Ku Fikelela Timbilu Hi Vuswikoti Bya Ku Khongotela

VANHU vo tala va sola rito “nkhongotelo.” Emianakanyweni ya munhu ri nga ha ringanyeta muxavisi la sindzisaka kumbe xinavetisi lexi endleriweke ku kanganyisa kumbe ku kucetela muxavi. Hambi ku ri eBibeleni, mianakanyo ya ku khongotela minkarhi yin’wana yi ni xivumbeko lexi nga tsakisiki, yi vula lexi tsongahataka kumbe ku lahlekisa. Hi xikombiso, muapostola wa Mukreste Pawulo u tsalele Vagalatiya a ku: “A mi tsutsuma kahle. I mani loyi a mi siveleke ku hambeta mi yingisa ntiyiso? Nkhongotelo wa muxaka lowu a wu humi eka yena Loyi a mi vitanaka.” (Vagalatiya 5:7, 8) Pawulo u tlhele a tsundzuxa Vakolosa malunghana ni ku pfumelela munhu wihi na wihi ‘a va hambukisa hi timhaka to wonga.’ (Vakolosa 2:4) Nkhongotelo wo tano wu titshege hi timhaka ta vutlhari leti akiweke emasungulweni ya vunwa.

Hambiswiritano, epapileni ra yena ra vumbirhi leri yaka eka Timotiya, muapostola Pawulo u tirhise mianakanyo ya nkhongotelo hi ndlela leyi hambaneke. U tsarile: “Tshama eka swilo leswi u swi dyondzeke, leswi u susumetelekeke ku swi pfumela, u tiva vanhu lava u swi dyondzeke eka vona.” (2 Timotiya 3:14) Hi ku ‘susumeteleka ku pfumela,’ Timotiya a nga sindzisiwi hi mana wa yena ni kokwa wa yena wa xisati, lava a dyondzeke mintiyiso ya Matsalwa eka vona.—2 Timotiya 1:5.a

Loko a ha yirisiwe ku huma endlwini ya vabohiwa eRhoma, Pawulo u nyikele vumbhoni bya rixaladza eka vo tala, a “tirhisa timhaka leti khorwisaka malunghana na Yesu hi ku landza nawu wa Muxe ni Vaprofeta, ku sukela nimixo ku fikela nimadyambu.” (Mintirho 28:23) Xana Pawulo a xisa vayingiseri va yena? Nikatsongo! Kutani, swi le rivaleni leswaku nkhongotelo a hi minkarhi hinkwayo wu hoxeke.

Loko ri tirhisiwe hi ndlela leyinene, rimitsu ra rito ra Xigriki leri hundzuluxeriweke va ku “ku khongotela” ri vula ku khorwisa, ku hundzula mianakanyo hi ku tirhisa miehleketo leyi twalaka, leyi twisisekaka. Xisweswo mudyondzisi a nga aka masungulo ya Matsalwa, a tirhisa nkhongotelo ku khorwisa van’wana hi ntiyiso wa Bibele. (2 Timotiya 2:15) Hakunene, lowu a ku ri mfungho wa vutirheli bya Pawulo. Hambi ku ri Demetriyo mufuri wa silivhere, loyi a languta tidyondzo ta Vukreste tanihi ta mavunwa, u te: “Pawulo [u hambukisa] ntshungu lowukulu . . . kutani a wu hambukisela eka mavonelo man’wana, a vula leswaku leswi endliweke hi mavoko a hi swikwembu, ku nga ri aEfesa ntsena kambe ni le xiphen’wini lexikulu xa muganga wa Asiya.”—Mintirho 19:26.

Ku Tirhisa Nkhongotelo eVutirhelini

Yesu Kreste u lerise valandzeri va yena a ku: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo leswi ndzi mi leriseke swona. Kutani, maswivo, ndzi na n’wina masiku hinkwawo ku fikela emakumu ka mafambiselo ya swilo.” (Matewu 28:19, 20) Ematikweni lama tlulaka 230, Timbhoni ta Yehovha ti yingisa xileriso lexi. N’hweti na n’hweti hi lembe ra vona ra ntirho ra 1997, va fambise xiringaniso xa tidyondzo ta le kaya ta Bibele ta 4552 589 emisaveni hinkwayo.

