‘Vafi Va Ta Pfuxiwa’

“Hikuva nanga yi ta rila, ivi vafi va pfuxiwa va ri lava nga onhakiki, kutani hi ta hundzuriwa.”—1 VAKORINTO 15:52.

1, 2. (a) Hi xihi xitshembiso lexi chavelelaka lexi vuriweke hi muprofeta Hosiya? (b) Hi swi tivisa ku yini leswaku Xikwembu xi lava ku tlherisela vafi evuton’wini?

XANA u tshama u feriwa hi loyi u nga n’wi tolovela swinene? Kutani ke, wa ku tiva ku vava loku rifu ri nga ku vangaka. Hambiswiritano, Vakreste va chaveleriwa hi xitshembiso lexi Xikwembu xi xi nyikeke hi ku tirhisa muprofeta Hosiya: “Nḍi ta v̌a kuṭula e šiv̌andleni ša v̌afi, nḍi v̌a lamulela e ku feni. Wena, rifu, nḍhombo wa wena wu kwihi? Wena, sira, ku hlula ka wena ku kwihi?”—Hosiya 13:14.

² Mianakanyo ya leswaku vafi va ta tlhela va hanya yi vonaka yi nga tshembisi eka lava nga ni ku kanakana. Kambe, handle ko kanakana, Xikwembu xa Matimba Hinkwawo xi na wona matimba yo endla singita ro tano! Mhaka ya nkoka hi leswaku Yehovha wa swi lava ku pfuxa vafi kumbe e-e. Wanuna wo lulama Yobo u vutisile: “Xana loko munhu la tiyeke emirini a fa a nga tlhela a hanya?” Kutani, a humesa nhlamulo ya yena leyi tiyisekisaka: “U ta vitana, mina ndzi ta hlamula. U ta navela ntirho wa mavoko ya wena.” (Yobo 14:14, 15, NW) Rito ku “navela” ri kombisa ku tsakela nchumu swinene. (Ringanisa Pisalema 84:2.) Ina, Yehovha u langutele ku pfuka ka vafi—u navela ku tlhela a vona vanhu vo tshembeka lava feke, lava va nga kona emianakanyweni ya yena.—Matewu 22:31, 32.

Yesu U Nyikela Nhlamuselo Leyi Twisisekaka Malunghana Ni Ku Pfuka Ka Vafi

3, 4. (a) Yesu u nyikele nhlamuselo yihi leyi twisisekaka malunghana ni ntshembo wa ku pfuxiwa ka vafi? (b) Ha yini Yesu a pfuxiwe a ri moya, ku nga ri hi nyama?

³ Vavanuna va ripfumelo, va khale, vo fana na Yobo, a va nga yi twisisi kahle mhaka ya ku pfuxiwa ka vafi. I Yesu Kreste loyi a wu hlamuseleke kahle ntshembo lowu wo hlamarisa. U kombise leswi yena a swi hetisisaka emhakeni leyi loko a ku: “Un’wana ni un’wana loyi a kombisaka ripfumelo eka N’wana u ni vutomi lebyi nga heriki.” (Yohane 3:36) Xana vutomi byebyo byi ta kumiwa kwihi? Vunyingi lebyi kombisaka ripfumelo, byi ta byi kuma laha misaveni. (Pisalema 37:11) Hambiswiritano, Yesu u byele vadyondzisiwa vakwe a ku: “Mi nga chavi, ntlhambinyana, hikuva Tata wa n’wina u tsakele ku mi nyika mfumo.” (Luka 12:32) Mfumo wa Xikwembu i wa le tilweni. Hikwalaho, xitshembiso lexi xi vula leswaku “ntlhambinyana” wu ta boheka ku va na Yesu etilweni, wu ri swivumbiwa swa moya. (Yohane 14:2, 3; 1 Petro 1:3, 4) Mawaku ntshembo lowu vangamaka swonghasi! Yesu u tlhele a paluxela muapostola Yohane leswaku nhlayo ya “ntlhambinyana” lowu yi ta va 144 000.—Nhlavutelo 14:1.

