leswi va swi kumeke loko va va Vakreste. U va tsundzuxa hi swikongomelo swa Xikwembu leswi hlamarisaka ni ku tshembeka ka vuprofeta bya Bibele. Leswi u swi endle hi ku va byela ta ku hundzuka, xivono lexi yena hi yexe a xi voneke malunghana na Kreste ematimbeni ya Mfumo.—Matewu 17:1-8; 2 Petro 1:3, 4, 11, 16-21.
6, 7. (a) Hi yihi dyondzo leyi hi nga yi dyondzaka eka xingheniso xa papila ra Petro? (b) Loko hi nyikela ndzayo, i yini leswi minkarhi yin’wana swi nga pfunaka ku swi amukela?
6 Xana hi nga dyondza dyondzo yo karhi eka xingheniso xa Petro? Xana ndzayo a yi amukeriwi hi ku olova loko hi sungula hi bula ni vayingiseri va hina hi swikombiso leswikulu swa ntshembo wa Mfumo lowu hi wu tlangelaka? Naswona ku vuriwa yini hi ku tirhisa ntokoto wa munhu hi xiyexe? Kumbexana, endzhaku ka rifu ra Yesu, Petro u hlamusele ko hlayanyana malunghana ni ku vona xivono xa Kreste eku vangameni ka Mfumo.—Matewu 17:9.
7 Nakambe, tsundzuka leswaku handle ko kanakana, hi nkarhi lowu Petro a tsaleke papila ra yena ra vumbirhi ha wona, Evhangeli ya Matewu ni papila ra muapostola Pawulo leri yaka eka Vagalatiya a swi hangalasiwe swinene. Kutani swihoxo swa Petro swa vumunhu ni rhekhodo ya ripfumelo ra yena kumbexana a swi tiveka swinene evanhwini lava hanyeke enkarhini wa yena. (Matewu 16:21-23; Vagalatiya 2:11-14) Hambiswiritano, leswi a swi n’wi tekelanga ntshunxeko wa yena wo vulavula. Entiyisweni, swi nga ha va swi endle papila ra yena ri tsakisa swinene eka lava a va karhateka swinene hi ku tsana ka vona vini. Hikokwalaho, loko hi pfuna lava nga ni swiphiqo, xana a swi nga ta va swinene ku pfumela leswaku na hina hi ni swihoxo?—Varhoma 3:23; Vagalatiya 6:1.
Xiloso Lexi Khutazaka
8. Xana Petro a nga va a ri tirhise hi mongo wihi rito leri nge ‘ripfumelo’?
8 Sweswi xiya xiloso xa Petro. Xikan’we-kan’we u vulavula hi mhaka ya ripfumelo, a vula leswaku vahlayi va yena hi “lava nyikiweke ku pfumela loku ringanaka hi xiyimo ni ku pfumela ka hina.” (2 Petro 1:1) Laha xiga lexi nge “ku pfumela” kumbexana xi vula “ku tiyiseka swinene” naswona xi kombetela eka leswi Vakreste va pfumelaka eka swona kumbe tidyondzo ta vona, leti minkarhi yin’wana eMatsalweni ti vuriwaka “ntiyiso.” (Vagalatiya 5:7; 2 Petro 2:2; 2 Yohane 1) Rito leri nge ‘ripfumelo’ hakanyingi ri tirhisiwa hi mukhuva wolowo ematshan’weni ya mukhuva lowu tolovelekeke wa ku tshemba kumbe ku tiyiseka loku vekiwaka eka munhu kumbe nchumu wo karhi.—Mintirho 6:7; 2 Vakorinto 13:5; Vagalatiya 6:10; Vaefesa 4:5; Yuda 3.
