Ku Tlangela Minhlangano Ya Vukreste
“A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina.”—VAHEVERU 10:24, 25.
1, 2. (a) Ha yini ku ri lunghelo ku ya enhlanganweni wa Vakreste va ntiyiso? (b) Yesu u va kona eminhlanganweni ya valandzeri vakwe hi mongo wihi?
MAWAKU lunghelo ro ya enhlanganweni wa Vukreste, ku nga khathariseki leswaku ku ni vagandzeri va Yehovha lava nga ehansi ka khume kumbe ku ni magidi yo talanyana, hikuva Yesu u te: “Laha ku nga na vambirhi kumbe vanharhu lava hlengeletaneke swin’we hi vito ra mina, ndzi kona exikarhi ka vona”! (Matewu 18:20) Entiyisweni, loko a endla xitshembiso xexo, Yesu a a bula hi timhaka ta vuavanyisi leti a ti fanele ti tameriwa kahle hi lava rhangelaka evandlheni. (Matewu 18:15-19) Kambe, xana marito ya Yesu ma nga tlhela ma tirhisiwa hi ku landza mongo wa wona eka minhlangano hinkwayo ya Vukreste leyi pfuriwaka ni ku pfariwa hi xikhongelo hi vito ra yena? Ina. Tsundzuka, loko Yesu a lerisa valandzeri vakwe leswaku va ya entirhweni wo endla vadyondzisiwa, u tshembisile: “Maswivo, ndzi na n’wina masiku hinkwawo ku fikela emakumu ka mafambiselo ya swilo.”—Matewu 28:20.
2 A swi kanakanisi leswaku Nhloko ya vandlha ra Vukreste, Hosi Yesu Kreste, wa yi tsakela swinene minhlangano hinkwayo ya valandzeri vakwe vo tshembeka. Tlhandlakambirhi, hi nga tiyiseka leswaku u na vona hi ku tirhisa moya lowo kwetsima wa Xikwembu. (Mintirho 2:33; Nhlavutelo 5:6) Yehovha Xikwembu na yena wa ku tsakela ku hlangana ka hina. Xikongomelo lexikulu xa minhlangano yo tano i ku dzunisa Xikwembu “e tinhlengeletanweni.” (Pisalema 26:12) Loko hi ya eminhlanganweni ya vandlha swi kombisa leswaku ha xi rhandza.
3. Hi xihi xivangelo xa nkoka lexi endlaka leswaku hi tlangela minhlangano ya Vukreste?
3 Ku ni swivangelo swin’wana leswinene leswi endlaka leswaku hi tlangela minhlangano ya Vukreste. A nga si suka emisaveni, Yesu Kreste u veke vadyondzisiwa vakwe lava totiweke leswaku va va “hlonga ro tshembeka ni ro tlhariha” hi ku lunghiselela swakudya swa moya leswi fikaka hi nkarhi endyangwini wa ripfumelo. (Matewu 24:45) Ndlela ya nkoka leyi swakudya sweswo swa moya swi phameriwaka ha yona i minhlangano ya vandlha swin’we ni minhlangano leyikulu—tinhlengeletano ni mintsombano. Hosi Yesu Kreste u kongomisa hlonga leri ro tshembeka leswaku ri lunghiselela rungula ra nkoka eminhlanganweni yo tano, eka hinkwavo lava lavaka ku pona makumu ya mafambiselo lawa yo homboloka kutani va kuma vutomi emisaveni leyintshwa ya Xikwembu yo lulama.
4. Hi wihi “ntolovelo” lowu nga ni khombo lowu boxiwaka eBibeleni, naswona i yini lexi nga ta hi pfuna ku wu papalata?
4 Hikwalaho, ku hava Mukreste loyi a nga tsakelaka ku va ni mukhuva lowu nga ni khombo lowu muapostola Pawulo a vulavuleke ha wona, loyi a tsaleke a ku: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Loko hi anakanyisisa hi lunghelo ni vuyelo bya ku va kona eminhlanganweni ya Vukreste swi ta hi pfuna leswaku hi seketela minhlangano yoleyo hi ku tshembeka, hi mbilu hinkwayo.
Minhlangano Leyi Akaka
5. (a) Ririmi ra hina ri fanele ri va ni vuyelo byihi eminhlanganweni? (b) Ha yini hi nga fanelanga hi hlwela ku rhamba lava tsakelaka leswaku va ta eminhlanganweni?
