Ku Hanya Hi Ripfumelo Eswitshembisweni Swa Xikwembu
“Hi mina Šikwembu, a ku na šiṅwana; nḍi Šikwembu, kutani a ku na loyi a fanaka na mina. Nḍi tiv̌isa ka ha ri ku sunguleni le’ŝi nga ta humelela e ku heleni, ni le’ŝi nga siki humelelaka, nḍa ŝi bvumba.”—ESAYA 46:9, 10.
1, 2. Hi yihi mianakanyo leyi hambanaka malunghana ni ku nghenelela ka Xikwembu etimhakeni ta misava?
XANA Xikwembu xi nghenelela ku fikela kwihi etimhakeni ta misava? Leswi vanhu va swi anakanyaka emhakeni leyi a swi fani. Van’wana va anakanya leswaku a xi ngheneleli nikatsongo. Va vula leswaku endzhaku ka loko Xikwembu xi hi vumbile, a xa ha swi lavanga ku hi pfuna, kumbe a xi swi koti. Hi ku ya hi vonelo leri, Xikwembu xi fana ni tatana loyi a khandziyisaka n’wana wakwe xikanyakanya lexintshwa, a xi yimisa kahle, ivi a xi susumeta leswaku n’wana wakwe a rhelela ha xona epatwini. Kutani tatana loyi a tifambela. N’wana loyi u rhelela a ri yexe; a nga ha wa kumbe a nga wi. Hambi ko endleka yini, tatana a nga ha ti ngheni.
2 Van’wanyana va anakanya leswaku Xikwembu xi kongomisa xin’wana ni xin’wana lexi hi xi endlaka evuton’wini bya hina, naswona xi nghenelela eka xin’wana ni xin’wana lexi endlekaka eka hinkwaswo leswi xi swi vumbeke. Kambe loko swi ri tano, van’wana va nga gimeta hileswaku Xikwembu a xi vangi swilo leswinene leswi humelelaka ntsena, kambe hi xona xi vangaka ni vugevenga kun’we ni timhangu leti kombaka vanhu maxangu. Ku tiva ntiyiso hi mintirho ya Xikwembu swi ta hi pfuna ku tiva leswi hi nga swi langutelaka eka xona. Nakambe swi ta tiyisa ripfumelo ra hina malunghana ni leswaku switshembiso swa xona swi ta hetiseka hakunene.—Vaheveru 11:1.
3. (a) Hi swi tivisa ku yini leswaku Yehovha i Xikwembu xa xikongomelo? (b) Ha yini ku vuriwa leswaku Yehovha u ‘vumba’ kumbe ku kanela xikongomelo xakwe?
3 Mhaka ya nkoka malunghana ni ku nghenelela ka Xikwembu etimhakeni ta vanhu hileswaku Yehovha i Xikwembu xa xikongomelo. Sweswo swi kombisiwa kahle hi nhlamuselo ya vito ra yena. “Yehovha” swi vula “La Vangaka Leswaku Swi Va Kona.” Hi ku endla swilo hakatsongo-tsongo, Yehovha u va Muhetisisi wa switshembiso swa yena hinkwaswo. Hikwalaho, Yehovha u vuriwa la ‘vumbaka’ kumbe la kanelaka xikongomelo xa yena malunghana ni swiendlakalo kumbe swiendlo swa nkarhi lowu taka. (2 Tihosi 19:25; Esaya 46:11) Marito lawa ma huma eritweni ra Xiheveru leri nge ya·tsarʹ, leri fambisanaka ni rito leri vulaka “muv̌umbi.” (Yeremiya 18:4) Tanihi leswi muvumbi wa vutshila a nga tekaka vumba a endla xibye xo xonga ha byona, Yehovha a nga vumba kumbe ku kongomisa swilo leswaku swi hetisisa ku rhandza ka yena.—Vaefesa 1:11.