⁴ Kambe, xana vanhu lava va 144 000 va ta nghenisa ku yini eku vangameni ka le tilweni? Yesu u “nyike[le] ku vonakala ehenhla ka vutomi ni ku pfumala ku onhaka hi mahungu lamanene.” Hi ngati ya yena, u simeke “ndlela leyintshwa leyi hanyaka” yo nghena ematilweni. (2 Timotiya 1:10; Vaheveru 10:19, 20) Xo sungula, u file, hilaha Bibele yi vhumbheke hakona. (Esaya 53:12) Kutani ke, hilaha muapostola Petro endzhakunyana a vuleke hakona, “Yesu yoloye Xikwembu xi n’wi pfuxile.” (Mintirho 2:32) Kambe Yesu a nga pfuxiwanga a ri munhu wa nyama. U te: “Xinkwa lexi ndzi nga ta xi nyikela i nyama ya mina hikwalaho ka vutomi bya misava.” (Yohane 6:51) Ku ambala nyama yakwe nakambe a swi ta endla gandzelo rero ri nga ha tirhi. Kutani ke, Yesu u “dlayiw[e] a ri nyama, kambe [u] hanyisiw[e] a ri wa moya.” (1 Petro 3:18) Xisweswo Yesu u “hi kumel[e] ku kutsuriwa loku nga heriki,” leswi vulaka “ntlhambinyana.” (Vaheveru 9:12) U nyikele eka Xikwembu ntikelo wa vutomi bya yena lebyi hetisekeke tanihi munhu wa nyama, byi va nkutsulo eka vanhu lava nga ni xidyoho, naswona lava 144 000 hi vona vo sungula ku vuyeriwa eka wona.

5. Hi wihi ntshembo lowu nyikiweke valandzeri va Yesu va lembe-xidzana ro sungula?

⁵ Yesu a hi yena ntsena la pfuxeriwaka ku hanya ematilweni. Pawulo u byele Vakreste-kulobye le Rhoma leswaku va totiwe hi moya lowo kwetsima leswaku va va vana va Xikwembu ni ku va vadya-ndzhaka swin’we na Kreste loko vo tiyisekisa ku totiwa ka vona hi ku tshembeka ku ya fikela emakumu. (Varhoma 8:16, 17) Pawulo na yena u hlamuserile: “Loko hi hlanganile na yena hi rifu leri fanaka ni ra yena, hakunene hi ta tlhela hi hlanganisiwa na yena hi ku pfuka loku fanaka ni ka yena.”—Varhoma 6:5.

Ku Lwela Ntshembo Wa Ku Pfuxiwa Ka Vafi

6. Ha yini ku pfumela eku pfuxiweni ka vafi a ku hlaseriwa eKorinto, naswona muapostola Pawulo u angurise ku yini?

⁶ Ku pfuka ka vafi i yin’wana ya ‘tidyondzo ta masungulo’ ta Vukreste. (Vaheveru 6:1, 2) Hambiswiritano, dyondzo leyi a yi hlaseriwa le Korinto. Van’wana evandlheni, lava kumbexana a va kuceteriwa hi filosofi ya Magriki, a a va ku: “Ku pfuka ka vafi a ku kona.” (1 Vakorinto 15:12) Loko muapostola Pawulo a twe mhaka leyi, u lwele ntshembo wa ku pfuka ka vafi, ngopfu-ngopfu ntshembo wa Vakreste lava totiweke. A hi kambisiseni marito ya Pawulo lama tsariweke eka 1 Vakorinto ndzima 15. A swi ta va swinene loko a wu lo hlaya ndzima leyi hinkwayo, hilaha ku ringanyetiweke hakona exihlokweni lexi hundzeke.

7. (a) Hi yihi mhaka leyikulu leyi Pawulo a buleke ha yona? (b) I vamani lava voneke Yesu la pfuxiweke?

