Xiviko Xa Vahuweleri Va Mfumo

‘Vanhu Va Wena Va Ta Tinyikela Hi Ku Swi Rhandza’

NDHUNA ya vuthu ra matimba ya le Siriya leyi vuriwaka Namani u na nhlokonho. Loko vuvabyi lebyi lebyi nyenyetsaka byi nga tshunguriwi, byi nga tsemelela swirho ni ku vanga rifu. Xana Namani u ta endla yini? Exikarhi ka vandyangu wa Namani ku na xinhwanyetana, ‘lexi nga hlonga xi huma etikweni ra Israyele.’ Xi vulavula hi xivindzi naswona xi hlamusela leswaku muprofeta Elixa a nga hanyisa Namani.—2 Tihosi 5:1-3.

Hikwalaho ka ku yima ka yena hi xivindzi, Namani u lava Elixa naswona wa hanyisiwa. Ku tlula kwalaho, Namani u va mugandzeri wa Yehovha! Ntokoto lowu lowu tsariweke eBibeleni, wu humelele hi lembe-xidzana ra vukhume B.C.E. (2 Tihosi 5:4-15) Namuntlha, vantshwa vo tala va kombisa xivindzi lexi fanaka loko va vulavula hi swilaveko swa Mfumo. Ntokoto lowu landzelaka wa le Mozambhiki wu tiyisekisa leswi.

Nuno wa malembe ya tsevu hi vukhale i muhuweleri wa mahungu lamanene la nga khuvuriwangiki. Hambiloko a nga si va muhuweleri la nga khuvuriwangiki, Nuno a hlengeleta vana va vaakelani va vona, a khongela, ivi a va dyondzisa Bibele, a tirhisa buku leyi nge Buku Yanga Ya Timhaka Ta Bibele.

Minkarhi yo tala Nuno u pfuka hi Mugqivela nimixo ivi a tsundzuxa ndyangu wa ka vona a ku: “Namuntlha ha ya evutirhelini bya nsimu.” Ku hisekela ka yena vutirheli ku kombisiwa hi tindlela tin’wana. Loko a ri karhi a famba ni vatswari va yena evutirhelini bya le xitaratini eMaputo, hakanyingi Nuno u tshinelela vanhu hi yexe. Eka nkarhi wun’wana, n’wamabindzu u te eka yena ivi a vutisa a ku: “Ha yini u xavisa timagazini leti?” Nuno u te: “A ndzi xavisi timagazini, kambe ndzi amukela munyikelo wo pfuneta ku hakelela ntirho wo chumayela.” N’wamabindzu u te: “Hambileswi ndzi nga tsakeriki, ndzi tsakisiwa hi langutelo ra wena ni vuswikoti bya wena. Ndzi tsakela ku nyikela entirhweni lowu.”

Eka khamba rin’wana, Nuno u ye eka wanuna un’wana exitarateni ivi a n’wi nyika buku leyi nge Ku Rhula Ka Ntiyiso Ni Nsirhelelo—U Nga Swi Kuma Njhani? Wanuna loyi u vutisile a ku: “Xana a wu ngheni kona eka xikolo lexiya?” Nuno u hlamurile a ku: “Ina, ndzi nghena kona exikolweni lexiya, kambe namuntlha ndzi fambisa rungula ra nkoka leri humaka ebukwini leyi. Yi ku kombisa leswaku u nga hanya emisaveni leyintshwa leyi Xikwembu xi nga ta yi tisa, hilaha swi kombisiweke hakona exifanisweni lexi ebukwini leyi.” Nuno a a nga swi xiyi leswaku wanuna loyi a vulavula na yena a a ri mudyondzisi exikolweni xa yena. Mudyondzisi loyi a nga amukelanga buku ntsena kambe sweswi u kuma ni timagazini ta Xihondzo xo Rindza na Xalamuka! nkarhi na nkarhi ti huma eka Nuno.

Loko Nuno a vutisiwa leswaku ha yini a tsakela ku hlanganyela entirhweni wo chumayela, u ri: “Ndzi lava ku vulavula na vanhu ni ku va dyondzisa hi Yehovha ni N’wana wa yena, Yesu Kreste.” Wa engetela a ku: “Naswona loko vanhu va nga swi lavi ku yingisela, a ku na xivangelo xo hlundzuka.”

Emisaveni hinkwayo, magidi ya vantshwa lava fanaka na Nuno ma ‘tinyikela hi ku swi rhandza’ leswaku ma dyondzisa ni ku chumayela hi Mfumo wa Xikwembu. (Pisalema 110:3) Kambe leswi a swo humelela hi xiwelo. Vatswari lava dyondzisaka vana va vona hi Yehovha ku sukela evuhlangini, va veka xikombiso lexinene evutirhelini, naswona hi ku hiseka va landzelela swilaveko swa Mfumo va ta hakeriwa hi ndlela leyi fuweke.