I Vamani Lava Nga Ta Pona “Siku Ra Yehovha”?

“Mi fanele mi va vanhu va muxaka muni hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, mi ri karhi mi langutela ni ku anakanyisisa hi vukona bya siku ra Yehovha!”—2 PETRO 3:11, 12, NW.

1. I vamani lava tirheke hi moya ni matimba ya Eliya?

YEHOVHA XIKWEMBU u hlawule vanhu lava va nga ta va vadya-ndzhaka-kulobye ni N’wana wakwe Yesu Kreste eMfun’weni wa le matilweni. (Varhoma 8:16, 17) Loko va ha ri emisaveni, Vakreste lava totiweke va tirha hi moya ni matimba ya Eliya. (Luka 1:17) Exihlokweni lexi hundzeke, hi xiye ku fana loku nga kona emintirhweni ya vona ni liyani ya Eliya. Kambe, ku vuriwa yini hi ntirho wa muprofeta Elixa, la nga mutlhandlami wa Eliya?—1 Tihosi 19:15, 16.

2. (a) Hi rihi singita ra Eliya ro hetelela, naswona hi rihi singita ra Elixa ro sungula? (b) Hi byihi vumbhoni lebyi kombisaka leswaku Eliya a nga yanga etilweni?

² Singita ro hetelela leri endliweke hi Eliya a ku ri leriyani ro hambanisa mati ya Nambu wa Yordani hi ku ma ba hi nguvu yakwe ya ntirho. Leswi swi endle leswaku Eliya na Elixa va kota ku tsemakanya hi le ndhawini leyi omeke. Loko va ri karhi va famba va kongome etlhelweni ra le vuxeni ra nambu, xihuhuri xi teke Eliya xi n’wi rhurhisela endhawini yin’wana ya misava. (Vona bokisi leri nga eka tluka 15 leri nge “Hi Wahi Matilo Lawa Eliya A Tlhandlukeleke Eka Wona?”) Xiambalo xa Eliya xa ntirho xi ve xi sala. Loko Elixa a xi tirhise ku ba Yordani, mati ya wona ma tlhele ma avana, leswi endleke leswaku a kota ku tlhela a famba endhawini leyi omeke. Singita leri ri swi veke erivaleni leswaku Elixa u ve mutlhandlami wa Eliya eku kondleteleni ka vugandzeri bya ntiyiso eIsrayele.—2 Tihosi 2:6-15.

Timfanelo Leti Nga Ni Vukwembu I Ta Nkoka

3. I yini leswi Pawulo na Petro va swi vuleke malunghana ni vukona bya Yesu ni “siku ra Yehovha”?

³ Malembe-xidzana layo tala endzhaku ka ku fa ka Eliya na Elixa, muapostola Pawulo na muapostola Petro va fanise ku ta ka “siku ra Yehovha” ni vukona bya Yesu Kreste ni “matilo lamantshwa” swin’we ni “misava leyintshwa” ya le nkarhini lowu taka. (2 Vatesalonika 2:1, 2; 2 Petro 3:10-13) Leswaku hi pona siku ra Yehovha lerikulu—loko Xikwembu xi lovisa valala va xona ni ku ponisa vanhu va xona—hi fanele hi lava Yehovha ni ku kombisa ku titsongahata swin’we ni vululami. (Sofoniya 2:1-3) Kambe timfanelo tin’wana ta vonaka loko hi ri karhi hi xiya swiendlakalo leswi humeleleke muprofeta Elixa.