5 Tanihi leswi Vakreste va khongelelaka moya lowo kwetsima wa Yehovha leswaku wu tirha eminhlanganweni ya Vukreste, un’wana ni un’wana loyi a nga kona u fanele a tikarhatela ku endla hi ku pfumelelana ni moya wolowo naswona “[a] nga hlunamisi moya lowo kwetsima wa Xikwembu.” (Vaefesa 4:30) Loko muapostola Pawulo a tsala marito wolawo lama huhuteriweke, a a bula hi matirhiselo lamanene ya ririmi. Leswi hi swi vulaka nkarhi hinkwawo swi fanele swi tirhiseriwa leswi “akaka hi ku landza xilaveko xa kona, leswaku [swi] nghenisa leswi tsakisaka eka lava swi twaka.” (Vaefesa 4:29) Leswi i swa nkoka swinene eminhlanganweni ya Vukreste. Epapileni rakwe leri yaka eka Vakorinto, Pawulo u kandziyise xilaveko xa leswaku minhlangano yi va leyi akaka, leyi dyondzisaka ni leyi khutazaka. (1 Vakorinto 14:5, 12, 19, 26, 31) Hinkwavo lava nga kona va vuyeriwa eminhlanganweni yo tano, ku katsa ni lava sungulaka ku va kona, lava va nga ha vulaka va ku: “Xikwembu xi le xikarhi ka n’wina hakunene.” (1 Vakorinto 14:25) Hi xivangelo lexi, a hi fanelanga hi hlwela ku rhamba vanhu lava tsakelaka leswaku va hlanganyela na hina, hikuva loko va endla sweswo va ta endla nhluvuko hi ku hatlisa.
6. Hi tihi tinhla tin’wana leti nga pfunaka leswaku nhlangano wu aka?
6 Hinkwavo lava averiweke tinkulumo, mimbulavurisano kumbe minkombiso enhlanganweni wa Vukreste, va fanele va tiyiseka leswaku ririmi ra vona ra aka naswona ri pfumelelana ni Rito ra Xikwembu leri tsariweke, ku nga Bibele. Ku tlhandlekela eku vulavuleni ka ririmi leri kongomeke, hi fanele hi kombisa mintlhaveko ni ku titwa loku pfumelelanaka ni vumunhu bya rirhandzu bya Xikwembu na Kreste. Loko hinkwavo lava nga ni swiavelo enongonokweni wa nhlangano va tikarhatela ku kombisa ‘mihandzu ya moya wa Xikwembu,’ ku fana ni ntsako, ku lehisa mbilu ni ripfumelo, hinkwavo lava nga kona va ta akeka hakunene.—Vagalatiya 5:22, 23.
7. Hinkwavo lava nga kona va nga hoxa xandla hi ndlela yihi leswaku nhlangano wu aka?
7 Hambileswi va nga vaka vatsongo lava nga ni swiavelo swa nongonoko eminhlanganweni ya Vukreste, hinkwerhu hi nga hoxa xandla leswaku nhlangano wu aka. Hakanyingi wu va kona nkarhi wa leswaku vayingiseri va hlamula swivutiso. Leyi i minkarhi yo vula ripfumelo ra hina erivaleni. (Varhoma 10:9) A yi fanelanga yi tirhiseriwa ku kandziyisa mavonelo ya hina vini, ku tidzunisa hi leswi hi kotaka ku swi endla kumbe ku sola mupfumeri-kulorhi. Xana sweswo a swi nge wu hlunamisi moya wa Xikwembu? Loko ku ri ni timholovo exikarhi ka vapfumeri, ti nga lulamisiwa khwatsi exihundleni hi moya wa rirhandzu. Bibele yi ri: “Kombanani musa, mi tsetselelana swinene, mi rivalelana hi ku ntshunxeka tanihi leswi Xikwembu na xona xi mi rivaleleke hi ku ntshunxeka hi Kreste.” (Vaefesa 4:32) Mawaku nkarhi lowunene lowu minhlangano ya Vukreste yi hi nyikaka wona wo tirhisa ndzayo leyi leyinene! Hikwalaho, vo tala va hatla va fika eminhlanganweni va tlhela va tshamanyana loko yi herile. Leswi swi tlhela swi pfuna ni lava tsakelaka, lava nga ni xilaveko lexi hlawulekeke leswaku va titwa va amukelekile. Xisweswo, Vakreste hinkwavo lava tinyiketeleke va ni xiphemu lexi va faneleke va xi hetisisa xo endla leswaku minhlangano yi aka hi ‘ku khathalelana leswaku va khutazana erirhandzwini ni le mintirhweni leyinene.’