4. Xikwembu xi yi lunghiselele njhani misava leswaku vanhu va tshama eka yona?
4 Hi xikombiso, xikongomelo xa Xikwembu a ku ri leswaku misava yi va ndhawu yo xonga swinene, laha ku nga ta tshama vanhu lava hetisekeke, lava yingisaka. (Esaya 45:18) Yehovha u endlele wanuna ni wansati vo sungula malunghiselelo lamanene a nga si va vumba. Tindzima to sungula ta buku ya Genesa ti hlamusela ndlela leyi Yehovha a simekeke nhlikanhi ni vusiku ha yona, kun’we ni misava ni lwandle. Endzhaku u mirise swimilana ni ku vumba swiharhi. Ku lunghiselela misava hi ndlela leyi leswaku vanhu va tshama eka yona swi teke magidi yo tala ya malembe. Ntirho lowu wu endliwe kahle wu hela. Wanuna ni wansati vo rhanga va sungule ku hanya aEdeni, paradeyisi yo tsakisa leyi a yi ri ni hinkwaswo leswi a swi laveka leswaku va tiphina hi vutomi. (Genesa 1:31) Xisweswo Yehovha u nghenelele hi ku kongoma etimhakeni ta misava, hakatsongo-tsongo a endla leswaku mintirho yakwe yi pfumelelana ni xikongomelo xakwe xo hlawuleka. Xana ku andza ka vanhu ku hundzule ku nghenelela ka yena?
Ndlela Leyi Yehovha A Khomaka Vanhu Ha Yona Yi Ni Mindzilikana
5, 6. Ha yini ndlela leyi Xikwembu xi khomaka vanhu ha yona yi ri ni mindzilakana?
5 Hambileswi a nga na wona matimba yo endla tano, Yehovha a nga kongomisi ni ku lawula nchumu wun’wana ni wun’wana lowu vanhu va wu endlaka. Ku ni swivangelo emhakeni leyi. Xivangelo xin’wana hileswaku vanhu va vumbiwe hi xifaniso xa Xikwembu, va ri ni ntshunxeko wa ku tihlawulela leswi va swi rhandzaka. Yehovha a nga hi sindzisi leswaku hi endla ku rhandza ka yena; phela, a hi swipopana. (Deteronoma 30:19, 20; Yoxuwa 24:15) Hambileswi hi faneleke hi tihlamulela eka Xikwembu malunghana ni swiendlo swa hina, hi rirhandzu xi hi nyike ntshunxeko lowukulu wa ku tiendlela xiboho eka ndlela leyi hi rhandzaka ku hanya ha yona.—Varhoma 14:12; Vaheveru 4:13.
6 Xivangelo xin’wana xa ku va Xikwembu xi nga kongomisi nchumu wun’wana ni wun’wana lowu endlekaka, xi vonaka eka mphikamakaneta leyi Sathana a yi pfuxeke aEdeni. Sathana u tlhontlhe vuhosi bya Xikwembu. U tshembise Evha leswi a swi vonaka swi ri ndlela ya ku tifuma—u xi amukerile xitshembiso lexi, ivi endzhaku xi amukeriwa hi nuna wakwe Adamu. (Genesa 3:1-6) Hiloko Xikwembu xi pfumelela vanhu leswaku va tifuma nkarhi wo karhi, va ta tivonela hi voxe loko leswi Sathana a swi vuleke swi ri ntiyiso. Hikwalaho, swilo swo biha leswi vanhu va swi endlaka namuntlha a swi nge rhwexiwi Xikwembu. Mayelana ni vanhu lava xandzukeke, Muxe u tsarile a ku: “Va endle hi ndlela leyi onhakeke; a hi vana [va Xikwembu], xihoxo i xa vona vini.”—Deteronoma 32:5, NW.
7. Hi xihi xikongomelo xa Yehovha mayelana ni misava kun’we ni vanhu?
7 Kambe, hambiloko Yehovha a pfumelele vanhu leswaku va tihlawulela ni ku ringeta vulawuri lebyi va byi lavaka, a nga khondli mavoko hi ku helela etimhakeni ta misava, hikuva sweswo a swi ta hi siya hi nga ri na ntshembo wa leswaku u ta swi hetisisa switshembiso swakwe. Hambileswi Adamu na Evha va xandzukeleke vuhosi bya Xikwembu, Yehovha a nga xi hundzulanga xikongomelo xa yena lexinene mayelana ni misava ni vanhu. Hakunene u ta hundzula misava yi va paradeyisi leyi vaaki va yona va nga ta va vanhu lava hetisekeke, lava yingisaka ni lava tsakeke. (Luka 23:42, 43) Rungula ra Bibele leri sukelaka eka Genesa ku ya eka Nhlavutelo ri hlamusela ndlela leyi Yehovha a endleke swilo hakatsongo-tsongo ha yona leswaku a fikelela pakani yoleyo.