4. Ku chivirika ku pfuna yini entirhweni wa Yehovha?

⁴ Ku chivirikela ntirho wa Xikwembu i swa nkoka loko hi lava ku pona “siku ra Yehovha.” Eliya na Elixa a va wu chivirikela ntirho wa Yehovha. Hi ku chivirika hi ndlela leyi fanaka, masalela ya Vakreste lava totiweke namuntlha ma nyikela vutirheli lebyo kwetsima eka Yehovha ni ku rhangela eku chumayeleni ka mahungu lamanene.a Ku sukela exikarhi ka va-1930, va khutaze hinkwavo lava amukelaka rungula ra Mfumo naswona va ri ni ntshembo wo hanya hilaha ku nga heriki emisaveni, leswaku va tinyiketela eka Yehovha ni ku khuvuriwa. (Marka 8:34; 1 Petro 3:21) Vanhu va timiliyoni va angule hi ndlela leyinene eka xikhutazo lexi. Khale a va ri emunyameni wa moya naswona a va file eswidyohweni, kambe sweswi va dyondze ntiyiso wa Xikwembu, va kume ntshembo wa vutomi lebyi nga heriki emisaveni ya paradeyisi, naswona va karhi va chivirika entirhweni wa Yehovha. (Pisalema 37:29; Nhlavutelo 21:3-5) Hikwalaho ka ku chivirika ka vona, ntirhisano, malwandla ni mintirho yin’wana leyinene, va endla leswaku vamakwavo va Kreste lava totiweke lava ha riki emisaveni va kuma ku phyuphya lokukulu.—Matewu 25:31-46.

5. Hikwalaho ka yini swi ri swa nkoka swinene ku endlela ‘vamakwavo’ va Yesu swilo leswinene, naswona hi xihi xikombiso lexi hi xi kumaka esikwini ra Elixa?

⁵ Lava endlelaka ‘vamakwavo’ va Yesu swilo leswinene hikwalaho ka leswi vatotiwa lava va nga valandzeri va yena, va ni ntshembo wo pona “siku ra Yehovha.” Mpatswa lowu tekaneke wa le Xuneme wu katekisiwe swinene hikwalaho ko kombisa tintswalo ni malwandla eka Elixa ni nandza wakwe. Mpatswa lowu a wu nga ri na n’wana, naswona nuna wa kona a a dyuharile. Kambe Elixa u tshembise wansati loyi wa Muxuneme leswaku a a ta kuma n’wana wa mufana, naswona leswi swi humelerile. Loko n’wana loyi un’we a ta va a file endzhakunyana ka malembe, Elixa u ye eXuneme kutani a fika a n’wi pfuxa. (2 Tihosi 4:8-17, 32-37) Vona mimbuyelo leyi fuweke yo kombisa malwandla eka Elixa!

6, 7. Hi xihi xikombiso lexi Namani a xi vekeke, naswona leswi swi ku khumba njhani ku pona “siku ra Yehovha”?

⁶ Ku laveka ku titsongahata leswaku hi kota ku amukela nkongomiso lowu sekeriweke eBibeleni lowu humaka eka ‘vamakwavo’ va Kreste, hi ri ni ntshembo wo pona siku ra Yehovha. Murhangeri wa mavuthu wa Musiriya, Namani, loyi a a khomiwe hi nhlokonho a a boheka ku kombisa ku titsongahata hi ku landzela xiringanyeto xa xinhwanyetana xa Muisrayele lexi nga hlonga, kutani a ya eIsrayele a ya lava Elixa leswaku a ta n’wi tshungula. Ematshan’weni yo huma endlwini ya yena a hlanganisa Namani, Elixa u n’wi rhumele rungula leri: “Hlamba e ka ntlhanu na kambiri e nambyeni wa Yordan, nyama ya wena yi ta hanya, u ta tenga.” (2 Tihosi 5:10) Namani u karhatekile hikwalaho ka vutikukumuxi bya yena, kutani a hlundzuka, kambe endzhaku ka loko hi ku titsongahata a ye a ya nghena eYordani ka nkombo, “nyama ya yena yi hola yi fana ni ya šihlangi, a tenga.” (2 Tihosi 5:14) Loko a nga si tlhelela ekaya, Namani u khome ndlela a kongoma eSamariya a ya nkhensa muprofeta wa Yehovha. Hi mhaka ya leswi a a nga lavi ku vuyeriwa hi tlhelo ra swilo leswi vonakaka hikwalaho ka matimba lawa a ma nyikiwe hi Xikwembu, Elixa u hume a ya hlanganisa Namani kambe a ala ku teka tinyiko. Hi ndlela yo titsongahata Namani u byele Elixa a ku: “Nanḍa wa wena a nga ka a nga ganḍeli ŝikwembu ŝiṅwana hi tiholokosta, ni maganḍelo, o ta ŝi humesela Yehova ntsena.”—2 Tihosi 5:17.