Loko u ri ni lunghelo ro fambisa dyondzo ya le kaya ya Bibele, u nga ha swi kota ku langutela mintlhontlho leyi nga ta lava ku tirhisa vuswikoti bya ku khongotela. Hi xikombiso, a hi nge eka xiyenge xa n’wina lexi landzelaka xa dyondzo, ku nga ha tlakuka xivutiso malunghana ni Vunharhu-un’we. Ku vuriwa yini hi loko u swi tiva leswaku xichudeni xa wena xi pfumela eka dyondzo leyi? U nga ha xi nyika buku leyi vulavulaka hi mhaka leyi. Endzhaku ka loko xi yi hlayile, u nga ha kuma leswaku xi khorwisekile leswaku Xikwembu na Yesu a hi munhu un’we. Kambe loko swivutiso swo karhi swa ha sele, xana u ta ya njhani emahlweni?

Yingisa hi vukheta. Leswi swi ta ku pfuna ku kumisisa leswi xichudeni xa wena ana se xi swi pfumelaka malunghana ni dyondzo leyi nyikeriweke. Hi xikombiso, loko xichudeni xa wena xi ku, “Ndzi pfumela eka Vunharhu-un’we,” hi ku hatlisa u nga ha ringeta bulo ra Matsalwa leswaku u kaneta dyondzo leyi. Kambe ku ni tidyondzo to hambana-hambana malunghana ni Vunharhu-un’we. Xichudeni xa wena xi nga ha va xi pfumela eka swin’wana leswi hambaneke ngopfu eka leswi wena u nga swi hlamuselaka tanihi dyondzo ya Vunharhu-un’we. Ku nga ha vuriwa leswi fanaka hi tidyondzo tin’wana, to tanihi ntswariwo-nyingi, ku nga fi ka moya-xiviri ni ku ponisiwa. Kutani yingisa hi vukheta u nga si vulavula. U nga endli swiringanyeto malunghana ni leswi xichudeni xi swi pfumelaka.—Swivuriso 18:13.

Vutisa swivutiso. Leswi swi nga ha katsa leswi nge: ‘Xana minkarhi hinkwayo a wu pfumela eka Vunharhu-un’we? Xana u tshame u endla ndzavisiso wa rixaladza malunghana ni leswi Bibele yi swi vulaka hi mhaka leyi? Loko Xikwembu a xi ri xiphemu xa vunharhu-un’we, xana Rito ra xona, ku nga Bibele, a ri nga ta hi byela hi ku kongoma leswaku xi tano?’ Loko u dyondzisa xichudeni, nkarhi na nkarhi yima u vutisa swivutiso swo tanihi leswi nge: ‘Xana leswi hi swi kambisiseke ku ta fikela sweswi swa twala eka wena?’ ‘Xana u pfumelelana na yona nhlamuselo leyi?’ Hi ku tirhisa ka wena swivutiso hi vutshila, u katsa xichudeni efambiselweni ro dyondza. A xi fanelanga xi ku yingisa ntsena loko u ri karhi u hlamusela mhaka yo karhi.

Tirhisa miehleketo leyi twalaka. Hi xikombiso, loko mi bula hi dyondzo ya Vunharhu-un’we, u nga ha vula leswi eka xichudeni xa wena: ‘Loko Yesu a khuvuriwa, ku twakale rito ri huma etilweni, ri ku: “U N’wana wa mina, la rhandzekaka.” Loko Xikwembu a xi ri emisaveni xi khuvuriwa, xana a xi ta rhumela rito ra xona etilweni ivi ri vuyela endzhaku leswaku marito wolawo ma ta twiwa emisaveni? Xana sweswo a swi nga ta va vuxisi? Xana Xikwembu, “lexi xi nga hembiki,” xi nga endla nchumu wo tano wa vuxisi?’—Luka 3:21, 22; Tito 1:1, 2.