Xikwembu Xi Teka Goza Leswaku Xi Hetisisa Ku Rhandza Ka Xona
8. A ku katseka yini eku yiseni ka Vaisrayele eTikweni leri Tshembisiweke?
8 Xikwembu xi swi kombise hi ndlela leyi xi khomeke tiko ra Israyele ha yona leswaku xi ta xi hetisisa xikongomelo xa xona. Hi xikombiso, Yehovha u tiyisekise Muxe leswaku U ta kutsula Vaisrayele aEgipta a va yisa eTikweni leri Tshembisiweke, leri a ri khuluka ntswamba ni vulombe. (Eksoda 3:8) Xexo a xi ri xitiviso xa nkoka ni lexi tiyisaka nhlana. A xi ta katsa ku kutsula Vaisrayele volavo—lava nhlayo ya vona a yi ri kwalomu ka timiliyoni tinharhu loko va hlangane ni vanghana va vona—xi va kutsula etikweni ra matimba leri a ri ala leswaku va famba. (Eksoda 3:19) Etikweni leri a va ya eka rona a ku tshama vanhu va matimba lava a va ta lwisana swinene na vona loko va fika. (Deteronoma 7:1) Vaisrayele a va ta hundza hi le mananga, laha a va ta lava swakudya ni mati. Lexi i xiyimo lexi pfumeleleke Yehovha ku kombisa matimba yakwe lamakulu ni Vukwembu bya yena.—Levhitika 25:38.
9, 10. (a) Ha yini Yoxuwa a kote ku tiyisekisa leswaku switshembiso swa Xikwembu swa tshembeka? (b) I swa nkoka ku fikela kwihi leswaku hi tiyiseka hi vuswikoti bya Xikwembu bya ku hakela vanhu va xona lava tshembekaka?
9 Xikwembu xi humese Vaisrayele aEgipta hi ntlhandlamano wa swiendlo swa matimba. Xo sungula, xi hlasele tiko ra Egipta hi makhombo lamakulu ya khume. Endzhaku, xi hambanise Lwandle ro Tshwuka, leswi pfuneke Vaisrayele ku baleka, kutani vuthu ra Vaegipta leri a ri va hlongorisa ri lovisiwa. (Pisalema 78:12, 13, 43-51) Endzhaku ka sweswo, xi khathalele Vaisrayele emananga ku ringana 40 wa malembe, xi va nyika manna, mati ni ku endla leswaku tinguvu ta vona ti nga hlakali ni leswaku milenge ya vona yi nga pfimbi. (Deteronoma 8:3, 4) Loko Vaisrayele va nghene eTikweni leri Tshembisiweke, Yehovha u va pfunile leswaku va hlula valala va vona. Yoxuwa, loyi a kombiseke ripfumelo ro tiya eka switshembiso swa Yehovha, u vone swilo leswi hinkwaswo hi mahlo. Xisweswo, u kote ku byela vakulukumba va nkarhi wakwe a ku: “Pfumelani hi timbilu hikwato ta ṅwina ni mimoya hikwayo ya ṅwina, mi tiv̌a leŝaku a ku wanga na rito riṅwe ra marito hikwawo la’manene lawa Yehova, Šikwembu ša ṅwina, a ma v̌uleke henhla ka ṅwina; kambe mi endleriwe hikwawo.”—Yoxuwa 23:14.
10 Ku fana na Yoxuwa wa khale, Vakreste namuntlha va tiyiseka hi ku helela leswaku Xikwembu xa swi rhandza ku lwela lava xi tirhelaka, naswona xi ni matimba ya ku endla tano. Ku tiyiseka hi leswi, i nchumu wa nkoka eka ripfumelo ra hina. Muapostola Pawulo u tsarile a ku: “Handle ka ripfumelo a swi koteki ku xi tsakisa kahle, hikuva la tshinelelaka Xikwembu u fanele a kholwa leswaku . . . hi xona muhakeri wa lava xi lavaka hi mbilu hinkwayo.”—Vaheveru 11:6.