⁷ Hi ku landzela ndzayo ya vatotiwa leyi humaka eMatsalweni ni ku titsongahata, vanhu va timiliyoni va katekisiwa swinene namuntlha. Ku tlula kwalaho, hi ku kombisa ripfumelo egandzelweni ra Yesu ra nkutsulo, vanhu lava va timbilu letinene va basisiwile hi tlhelo ra moya. Sweswi va ni lunghelo ro va vanghana va Yehovha Xikwembu na Yesu Kreste. (Pisalema 15:1, 2; Luka 16:9) Naswona ku tinyiketela ka vona eka Xikwembu ni le ntirhweni wa xona ku ta hakeriwa hi ku hlayisiwa eka ndzoviso wa makumu lowu nga ta wela vadyohi lava tikurisaka, lava nga hundzukiki ‘esikwini ra Yehovha’ leri tshinelaka hi ku hatlisa.—Luka 13:24; 1 Yohane 1:7.

“I Mani L’a Yimaka Na Mina? I Mani Šana?”

8. (a) Lava nga ta pona “siku ra Yehovha” va ni langutelo rihi malunghana ni ku endla ku rhandza ka Xikwembu? (b) Hi wihi ntirho lowu Yehu a a nyikiwe wona? (c) Xana a ku fanele ku humelela yini hi Yezabele?

⁸ Lava nga ni ntshembo wo pona “siku ra Yehovha” va fanele va tlhela va tikarhatela ku endla ku rhandza ka Xikwembu. Hi xivindzi Eliya u vhumbhe ku lovisiwa ka Hosi Akabu wa mudlayi, ndyangu lowu gandzelaka Bali. (1 Tihosi 21:17-26) Hambiswiritano, emahlweni ko va ndzoviso lowu wu endliwa, Elixa mutlhandlami wa Eliya a a fanele ku hetisisa ntirho wun’wana lowu a wa ha sele. (1 Tihosi 19:15-17) Loko nkarhi wa Yehovha lowu faneleke wu fika, Elixa u lerise nandza wa yena leswaku a ya tota murhangeri wa mavuthu la vuriwaka Yehu tanihi hosi leyintshwa ya Israyele. Endzhaku ko chela mafurha enhlokweni ya Yehu, murhumiwa loyi u te eka yena: “Yehova, Šikwembu ša Israel o v̌urisile, a ku: Nḍi ku tšherile hi mafura leŝaku u v̌a hosi ya Israel, e tikweni ra Yehova. U ta dlaya v̌a yindlu ya Akab, hosi ya wena, nḍi ta tirihisela e ka Yezabel hikwalaho ka ngati ya malanḍa ya mina, v̌aprofeta, ni hikwalaho ka ngati ya malanḍa hikwawo ya Yehova. Yindlu hikwayo ya Akab yi ta herisiwa.” Hosikati Yezabele lowo homboloka a a ta hoxeriwa timbyana naswona a a nga ta lahliwa hi ndlela leyi xiximekaka.—2 Tihosi 9:1-10.

9, 10. Xana rito ra Eliya ri hetiseke njhani emhakeni ya Yezabele?

