Tlakusa Mavoko Lama Tshembekeke U Khongela
“Ndzi navela leswaku endhawini yin’wana ni yin’wana vavanuna va hambeta va khongela, va tlakusa mavoko lama tshembekeke, handle ka vukarhi ni minjhekanjhekisano.”—1 TIMOTIYA 2:8.
1, 2. (a) Xana 1 Timotiya 2:8 yi tirha njhani eka xikhongelo lexi katsaka vanhu va Yehovha? (b) Xana i yini lexi hi nga ta xi kambisisa sweswi?
YEHOVHA u langutele leswaku vanhu va yena va tshembeka eka yena, ni le ka vona vini. Muapostola Pawulo u hlanganise ku tshembeka ni xikhongelo loko a tsala a ku: “Ndzi navela leswaku endhawini yin’wana ni yin’wana vavanuna va hambeta va khongela, va tlakusa mavoko lama tshembekeke, handle ka vukarhi ni minjhekanjhekisano.” (1 Timotiya 2:8) Swi le rivaleni leswaku Pawulo a a vulavula hi ku yimela vanhu hi xikhongelo “endhawini yin’wana ni yin’wana” leyi Vakreste a va hlengeletana eka yona. I vamani lava a va ta yimela vanhu va Xikwembu hi xikhongelo eminhlanganweni ya vandlha? I vavanuna lava kwetsimaka, vo lulama, lava xiximekaka ntsena, lava hi vukheta va endlaka mintirho hinkwayo ya Matsalwa, ya Xikwembu. (Eklesiasta 12:13, 14) A va fanele va basa emoyeni ni le mahanyelweni naswona va ri lava tinyiketeleke eka Yehovha Xikwembu hi ndlela leyi nga kanakanisiki.
2 I swa nkoka swinene leswaku vakulu va vandlha va ‘tlakusa mavoko lama tshembekeke, va khongela.’ Swikhongelo swa vona swa mbilu hinkwayo leswi hundzisiwaka ha Yesu Kreste swi kombisa ku tshemba ka vona Xikwembu naswona swi va pfuna leswaku va papalata ku kanetana ni ku holova. Kahle-kahle, munhu un’wana ni un’wana la nga ni lunghelo ro yimela vandlha ra Vukreste hi xikhongelo u fanele a ri la nga riki na vukarhi, a va ni vunghana naswona u fanele a va la tshembekeke eka Yehovha ni nhlengeletano yakwe. (Yakobo 1:19, 20) Hi yihi minkongomiso yin’wana ya Bibele leyi nyikiweke lava va nga ni lunghelo ro yimela van’wana hi xikhongelo? Naswona hi yihi misinya ya milawu ya Matsalwa yin’wana, leyi hi faneleke hi yi tirhisa eka swikhongelo swa hina vini ni loko hi khongelela ndyangu?
Anakanyisisa U Nga Si Khongela
3, 4. (a) Hikwalaho ka yini swi pfuna ku anakanyisisa ka ha ri emahlweni hi xikhongelo xo yimela vanhu? (b) Xana Matsalwa ma kombisa yini malunghana ni ku leha ka swikhongelo?
3 Loko hi komberiwe ku yimela vanhu hi xikhongelo, handle ko kanakana hi ta swi kota ku anakanyisisa hi xikhongelo xa hina ka ha ri emahlweni. Loko ho endla tano hi ta swi kota ku hlanganisa timhaka ta nkoka leti fanelaka, handle ko nyikela xikhongelo xo leha, lexi nga kongomiki. Ina, swikhongelo swa hina swa le xihundleni swi nga ha vuriwa hi rito leri twalaka. Swi nga ha leha hilaha hi lavaka hakona. Yesu u hete vusiku hinkwabyo a khongela a nga si hlawula vaapostola va yena va 12. Hambiswiritano, loko a simeka Xitsundzuxo xa rifu rakwe, handle ko kanakana swikhongelo swa yena loko a khongelela xinkwa ni vhinyo a swi komile. (Marka 14:22-24; Luka 6:12-16) Naswona ha swi tiva leswaku hambi ku ri swikhongelo swo koma swa Yesu a swi amukeleka hi ku helela eka Xikwembu.