9. Hikwalaho ka yini xiloso xa Petro xi fanele xi twale xi ri xa nkoka swinene eka Vamatiko?
9 Xiloso xa Petro xi fanele xi twakale xi tsakisa swinene eka vahlayi lava nga Vamatiko. Vayuda a va nga fambelani ni Vamatiko, naswona a va va tsongahata, naswona ku hlawula Vamatiko a ku ri kona ni le xikarhi ka Vayuda lava veke Vakreste. (Luka 10:29-37; Yohane 4:9; Mintirho 10:28) Kambe Petro, loyi a ri Muyuda tlhelo muapostola wa Yesu Kreste, u vule leswaku vahlayi va yena—ku nga Vayuda ni Vamatiko—va ni ripfumelo rin’we na yena naswona va ni lunghelo rin’we na yena.
10. Hi tihi tidyondzo leti hi nga ti dyondzaka eka xiloso xa Petro?
10 Anakanya hi tidyondzo leti xiloso xa Petro xi hi dyondzisaka tona namuntlha. Xikwembu a xi yi hi nghohe; a xi rhandzi rixaka ro karhi kumbe tiko ro karhi ku tlula rin’wana. (Mintirho 10:34, 35; 11:1, 17; 15:3-9) Hilaha Yesu hi yexe a dyondziseke hakona, Vakreste hinkwavo i vamakwavo, naswona ku hava ni un’we wa hina loyi a faneleke a titwa a ri wa le henhla. Ku tlhandlekela kwalaho, xiloso xa Petro xi kandziyisa leswaku hakunene hi vamakwerhu va misava hinkwayo, lava nga ni ‘lunghelo leri ringanaka,’ ku nga ripfumelo leri Petro ni vaapostola-kulobye a va ri na rona.—Matewu 23:8; 1 Petro 5:9.
Vutivi Ni Switshembiso Swa Xikwembu
11. Endzhaku ka xiloso xa yena, hi swihi swilo swa nkoka leswi Petro a swi kandziyisaka?
11 Endzhaku ka xiloso xakwe, Petro u tsarile a ku: “Tintswalo ni ku rhula a swi ve na n’wina swi mi talela.” Xana tintswalo leti nga faneriwiki ni ku rhula swi nga hi talela njhani? Petro wa hlamula: “Eku tiveni ka Xikwembu ni ka Yesu Hosi ya hina.” Kutani u ri: “Hi matimba ya yena ya vukwembu, Kriste ú hi nyikile swilo hinkwaswo leswi swi hi pfunaka ku hanya vutomi bya vukhongeri.” Kambe, xana hi swi kumisa ku yini swilo leswi swa nkoka? “Hi mhaka ya ku tiva loyi a hi vitaneleke eku kwetsimeni ka yena ne ku sasekeni ka yena ka xiviri.” Xisweswo, kambirhi Petro u kandziyisa leswaku ku tiva Xikwembu na N’wana wa xona hilaha ku kongomeke i swa nkoka.—2 Petro 1:2, 3; Yohane 17:3.
12. (a) Hikwalaho ka yini Petro a kandziyisa nkoka wa vutivi lebyi kongomeke? (b) Leswaku hi tsakela switshembiso swa Xikwembu, xana hi fanele hi rhanga hi endla yini?
12 “Vadyondzisi va mavunwa” lava Petro a tsundzuxaka malunghana na vona eka ndzima 2 va tirhisa “marito ya vona ya vuxisi” leswaku va xisetela Vakreste. Hi ndlela leyi va ringeta ku va xisetela leswaku va tlhelela eka vunghwavava lebyi va ponisiweke eka byona. Vuyelo bya un’wana ni un’wana loyi a a ponisiwile hi “ku tiva Hosi ya hina ni Muponisi Yesu Kriste” kutani endzhaku a hluriwa hi vuxisi, byi ni khombo. (2 Petro 2:1-3, 20) Kumbexana hikwalaho ko lava ku vulavula hi xiphiqo lexi endzhakunyana, eku sunguleni ka papila rakwe Petro u kandziyisa nkoka wa vutivi lebyi kongomeke leswaku ku hlayisiwa xiyimo lexi tengeke ni Xikwembu. Petro u xiya leswaku Xikwembu ‘xi hi nyikile switshembiso swa risima, ni leswikulu swinene, leswaku ha swona mi ta kota ku hlanganyela eka ntumbuluko wa Xikwembu.’ Kambe, leswaku hi kuma switshembiso leswi, leswi nga xiphemu xa nkoka xa ripfumelo ra hina, Petro u vula leswaku hi fanele hi sungula hi “pona eku onhakeni loku nga kona emisaveni hikwalaho ka ku navela loko biha.”—2 Petro 1:4.