⁹ Vavanuna va Yehu va wu vonile ntikelo wa ku totiwa ka yena naswona va n’wi vule hosi leyintshwa ya Israyele. Loko a teka goza ra matimba, Yehu u tsutsumele eYizriyele leswaku a ya sungula ntirho wakwe wa ku dlaya varhangeri va ntlawa lowu gwineheke wa vugandzeri bya Bali. Munhu wo sungula ku tlhaviwa hi nseve wa ndzoviso wa Yehu i Hosi Yoramu, n’wana Akabu. U hume emutini a ya vutisa Yehu loko a te hi ta ku rhula. Yehu u hlamule a ku: “Ku rula ku nga v̌a kwihi loko mikhuv̌a ya mbhisa ya Yezabel, mana wa wena, ni ku tala ka v̌uloyi bya yena ŝa ha ri kona?” Hi ndlela yoleyo, Yehu a tlhava mbilu ya Yoramu hi nseve.—2 Tihosi 9:22-24.

¹⁰ Vavasati lava chavaka Xikwembu va papalata ku tifanisa na Yezabele kumbe un’wana ni un’wana loyi a fanaka na yena. (Nhlavutelo 2:18-23) Hi nkarhi lowu Yehu a fikeke eYizriyele, wansati loyi a a ringete ku tisasekisa leswaku a koka mahlo. Loko wansati loyi a hlometele hi fasitere, u xewete Yehu hi ku hlekula. Yehu u vutise malandza ya wansati loyi a ku: “I mani l’a yimaka na mina? I mani šana?” Xikan’we-kan’we, vatirhi vambirhi kumbe vanharhu va le hubyeni va sungula ku hlometela. Xana a va yima na Yehu? U lerisile a ku: “Ṅwi hošeni hansi!” Kwalaho, va teke goza ra matimba, va khoma Yezabele lowo homboloka va n’wi hoxela ehandle hi fasitere. Tihanci ti n’wi kandziyele hi swinyondzwana, ti n’wi cakanyetela. Loko vanhu va ta eku n’wi lahleni, ‘a va kumanga nchumu handle ka xipalapala xa yena ni minkondzo ni swandla swa mavoko ya yena.’ Vona ku hetiseka loku chavisaka ka marito ya Eliya lama nge: “Timbyana ti ta dya nyama ya Yezabel”!—2 Tihosi 9:30-37.

Ku Seketela Vugandzeri Bya Ntiyiso Hi Mbilu Hinkwayo

11. Xana Yehonadabu a a ri mani, naswona u ku kombise njhani ku seketela ka yena vugandzeri bya ntiyiso?

¹¹ Lava nga ni ntshembo wo pona “siku ra Yehovha” kutani va hanya hilaha ku nga heriki emisaveni, va fanele va seketela vugandzeri bya ntiyiso hi mbilu hinkwayo. Va fanele va fana na Yehonadabu, kumbe Yonadabu, mugandzeri wa Yehovha la nga riki Muisrayele. Loko Yehu a ri karhi a endla ntirho wa yena hi ku chivirika, Yehonadabu a a tiyimisele ku kombisa ku navela ka yena ni nseketelo wa yena. Hiloko a huma a ya hlanganisa hosi leyintshwa ya Israyele, leyi a yi kongome eSamariya leswaku yi ta dlaya va ndyangu wa Akabu lava saleke. Loko a vona Yehonadabu, Yehu u vutisile a ku: “Šana mbilu ya wena yi basile kukotisa mbilu ya nga e mahlweni ka wena-ke?” Nhlamulo ya Yehonadabu leyinene yi endle leswaku Yehu a tshambuluta voko ra yena a rhamba Yehonadabu leswaku a ta khandziya egolonyini ya yena ya nyimpi, a ku: “A hi fambe ŝiṅwe, u ta v̌ona ku hiseka ka mina e ka Yehova.” Handle ko hlwela, Yehonadabu u amukele lunghelo ro kombisa ku seketela ka yena muavanyisi wa Yehovha la totiweke.—2 Tihosi 10:15-17.