Miehleketo leyi twalaka leyi andlariwaka hi ndlela ya vuxiya-xiya hakanyingi ya tirha swinene. Xiya xikombiso xa wansati loyi hi nga ta n’wi vitana Barbara. Vutomi bya yena hinkwabyo, a a pfumela leswaku Yesu a ri Xikwembu naswona a ri xiphemu xa vunharhu-un’we lexi a xi katsa moya lowo kwetsima. Kutani ke un’wana wa Timbhoni ta Yehovha a n’wi byela leswaku Xikwembu na Yesu i vanhu vambirhi lava hambaneke, ivi a n’wi komba matsalwa ku seketela mhaka ya yena.b Barbara a nga ta yi kaneta Bibele. Hi nkarhi lowu fanaka, u hetiwe matimba. Phela, dyondzo ya Vunharhu-un’we a a yi rhandza swinene.

Mbhoni leyi yi hlamulane na Barbara hi ku lehisa mbilu. Yi vutisile: “Loko a wu ringeta ku ndzi dyondzisa leswaku vanhu vambirhi va ringana, xana a wu ta tirhisa vuxaka byihi bya ndyangu leswaku u endla xifaniso?” U anakanyile swa xinkarhana ivi a hlamula a ku: “Ndzi nga ha tirhisa vamakwavo vambirhi va xinuna.” Mbhoni yi hlamurile yi ku: “U be nhloko ya mhaka. Kumbexana hambi ku ri mahahla lama fanaka. Kambe loko a hi dyondzisa ku languta Xikwembu tanihi Tatana naswona yena tanihi N’wana, xana Yesu a hundzisa rungula rihi?” “Ndza swi vona,” ku hlamula Barbara, hi ku hlamala. “U hlamusela un’wana tanihi lonkulu naswona a ri ni vulawuri lebyikulu.”

Mbhoni yi hlamurile yi ku: “Ina, ni vayingiseri va Yesu lava a va ri Vayuda, lava a va tshama etikweni ra vapatriyarka, ngopfu-ngopfu va ta va va fikelele makumu wolawo.” Leswaku yi kandziyisa yinhla ya yona, Mbhoni yi gimete hi ku: “Loko hi kote ku tirhisa xifaniso lexi fanelaka swinene leswaku hi dyondzisa hi ta ku ringana—xa vamakwavo kumbe mahahla lama fanaka—entiyisweni, Yesu, Mudyondzisi Lonkulu, na yena a ta va a endle tano. Ematshan’weni ya sweswo, u tirhise marito ‘tatana’ na ‘n’wana’ leswaku a hlamusela vuxaka exikarhi ka yena na Xikwembu.”

Eku heteleleni Barbara u yi twisisile yinhla, ivi a yi amukela. Mbilu ya yena yi fikeleriwe hi vuswikoti bya nkhongotelo.

Ku Langutana Ni Mintlhaveko

Tidyondzo ta vukhongeri leti dzikeke hakanyingi ti katsa xiyimo xa mintlhaveko. Xiya mhaka ya Edna, Mukhatoliki la tinyiketeleke. Vatukulu va yena va vafana va le malembeni ya kondlo-a-ndzi-dyi va n’wi nyike vumbhoni lebyi nga erivaleni bya Matsalwa bya leswaku Xikwembu na Yesu a hi vanhu van’we. Edna u swi twisisile leswi a swi tweke. Hambiswiritano, hi ku titsongahata kambe hi ku tiyisa u te: “Mina ndzi pfumela eka Vunharhu-un’we lebyi kwetsimaka.”