⁷ Eka tindzimana to sungula timbirhi ta 1 Vakorinto ndzima 15, Pawulo u andlala nhloko-mhaka ya nhlamuselo ya yena: “Vamakwerhu, ndzi mi tivisa mahungu lamanene lawa ndzi ma vuleke eka n’wina, lawa na n’wina mi ma amukeleke, lawa nakambe mi yimaka eka wona, lawa nakambe mi ponisiwaka ha wona, . . . handle ka loko entiyisweni mi ve vapfumeri mi nga ri na xikongomelo.” Loko Vakorinto va tsandzekile ku yima va tiya eka mahungu lamanene, i swa hava leswi va amukeleke ntiyiso. Pawulo u ye emahlweni a ku: “Hikuva exikarhi ka swilo swo sungula leswi na mina ndzi swi amukeleke, ndzi hundzisele eka n’wina leswaku Kreste u fele swidyoho swa hina hi ku ya hi Matsalwa; ni leswaku u lahliwile, ina, leswaku u pfuxiwile esikwini ra vunharhu hi ku ya hi Matsalwa; ni leswaku u humelele eka Khefasi, ivi a humelela eka lava khume-mbirhi. Endzhaku ka sweswo u humelele eka vamakwerhu vo tlula ntlhanu wa madzana hi nkarhi wun’we, lava vo tala va vona va ha riki kona nisweswi, kambe van’wana va etlele eku feni. Endzhaku ka sweswo u humelele eka Yakobo, kutani a humelela eka vaapostola hinkwavo; kambe eku heteleleni ka hinkwaswo u humelele ni le ka mina, tanihi le ka munhu la velekiweke ku nga si fika nkarhi wa kona.”—1 Vakorinto 15:3-8.

8, 9. (a) Xana i swa nkoka hi ndlela yihi ku pfumela eku pfuxiweni ka vafi? (b) Hi xihi xiendlakalo lexi swi nga ha endlekaka leswaku Yesu u humelele eka “vamakwerhu vo tlula ntlhanu wa madzana” eka xona?

⁸ Eka lava va amukeleke mahungu lamanene, ku pfumela leswaku Yesu u pfuxiwile eku feni a ku ri mfanelo. A ku ri ni timbhoni to tala ta ku swi vona hi mahlo leti nga tiyisaka leswaku “Kreste u fele swidyoho swa hina” ni leswaku u pfuxiwile eku feni. Yin’wana a ku ri Khefasi, kumbe Petro, hilaha a vitaniwaka hakona hi ntolovelo. Endzhaku ka loko Petro a landzule Yesu hi siku leri Yesu a xengiweke ni ku khomiwa ha rona, swi nga ha endleka a a chavelelekile swinene loko Yesu a humelela eka yena. “Lava khume-mbirhi,” vaapostola tanihi ntlawa, na vona va endzeriwe hi Yesu la pfuxiweke—ku nga nchumu lowu handle ko kanakana wu va pfuneke leswaku va herisa nchavo wa vona ni ku va timbhoni leti nga ni xivindzi ta ku pfuxiwa ka Yesu eku feni.—Yohane 20:19-23; Mintirho 2:32.

⁹ Nakambe Kreste u humelele ni le ka ntlawa lowukulu, “vamakwerhu vo tlula ntlhanu wa madzana.” Tanihi leswi a ku ri eGaleliya ntsena laha a a ri ni valandzeri va nhlayo leyikulu, leswi swi nga ha va swi endleke eka xiendlakalo lexi hlamuseriweke eka Matewu 28:16-20, loko Yesu a lerisa leswaku ku endliwa vadyondzisiwa. Mawaku vumbhoni bya matimba swonghasi lebyi vanhu lava va byi nyikeleke! Van’wana a va ha hanya hi 55 C.E. loko Pawulo a tsala papila leri ro sungula leri yaka eka Vakorinto. Kambe, xiya leswaku lava va feke ku vuriwa leswaku va “etlele eku feni.” A va nga si pfuxiwa eku feni leswaku va amukela hakelo ya vona ya le tilweni.