12. Hikwalaho ka yini Yehovha a ri ni mfanelo yo koxa vugandzeri lebyi heleleke?

¹² Kunene, nseketelo wa vugandzeri bya ntiyiso lowu humaka embilwini wa laveka, hikuva Yehovha i Mutumbuluxi ni Hosi ya Hinkwako-nkwako, leyi nga ni mfanelo yo koxa ku tinyiketela ka hina loku heleleke, leyi naswona ku yi fanelaka. U lerise Vaisrayele a ku: “U nga ṭhuki u tiendlela šifaniso le’ši v̌atliweke, ni loko ši ri šifaniso šihi ni šihi ša ŝilo le’ŝi nge henhla e tilweni, ni loko ši ri ša ŝilo le’ŝi nge hansi e misav̌eni, ni loko ši ri ša ŝilo le’ŝi nge matini, e hansi ka misav̌a; u nga ṭhuki u ŝi nkhinsamela, ni loko ku ri ku ŝi tirela; hikuv̌a hi mina Yehova, Šikwembu ša wena, ša rilav̌eta.” (Eksoda 20:4, 5) Lava nga ni ntshembo wo pona “siku ra Yehovha” va fanele va n’wi gandzela swi huma embilwini, va endla tano “hi moya ni ntiyiso.” (Yohane 4:23, 24) Va fanele va yimela vugandzeri bya ntiyiso va tiyile, kukotisa Eliya, Elixa na Yehonadabu.

13. Tanihi leswi mbilu ya Yehonadabu a yi ri ni mbilu ya Yehu, i vamani lava tlangelaka Hosi ya Vumesiya, naswona va swi kombisa njhani leswi?

¹³ Endzhaku ko dlaya va ndyangu wa Akabu, Hosi Yehu u teke magoza man’wana leswaku a kumisisa vagandzeri va Bali erivaleni, ni ku herisa vukhongeri bya mavunwa eIsrayele. (2 Tihosi 10:18-28) Namuntlha, Hosi ya le tilweni Yesu Kreste u hlawuleriwe ku avanyisa valala va Yehovha ni ku lwela vuhosi bya Yena. Tanihi leswi mbilu ya Yehonadabu a yi ri ni mbilu ya Yehu, “ntshungu lowukulu” wa “tinyimpfu tin’wana” ta Yesu namuntlha wu swi xiya swinene leswaku Kreste i Hosi ya Vumesiya naswona wu tirhisana ni vamakwavo vakwe va moya lava nga emisaveni. (Nhlavutelo 7:9, 10; Yohane 10:16) Wu nyikela vumbhoni bya leswi hi ku va evukhongerini bya ntiyiso ni ku hlanganyela hi xitalo evutirhelini bya Vukreste, wu ri karhi wu tsundzuxa valala va Xikwembu hi “siku ra Yehovha” leri tshinelaka hi ku hatlisa.—Matewu 10:32, 33; Varhoma 10:9, 10.

Swiendlakalo Leswi Chavisaka Swi Tshinele!

14. I yini leswi yimeleke vukhongeri bya mavunwa?

¹⁴ Yehu u teke goza ro herisa vugandzeri bya Bali eIsrayele. Esikwini ra hina, hi ku tirhisa Yehu Lonkulu, ku nga Yesu Kreste, Xikwembu xi ta tisa ndzoviso eka Babilona Lonkulu, mfumo wa misava wa vukhongeri bya mavunwa. Ku nga ri khale hi ta vona ku hetiseka ka marito ya ntsumi lama yaka eka muapostola Yohane lama nge: “Timhondzo ta khume leti u ti voneke, tona swin’we ni xivandzana, swi ta venga [w]ansati loyi wa muoswi [Babilona Lonkulu], swi ta endla leswaku a swela ni ku sala a nga ambalanga nchumu, swi dya nyama ya yena, swi n’wi hisa hi ndzilo. Hikuva Xikwembu xi nghenisile etimbilwini ta swona leswaku swi yisa makungu ya xona emahlweni: Hi ku twanana ka swona, swi ta nyika matimba ya vuhosi bya swona eka xivandzana, ku kondza loko marito ya Xikwembu ma hetiseka.” (Nhlavutelo 17:16, 17; 18:2-5) “Timhondzo ta khume” ti fanekisela mimfumo ya misava ya tipolitiki leyi hlomeke, leyi fumaka misava. Hambileswi sweswi yi endleke vuoswi bya moya na Babilona Lonkulu, nkarhi wa yena wu komile. Xitirho lexi xa misava ya politiki xi ta lovisa vukhongeri bya mavunwa, naswona “xivandzana”—ku nga Nhlangano wa Matiko—xi ta hoxa xandla swinene eku tirhisaneni ka xona ni “timhondzo ta khume” leswaku xi n’wi lovisa.b Vona xiendlakalo xo tano lexi dzunisaka Yehovha!—Nhlavutelo 19:1-6.