Xikwembu Xi Vona Swa Nkarhi Lowu Taka
11. I swilo swihi leswi endlaka leswaku Xikwembu xi hetisisa swikongomelo swa xona?
11 Se hi swi vonile leswaku hambileswi Xikwembu xi pfumelelaka vanhu leswaku va endla leswi va swi rhandzaka ni ku tirhisa vulawuri lebyi va byi tsakelaka, xi ni matimba ya ku teka goza ro hetisisa xikongomelo xa xona, naswona xi tiyimiserile ku endla tano. Kambe ku ni xin’wana lexi tiyisekisaka leswaku switshembiso swa Xikwembu swi ta hetiseka hakunene. Yehovha u kota ku vona swa nkarhi lowu taka. (Esaya 42:9) Hi ku tirhisa muprofeta wa xona, Xikwembu xi te: “Ṭunḍukani ŝilo le’ŝi humeleleke khale; hikuv̌a hi mina Šikwembu, a ku na šiṅwana; nḍi Šikwembu, kutani a ku na loyi a fanaka na mina. Nḍi tiv̌isa ka ha ri ku sunguleni le’ŝi nga ta humelela e ku heleni, ni le’ŝi nga siki humelelaka, nḍa ŝi bvumba. Makungu ya mina ma ta tiya, kutani nḍi ta endla ku ranḍa ka mina hikwaku.” (Esaya 46:9, 10) Murimi la nga ni ntokoko u tiva nkarhi ni ndhawu yo byala mbewu, kambe a nga ha va a nga tiyiseki leswaku leswi a swi byaleke swi ta kula njhani. Hambiswiritano, “Hosi leyi nga riki na makumu” yi kota ku swi vona kahle ka ha ri emahlweni leswaku hi wihi nkarhi lowu yi faneleke yi teka goza ha wona leswaku yi hetisisa xikongomelo xa yona, naswona yi fanele yi teka goza ra kona endhawini yihi.—1 Timotiya 1:17.
12. Yehovha u byi tirhise njhani vuswikoti byo tiva swilo ka ha ri emahlweni enkarhini wa Nowa?
12 Xiya ndlela leyi Xikwembu xi byi tirhiseke ha yona vuswikoti byo tiva swilo swa nkarhi lowu taka emasikwini ya Nowa. Hikwalaho ka vubihi lebyi a byi hangalake swinene lerova byi tata misava, Xikwembu xi endle xiboho xo herisa vanhu lava nga yingisiki. Xi veke nkarhi lowu a xi ta herisa vanhu lava ha wona, malembe ya 120 lawa a ma ha ta. (Genesa 6:3) Loko a veka nkarhi wolowo, Yehovha a nga ehleketanga hi ku lovisiwa ka lavo homboloka ntsena, hikuva sweswo a a ta swi endla nkarhi wihi ni wihi. Nkarhi lowu Yehovha a wu vekeke wu pfumelele ni ku ponisiwa ka lavo lulama. (Ringanisa Genesa 5:29.) Hikwalaho ka vutlhari bya xona, Xikwembu xi wu tive ka ha ri emahlweni nkarhi wo avela vanhu ntirho lowu a wu ta yisa eka makumu wolawo. Xi nyike Nowa rungula leri andlariweke kahle hi vuenti. Nowa a a fanele a aka ngalava “leswaku ku ponisiwa ndyangu wakwe,” naswona lavo homboloka a va ta lovisiwa hi ndhambi ya misava hinkwayo.—Vaheveru 11:7; Genesa 6:13, 14, 18, 19.
Ntirho Lowukulu Wo Aka
13, 14. Ha yini ntirho wo aka ngalava a wu ri xiavelo lexi tlhontlhaka?
13 Xiya xiavelo lexi hi ku ya hi langutelo ra Nowa. Leswi Nowa a a ri munhu wa Xikwembu, a a swi tiva leswaku Yehovha u ta lovisa vanhu lava nga n’wi chaviki. Kambe, ku nga si humelela sweswo, a ku ri ni ntirho lowu a wu fanele wu endliwa—ntirho lowu a wu lava ripfumelo. Ku akiwa ka ngalava a ku ta va ntirho lowukulu. Xikwembu a xi n’wi nyike mimpimo ya yona. Ngalava a yi ta leha ku tlula timbala tin’wana ta mintlangu ya bolo ta namuntlha, naswona a yi ta ringana ni muako wa swithezi swa ntlhanu hi ku tlakuka. (Genesa 6:15) A yi ta akiwa hi vanhu lava nga riki na ntokoto naswona va ri vatsongo hi nhlayo. A va nga ta va na swona switirho swo rharhangana leswi tirhisiwaka namuntlha. Ku tlula kwalaho, tanihi leswi Nowa a a nga ri na byona vuswikoti lebyi Yehovha a a ri na byona bya ku tiva swilo ka ha ri emahlweni, a a nga ta swi tiva swiyimo leswi a swi ta humelela hi malembe lama landzelaka, leswi a swi ta olovisa ntirho wo aka kumbe swi wu kavanyeta. Nowa u fanele a tivutise swivutiso swo tala. Xana swilo swo aka a swi ta kumiwa njhani? Swiharhi a a ta swi hlengeleta njhani? A ku ta laveka swakudya swa muxaka muni naswona a swi ta va swo tanihi kwihi? Kahle-kahle, Ndhambi leyi vuriweke ka ha ri emahlweni a yi ta fika rini?