13. I yini leswi Vakreste lava totiweke ni “tinyimpfu tin’wana” va tiyimiseleke ku yima va tiyile eka swona?
13 Xana u swi languta njhani switshembiso swa Xikwembu? Xana u swi languta hi ndlela leyi masalela ya Vakreste lava totiweke ma swi langutaka ha yona? Hi 1991, Frederick Franz, loyi enkarhini wolowo a a ri muungameri wa Watch Tower Bible and Tract Society, loyi a veke entirhweni wa nkarhi hinkwawo ku tlula malembe ya 75, u katsakanye ndlela leyi lava nga ta fuma na Kreste va titwaka ha yona a ku: “Hi tshama hi tiyile ku fikela sweswi, naswona hi ta tshama hi tiyile ku fikela loko Xikwembu xi kombisa hakunene leswaku xi tiyisile eka ‘switshembiso swa xona swa risima ni leswikulu swinene.’” Makwerhu Franz u tshame a tiyisekile hi xitshembiso xa Xikwembu xa ku pfuxeriwa etilweni, naswona u tshame a tiyile eripfumelweni kukondza loko a fa a ri ni malembe ya 99 hi vukhale. (1 Vakorinto 15:42-44; Vafilipiya 3:13, 14; 2 Timotiya 2:10-12) Hilaha ku fanaka, vanhu va timiliyoni va tshama va tiyile eripfumelweni, va langute eka xitshembiso xa Xikwembu xa misava ya paradeyisi leyi vanhu va nga ta hanya eka yona hi ntsako hilaha ku nga heriki. Xana u un’wana wa vona?—Luka 23:43; 2 Petro 3:13; Nhlavutelo 21:3, 4.
Ku Angula Eka Switshembiso Swa Xikwembu
14. Hikwalaho ka yini Petro a boxa vunene tanihi mfanelo yo sungula leyi faneleke yi engeteriwa eripfumelweni?
14 Xana ha xi nkhensa Xikwembu eka leswi xi swi tshembiseke? Loko swi ri tano, Petro u vula leswaku hi fanele hi swi kombisa. “Hikwalaho ka swona sweswo” (hikwalaho ka leswi Xikwembu xi hi nyikeke switshembiso swa risima swinene), hi fanele hi endla matshalatshala lamakulu leswaku hi gingiriteka. A hi fanelanga hi eneriseka hi ku va hi ri eripfumelweni ntsena kumbe hi ku va hi tiva ntiyiso wa Bibele ntsena. Sweswo a swi enelanga! Kumbexana esikwini ra Petro van’wana evandlheni a va vulavula ngopfu hi ripfumelo kambe va katseka emahanyelweni layo biha. A va fanele va va ni mahanyelo layo tenga, kutani Petro wa khutaza a ku: “Seketela[ni] ku pfumela ka n’wina hi vunene.”—2 Petro 1:5; Yakobo 2:14-17.
15. (a) Hikwalaho ka yini vutivi byi boxiwa endzhaku ka vunene tanihi mfanelo leyi faneleke yi engeteriwa eripfumelweni? (b) Hi tihi timfanelo tin’wana leti nga ta hi hlomisela leswaku hi tshama hi tiyile eripfumelweni?