4 A hi nge hi ni lunghelo ra ku yimela ndyangu hi xikhongelo hi nkarhi wa swakudya. Xikhongelo xo tano xi nga ha koma—kambe hinkwaswo leswi swi vuriwaka swi fanele swi kombisa ku tlangela swakudya. Loko hi yimela vanhu hi xikhongelo, eku sunguleni ni le ku heteleleni ka nhlangano wa Vukreste, a hi fanelanga hi endla xikhongelo xo leha lexi hlanganisaka tinhla to tala. Yesu u sole vatsari lava ‘hi vukanganyisi a va endla swikhongelo swo leha.’ (Luka 20:46, 47) Munhu la chavaka Xikwembu a nga fanelanga a endla sweswo. Kambe, minkarhi yin’wana, swi nga ha fanela ku endla xikhongelo xo leha emahlweni ka vanhu. Hi xikombiso, nkulu la hlawuriweke ku nyikela xikhongelo xo hetelela enhlengeletanweni u fanele a anakanyisisa ha xona ka ha ri emahlweni naswona a nga navela ku boxa tinhla to hlayanyana. Hambiswiritano, xikhongelo xo tano a xi fanelanga xi leha ku tlula mpimo.
Tshinelela Xikwembu Hi Xichavo
5. (a) I yini lexi hi faneleke hi xi tsundzuka loko hi khongela emahlweni ka vanhu? (b) Hikwalaho ka yini hi fanele hi khongela hi ndlela leyi xiximekaka ni leyi nga ni xindzhuti?
5 Loko hi khongela emahlweni ka vanhu, hi fanele hi tsundzuka leswaku a hi vulavuli ni vanhu. Kambe, hi swivumbiwa leswi nga ni vudyoho, leswi khongelaka Yehovha, Hosi Leyikulu. (Pisalema 8:3-5, 9; 73:28) Hikwalaho, hi fanele hi lwela ku ka hi nga n’wi hlundzukisi hi leswi hi swi vulaka ni ndlela leyi hi swi vulaka ha yona. (Swivuriso 1:7) Mupisalema Davhida u yimbelerile a ku: “Kambe mina, hi tintŝalo ta wena le’tikulu, nḍi ta nghena e ndlwini ya wena, nḍi ta nkhinsama hi ku tšhav̌a e tempeleni ya wena le’yo kwetsima.” (Pisalema 5:7) Loko hi ri ni langutelo leri, xana hi ta tiphofula njhani loko hi komberiwa ku yimela vanhu hi xikhongelo enhlanganweni wa Timbhoni ta Yehovha? Phela, loko a ko va leswaku hi vulavula ni hosi leyi nga munhu wa nyama, a hi ta vulavula hi xichavo ni ku yi nyika xindzhuti. Xana swikhongelo swa hina a swi fanelanga swi xiximeka ku tlurisa ni ku kombisa xichavo tanihi leswi hi khongelaka eka Yehovha, “Hosi leyi nga riki na makumu”? (Nhlavutelo 15:3) Kutani, loko hi khongela, hi ta papalata marito yo tanihi lama nge, “Xewani Yehovha,” “Hi ku rhumela marungula ya hina,” kumbe, “Vana ni siku lerinene.” Matsalwa ma kombisa leswaku N’wana wa Xikwembu la velekiweke a ri yexe, Yesu Kreste, a a nga vulavuli ni Tata wakwe wa le tilweni hi ndlela leyi.