15. Xana ku ta humelela yini loko ku endliwa matshalatshala yo herisa nhlengeletano ya Xikwembu ya laha misaveni?

¹⁵ Endzhaku ka loko Hosi Yehu a herise vugandzeri bya Bali, yindlu yakwe ya vuhosi yi hundzukele valala va Israyele va tipolitiki. Hosi Yesu Kreste u ta teka goza leri fanaka. Mimfumo ya tipolitiki yi ta sala loko ku lovisiwa vukhongeri bya mavunwa lebyi fanaka ni bya Bali. Ehansi ka nkucetelo wa Sathana Diyavulosi, valala lava va vuhosi bya Yehovha va ta lwa hi matimba va ringeta ku herisa nhlengeletano ya Xikwembu ya laha misaveni. (Ezekiyele 38:14-16) Kambe Yehovha u ta tirhisa Hosi Yesu Kreste leswaku a va dlaya hi ku va lovisa eHarmagedoni, ‘nyimpi ya Xikwembu xa Matimba Hinkwawo,’ a hetisisa ku lweriwa ka vuhosi bya Yehovha.—Nhlavutelo 16:14, 16; 19:11-21; Ezekiyele 38:18-23.

Ku Tirha Hi Ku Chivirika Loku Fanaka Ni Ka Elixa

16, 17. (a) Hi swi tivisa ku yini leswaku Elixa a a chivirika ku ya fikela emakun’wini ya vutomi bya yena? (b) Xana hi fanele hi endla yini hi matlhari ya ntiyiso?

¹⁶ Ku fikela loko “siku ra Yehovha” ri herisa swiyenge hinkwaswo swa mafambiselo ya Sathana yo homboloka, malandza ya Xikwembu ma ta va ni xivindzi ma tlhela ma chivirika kukotisa Elixa. Handle ka ntirho wakwe tanihi nandza wa Eliya, Elixa u tirhele Yehovha malembe yo tlula 50 a ri yexe tanihi muprofeta! Naswona Elixa u tirhe hi ku chivirika ku fikela emakun’wini ya vutomi bya yena lebyo leha. Emahlweninyana ka rifu rakwe, u endzeriwe hi Yehu, ntukulu wa Hosi Yowasi. Elixa u n’wi byele ku copa nseve hi fasitere. Nseve wu hahe hi rivilo lerikulu, kutani Elixa a ku: “I nsev̌e wa ku ponisa ka Yehova! I nsev̌e wa ku ponisiwa emav̌okweni ya va-Siria; u ta lwa ni v̌a-Siria e Afek, u ko u v̌a heta.” Hi ku komberiwa hi Elixa, Yowasi endzhaku u tlhave misava hi miseve yakwe. Kambe a nga swi endlanga hi ku hiseka, a tlhava kanharhu ntsena. Kutani Elixa u vule leswaku hikwalaho ka sweswo, Yowasi a ta nyikiwa ku hlula kanharhu ntsena ehenhla ka Siriya, naswona sweswo swi ve tano. (2 Tihosi 13:14-19, 25) Hosi Yowasi a nga dlayanga Vasiriya hi ku helela, ‘a kondza a va heta.’