10. (a) Byi ve byihi vuyelo bya nhlangano wa Yesu wo hetelela ni vadyondzisiwa vakwe? (b) Xana Yesu u humelerise ku yini eka Pawulo “tanihi le ka munhu la velekiweke ku nga si fika nkarhi wa kona”?

¹⁰ Mbhoni yin’wana leyi xiyekaka ya ku pfuxiwa ka Yesu eku feni i Yakobo, n’wana wa Yosefa na Mariya mana wa Yesu. Loko a nga si pfuxiwa, swi le rivaleni leswaku Yakobo a a nga ri mupfumeri. (Yohane 7:5) Kambe endzhaku ka loko Yesu a humelerile eka yena, Yakobo u ve mupfumeri, swi nga ha endleka nileswaku u hoxe xandla eku hundzuleni ka van’wana va vamakwavo va yena. (Mintirho 1:13, 14) Loko a hlangane ni vadyondzisiwa vakwe ro hetelela, enkarhini lowu a tlhandlukeke ha wona a ya etilweni, Yesu u va lerise leswaku va “va timbhoni . . . ku ya fika exiphen’wini xa le kule swinene xa misava.” (Mintirho 1:6-11) Endzhakunyana, u humelele eka Sawulo wa le Tarso, loyi a a xanisa Vakreste. (Mintirho 22:6-8) Yesu u humelele eka Sawulo “tanihi le ka munhu la velekiweke ku nga si fika nkarhi wa kona.” A swi fana niloko Sawulo se a pfuxeriwe evuton’wini bya moya, a kota ku vona Hosi leyi kwetsimisiweke eka madzana ya malembe ku nga si fika ku pfuxiwa koloko. Ntokoto lowu wu tshikise Sawulo ndlela yakwe yo kanetana ni vandlha ra Vukreste, wu endla ku cinca loku xiyekaka. (Mintirho 9:3-9, 17-19) Sawulo u hundzuke muapostola Pawulo, un’wana wa vaseketeri lavakulu va ripfumelo ra Vukreste.—1 Vakorinto 15:9, 10.

I Swa Nkoka Ku Pfumela Eku Pfuxiweni Ka Vafi

11. Pawulo u xi paluxe njhani xihoxo xa ku vula leswaku, ‘Ku pfuxiwa ka vafi a ku kona’?

¹¹ Hikwalaho ku pfuxiwa ka Yesu a ku ri mhaka leyi tiyisekisiweke. Pawulo u ri: “Kutani loko ku chumayeriwa Kreste leswaku u pfuxiwile eka lava feke, swi endlekisa ku yini leswaku van’wana exikarhi ka n’wina va vula leswaku ku pfuka ka vafi a ku kona?” (1 Vakorinto 15:12) Vanhu volavo a va nga ri na ku kanakana ni ku va ni swivutiso swo karhi malunghana ni ku pfuka ka vafi ntsena, kambe a va tlhela va vula erivaleni leswaku a va ku pfumeli. Hikwalaho, Pawulo u paluxa ku hoxa ka mianakanyo ya vona. U vula leswaku loko Kreste a nga pfuxiwanga, swi vula leswaku rungula ra Vukreste i mavunwa, ni lava va nyikelaka vumbhoni bya ku pfuxiwa ka Kreste a va ri “timbhoni ta mavunwa malunghana ni Xikwembu.” Loko Kreste a nga pfuxiwanga, swi vula leswaku ku hava nkutsulo lowu hakeriweke eka Xikwembu; Vakreste a va ‘ha ri eswidyohweni swa vona.’ (1 Vakorinto 15:13-19; Varhoma 3:23, 24; Vaheveru 9:11-14) Vakreste lava va “etleleke eku feni,” nkarhi wun’wana va dlawela ripfumelo, va fe va nga ri na wona ntshembo wa xiviri. Kunene Vakreste a va ta va ni gome loko a va langutele vutomi lebyi ntsena! Ku xaniseka ka vona a ku ta va ka hava.