6. I yini leswi hi faneleke hi swi tsundzuka loko hi ‘tshinelela xiluvelo xa musa lowu nga faneriwiki’?
6 Pawulo u te: “A hi tshineleleni xiluvelo xa musa lowu nga faneriwiki hi mavulavulelo yo ntshunxeka.” (Vaheveru 4:16) Hi nga tshinelela Yehovha hi “mavulavulelo yo ntshunxeka” ku nga khathariseki vudyoho lebyi hi nga na byona hikuva hi ri ni ripfumelo eka gandzelo ra nkutsulo ra Yesu Kreste. (Mintirho 10:42, 43; 20:20, 21) Kambe, ‘ntshunxeko wolowo wo vulavula’ a wu vuli swona leswaku hi tlanga ni Xikwembu; kumbe leswaku hi vula marito yo pfumala xichavo eka xona. Loko swikhongelo swa hina swo yimela vanhu swi ta tsakisa eka Yehovha, swi fanele swi nyikeriwa hi xichavo lexi faneleke ni ku n’wi nyika xindzhuti, naswona a hi fanelanga ku swi tirhisa ku endla switiviso ha swona, hi laya vanhu vo karhi, kumbe hi dyondzisa vayingiseri eka swona.
Khongela Hi Moya Wa Ku Titsongahata
7. Xana Solomoni u ku kombise njhani ku titsongahata loko a khongela eku nyiketeriweni ka tempele ya Yehovha?
7 Hambi hi khongela emahlweni ka vanhu kumbe exihundleni, nsinya wa nawu wa nkoka, wa Matsalwa, lowu hi faneleke hi wu tsundzuka nkarhi hinkwawo, hi leswaku hi fanele hi kombisa moya wa ku titsongahata eka swikhongelo swa hina. (2 Tikronika 7:13, 14) Hosi Solomoni u kombise ku titsongahata eka xikhongelo xakwe emahlweni ka vanhu hi nkarhi wa ku nyiketeriwa ka tempele ya Yehovha le Yerusalema. Solomoni a a ha ku heta ku aka muako wo saseka ku yi tlula hinkwayo leyi tshameke yi akiwa emisaveni hi nkarhi wolowo. Kambe hi ku titsongahata u khongerile a ku: “Šana kunene Šikwembu ši nga aka e misav̌eni šana? Waŝiv̌o, matilo, ni matilo ya matilo a ma ku eneri; šana-ke e Yindlu leyi nḍi akeke yona a hi yiṭongo ku tlurisa šana?”—1 Tihosi 8:27.
8. Hi tihi tindlela tin’wana to kombisa ku titsongahata loko munhu a khongela emahlweni ka vanhu?
8 Ku fana na Solomoni, hi fanele hi titsongahata loko hi yimela van’wana hi xikhongelo. Hambiloko hi fanele hi papalata ku tiendla valulami, ku titsongahata ku nga ha kombisiwa hi mpfumawulo wa rito ra hina. Swikhongelo leswi endliwaka hi ku titsongahata a swi hundzeletiwi kumbe ku kombisa mintlhaveko leyi hoxeke. Swi kokela nyingiso eka Loyi ku khongeriwaka eka yena, ku nga ri eka loyi a khongelaka. (Matewu 6:5) Ku titsongahata nakambe ku kombisiwa hi leswi hi swi vulaka loko hi khongela. Loko hi khongela hi ku titsongahata, a hi nge vulavuli hi ndlela leyi kombisaka leswaku hi koxa leswaku Xikwembu xi endla swilo hi ndlela leyi hi anakanyaka ha yona. Ematshan’weni ya sweswo, hi ta kombela Yehovha leswaku a endla hi ndlela leyi nga ta pfumelelana ni ku rhandza ka yena ko kwetsima. Mupisalema u kombise langutelo leri faneleke loko a komberile a ku: “Oho Yehova! Ponisa! Oho Yehova! Katekisa!”—Pisalema 118:25; Luka 18:9-14.
Khongela Swi Suka eMbilwini
9. Hi yihi ndzayo leyinene leyi nyikeriweke hi Yesu leyi kumekaka eka Matewu 6:7, naswona yi nga tirhisiwa njhani?
9 Loko swikhongelo swa hina swo yimela vanhu kumbe swa munhu hi xiyexe swi ta tsakisa Yehovha, swi fanele swi huma embilwini. Hikwalaho, a hi nge phindha-phindhi ndlela yo karhi yo khongela leyi hi yi nhlokohateke, handle ko anakanya leswi hi swi vulaka. Eka Dyondzo ya yena ya le Ntshaveni, Yesu u tsundzuxile: “Loko u khongela, u nga vuli swilo leswi fanaka hi ku phindha-phindha, hilaha vanhu va matiko va endlaka hakona, hikuva va [endla xihoxo va] anakanya leswaku va ta twiwa hi ku tirhisa marito yo tala.” Hi marito man’wana, Yesu u te: “U nga vuli marito ntsena; u nga phindha-phindhi nchumu wun’we.”—Matewu 6:7, nhlamuselo ya le hansi eka NW.