14 Nakambe a ku ri ni swiyimo swa vanhu va nkarhi wolowo. Vuhomboloki a byi tinyike matimba. Tinefelimi ta matimba—ku nga vana lava tintsumi to homboloka ti va tswaleke ni vavasati—ti tate misava hi madzolonga. (Genesa 6:1-4, 13) Ku tlula kwalaho, ntirho wa ku aka ngalava a wu nga ta endleriwa exihundleni. Vanhu a va ta tivutisa leswaku Nowa u endla yini, kutani a a ta va byela. (2 Petro 2:5) Xana a ku languteriwe leswaku va ta pfumelelana na swona ke? Doo! Emalembeni ma nga ri mangani lama hundzeke, Enoko wo tshembeka a a tivise ta ku lovisiwa ka lavo homboloka. Rungula ra yena ri yimise vanhu tindleve lerova Xikwembu ‘xi n’wi teka,’ kumbe xi komisa vutomi byakwe, handle ko kanakana xi endlela leswaku a nga dlayiwi hi valala va xona. (Genesa 5:24; Vaheveru 11:5; Yudha 14, 15) Nowa a a nga ta twarisa rungula leri fanaka leri yimisaka vanhu tindleve ntsena, kambe a a ta tlhela a aka ngalava. Loko ngalava yoleyo yi ri karhi yi akiwa, a yi ta va xitsundzuxo lexikulu xa ku tshembeka loku Nowa a veke na kona loko a langutane ni vanhu vo homboloka lava a va hanya enkarhini wakwe!
15. Ha yini Nowa a a tiyiseka leswaku u ta swi kota ku hetisisa xiavelo xakwe?
15 Nowa a a swi tiva leswaku ntirho lowu wu seketeriwa ni ku katekisiwa hi Xikwembu xa Matimba Hinkwawo. Xana a ku nga ri yena Yehovha loyi a n’wi nyikeke ntirho lowu? Yehovha a a tiyisekise Nowa leswaku yena ni ndyangu wakwe va ta nghena engalaveni leyi heleke kutani va ponisiwa eka Ndhambi ya misava hinkwayo. Xikwembu xi tlhele xi kandziyisa ku tiyiseka ka mhaka yoleyo hi ntwanano lowu tiyeke. (Genesa 6:18, 19) Handle ko kanakana, Nowa u swi lemukile leswaku Yehovha u anakanyisise hi hinkwaswo leswi a swi katseka a nga si n’wi nyika xiavelo lexi. Ku tlula kwalaho, Nowa a a swi tiva leswaku Yehovha u ni matimba yo nghenelela a n’wi pfuna loko swi laveka. Kutani ripfumelo ra Nowa ri n’wi susumetele ku teka goza. Ku fana na Abrahama ntukulu wakwe, Nowa a a “kholwa hi ku helela leswaku leswi [Xikwembu] xi swi tshembiseke a xi kota ni ku swi endla.”—Varhoma 4:21.
16. Loko ntirho wo aka ngalava wu ya emahlweni, ripfumelo ra Nowa ri tiyisiwe njhani?
16 Loko malembe ma ri karhi ma hundza, ngalava yi ri karhi yi akiwa, ripfumelo ra Nowa ri tiyisiwile. Swiphiqo swa ku aka ni swa matirhelo swi tlhantlhiwile. Miringo yi hluriwile. A ku nga ri na nkaneto lowu a wu ta yimisa ntirho lowu. Ndyangu wa Nowa wu vone nseketelo ni nsirhelelo wa Yehovha. Loko Nowa a ya emahlweni, ‘mfanelo leyi ringiweke ya ripfumelo ra yena yi vange ku tiyisela.’ (Yakobo 1:2-4) Eku heteleleni, ngalava yi hetiwile, Ndhambi yi fika, kutani Nowa ni ndyangu wakwe va pona. Nowa u vone ku hetiseka ka switshembiso swa Xikwembu, ku fana na Yoxuwa endzhaku. Ripfumelo ra Nowa ri hakeriwile.