12. (a) Xana swi vula yini ku vitana Kreste leswaku i “xirhangana xa lava va etleleke eku feni”? (b) Xana Kreste u endle leswaku ku pfuxiwa ka vafi ku va kona hi ndlela yihi?

¹² Kambe, a swi nga ri tano. Pawulo u ya emahlweni a ku: “Kreste se u pfuxiwile eka lava feke.” Ku tlula kwalaho, i “xirhangana xa lava va etleleke eku feni.” (1 Vakorinto 15:20) Loko Vaisrayele, hi ku titsongahata, va nyika Yehovha swirhangana swa ntshovelo wa vona, Yehovha a a va katekisa hi ntshovelo lowukulu. (Eksoda 22:29, 30; 23:19; Swivuriso 3:9, 10) Hi ku vula leswaku Kreste i “xirhangana,” Pawulo u kombisa leswaku ka ha ri ni ntshovelo wun’wana wa vanhu lava nga ta pfuxiwa eku feni va ya evuton’wini bya le tilweni. Pawulo u ri: “Tanihi leswi rifu ri nga kona hikwalaho ka munhu, ni ku pfuka ka vafi ku va kona hikwalaho ka munhu. Hikuva tanihi leswi hinkwavo va faka eka Adamu, kutani hinkwavo va ta hanyisiwa eka Kreste.” (1 Vakorinto 15:21, 22) Yesu u endle leswaku ku va ni ku pfuxiwa eku feni hi ku nyikela vutomi byakwe lebyi hetisekeke bya vumunhu byi va nkutsulo, a pfula ndlela ya leswaku vanhu va ntshunxiwa evuhlongeni bya xidyoho ni rifu.—Vagalatiya 1:4; 1 Petro 1:18, 19.a

13. (a) Xana ku pfuxeriwa etilweni ku endleka rini? (b) Xana vatotiwa van’wana a va ‘etleli eku feni’ hi ndlela yihi?

¹³ Pawulo u ya emahlweni a ku: “Kambe un’wana ni un’wana exiyin’weni xa yena: Kreste a va swirhangana, ku landzela lava nga va Kreste hi nkarhi wa vukona bya yena.” (1 Vakorinto 15:23) Kreste u pfuxiwe hi 33 C.E. Hambiswiritano, valandzeri vakwe lava totiweke—“lava nga va Kreste”—a va fanele va rindza ku fikela loko Yesu a ha ku sungula vukona bya yena emfun’weni, lebyi vuprofeta bya Bibele byi kombaka leswaku byi endleke hi 1914. (1 Vatesalonika 4:14-16; Nhlavutelo 11:18) Ku vuriwa yini hi lava va nga ta va va hanya enkarhini wa vukona byebyo? Pawulo u ri: “Maswivo! Ndzi mi byela xihundla xo kwetsima: A hi hinkwerhu hi nga ta etlela eku feni, kambe hinkwerhu hi ta hundzuriwa, hi nkarhinyana, hi ku tsopeta ka tihlo, hi nkarhi wa nanga yo hetelela. Hikuva nanga yi ta rila, ivi vafi va pfuxiwa va ri lava nga onhakiki, kutani hi ta hundzuriwa.” (1 Vakorinto 15:51, 52) Hakunene, a hi hinkwavo vatotiwa lava va etlelaka esirheni va rindzela ku pfuxiwa. Lava va faka enkarhini wa vukona bya Kreste va hundzuriwa hi nkarhi wolowo.—Nhlavutelo 14:13.

