Vandlha Ra Vukreste—Xihlovo Xa Mpfuno Lowu Tiyisaka

POPI, wansati la ha ku hundzaka malembe ya 20 hi vukhale, a a karhatekile hikwalaho ka xiyimo xa ndyangu lexi a xi katsa ku pfumala nkarhi wa mbulavurisano lowunene ni vatswari vakwe.a Endzhaku ko tiphofula eka nkulu wa Mukreste ni nsati wakwe, u va tsalerile a ku: “Ndzi mi nkhensa swonghasi ku va mi tinyike nkarhi wa ku vulavula na mina. Eka mina i swa nkoka ku vona leswaku ma khathala. Ndzi nkhensa Yehovha ku va a ndzi nyike vanhu lava ndzi va tshembaka ni lava ndzi nga vulavulaka na vona.”

Toula, wansati loyi a ha ku feriwaka hi nuna, loyi a nga ni vana vambirhi va kondlo-a ndzi-dyi, u tikume a langutane ni swiphiqo swa ku karhateka emintlhavekweni ni swa timali. Yena ni vana vakwe va endzeriwe nkarhi ni nkarhi va ta tiyisiwa hi mpatswa lowu tekaneke wa Vakreste wa le vandlheni. Endzhaku ka loko a humelerile eku langutaneni ni xiyimo xakwe, u va rhumele khadi leyi nge: “Ndzi tshama ndzi ri karhi ndzi mi tsundzuka eswikhongelweni swa mina. Ndzi tsundzuka minkarhi yo tala leyi mi ndzi seketeleke ni ku ndzi tiyisa.”

Xana minkarhi yin’wana u tikuma u ‘tikeriwa’ hi mintshikilelo leyi yaka yi andza ya misava leyi? (Matewu 11:28) Xana “nkarhi ni xiendlakalo lexi nga languteriwangiki” swi onhe vutomi bya wena hi swilo leswi twisaka ku vava? (Eklesiasta 9:11, NW) Loko swi ri tano, a wu wexe. Ku fana ni vanhu va magidi lava nga ni nhlomulo, na wena u nga wu kuma mpfuno wa xiviri evandlheni ra Vukreste ra Timbhoni ta Yehovha. Eka lembe-xidzana ro sungula C.E., muapostola Pawulo u kume leswaku vapfumeri-kulobye vo karhi a va ri “mpfuno lowu tiyisaka” eka yena hi ndlela yo hlawuleka. (Vakolosa 4:10, 11) Na wena u nga tokota leswi fanaka.

Nseketelo Ni Mpfuno

Eka Matsalwa ya Vukreste ya Xigriki, rito “vandlha” ri hundzuluxeriwe ri suka eka rito ra Xigriki ek·kle·siʹa, leri vulaka ntlawa wa vanhu lava vitaniweke leswaku va hlangana. Mianakanyo leyi yelanaka ni rito rero i ku va ni vun’we ni ku seketelana.

Vandlha ra Vukreste ri seketela ntiyiso wa Rito ra Xikwembu naswona ri twarisa mahungu lamanene ya Mfumo wa xona. (1 Timotiya 3:15; 1 Petro 2:9) Hambiswiritano, vandlha ri tlhela ri nyika nseketelo wa moya ni mpfuno eka lava va tihlanganisaka na rona. Eka rona, munhu a nga kuma vanghana lava nga ni rirhandzu, lava ehleketelelaka ni lava khathalelaka, lava tshamaka va lunghekile naswona va swi tsakelaka ku pfuna ni ku chavelela van’wana loko va tshikileriwile.—2 Vakorinto 7:5-7.

Minkarhi hinkwayo vagandzeri va Yehovha va kume vuhlayiseki ni nsirhelelo evandlheni rakwe. Mupisalema u kombise leswaku u kume ntsako ni nsirhelelo exikarhi ka vanhu va Xikwembu lava hlengeletaneke. (Pisalema 27:4, 5; 55:14; 122:1) Hilaha ku fanaka ni namuntlha, vandlha ra Vukreste i nhlengeletano ya vapfumeri-kulobye lava akanaka ni ku khutazana.—Swivuriso 13:20; Varhoma 1:11, 12.