¹⁷ Kambe, hikwalaho ka ku chivirika ku fana na Elixa, masalela lama totiweke ma hambeta ma lwisana ni vugandzeri bya mavunwa. Vanakulobye va wona lava nga ni ntshembo wa laha misaveni va endla nchumu lowu fanaka. Ku tlula kwalaho, hinkwavo lava nga ni ntshembo wo pona “siku ra Yehovha” va endla kahle loko va tsundzuka marito ya Elixa wo chivirika malunghana ni ku lovisa misava. A hi hlomeni hi miseve ya ntiyiso kutani hi hlasela hi yona hi ku chivirika—hi ku phindha-phindha—ina, kukondza Yehovha a vula leswaku ntirho wa hina wo yi tirhisa wu herile.

18. Xana hi fanele hi angula njhani eka marito ya 2 Petro 3:11, 12?

¹⁸ “Siku ra Yehova” ri ta herisa mafambiselo ya sweswi ya swilo yo homboloka ku nga ri khale. Kutani, a hi amukeleni marito ya muapostola Petro hi mbilu yo basa. Petro u te: “Leswi ku nga ta tshwa swilo leswi hinkwaswo swi hela hi ndlela leyi, mi fanele ku va ni vutomi lebyo hlawuleka bya vukhongeri, mi ri karhi mi langutela siku ra Xikwembu.” (2 Petro 3:11, 12) Loko swiphemu hinkwaswo swa mafambiselo lawa ya swilo swi n’okisiwile hi ndzilo wa vukarhi bya Xikwembu hi ku tirhisa Yesu Kreste, lava nga ni rhekhodo ya mahanyelo lamanene ni lava nga ni ku tinyiketela loku nga ni vukwembu hi vona ntsena va nga ta pona. Ku va ni mahanyelo lamanene ni ku tenga hi tlhelo ra moya i swa nkoka. Swi tano na hi ku rhandza vanhu-kulorhi, leswi kombisiwaka hi ku angula ka hina eka swilaveko swa vona, ngopfu-ngopfu hi ndlela ya moya leswi hi swi enerisaka hi vutirheli bya hina bya Vukreste.

19. I yini leswi hi faneleke hi swi endla leswaku hi ta pona “siku ra Yehovha”?

¹⁹ Xana marito ni swiendlo swa wena swi ku kombisa u ri nandza wa Xikwembu la tshembekeke ni la chivirikaka? Lokoswiritano, u nga va ni ntshembo wo pona “siku ra Yehovha” u ya emisaveni ya Xikwembu leyintshwa leyi tshembisiweke. Ina, u nga pona loko u endlela vamakwavo va Kreste va moya swilo leswinene hikuva i valandzeri va yena, hilaha mpatswa wa le Xuneme wu kombiseke malwandla eka Elixa hakona. Leswaku u pona u fanele u tlhela u fana na Namani, loyi a amukeleke nkongomiso wa Xikwembu kutani a va mugandzeri wa Yehovha. Loko u navela ku hanya emisaveni ya paradeyisi hilaha ku nga heriki, u fanele u seketela vugandzeri bya ntiyiso swi suka embilwini, hilaha Yehonadabu a endleke hakona. Kutani u nga va exikarhi ka malandza ya Yehovha yo tshembeka lama nga ta vona ku hetiseka ka marito ya Yesu ku nga ri khale: “Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.”—Matewu 25:34.

[Tinhlamuselo ta le hansi]

A Wu Ta Hlamurisa Ku Yini?

◻ I timfanelo tihi tin’wana leti lavekaka leswaku hi ta pona “siku ra Yehovha”?

◻ Hi xihi xikombiso lexi vekiweke hi mpatswa wa le Xuneme esikwini ra Elixa?

◻ Hi yihi dyondzo leyi hi nga yi dyondzaka eka Namani?

◻ Xana hi xi landzela njhani xikombiso xa Yehonadabu?

◻ Xana 2 Petro 3:11, 12 yi fanele yi hi khumba njhani?