14. Xana vatotiwa van’wana “va [khuvuriwa] hi xikongomelo xa ku va lava feke” hi ndlela yihi?

¹⁴ Pawulo wa vutisa: “Loko swi nga ri tano, va ta endla yini lava va khuvuriwaka hi xikongomelo xa ku va lava feke? Loko lava feke va nga ta pfuxiwa nikatsongo, ha yini na vona va khuvuriwa hi xikongomelo xa leswaku va va tano? Ha yini na hina hi va ekhombyeni nkarhi wun’wana ni wun’wana?” (1 Vakorinto 15:29, 30) Pawulo a a nga vuli swona leswaku vanhu lava hanyaka va khuvuriwa ematshan’weni ya lava va feke, hilaha vuhundzuluxeri byin’wana bya Bibele byi swi vekaka hakona. Phela, nkhuvulo wu fambisana ni ku va mudyondzisiwa wa Vukreste, kutani mimoya-xiviri leyi feke a yi nge vi vadyondzisiwa. (Yohane 4:1) Ematshan’weni ya sweswo, Pawulo a a bula hi Vakreste lava hanyaka, lava vo tala va vona, kukota Pawulo, a va ri “ekhombyeni nkarhi wun’wana ni wun’wana.” Vakreste lava totiweke va ‘khuvuriwe eka rifu ra Kreste.’ (Varhoma 6:3) Ku sukela loko va totiwile, a va ‘khuvuriwa’ hi ndlela yo fanekisela, va nghena endleleni leyi nga ta va yisa eku feni loku fanaka ni ka Kreste. (Marka 10:35-40) A va ta fa va ri ni ntshembo wa ku pfuxeriwa etilweni loku vangamaka.—1 Vakorinto 6:14; Vafilipiya 3:10, 11.

15. Hi wahi makhombo lawa Pawulo a nga ha vaka a langutane na wona, naswona ku pfumela eku pfuxiweni ka vafi swi n’wi pfunise ku yini leswaku a tiyisela?

¹⁵ Sweswi Pawulo u hlamusela leswaku yena u langutane ni khombo lerova a vula a ku: “Siku ni siku ndzi langutana ni rifu.” Leswaku a nga tshuki a hehliwa hi van’wana va ku wa hundzeleta, Pawulo u tlhandlekela a ku: “Leswi ndzi swi tiyisekisa hi ku khana ha n’wina vamakwerhu, loku ndzi nga na kona eka Kreste Yesu Hosi ya hina.” The Jerusalem Bible yi hundzuluxela ndzimana leyi yi ku: “Ndzi langutana ni rifu siku ni siku, vamakwerhu, ndzi nga hlambanya hi ku tinyungubyisa loku ndzi nga na kona ha n’wina eka Kreste Yesu Hosi ya hina.” Tanihi xikombiso xa makhombo lawa a langutaneke na wona, eka ndzimana 32 Pawulo u vulavula hi ku ‘lwa ni swivandzana le Efesa.’ Hakanyingi Varhoma a va dlaya swigevenga hi ku swi hoxa eka swivandzana etindhawini ta mintlango. Loko Pawulo a swi kotile ku langutana ni ku lwa ni swivandzana, u fanele a pfuniwe hi Yehovha ntsena leswaku a pona. Loko a a nga ri na wona ntshembo wa ku pfuxiwa ka vafi, kunene a byi ta va vuphukuphuku lebyikulu ku hlawula ndlela ya vutomi leyi a yi ta n’wi peta ekhombyeni ro tano. Loko a a nga ri na wona ntshembo wa vutomi bya nkarhi lowu taka, a swi nga ta pfuna nchumu ku tiyisela maxangu ni ku titsona swo karhi, hikwalaho ka ku tirhela Xikwembu. Pawulo u ri: “Loko lava feke va nga ta pfuxiwa, ‘a hi dyeni hi nwa, hikuva mundzuku hi ta fa.’”—1 Vakorinto 15:31, 32; vona 2 Vakorinto 1:8, 9; 11:23-27.

16. (a) Xana marito lama nge “a hi dyeni hi nwa, hikuva mundzuku hi ta fa” ma nga va ma sungule kwihi? (b) Hi wahi makhombo lawa a ma ta vangiwa hi ku amukela langutelo leri?