Swirho swa vandlha swi dyondzisiwa ku ‘endlela hinkwavo leswi nga swinene, kambe ngopfu-ngopfu lava nga swin’we na swona eripfumelweni.’ (Vagalatiya 6:10) Dyondzo leyi swi yi kumaka leyi sekeriweke eBibeleni yi swi susumetela ku kombisana rirhandzu ra vumakwerhu ni xinakulobye lexikulu. (Varhoma 12:10; 1 Petro 3:8) Vamakwerhu va moya va xinuna ni va xisati evandlheni va susumeteleka ku va ni musa, ku rhula ni ntwela-vusiwana lowukulu. (Vaefesa 4:3) Ematshan’weni yo va vagandzeri vo hetisisa nawu, va kombisa nkhathalelo wa rirhandzu eka van’wana.—Yakobo 1:27.

Hikokwalaho, lava va titwaka va tshikileriwile evandlheni va kuma xiyimo lexi fanaka ni xa ndyangu, lexi va endlaka va titwa va amukelekile. (Marka 10:29, 30) Swa va tiyisa ku titwa va ri entlaweni lowu nga ni vun’we ni rirhandzu. (Pisalema 133:1-3) Hi ku tirhisa vandlha, “hlonga ro tshembeka ni ro tlhariha,” ri va nyika ‘swakudya hi nkarhi lowu faneleke,’ leswi va wundlaka emoyeni.—Matewu 24:45.

Mpfuno Lowu Humaka Eka Valanguteri Va Rirhandzu

Swirho swa vandlha ra Vukreste swi nga rindzela ku kuma varisi va rirhandzu, lava twisisaka ni lava fanelekaka eka rona, lava nyikaka nseketelo wa moya ni xikhutazo. Varisi lava nga ni timfanelo to tano, va kotisa “šisirelelo loko moya wu hunga, [ni] šitšhav̌elo loko šidzedze ši fika.” (Esaya 32:1, 2) Vakulu lava vekiweke hi moya, kumbe valanguteri, va khathalela vanhu va Xikwembu lava fanaka ni tinyimpfu, va khutaza lava vabyaka ni lava tshikileriweke, naswona va lava ku vuyisa lava dyoheke.—Pisalema 100:3; 1 Petro 5:2, 3.

Kambe, huvo ya vakulu va vandlha a hi ntlawa va vaongori va vutshila kumbe vatshunguri, lava kotaka ku tshungula mavabyi ya miri kumbe swiphiqo swa ku karhateka emianakanyweni, leswi vapfumeri-kulobye va langutanaka na swona. Eka mafambiselo lawa ya swilo, lava vabyaka swa ha laveka leswaku va ‘vona n’anga.’ (Luka 5:31) Hambiswiritano, varisi volavo va nga va pfuna lava nga ni xilaveko hi tlhelo ra moya. (Yakobo 5:14, 15) Loko swi koteka, vakulu va tlhela va hlela ku nyika mpfuno wun’wana.—Yakobo 2:15, 16.

I mani museketeri wa lunghiselelo ro tano ra rirhandzu? I Yehovha Xikwembu hi byakwe! Muprofeta Ezekiyele u hlamusela Yehovha a ri la vulaka a ku: “Nḍi ta lav̌isisa tinyimpfu ta mina, nḍi ti [langutela]. . . . Nḍi ti humesa e ŝiv̌andleni hikwaŝo leŝo ti hangalakeleke ka ŝona . . . Tinyimpfu ta mina ti ta risiwa hi mina, nḍi ta ti etlerisa e hansi.” Nakambe Xikwembu xa karhateka hi tinyimpfu leti vabyaka ni leti tsaneke.—Ezekiyele 34:11, 12, 15, 16.