10. Hikwalaho ka yini swi fanela ku khongela hi mhaka yo karhi minkarhi yo hlayanyana?
10 Ina, swi nga ha endleka hi boheka ku khongela hi mhaka leyi fanaka, nkarhi na nkarhi. Sweswo swi ta va swi nga hoxanga hikuva Yesu u khutazile a ku: “Hambetani mi kombela, kutani mi ta nyikiwa; hambetani mi lava, kutani mi ta swi kuma; hambetani mi gongondza, kutani mi ta pfuleriwa.” (Matewu 7:7) A hi nge ku ni xilaveko xa Holo ya Mfumo leyintshwa, hi mhaka ya leswi Yehovha a katekisaka ntirho wa kwalaho wa ku chumayela. (Esaya 60:22) Swi ta va swi fanerile ku hambeta mi boxa xilaveko lexi loko mi khongela exihundleni kumbe loko mi khongela eminhlanganweni ya vanhu va Yehovha. Ku endla tano swi ta va swi nga vuli swona leswaku hi ‘phindha-phindha nchumu wun’we.’
Tsundzuka Ku Nkhensa Ni Ku Dzunisa
11. Xana Vafilipiya 4:6, 7 yi tirha njhani eka xikhongelo xa munhu hi xiyexe ni xo yimela vanhu?
11 Vanhu vo tala va khongela ntsena loko va kombela xo karhi, kambe rirhandzu leri hi nga na rona hi Yehovha Xikwembu ri fanele ri hi susumetela ku n’wi nkhensa ni ku n’wi dzunisa eka xikhongelo xa le xihundleni ni le mahlweni ka vanhu. Pawulo u tsarile a ku: “Mi nga vileli ha nchumu, kambe eka hinkwaswo hi xikhongelo ni xikombelo swin’we ni ku nkhensa tivisani Xikwembu swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” (Vafilipiya 4:6, 7) Ina, ku engetela eka swikhongelo ni swikombelo, hi fanele hi nkhensa Yehovha, hi mikateko ya moya ni ya nyama leyi a hi nyikaka yona. (Swivuriso 10:22) Mupisalema u yimbelerile a ku: “Humesela Šikwembu e ku v̌onga ri nga ganḍelo ra wena, u v̌a u riha ku hlambanya ka wena e ka L’a-nge-henhla-henhla.” (Pisalema 50:14) Naswona miloti ya Davhida leyi humaka embilwini a yi katsa marito lawa lama khumbaka mbilu: “Nḍi ta twarisa v̌ito ra Šikwembu hi tinsimu, nḍi ta ri kurisa hi ku ri ḍunisa.” (Pisalema 69:30) Xana a hi swona leswi hi faneleke hi endla swona eka xikhongelo xo yimela vanhu ni xa le xihundleni?
12. Xana Pisalema 100:4, 5 yi hetiseka njhani namuntlha, naswona hi nga nkhensa ni ku dzunisa Xikwembu hikwalaho ka yini?
12 Malunghana ni Xikwembu, mupisalema u yimbelerile a ku: “Nghenani tinyangweni ta yena hi minkhenso, ne makupakupeni ya yena hi tinsimu; ṅwi ḍuniseni, mi v̌onga v̌ito ra yena! Hikuv̌a o ni tintŝalo, v̌unene bya yena hi bya masiku, ni ku ṭhembeka ka yena e tinšakeni ta tinšaka.” (Pisalema 100:4, 5) Namuntlha, vanhu va matiko hinkwawo va nghena eswivaveni swa xikwetsimisiso xa Yehovha, naswona hi fanele hi n’wi dzunisa ni ku n’wi nkhensa hikwalaho ka leswi. Xana wa xi nkhensa Xikwembu hikwalaho ka Holo ya Mfumo ya ka n’wina ni ku kombisa ku tlangela koloko hi ku va kona kwalaho nkarhi hinkwawo swin’we ni lava xi rhandzaka? Loko u ri kwalaho, xana u hlanganyela hi mbilu hinkwayo u tlakusa rito u yimbelela u dzunisa ni ku nkhensa Tata wa hina wa le tilweni la nga ni rirhandzu?