Lunghiselela Kahle
8. (a) Van’wana va tikarhata hi ndlela yihi leswaku va kota ku ya eminhlanganweni? (b) Yehovha u veka xikombiso xihi tanihi murisi?
8 Hambileswi van’wana swi va olovelaka hi ndlela yo karhi ku va kona eminhlanganweni ya Vukreste, van’wana va tikarhata nkarhi hinkwawo. Hi xikombiso, manana un’wana la nga Mukreste loyi a tirhaka ntirho wo tihanyisa leswaku a khathalela swilaveko swa ndyangu wa yena, hakanyingi u vuya entirhweni a karhele. Minkarhi yin’wana u boheka ku sweka swakudya naswona a pfuna vana vakwe leswaku va lunghekela ku ya enhlanganweni. Vakreste van’wana va famba mpfhuka wo leha loko va ya eminhlanganweni, kumbe va karhatiwa hi ku lamala kumbe vudyuhari. Entiyisweni, Yehovha Xikwembu wa xi twisisa xiyimo xa un’wana ni un’wana loyi a yaka enhlanganweni hi ku tshembeka, hilaha murisi wa rirhandzu a swi twisisaka hakona swilaveko leswikulu swa nyimpfu yin’wana ni yin’wana ya ntlhambi wakwe. Bibele yi ri: “Tani hi murisi, [Yehova] o ta risa ntlhambi wa yena; o ta rola ŝinyimpfana hi mav̌oko, o ta ŝi v̌ukara e rumbini ra yena, o ta fambisa khwaṭi le’ti aṅwisaka.”—Esaya 40:11.
9, 10. Xana hi vuyeriwa swinene hi ndlela yihi eminhlanganweni?
9 Lava va bohekaka ku tikarhata swinene leswaku va va kona eminhlanganweni nkarhi na nkarhi swi nga ha endleka va nga swi koti kahle ku lunghiselela leswi swi nga ta dyondziwa. Ku fambisana ni xiyimiso xa vhiki na vhiki xa ku hlaya ka Bibele swi endla leswaku swi vuyerisa swinene ku va kona eXikolweni xa Vutirheli bya le Tilweni. Hilaha ku fanaka, ku lunghiselela minhlangano yin’wana ka ha ri ni nkarhi, ku fana ni Dyondzo ya Xihondzo xo Rindza ni Dyondzo ya Buku ya Vandlha, swi yi endla yi vuyerisa swinene. Hi ku hlaya xihloko lexi nga ta dyondziwa ka ha ri emahlweni ni ku kamba tindzimana tin’wana eBibeleni, lava swiyimo swa ndyangu swi va dyelaka nkarhi va nga swi lunghekela ku antswa ku hlanganyela hi xitalo eka mabulo lawa ya nkoka ya Bibele.
10 Van’wana, lava swiyimo swa vona swi nga dyiki nkarhi ngopfu, va nga heta nkarhi lowu engetelekeke va lunghiselela nhlangano. Hi xikombiso, va nga kamba matsalwa lama tsariweke kambe ma nga tshahiwanga. Xisweswo hinkwavo va nga lunghekela ku vuyeriwa swinene eminhlanganweni ni ku hoxa xandla eku akeni ka vandlha hi tinkulumo ta vona ni tinhlamulo ta vona. Loko va lunghiselele kahle, vakulu ni malandza ya vutirheli va ta veka xikombiso lexinene hi ku nyika tinhlamulo to koma, leti baka nhloko ya mhaka. Hi ku xixima malunghiselelo ya Yehovha, lava va nga kona va fanele va papalata ku endla swilo leswi kavanyetaka loko minhlangano yi ya emahlweni.—1 Petro 5:3.