Mpfuno Wa Xiviri Hi Nkarhi Lowu Faneleke

Xana mpfuno wa xiviri wa kumeka hakunene evandlheni ra Vukreste? Ina, naswona swikombiso leswi landzelaka swi kombisa swiyimo swo hambana-hambana leswi vandlha ri tikombaka ri ri mpfuno eka swona.

◆ Ku lahlekeriwa hi murhandziwa. Nuna wa Anna u file endzhaku ko vabya nkarhi wo leha. U ri: “Ku sukela hi nkarhi wolowo, ndzi kombiwe rirhandzu lerikulu hi vamakwerhu va Vakreste. Marito lama hambetaka ya musa, lama seketelaka ni lama khutazaka, lama humaka eka vapfumeri-kulobye, ku katsa ni ku ndzi angarha ka vona hi rirhandzu, swi ndzi khuthazile ku ri ni ku ndzi heta matimba hilaha ku heleleke, kutani ndzi nkhensa Yehovha. Rirhandzu ra vona ri endle leswaku ndzi titwa ndzi seketeriwile swinene, eku heteleleni ndzi titwa ndzi antswa, ndzi khathaleriwile hi ndlela ya rirhandzu.” Swi nga ha endleka leswaku na wena u twe ku vava hi ku feriwa hi murhandziwa. Eminkarhini yo fana ni yoleyo, swirho swa vandlha swi nga ku chavelela swinene ni ku ku seketela emintlhavekweni.

◆ Vuvabyi. Arthur, mulanguteri la famba-fambaka wa le Poland, a a endzela mavandlha ya le Asia Xikarhi leswaku a ta ma tiyisa hi tlhelo ra moya. Eka rin’wana ra maendzo yakwe, u vabyile swinene kutani a langutana ni swiyimo swo tika loko a ri karhi a hlakarhela. Arthur u kombise ku tlangela lokukulu a ku: “Ndzi lava ku mi byela ndlela leyi vamakwerhu va xinuna ni va xisati [edorobeni ra Kazakhstan] va ndzi khathaleleke ha yona. Vamakwerhu va xinuna ni va xisati, lava vo tala va vona ndzi nga va tiviki—hambi ku ri vanhu lava tsakelaka—va tise mali, swakudya ni mirhi. . . . Va endle leswi va tsakile swinene.

“U nga ehleketa ndlela leyi ndzi titweke ha yona loko ndzi amukela mvhilopho leyi nga ni mali ni papila leri a ri ku: ‘Eka Makwerhu, ndzi ku rhumela marungula ya rirhandzu. Manana u ndzi nyike mali leswaku ndzi xava ayisikhirimi hi yona, kambe ndzi vone swi antswa leswaku ndzi ku nyika yona u ta xava mirhi. Ndzi kombela leswaku u hola hi ku hatlisa. Yehovha u hi lava hilaha ku nga heriki. Ndzi ku navelela leswinene. Tlhela u hi byela timhaka tin’wana letinene, leti akaka. Hi mina Vova.’” Ina, hilaha swi kombisiweke hakona emhakeni leyi, vanhu lavatsongo ni lavakulu evandlheni va nga va mpfuno lowu tiyisaka loko van’wana va vabya.—Vafilipiya 2:25-29.

◆ Gome. Teri a a swi navela hi mbilu hinkwayo ku va phayona, kumbe muhuweleri wa nkarhi hinkwawo wa Mfumo. Kambe, hikwalaho ka ku nonon’hweriwa, u boheke ku tshika ku phayona. U ri: “Ndzi titwe ndzi ri ni nandzu lowukulu hi ku va ndzi ringete ku endla xiavelo lexi, kambe ndzi tsandzeka ku heta ni lembe rin’we.” Teri u ve ni vonelo leri hoxeke ra leswaku ku amukeriwa ka yena hi Yehovha ku titshege ntsena hi mpimo wa ntirho lowu a nga n’wi endlelaka wona. (Ringanisa Marka 12:41-44.) Hikwalaho ko heleriwa hi ntshembo, u tihambanise ni vanhu van’wana. Kambe hi nkarhi wolowo u kume mpfuno lowu phyuphyisaka lowu humaka evandlheni.