15 Endzhaku ko boxa vutengi, Petro u xaxameta timfanelo tin’wana ta tsevu leti hi faneleke hi ti kombisa, kumbe ku ti engetela eripfumelweni ra hina. Yin’wana ni yin’wana ya tona ya laveka leswaku hi ta “tiya swinene eku pfumeleni.” (1 Vakorinto 16:13) Hikwalaho ka leswi vagwinehi a va ‘soholota Matsalwa’ ni ku nghenisa ‘tidyondzo ta mavunwa,’ Petro u boxa vutivi tanihi nchumu wa nkoka, a ku: “Vunene byona mi byi seketela hi vutivi.” Kutani u ya emahlweni a ku: “Mi [engetela] vutivi hi ku tikhoma, ni ku tikhoma hi ku tiyisela, ni ku tiyisela hi vukhongeri, ni vukhongeri hi ku tsakelana ka vuxaka, ni ku tsakelana ka vuxaka hi rirhandzu.”—2 Petro 1:5-7; 2:12, 13; 3:16.
16. Xana ku ta humelela yini loko timfanelo leti Petro a ti xaxametaka to engeteriwa eripfumelweni ra hina, kambe ku ta humelela yini loko ti nga engeteriwi?
16 Xana ku ta humelela yini loko swilo leswi swa nkombo swo engeteriwa eka ripfumelo ra hina? Petro wa hlamula: “Loko mi ri ni swilo leswi, ni loko swi mi talela swi andza, swi ta endla leswaku mi nga phyami kumbe ku pfumala mihandzu, kutani swi ta mi fikisa eku tiveni loku hetisekeke ka Hosi ya hina Yesu Kriste.” (2 Petro 1:8, xiitaliki i xerhu.) Hi hala tlhelo, Petro u ri: “Loyi a pfumalaka swilo leswi, ú file mahlo, a nga voni kule, naswona wa rivala leswaku ú susiwile swidyoho swa yena swa khale.” (2 Petro 1:9) Xiya leswaku Petro a nga ha tirhisi swiga swo tanihi “n’wina” na “hina” kambe u tirhisa “loyi,” “ú” na “swa yena.” Lexi vavisaka, hambileswi van’wana va nga voniki, va rivalaka, naswona va nga tengangiki, hi ndlela ya tintswalo Petro a nga vuli swona leswaku muhlayi hi wun’wana wa vanhu lava.—2 Petro 2:2.
Ku Tiyisa Vamakwavo
17. I yini lexi nga ha vaka xi susumetele Petro leswaku a khutaza ku endla ‘swilo leswi’?
17 Kumbexana hi ku xiya leswaku ngopfu-ngopfu lava ha riki vantshwa va nga kuceteriwa hi ku olova, Petro wa va khutaza hi ndlela yo kombisa musa: “Vamakwerhu, hisekelani ngopfu-ngopfu ku tiyisa ku vitaniwa ni ku hlawuriwa ka n’wina, hikuva loko mi endla sweswo a mi nga khuguki mi wa ni siku ni rin’we.” (2 Petro 1:10; 2:18) Vakreste lava totiweke lava engetelaka swilo leswi swa nkombo eka ripfumelo ra vona va ta kuma hakelo leyikulu, hilaha Petro a vulaka hakona: “Mi ta nyikiwa fanelo hinkwayo ya ku nghena eMfun’weni lowu nga heriki wa Hosi ni muponisi wa hina Yesu Kriste.” (2 Petro 1:11) “Tinyimpfu tin’wana” ti ta kuma ndzhaka leyi nga heriki exivandleni xa Mfumo wa Xikwembu wa laha misaveni.—Yohane 10:16; Matewu 25:33, 34.