11. Ha yini ku laveka ku tiyimisela leswaku hi lunghiselela minhlangano?
11 Mintirho ni vuhungasi lebyi nga riki bya nkoka erihanyweni ra hina ra moya swi nga hi dyela nkarhi wo tala. Loko swi ri tano, hi fanele hi tikambela kutani ‘hi tshika ku va lava nga anakanyeliki’ eku tirhiseni ka nkarhi wa hina. (Vaefesa 5:17) Xikongomelo xa hina xi fanele xi va ku ‘tixavela nkarhi’ eka swilo leswi nga riki swa nkoka ngopfu leswaku hi tirhisa nkarhi lowu engetelekeke edyondzweni ya munhu hi xiyexe ya Bibele ni ku lunghiselela minhlangano, ni ku wu tirhisa entirhweni wa Mfumo. (Vaefesa 5:16) Kunene, leswi a swi olovi minkarhi yin’wana naswona swi lava ku tiyimisela. Vantshwa lava nyikelaka nyingiso eka leswi va veka masungulo lamanene ya nhluvuko wa nkarhi lowu taka. Pawulo u tsalele munghana wakwe lontsongo Timotiya, a ku: “Anakanyisisa hi swilo leswi [ndzayo ya Pawulo eka Timotiya]; u dzika eka swona, leswaku ku ya emahlweni ka wena ku vonaka eka vanhu hinkwavo.”—1 Timotiya 4:15.
Swikombiso Leswi Humaka eRitweni Ra Xikwembu
12. Hi xihi xikombiso lexinene lexi vekiweke hi ndyangu wa ka va Samuwele?
12 Anakanya hi xikombiso lexinene lexi vekiweke hi ndyangu wa ka va Samuwele, lowu nkarhi na nkarhi a wu hlanganyela eka malunghiselelo yo hlangana ni vagandzeri-kulobye loko tabernakela ya Xikwembu ya ha ri eXilo. Va xinuna hi vona lava a va boheka ku ya eku tlangeriweni ka minkhuvo lembe na lembe. Kambe, Elkana tata wa Samuwele u fambe ni ndyangu wakwe hinkwawo, tanihi leswi “lembe riṅwana ni riṅwana munhu loyi a a suka mutini wa yena, a tlhandluka ku ya nkhinsama e mahlweni ka Yehovha wa mav̌andla, ni ku ṅwi humesela mihlengo e Šilo.” (1 Samuwele 1:3-5) Ndhawu ya ka va Samuwele, eRamatayimi-Sofimi, swi nga ha endleka leswaku a yi ri kusuhi ni ribuwa ra le Rentis ya manguva lawa ehansi “e nṭhav̌eni ya Efraim.” (1 Samuwele 1:1) Hikwalaho riendzo ro ya eXilo a ri ri mpfhuka wa tikhilomitara ta 30, ku nga riendzo leri a ri vanga matshimbi emasikwini wolawo. Ndyangu wa Elkana a wu endla sweswo hi ku tshembeka “malembe hikwawo. Mikari hikwayo [a va] tlhandlukela e ndlwini ya Yehova.”—1 Samuwele 1:7.
13. Hi xihi xikombiso lexi vekiweke hi Vayuda vo tshembeka enkarhini wa Yesu emisaveni?
13 Yesu na yena u kulele endyangwini lowukulu. Lembe na lembe ndyangu lowu a wu famba mpfhuka wa tikhilomitara ta 100 ku suka eNazareta etlhelo ra le dzongeni wu ya enkhubyeni wa Paseka eYerusalema. Swi nga ha endleka va tirhise tindlela timbirhi. Ndlela leyi kongomeke swinene a yi ri ni ndhawu leyi ehlelaka eNkoveni wa Megido ni ndhawu yo khupuka ya kwalomu ka timitara ta 600 ku tsemakanya ndhawu ya Samariya, ku ya fika eYerusalema. Ndlela yin’wana leyi tolovelekeke hi leyi tekiweke hi Yesu eriendzweni rakwe ro hetelela ro ya eYerusalema hi 33 C.E. A a famba hi le Nkoveni wa Yordani laha ku nga ehansi ka vuandlalo bya lwandle a kondza a ya fika “emaaveni ya Yudiya entsungeni wa Yordani.” (Marka 10:1) Ku suka laha, “gondzo [ro] kongoma eYerusalema” i mpfhuka wa tikhilomitara ta 30, ku katsa ni ndhawu leyi ehlelaka ya timitara to tlula 1100. (Marka 10:32) Nkarhi na nkarhi, mintshungu ya lava va tlangelaka nkhuvo hi ku tshembeka a yi teka riendzo ro tika ku suka eGaleliya ku ya eYerusalema. (Luka 2:44) Mawaku xikombiso lexinene eka malandza ya Yehovha lama tshamaka ematikweni lama hluvukeke swinene namuntlha, van’wana va vona va nga swi kota ku ya eminhlanganweni ya Vukreste hi ku olovanyana, hikwalaho ka swilo swo famba swa manguva lawa!