Teri u ri: “Makwerhu wa xisati loyi ku nga khale a ri phayona u tinyiketele ku ndzi pfuna kutani a rhiya ndleve loko ndzi n’wi byela ndlela leyi ndzi titwaka ha yona. Loko ndzi suka ekaya rakwe, ndzi titwe onge ndzi rhuliwe ndzhwalo emakatleni ya mina. Ku sukela hi nkarhi wolowo, makwerhu loyi wa xisati wa phayona ni nuna wakwe, loyi a nga nkulu evandlheni, va ve mpfuno wa nkoka. Siku rin’wana ni rin’wana va ndzi bele riqingho va lava ku tiva leswaku ndzi pfuke njhani. . . . Minkarhi yin’wana va ndzi pfumelele ku hlanganyela na vona edyondzweni ya vona ya ndyangu, leswi ndzi dyondziseke nkoka wa ku va mindyangu yi tshama yi ri ni vuxaka lebyikulu.”

Swi tolovelekile leswaku vanhu vo tala—hambi ku ri Vakreste lava tinyiketeleke—va titwa va karhatekile, va hele matimba ni ku va ni xivundza. Hi nga tsaka swonghasi leswi mpfuno wa rirhandzu lowu pfumalaka vutianakanyi wu kumekaka evandlheni ra Xikwembu!—1 Vatesalonika 5:14.

◆ Timhangu ni makhombo. Tiveke eka xiyimo xa ndyangu wa vanhu va mune lava lahlekeriweke hi nhundzu ya vona hinkwayo loko yindlu ya vona yi tshwe hinkwayo. Ku nga ri khale va kume leswi va swi vitaneke “ntokoto lowu khutazaka lowu nga ta hi khumba hilaha ku nga heriki ni lowu hi kombiseke rirhandzu ra ntiyiso leri nga exikarhi ka vanhu va Yehovha.” Va ri: “Hi ku hatlisa hi hlamarisiwe hi ku va vamakwerhu va xinuna ni va xisati va hi bele tinqingho va hi seketela ni ku hi ririsa swi huma etimbilwini. Riqingho a ri tshamela ku rila nkarhi hinkwawo. Nkhathalelo wa xiviri ni rirhandzu ra hinkwavo swi hi khumbe swinene lerova hi kala hi rila mihloti ya ku tlangela.”

Ku nga ri khale, ntlawa lowukulu wa vamakwerhu wu hlengeletiwile hi vakulu va vandlha, kutani ku nga si hela masiku yo tala va akele ndyangu lowu yindlu leyintshwa. Muakelani u te: “U fanele u swi vona! Ku na tinxaka hinkwato ta vanhu lava tirhaka kwalaho—vavanuna, vavasati, vantima, Mahispano!” Lebyi a ku ri vumbhoni bya xiviri bya rirhandzu ra vumakwerhu.—Yohane 13:35.

Vakreste-kulobye va tlhele va nyika ndyangu lowu swiambalo, swakudya ni mali. Tatana wa ndyangu lowu u ri: “Leswi swi endleke hi nkarhi wa Khisimusi loko vanhu hinkwavo va ri karhi va nyikana tinyiko, kambe hi nga vula hi tiyisile leswaku a nga kona ni un’we la hiweke hi ndlela ya xiviri, leyi hlamarisaka ku fana na hina.” Kutani va ya emahlweni va ku: “Leswi ndzilo wu swi endleke ha swi rivala hakatsongo-tsongo kambe hi ku tsaka a hi swi rivali swiendlo swa musa ni vanghana lavanene. Hi nkhensa Tata wa hina wa le tilweni, Yehovha, leswi hi nga ni ndyangu lowu hlamarisaka wa vamakwerhu emisaveni, lowu nga ni vun’we, naswona hi tsaka swonghasi ku va xiphemu xa wona!”