Kumbexana u ve ni ntokoto lowu fanaka. Vo tala va languta tidyondzo ta vukhongeri bya vona onge i xiphemu xa vumunhu bya vona. Leswaku ku khorwisiwa swichudeni swoleswo swa Bibele, ku laveka swo tala ku tlula ku anakanya loku nga twaliki kumbe hambi ku ri ntlhandlamano wa matsalwa lama kombisaka langutelo ra munhu loyi tanihi leri hoxeke. Swiyimo swo tano swi nga tlhantlhiwa hi ku ringanisela vuswikoti bya ku khorwisa ni ntwela-vusiwana. (Ringanisa Varhoma 12:15; Vakolosa 3:12.) I ntiyiso leswaku mudyondzisi la hisekaka u fanele a khorwiseka swinene. Hi xikombiso, Pawulo u tirhise swivulwa swo tanihi “ndza kholwa” ni lexi nge “ndza swi tiva naswona ndza khorwiseka eka Hosi Yesu.” (Varhoma 8:38; 14:14) Hambiswiritano, loko hi phofula mintshembo ya hina, a hi fanelanga hi va ni mavulavulelo yo sindzisa, yo tiendla lavo lulama, naswona a hi fanelanga hi monya kumbe hi tsongahata van’wana loko hi ri karhi hi nyikela mintiyiso ya Bibele. Kahle-kahle a hi lavi ku hlundzukisa kumbe ku sandza xichudeni.—Swivuriso 12:18.

Swi pfuna swinene ku xixima tidyondzo ta xichudeni ni ku xixima mfanelo ya xona yo va na tona. Xilotlelo xa kona i ku titsongahata. Mudyondzisi la nga ni mianakanyo yo titsongahata a nga titwi a tlakukile hi ntumbuluko eka xichudeni xa yena. (Luka 18:9-14; Vafilipiya 2:3, 4) Ku khongotela ka vukwembu ku katsa vutitsongahati lebyi, entiyisweni byi nge: ‘Yehovha hi tintswalo u ndzi pfune ku vona leswi. A hi avelane swona.’

Pawulo u tsalele Vakreste-kulobye va le Korinto, a ku: “Matlhari ya nyimpi ya hina a hi ya nyama, kambe Xikwembu hi xona xi ma nyikaka matimba leswaku ma wisetela swilo leswi simekiweke swi tiya. Hikuva hi wisa makungu ni swilo hinkwaswo leswi tlakukeke leswi lwisanaka ni vutivi bya Xikwembu; naswona hi tisa miehleketo hinkwayo evukhumbini leswaku hi yi endla yi yingisa Kreste.” (2 Vakorinto 10:4, 5) Namuntlha, Timbhoni ta Yehovha ti tirhisa Rito ra Xikwembu leswaku ti herisa tidyondzo ta mavunwa leti dzikeke ni mahanyelo lama dzimeke timitsu ni mikhuva leyi nga xi tsakisiki. (1 Vakorinto 6:9-11) Loko ti endla leswi, Timbhoni ti tsundzuka leswaku Yehovha u ti lehisele mbilu hi rirhandzu. Wa nga vona ndlela leyi ti tsakaka ha yona ku va ni Rito ra xona, ku nga Bibele, ni ku tirhisa xitirho lexi xa matimba ku simula tidyondzo ta mavunwa ni ku fikelela timbilu hi vuswikoti byo khongotela!

[Tinhlamuselo ta le hansi]

[Bokisi leri nga eka tluka 23]

Ku Fikelela Mbilu Ya Xichudeni Xa Wena

◻ Khongelela nkongomiso wa Yehovha leswaku u fikelela mbilu ya xichudeni xa Bibele.—Nehemiya 2:4, 5; Esaya 50:4.

◻ Twisisa leswi xichudeni xi swi pfumelaka ni lexi endlaka xi kuma dyondzo ya mavunwa yi tsakisa.—Mintirho 17:22, 23.

◻ Hi ndlela ya tintswalo, ni ku lehisa mbilu, aka mhaka leyi twisisekaka, ya Matsalwa loko u ri karhi u voyamela laha mi pfumelelanaka kona.—Mintirho 17:24-34.

◻ Loko swi koteka, kandziyisa mintiyiso ya Bibele hi swifaniso leswi tirhaka.—Marka 4:33, 34.

◻ Kombisa xichudeni vuyelo byo amukela vutivi lebyi kongomeke lebyi humaka eBibeleni.—1 Timotiya 2:3, 4; 2 Timotiya 3:14, 15.