U Nga Tshuki U Va Ni Tingana Ku Khongela
13. Hi xihi xikombiso xa Matsalwa lexi kombisaka leswaku hi fanele hi khongela Yehovha hambiloko hi titwa hi nga faneleki hikwalaho ka ku tivona nandzu?
13 Hambiloko hi titwa hi nga faneleki hikwalaho ka ku tivona nandzu, hi fanele hi tshinelela Xikwembu hi xikhongelo xo huma embilwini. Loko Vayuda va dyohile hi ku teka vavasati vambe, Ezra u khinsamile, a tlakusela swandla swakwe leswi tshembekeke eka Xikwembu, kutani hi ku titsongahata a khongela a ku: “Oho! Šikwembu ša mina, nḍi ṭanile hi tingana e ku tlakusa mombo wa nga e ka wena, Šikwembu ša mina, hikuv̌a ŝiv̌i ŝa hina ŝi anḍile henhla ka tinhloko ta hina, ni nanḍu wa hina wu kurile ku fika matilweni. Ka ha ri mpfhuka wa v̌atata wa hina, hi ṭhama e nanḍwini lo’wukulu, ku fikela ŝeŝi . . . Loko ku ri laha hi nga humelela hi le’ŝo tala, hikwalaho ka ku endla ka hina ka ku biha, ni milanḍu le’mikulu ya hina (kasi wena Šikwembu ša hina, u hi ṭeṭelele, a ku hi banga hi ku biwa lo’ku ringanaka ni makhombo ya hina, u tlhele u hi hlayisela masalela la’yonghasi); hi nga tlhela hi tlula milawu ya wena hi ku yini, ni ku tipfanganyeta ni matiko walawo ya manyala, hi ku tekana na v̌ona šana? Šana u nga ka u nga hi kariheli, u hi heta, u nga ha siyi ni masiyela, hambi wu ri lo’wu poneke šana? Oho Yehova, Šikwembu ša Israel, u lulamile; hina, hi lo sala hi ri la’v̌a poneke, kukotisa le’ŝi v̌oniwaka namuntlha. Hi hina kwala, hi yimeke mahlweni ka wena hi ri ni nanḍu; hikuv̌a hi nga ka hi nga hanyi mahlweni ka wena hikwalaho ka ŝona.”—Ezra 9:1-15; Deteronoma 7:3, 4.
14. Hilaha swi kombisiweke ha kona esikwini ra Ezra, i yini lexi lavekaka leswaku hi rivaleriwa hi Xikwembu?
14 Leswaku u rivaleriwa hi Xikwembu, ku vula xidyoho xa wena eka xona swi fanele swi fambisana ni ku hundzuka ni “mihandzu leyi fanekelaka ku hundzuka.” (Luka 3:8; Yobo 42:1-6; Esaya 66:2) Esikwini ra Ezra, moya wa ku hundzuka a wu fambisana ni matshalatshala yo lulamisa xihoxo hi ku ntshunxa vavasati vambe. (Ezra 10:44; ringanisa 2 Vakorinto 7:8-13.) Loko hi lava leswaku Xikwembu xi hi rivalela xidyoho lexikulu, a hi vuleni xidyoho xa hina eka xona hi xikhongelo xa ku titsongahata, naswona hi humesa mihandzu leyi kombisaka ku hundzuka. Moya wa ku hundzuka ni ku navela ku lulamisa xihoxo swi ta hi susumetela ku lava mpfuno wa moya eka vakulu lava nga Vakreste.—Yakobo 5:13-15.