18. Hikwalaho ka yini Petro a rhandza ku ‘tshamela ku tsundzuxa’ vamakwavo?
18 Petro u va navelela swinene vamakwavo leswaku va kuma nyiko yoleyo leyikulu. Wa tsala: “Hikokwalaho, hi masiku hinkwawo, ndzi navela ku tshama ndzi ri karhi ndzi mi tsundzuxa timhaka leti, hambileswi mi ti tivaka ni ku tiyisela entiyisweni.” (2 Petro 1:12) Petro u tirhisa rito ra Xigriki leri nge ste·riʹzo, leri laha ri hundzuluxeriweke ri va “ku tiyisela” kambe leri hundzuluxeriweke ri va “tiyisa” eka ndzayo ya Yesu yo sungula leyi yaka eka Petro leyi nge: “Tiyisa vamakwenu.” (Luka 22:32) Ku tirhisiwa ka rito rero swi nga ha kombisa leswaku Petro u tsundzuka ndzayo ya matimba leyi a yi kumeke eka Hosi ya yena. Sweswi Petro u ri: “Ndzi ehleketa leswaku swi lulamile ku mi pfuxa hi ku mi tsundzuxa swilo leswi, loko ndza ha ri emirini lowu [miri wa vumunhu]. Hikuva ndza swi tiva leswaku ku rhurha ka mina emirini lowu wa mina ku le kusuhi.”—2 Petro 1:13, 14.
19. Hi yihi mimpfuno leyi hi yi lavaka namuntlha?
19 Hambileswi hi ndlela ya musa Petro a vulaka leswaku vahlayi va yena va ‘tiye swinene entiyisweni,’ wa swi xiya leswaku ripfumelo ra vona ri nga ha tshoveka ku fana ni xikepe. (1 Timotiya 1:19) Tanihi leswi a a swi tiva leswaku a a ta fa ku nga ri khale, u tiyisa vamakwavo hi ku boxa swilo leswi endzhaku ka nkarhi a va ta swi tsundzuka leswaku va tshama va tiyile hi tlhelo ra moya. (2 Petro 1:15; 3:12, 13) Hilaha ku fanaka, na hina namuntlha hi lava switsundzuxo swa nkarhi na nkarhi leswaku hi tshama hi tiyile eripfumelweni. Ku nga khathariseki leswaku hi vamani ni leswaku hi ni nkarhi wo tanihi kwihi hi ri entiyisweni, a hi fanelanga hi honisa ku hlaya Bibele nkarhi na nkarhi, dyondzo ya munhu hi xiyexe ni ku va kona eminhlanganweni ya vandlha. Van’wana va kuma xisirhelelo xo ka va nga yi eminhlanganweni, va vula leswaku va va va karhele swinene kumbe va vula leswaku minhlangano ya kona yo phindha-phindha nchumu wun’we kumbe swilo a swi endliwi kahle, kambe Petro a a swi tiva leswaku un’wana ni un’wana wa hina a nga lahlekeriwa hi ripfumelo hi ku hatlisa, loko ho titshemba ku tlula mpimo.—Marka 14:66-72; 1 Vakorinto 10:12; Vaheveru 10:25.
Xisekelo Lexi Tiyeke Xa Ripfumelo Ra Hina
20, 21. Xana xivono xa ku hundzuka xi ri tiyise njhani ripfumelo ra Petro ni vahlayi va mapapila ya yena, ku katsa na hina namuntlha?
20 Xana ripfumelo ra hina ri sekeriwe eka mintsheketo leyi qambhiweke hi vutlhari? Petro u hlamula hi xivindzi: “A hi landzanga mintsheketo yo endliwa hi vutlhari, loko hi mi tivisile ta ku humelela hi matimba ka Hosi ya hina Yesu Kriste; hina hi timbhoni ta vukulukumba bya yena, lebyi hi nga byi vona hi mahlo.” Petro, Yakobo na Yohane a va ri na Yesu loko va vona xivono xa yena ematimbeni ya Mfumo. Petro wa hlamusela: “[U nyikiwe] ku dzuneka ni ku twala hi Xikwembu Tatana, rito ri fikile eka yena ri ta hi ku kwetsima loku hlamarisaka, ri ku: ‘Loyi i N’wananga, loyi ndzi n’wi rhandzaka ni ku n’wi tsakela.’ Kutani hina hi ri twile rito leri, loko ri huma etilweni, hikuva a hi ri na yena entshaveni leyo hlawuleka.”—2 Petro 1:16-18.