14, 15. (a) Ana u veke xikombiso xihi lexinene? (b) Hi nga dyondza yini eka langutelo lerinene leri kombisiwaka hi van’wana lavantshwa lava vaka kona eminhlanganweni?
14 Xikombiso xin’wana i xa noni ya malembe ya 84 hi vukhale, Ana. Bibele yi vula leswaku “a a nga kali etempeleni.” (Luka 2:37) Ku tlula kwalaho, Ana a a tsakela vanhu van’wana. Loko a vona Yesu lowa xihlangi naswona a twa leswaku i Mesiya la tshembisiweke, xana u endle yini? U nkhense Xikwembu, ivi a sungula “ku vulavula hi n’wana eka hinkwavo lava rindzeleke ku kutsuriwa ka Yerusalema.” (Luka 2:38) Mawaku langutelo lerinene swonghasi, leri nga xikombiso eka Vakreste namuntlha!
15 Ina, ku va kona ni ku hlanganyela eminhlanganweni ya hina ku fanele ku tsakisa lerova, ku fana na Ana, na hina hi nga tshuki hi xwa. Vo tala lavantshwa na vona va ta titwa hi ndlela leyi. Leswi va humeke emunyameni va nghena eku vonakaleni loku hlamarisaka ka Xikwembu, va fanele va dyondza hinkwaswo leswi va nga swi kotaka, naswona vo tala va yi hisekela swinene minhlangano ya Vukreste. Hi hala tlhelo, lava nga ni nkarhi wo leha va ri entiyisweni va fanele va tivonela leswaku va nga ‘lahli rirhandzu leri a va ri na rona eku sunguleni.’ (Nhlavutelo 2:4) Vuvabyi lebyikulu kumbe swiyimo swin’wana leswi tlulaka matimba ya munhu swi nga ha tshuka swi kavanyeta ku va kona eminhlanganweni. Kambe hi nga tshuki hi pfumelela ku rhandza swilo leswi vonakaka, vuhungasi kumbe ku pfumala ku tsakela ku hi endla hi va vanhu lava nga lunghiseleliki, lava tshamaka hi mavoko kumbe lava pfaka va xwa eminhlanganweni.—Luka 8:14.
Xikombiso Lexinene Ngopfu
16, 17. (a) Yesu a a ri ni langutelo rihi hi minhlangano ya moya? (b) Hi wihi mukhuva lowunene lowu Vakreste hinkwavo va faneleke va ringeta ku wu landzela?
16 Yesu u veke xikombiso lexinene ngopfu hi ku tlangela minhlangano ya moya. Loko a ha ri ntsongo a ri ni malembe ya 12, u kombise ku rhandza ka yena yindlu ya Xikwemu eYerusalema. Vatswari vakwe a va nga ku tivi lomu va nga ta n’wi kuma kona kambe eku heteleleni va n’wi kume a ri karhi a bula ni vadyondzisi va le tempeleni hi Rito ra Xikwembu. Loko vatswari vakwe va kombisa ku karhateka, hi xichavo Yesu u vutisile: “Xana a mi nga swi tivi leswaku ndzi fanele ku va endlwini ya Tatana?” (Luka 2:49) Hi ku titsongahata, Yesu loyi a ha ri ntsongo u tlhelele eNazareta ni vatswari vakwe. U ye emahlweni a kombisa ku rhandza minhlangano ya vugandzeri hi ku va kona nkarhi hinkwawo esinagogeni. Xisweswo, loko a sungula vutirheli byakwe, Bibele ya vika: “A ta eNazareta, laha a nga kulela kona; kutani, hi ku ya hi ntolovelo wakwe hi siku ra savata, a nghena esinagogeni, ivi a suka a yima leswaku a hlaya.” Endzhaku ka loko Yesu a hlayile a tlhela a hlamusela Esaya 61:1, 2, vayingiseri va sungula “ku hlamarisiwa hi marito lamanene lama humaka enon’wini wakwe.”—Luka 4:16, 22.
17 Minhlangano ya Vukreste namuntlha yi landzela ntila lowu fanaka wa xisekelo. Endzhaku ka loko nhlangano wu pfuriwile hi risimu ro dzunisa ni xikhongelo, ku hlayiwa tindzimana ta le Bibeleni (kumbe tindzimana leti tshahiwaka etibukwini leti dyondziwaka ta Bibele) kutani ti hlamuseriwa. Vakreste va ntiyiso va fanele va tekelela mukhuva lowunene wa Yesu Kreste. Loko swiyimo swa vona swi va pfumelela, va tsakela ku va kona nkarhi hinkwawo eminhlanganweni ya Vukreste.