Kuma Nchavelelo eXikhongelweni
15. Xana ntokoto wa Hana wu kombisa njhani leswaku hi nga kuma nchavelelo hi ku khongela?
15 Loko hikwalaho ka swivangelo swo karhi mbilu ya hina yi vava, hi nga kuma nchavelelo hi ku khongela. (Pisalema 51:17; Swivuriso 15:13) Hana wo tshembeka u wu kumile. U hanye enkarhini lowu mindyangu leyikulu a yi tele eIsrayele, kambe yena a a nga ri na vana. Elkana nuna wakwe, a a ri ni vana va majaha ni va vanhwanyana hi nsati wakwe loyi un’wana, Penina, loyi a hlekuleke Hana hikwalaho ka leswi a a ri mhika. Hana u khongele swinene naswona a tshembisa leswaku loko a katekisiwa hi n’wana, ‘a a ta n’wi nyiketa eka Yehovha vutomi bya yena hinkwabyo.’ Hi ku chaveleriwa hi xikhongelo xakwe ni marito ya Eli Muprista Lonkulu, “mombo wa [Hana] wu hunḍuka.” U veleke n’wana wa jaha loyi a n’wi thyeke vito ra Samuwele. Hi ku famba ka nkarhi, u n’wi yise exikwetsimisisweni xa Yehovha a ya tirhela kona. (1 Samuwele 1:9-28) Hi ku tlangela tintswalo leti Xikwembu xi n’wi kombiseke tona, u endle xikhongelo xa ku nkhensa—lexi dzuniseke Yehovha tanihi la tlakukeke swinene. (1 Samuwele 2:1-10) Ku fana na Hana, hi nga kuma nchavelelo exikhongelweni, hi tiyiseka leswaku Xikwembu xi hlamula swikombelo hinkwaswo leswi fambisanaka ni ku rhandza ka xona. Loko hi chulula timbilu ta hina eka xona, a hi ‘ntshunxeni mimombo ya hina,’ hikuva xi ta susa ndzhwalo wa hina naswona xi ta hi pfuna leswaku hi tiyisela.—Pisalema 55:22.
16. Hilaha swi kombisiweke hakona emhakeni ya Yakobe, hikwalaho ka yini hi fanele hi khongela loko hi chava kumbe hi karhatekile?
16 Loko xiyimo xi endla leswaku hi chava, mbilu yi vava kumbe hi karhateka, hi nga tshiki ku tshinelela Xikwembu leswaku hi kuma nchavelelo hi ku khongela. (Pisalema 55:1-4) Yakobe a a ngheniwe hi ku chava loko a fanele a hlangana ni makwavo la hlundzukeke, Esawu. Kambe, Yakobe u khongerile a ku: “Oho! Šikwembu ša tatana Abraham, ni Šikwembu ša tatana Isak, wena Yehova, loyi u nga te ka mina: Tlhelela e ka rikwenu ne tikweni ra v̌atata wa wena, nḍi ta ku endla ŝinene, a nḍi ringani tintŝalo ta wena hikwato, ni ku ṭhembeka hikwaku loku u ku humeseleke nanḍa wa wena; kasi nḍi pele Yordan loyi nḍi ri ni nhonga ya mina ntsena, kasi ŝeŝi nḍi hunḍuke mišaša mimbiri. Nḍa ku khongela, nḍi ponise v̌okweni ra hosi ya mina, e v̌okweni ra Esau, hikuv̌a nḍa ṅwi tšhav̌a, a nga ta ta a ta nḍi ba, a dlaya v̌ana ni mana wa v̌ona. Hikuv̌a wena u te: Ha kunene nḍi ta ku katekisa, nḍi endla leŝaku v̌atukulu v̌a wena v̌a kotisa sav̌a ra lwandle, le’ri nga hlayekiki hi ku tala ka rona.” (Genesa 32:9-12) Esawu a nga n’wi hlaselanga Yakobe ni lava fambaka na yena. Xisweswo, hakunene Yehovha u n’wi ‘endle leswinene’ Yakobe hi nkarhi wolowo.