¹⁶ Swi nga ha endleka leswaku Pawulo u tshahe Esaya 22:13, leyi hlamuselaka langutelo leri nga ni khombo ra vanhu lava nga yingisiki va le Yerusalema. Kumbexana, a a anakanya hi tidyondzo ta Vaepikuro, lava a va nyenya ntshembo wihi ni wihi wa ku hanya endzhaku ka rifu naswona a va pfumela leswaku ku tsakisa nyama a wu ri wona nchumu lowukulu evuton’wini. Ku nga khathariseki xivangelo xa kona, mhaka ya ‘ku dya ni ku nwa’ a yi nga amukeleki eka Xikwembu. Hikwalaho, Pawulo wa tsundzuxa: “Mi nga xisiwi. Vunakulobye byo biha byi onha mikhuva leyi pfunaka.” (1 Vakorinto 15:33) Ku tihlanganisa ni lava a va kaneta ku pfuxiwa ka vafi a swi ta vanga khombo. Swi nga endleka leswaku ku tihlanganisa ni vanhu volavo hi swona leswi vangeke swiphiqo leswi Pawulo a bohekeke ku swi tlhantlha evandlheni ra Korinto, ku fana ni vuoswi, ku avana, ku mangalelana, ni ku delela Xilalelo xa Hosi.—1 Vakorinto 1:11; 5:1; 6:1; 11:20-22.

17. (a) Xana Pawulo u khongotele Vakorinto hi ndlela yihi? (b) Hi swihi swivutiso leswi faneleke swi hlamuriwa?

¹⁷ Hikwalaho Pawulo u khongotela Vakorinto hi ndlela leyi: “Xalamukani mi va ni mianakanyo leyi hlutekeke hi ku landza ku lulama, naswona mi nga hanyi hi xidyoho, hikuva van’wana a va xi tivi Xikwembu. Leswi ndzi swi vulela ku mi khomisa tingana.” (1 Vakorinto 15:34) Langutelo leri hoxeke ra ku pfuxiwa ka vafi ri vangele van’wana leswaku va khudzehela hi tlhelo ra moya, onge hiloko va pyopyiwile. A va fanele va xalamuka, va hanyanya. Hilaha ku fanaka Vakreste lava totiweke namuntlha va fanele va tshama va xalamukile hi tlhelo ra moya, va nga kuceteriwi hi mavonelo ya misava leyi nga ni ku kanakana. Va fanele va namarhela swinene eka ntshembo wa vona wa ku pfuxeriwa etilweni. Kambe ka ha ri ni swivutiso—swa Vakorinto va nkarhi wolowo swin’we na hina sweswi. Hi xikombiso, xana lava 144 000 va pfuxeriwa etilweni va ri eka xivumbeko xihi? Naswona ku vuriwa yini hi timiliyoni tin’wana leti ta ha riki esirheni, leti nga riki na wona ntshembo wa ku ya etilweni? Xana ku pfuxiwa eku feni ku ta vula yini eka vona? Eka xihloko xa hina lexi tlhandlamaka, hi ta kambisisa bulo leri seleke ra Pawulo ra ku pfuxiwa ka vafi.

[Nhlamuselo ya le hansi]

Wa Tsundzuka Xana?

◻ Xana Yesu u nyikele nhlamuselo yihi leyi twisisekaka malunghana ni ku pfuxiwa ka vafi?

◻ I vamani van’wana lava voneke ku pfuxiwa ka Kreste?

◻ Ha yini dyondzo ya ku pfuxiwa ka vafi a yi hlaseriwa, naswona Pawulo u angurise ku yini?

◻ Ha yini a swi ri swa nkoka leswaku Vakreste lava totiweke va pfumela eku pfuxiweni ka vafi?

[Xifaniso lexi nga eka tluka 15]

N’wana wa Yayiro wa nhwanyana u ve xikombiso xa ku pfuxiwa ka vafi

[Xifaniso lexi nga eka tluka 16, 17]

Handle ka ntshembo wa ku pfuxiwa ka vafi, ku dlawela ripfumelo ka Vakreste vo tshembeka a ku ta va ka hava