Swikombiso Swa Manguva Lawa
18, 19. Hi swihi swikombiso leswinene leswi vamakwerhu va le matikweni lama nga hluvukangiki ngopfu va swi vekeke malunghana ni minhlangano, tinhlengeletano ni mintsombano?
18 Etindhawini ta misava leti nga hluvukangiki ngopfu, vamakwerhu vo tala va xinuna ni va xisati va veka xikombiso lexinene xa ku tlangela minhlangano ya Vukreste. EMozambhiki, mulanguteri wa muganga, Orlando swin’we ni nsati wakwe, Amélia, va tshame va famba tiawara ta 45 hi milenge, mpfhuka wa kwalomu ka tikhilomitara ta 90 entshaveni leyi tlakukeke va ya fambisa nhlengeletano. Kutani va boheka ku famba mpfhuka lowu fanaka loko va tlhela va ya fambisa nhlengeletano yin’wana. Orlando u vike khwatsi a ku: “Hina a hi vona onge a hi endlanga nchumu loko hi hlangana ni vamakwerhu lava humaka eVandlheni ra Bawa. Leswaku va ya enhlengeletanweni ivi va tlhelela emakaya ya vona a swi endla riendzo ra masiku ya tsevu ra tikhilomitara ta kwalomu ka 400 hi milenge, un’wana wa vona a ku ri makwerhu la nga ni malembe ya 60 hi vukhale!”
19 Ku vuriwa yini hi ku tlangela minhlangano ya vandlha ya vhiki na vhiki? Kashwashwa Njamba i makwerhu wa xisati la tsaneke emirini la nga ni malembe ya kwalomu ka 70. U tshama eKaisososi, ximutana lexi nga eka mpfhuka wo ringana tikhilomitara ta ntlhanu ku suka eHolweni ya Mfumo ya le Rundu, eNamibia. Loko a ya eminhlanganweni, u famba mpfhuka wa tikhilomitara ta khume ku ya ni ku vuya, a famba ekhwatini. Van’wana va hlaseriwile endleleni leyi, kambe Kashwashwa u hambeta a ta. Minhlangano yo tala yi fambisiwa hi tindzimi leti a nga ti twisisiki. Xana u vuyeriwa njhani hi ku va kona ka yena? Kashwashwa u ri: “Hi ku landzelela matsalwa, ndzi ringeta ku kumisisa leswi nkulumo yi vulavulaka ha swona.” Kambe a nga dyondzanga, kutani u swi kotisa ku yini ku landzelela matsalwa? U hlamula a ku: “Ndzi yingisa matsalwa lawa ndzi ma tivaka hi mbilu.” Naswona emalembeni lama hundzeke, u nghenise matsalwa yo tala emianakanyweni yakwe. Leswaku a antswisa vuswikoti byakwe byo tirhisa Bibele, u le ka ntlawa lowu dyondzaka ku hlaya lowu hleriweke hi vandlha. U ri: “Ndza swi rhandza ku ya eminhlanganweni. Nkarhi hinkwawo ku ni swilo leswintshwa leswi dyondziwaka. Ndzi rhandza ku va swin’we ni vamakwerhu va xinuna ni va xisati. Hambileswi van’wana ndzi nga swi kotiki ku vulavula na vona, nkarhi hinkwawo va ta, va ta ndzi pfuxela. Naswona xa nkoka swinene, ndza swi tiva leswaku loko ndzi ya eminhlanganweni, ndzi tsakisa mbilu ya Yehovha.”
20. Ha yini hi nga fanelanga hi fularhela minhlangano ya hina ya Vukreste?
20 Ku fana na Kashwashwa, timiliyoni ta vagandzeri va Yehovha emisaveni hinkwayo ti tlangela minhlangano ya Vukreste hi ndlela leyi nkhensekaka. Tanihi leswi misava ya Sathana yi tshinelaka eku lovisiweni, a hi fanelanga hi tshika ku hlengeletana swin’we. Ematshan’weni ya sweswo, a hi tshameni hi xalamukile emoyeni naswona hi tlangela minhlangano, tinhlengeletano ni mintsombano hi vuenti. Sweswo a swi nge tsakisi mbilu ya Yehovha ntsena kambe swi ta tlhela swi hi vuyerisa swinene loko hi ri karhi hi amukela dyondzo ya vukwembu leyi yisaka evuton’wini lebyi nga heriki.—Swivuriso 27:11; Esaya 48:17, 18; Marka 13:35-37.