17. Hi ku pfumelelana na Pisalema 119:52, xana xikhongelo xi nga hi chavelela njhani loko hi ri endzingweni lowukulu?
17 Loko hi ri karhi hi khongela, hi nga ha chaveleriwa hi ku tsundzuka swilo leswi vuriweke eRitweni ra Xikwembu. Eka pisalema yo leha ku tlula hinkwato—xikhongelo lexinene lexi fambisanaka ni vuyimbeleri—swi nga ha endleka leswaku a ku ri Hosana Hezekiya loyi a yimbeleleke a ku: “Yehova, nḍi anakanya ku av̌anyisa ka wena ka khale! Kutani nḍi tšhav̌eleriwa.” (Pisalema 119:52) Hi ku khongela hi ku titsongahata, loko hi ri endzingweni lowukulu, hi nga ha tsundzuka nsinya wa nawu kumbe nawu wa Bibele lowu nga hi pfunaka leswaku hi endla swilo hi ndlela leyi nga ta hi tiyisekisa leswaku hi tsakisa Tata wa hina wa le tilweni.
Lavo Tshembeka Va Phikelela eXikhongelweni
18. Hikwalaho ka yini ku nga ha vuriwaka leswaku ‘un’wana ni un’wana wo tshembeka u ta khongela eka Xikwembu’?
18 Hinkwavo lava tshembekaka eka Yehovha Xikwembu va ta “phikelela exikhongelweni.” (Varhoma 12:12) Eka Pisalema ya vu-32, leyi kumbexana yi tsariweke endzhaku ka loko Davhida a dyohe na Bati-xeba, u hlamusele mbitsi lowu a veke na wona hi ku tsandzeka ku kombela ndzivalelo, ni ku wisa loku a ku kumeke hikwalaho ko hundzuka ni ku vula swidyoho swakwe eka Xikwembu. Kutani Davhida u yimbelerile a ku: “Hikwalaho [hikuva Yehovha u rivalela lava hundzukeke hakunene] uṅwana ni uṅwana l’a ku ranḍaka o ta ku khongela hi nkari lowu u kumiwaka ha wona.”—Pisalema 32:6.
19. Hikwalaho ka yini hi fanele hi tlakusa mavoko yo tshembeka, hi khongela?
19 Loko hi byi tlangela vuxaka bya hina na Yehovha Xikwembu, hi ta khongelela musa wakwe exisekelweni xa gandzelo ra nkutsulo ra Yesu. Hi ripfumelo, hi nga tshinelela xiluvelo xa musa lowu nga faneriwiki hi ntshunxeko wo vulavula, leswaku hi kuma tintswalo ni mpfuno hi nkarhi wa kona. (Vaheveru 4:16) Kambe ku ni swivangelo swo tala swo khongela! Hikokwalaho a hi ‘khongeleni minkarhi hinkwayo’—hakanyingi hi marito lama kombisaka ku dzunisa ni ku nkhensa Xikwembu hi mbilu hinkwayo. (1 Vatesalonika 5:17) Vusiku ni nhlikanhi, a hi tlakuseni mavoko yo tshembeka, hi khongela.
U Nga Hlamula Njhani?
◻ Swi pfuna yini ku anakanyisisa ka ha ri emahlweni hi xikhongelo xo yimela vanhu?
◻ Hikwalaho ka yini hi fanele hi khongela hi ndlela leyi xiximekaka ni leyi nga ni xindzhuti?
◻ Hi fanele hi va ni moya wa njhani loko hi khongela?
◻ Loko hi khongela, hikwalaho ka yini hi fanele hi tsundzuka ku nkhensa ni ku dzunisa?
◻ Bibele yi kombisa njhani leswaku hi nga chaveleleka hi ku khongela?
[Xifaniso lexi nga eka tluka 17]
Hosi Solomoni u kombise ku titsongahata loko a khongela emahlweni ka vanhu hi nkarhi wa ku nyiketeriwa ka tempele ya Yehovha
[Swifaniso leswi nga eka tluka 18]
Ku fana na Hana, u nga kuma nchavelelo hi ku khongela