21 Loko Petro, Yakobo na Yohane va vone xivono xexo, Mfumo wu ve wa xiviri eka vona hakunene! Petro wa hlamusela: “Hikokwalaho, rito ra vaprofeta, hina hi ri kuma ri tiyile ku tlula ni khale. Mi ta va mi endla swona loko mi [ri] hlayisa swinene.” Ina, vahlayi va papila ra Petro, ku katsa na hina namuntlha, va ni xivangelo lexi tiyeke xo yisa nyingiso eka vuprofeta lebyi vulavulaka hi Mfumo wa Xikwembu. Xana hi fanele hi wu nyikela njhani nyingiso? Petro wa hlamula: “Ku fana ni rivoni leri voningaka lomu ku nga ni munyama, ku fikela loko vurhonga byi tshwuka, ni loko nyeleti ya mixo yi humelela etimbilwini ta n’wina.”—2 Petro 1:19; Daniyele 7:13, 14; Esaya 9:6, 7.
22. (a) Timbilu ta hina ti fanele ti xalamukisiwa eka yini? (b) Xana hi wu yisa njhani nyingiso eka rito ra vuprofeta?
22 Timbilu ta hina ti nga va emunyameni lowu pfumalaka ku vonakala ka rito ra vuprofeta. Kambe hi ku yisa nyingiso eka rona, timbilu ta Vakreste ti tshame ti xalamukile ku fikela hi vurhonga loko “nyeleti ya mixo,” Yesu Kreste, a humelela eku vangameni ka Mfumo. (Nhlavutelo 22:16) Xana namuntlha hi wu yisa njhani nyingiso eritweni ra vuprofeta? Hi dyondzo ya Bibele, hi ku lunghiselela ni ku hoxa xandla loko hi ri eminhlanganweni, na hi ku ‘anakanyisisa hi swilo leswi, ni ku tinyiketela swinene eka swona.’ (1 Timotiya 4:15) Leswaku rito ra vuprofeta ri ta fana ni rivoni leri vangamaka “lomu ku nga ni munyama,” (etimbilwini ta hina), hi fanele hi ri pfumelela ri hi khumbha swinene—ku navela ka hina, mintlhaveko ya hina, minsusumeto ni tipakani ta hina. Hi fanele hi va swichudeni swa Bibele, hikuva Petro wa gimeta eka ndzima 1 a ku: “Ku hava marito ya vaprofeta eMatsalweni lawa munhu a nga ma hlamuselaka hi ku tisungulela. Hikuva ku hava rito ni rin’we ra vaprofeta leri teke hi ku titwa ka munhu, kambe vanhu lava susumetiweke hi Moya lowo Kwetsima, va vurile leswi humaka eka Xikwembu.”—2 Petro 1:20, 21.
23. I yini leswi ndzima yo sungula ya 2 Petro yi swi lunghiseleleke vahlayi?
23 Eku sunguleni ka ndzima ya papila ra yena ra vumbirhi, Petro u hi khutaza swinene leswaku hi yima hi tiyile eripfumelweni ra hina ra risima. Sweswi hi lunghekele ku kambisisa timhaka ta nkoka leti landzelaka. Xihloko lexi landzelaka xi ta vulavula hi ndzima 2 ya 2 Petro, laha muapostola a vulavulaka hi ntlhontlho wa minkucetelo ya ku tikhoma loko biha leyi tlhotlhomeleke yi nghena emavandlheni.
Wa Tsundzuka Xana?
◻ Hikwalaho ka yini Petro a kandziyisa nkoka wa vutivi lebyi kongomeke?
◻ Xana ku nga ha va ku ri xihi xivangelo xo va vunene byi boxiwa tanihi mfanelo yo sungula leyi faneleke yi engeteriwa eripfumelweni?
◻ Hikwalaho ka yini Petro a tshamela ku nyika vamakwavo switsundzuxo?
◻ Hi swihi switiyisekiso leswi tiyeke leswi Petro a swi nyikelaka malunghana ni ripfumelo ra hina?
[Xifaniso lexi nga eka tluka 9]
Swihoxo swa Petro a swi n’wi vangelanga ku lahla ripfumelo ra yena