Entiyisweni, a hi makhombo hinkwawo lama nga ta phalariwa kumbe ku langutela mpfuno wo tano. Kambe xiendlakalo lexi xi kombisa nseketelo lowu hakunene vandlha ri nga wu nyikaka.

Vutlhari Lebyi Humaka eHenhla

Vanhu vo tala va kume xihlovo xin’wana xa mpfuno ni nseketelo evandlheni ra Vukreste. Hi xihi? I minkandziyiso leyi lunghiseleriweke hi “hlonga ro tshembeka ni ro tlhariha.” Leyi nga emahlweni eka yona i timagazini ta Xihondzo xo Rindza na Xalamuka! Leswaku minkandziyiso leyi yi nyika ndzayo ni ndzetelo lowu tirhaka, yi titshege ngopfu hi vutlhari bya Xikwembu lebyi kumekaka eBibeleni. (Pisalema 119:105) Rungula ra Matsalwa ri seketeriwa hi ndzavisiso lowu wa vukheta ni lowu tshembekaka, etimhakeni to fana ni ntshikilelo wa mianakanyo, ku hlakarhela loko u tshame u khomiwa hi ndlela yo biha, swiphiqo swo hambana-hambana swa vuxaka bya vanhu ni swa ikhonomi, mintlhontlho leyi khumbaka vantshwa ni swiphiqo leswi matiko lawa ma ha hluvukaka ma langatanaka na swona. Xa nkoka eka leswi hinkwaswo, minkandziyiso leyi yi seketela ndlela ya Xikwembu tanihi yona ndlela yo antswa ya ku hanya.—Esaya 30:20, 21.

Lembe rin’wana ni rin’wana, Sosayiti ya Watch Tower yi amukela magidi ya mapapila lama kombisaka ku tlangela. Hi xikombiso, malunghana ni xihloko xa Xalamuka! lexi vulavulaka hi ku tidlaya, jaha rin’wana ra le Russia ri tsarile ri ku: “Hikwalaho ko tshamela ku va ni gome, . . . ndzi lave ku tidlaya ko tala. Xihloko lexi xi tiyise ripfumelo ra mina ra leswaku Xikwembu xi ta ndzi pfuna ndzi langutana ni swiphiqo swa mina. Xi lava leswaku ndzi hanya. Ndza xi nkhensa hikwalaho ka nseketelo wa xona lowu xi wu nyikeke hi ku tirhisa xihloko lexi.”

Loko swiyimo swa misava leyi swi vonaka swi tika ku langutana na swona, u nga tiyiseka leswaku ku na ndhawu leyi u nga tumbelaka eka yona evandlheni ra Vukreste. Hakunene, loko kwandzasi leri omeke, ra xiyimiso lexi nga riki na rirhandzu ri tswonga matimba ya wena, u nga kuma xihlovo xa mati lama nyikaka matimba enhlengeletanweni ya Yehovha. Endzhaku ko kuma nseketelo wo tano, na wena u nga phindha marito ya wansati wa Mukreste, loyi a humeleleke eku langutaneni ni vuvabyi lebyi dlayaka bya nuna wakwe kutani a tsala a ku: “Hikwalaho ka rirhandzu ni nkhathalelo leswi hi kombiweke swona, ndzi titwa onge Yehovha u hi rhwale hi xandla xakwe a hi hundzisa eka xiyimo lexi xo tika. Ndzi nkhensa swonghasi ku va ndzi ri xiphemu xa nhlengeletano leyikulu ya Yehovha!”

[Nhlamuselo ya le hansi]

[Swifaniso leswi nga eka tluka 26]

Hi nga va mpfuno lowu tiyisaka eka lava vabyaka, lava feriweke ni van’wana