Swivutiso Swa Mpfuxeto
◻ Ha yini ku ri lunghelo ku ya eminhlanganweni ya Vukreste?
◻ Hinkwavo lava nga kona va nga hoxa xandla hi ndlela yihi leswaku nhlangano wu aka?
◻ Yesu Kreste u veke xikombiso xihi lexinene?
◻ I yini leswi nga dyondziwaka eka vamakwerhu va le matikweni lama nga hluvukangiki ngopfu?
[Bokisi leri nga eka tluka 17]
Va Yi Tlangela Minhlangano Ya Vhiki Na Vhiki
Timiliyoni ta vanhu ti tshama emadorobeni lama nga ni vusweti ni vugevenga. Ku nga khathariseki swiyimo swo tano, Vakreste va ntiyiso va tlangela minhlangano ya Vukreste hi ndlela leyi nkhensekaka. Nkulu un’wana evandlheni ra le Gauteng, eSoweto, Afrika Dzonga, wa vika: “Evandlheni leri nga ni Timbhoni ta 60 ni vahuweleri lava nga khuvuriwangiki, ku ni vanhu lava taka eminhlanganweni lava endlaka 70 ku ya eka 80 kumbe ku tlula. Hambileswi vamakwerhu va xinuna ni va xisati va nga fambiki mpfhuka wo leha, xiyimo xa laha Soweto a xi tsakisi. Makwerhu un’wana u tlhaviwe enhlaneni loko a ri karhi a ya enhlanganweni. Vamakwerhu va xisati vambirhi va khomiwile va lava ku tekeriwa leswi a va ri na swona. Kambe sweswo a swi va tshikisi ku ta. Hi Tisonto, hi titoloveta tinsimu endzhaku ko pfala minhlangano hi xikhongelo. Vanhu va kwalomu ka tiphesente ta 95 va tshama, va yimbelela tinsimu hinkwato leti nga ta tirhisiwa eminhlanganweni ya vhiki leri tlhandlamaka. Leswi swi pfuna lava tsakelaka leswaku va dyondza tinsimu, va yimbelela na hina.”
Lava tshamaka etindhawini ta le makaya va langutana ni swihinga swin’wana, tanihi mpfhuka wo leha lowu va bohekaka ku wu famba loko va ya eminhlanganweni kanharhu hi vhiki. Mpatswa wun’wana lowu tsakelaka wu tshama eka mpfhuka wa tikhilomitara ta 15 ku suka eHolweni ya Mfumo ya le Lobatse, eBotswana. Elembeni leri hundzeke, a va tshama va ri kona eminhlanganweni swin’we ni vana va vona vambirhi. Nuna u lunghisa tintanghu leswaku a wundla ndyangu wakwe. Nsati, yena u xavisa swo xavisa leswaku a engetela eka mali ya ndyangu leswaku va kota ku hakelela swo famba ha swona eminhlanganweni.
Ku nga ri khale eka madyambu man’wana ya ximumu, endzhaku ka nhlangano enkarhini lowu a ku ri ni mulanguteri wa xifundzha, ndyangu lowu a wu yime exitichini xa bazi hi nkarhi wa 9:00 ni vusiku wu nga ri na xo famba. Tibazi a ti hatle ti chayisa hikwalaho ka maxelo yo biha. Phorisa rin’wana ri yime hi vhene ya rona, ri vutisa leswaku va endla yini. Loko ri twa xiyimo lexi a va langutane na xona, ri va twele vusiwana kutani ri va yisa ekaya mpfhuka wolowo wa tikhilomitara ta 15. Nsati, loyi a nga muhuweleri la nga khuvuriwangiki, u byele nuna wakwe a ku: “Waswivo, loko hi rhangisa minhlangano, nkarhi hinkwawo Yehovha wa hi pfuna.” Sweswi nuna u vule leswaku na yena u tsakela ku va muchumayeri wa mahungu lamanene.
[Xifaniso lexi nga eka tluka 18]
Timbhoni to fana ni leti ti veka xikombiso lexinene xa ku tlangela minhlangano ya Vukreste eRomania