Yehovha U Seketela Ntirho
17. Nkarhi wa hina wu fana njhani ni minkarhi ya Nowa?
17 Yesu u vule ka ha ri emahlweni leswaku nkarhi wa hina a wu ta fana ni minkarhi ya Nowa. Nakambe Xikwembu xi tiyimisele ku lovisa lavo homboloka, naswona xi veke nkarhi lowu leswi swi nga ta endleka ha wona. (Matewu 24:36-39) Xi tlhele xi endla malunghiselelo yo ponisa lava lulameke. Hambileswi Nowa a a fanele a aka ngalava, malandza ya Xikwembu namuntlha ma fanele ma twarisa swikongomelo swa Yehovha, ma dyondzisa van’wana Rito ra yena ni ku endla vadyondzisiwa.—Matewu 28:19.
18, 19. Hi swi tivisa ku yini leswaku ku chumayeriwa ka mahungu lamanene ku seketeriwa hi Yehovha?
18 Loko Yehovha a a nga seketelanga Nowa ni ku n’wi tiyisa, ingi ngalava yi nga akiwanga. (Ringanisa Pisalema 127:1.) Hilaha ku fanaka, Vukreste bya ntiyiso a byi nga ta ya emahlweni loko a byi nga seketeriwi hi Yehovha, naswona a byi nga ta humelela. Mhaka leyi yi lemukiwe eka lembe-xidzana ro sungula hi Gamaliyele, Mufarisi la xiximekaka tlhelo mudyondzisi wa Nawu. Loko Sanedri ya Vayuda yi lave ku lovisa vaapostola, u tsundzuxe huvo leyi a ku: “Mi nga tikarhati hi vanhu lava, kambe va tshikeni; (hikuva, loko kungu leri kumbe ntirho lowu wu huma evanhwini, wu ta hluleka; kambe loko wu huma eka Xikwembu, a mi nge swi koti ku va hlula.)”—Mintirho 5:38, 39.
19 Ku humelela ka ntirho wo chumayela eka lembe-xidzana ro sungula ni namuntlha, ku kombise leswaku lowu a hi ntirho wa vanhu, kambe i wa Xikwembu. Xihloko lexi landzelaka xi ta hlamusela swiyimo ni swiendlakalo swin’wana leswi tsakisaka leswi pfuneteke leswaku ntirho lowu wu humelela swinene etindhawini to tala.
U Nga Heleriwi Hi Ntshembo!
20. I vamani lava hi seketelaka loko hi chumayela mahungu lamanene?
20 Hambileswi hi hanyaka “[eminkarhini] ya mangava leyi swi nonon’hwaka ku langutana na yona,” hi nga tiyiseka leswaku swilo hinkwaswo swi le mavokweni ya Yehovha. U seketela ni ku tiyisa vanhu vakwe lava tiyimiseleke ku heta ku chumayela mahungu lamanene, ku nga si fika nkarhi lowu vekiweke hi Xikwembu wa makumu ya mafambiselo lawa yo homboloka ya swilo. (2 Timotiya 3:1; Matewu 24:14) Yehovha wa hi rhamba leswaku hi va “vatirhi-kulobye” na yena. (1 Vakorinto 3:9) Nakambe ha tiyiseka leswaku Kreste Yesu u na hina entirhweni lowu, naswona hi nga titshega hi nseketelo ni vukongomisi bya tintsumi.—Matewu 28:20; Nhlavutelo 14:6.
21. Hi wihi ntshembo lowu hi nga laviki ku heleriwa hi wona?
21 Hikwalaho ka leswi Nowa ni ndyangu wakwe va kombiseke ripfumelo eka switshembiso swa Yehovha, va ponisiwile eka ndhambi. Lava va kombisaka ripfumelo leri fanaka namuntlha va ta ponisiwa “enhlomulweni lowukulu” lowu taka. (Nhlavutelo 7:14) Hi hanya eminkarhini leyi tsakisaka hakunene. Hi langutele swiendlakalo swo hlawuleka! Ku nga ri khale, Xikwembu xi ta teka goza xi simeka matilo lamantshwa ni misava leyintshwa yo saseka, laha ku nga ta va ni ku lulama. (2 Petro 3:13) U nga tshuki u heleriwa hi ntshembo wa leswaku hinkwaswo leswi Xikwembu xi swi vulaka, xi ni matimba ya ku swi endla.—Varhoma 4:21.
Tinhla To Ti Tsundzuka
◻ Ha yini Yehovha a nga lawuli timhaka hinkwato ta vanhu?
◻ Vuswikoti bya Yehovha bya ku hetisisa xikongomelo xa yena byi vonake njhani eka ndlela leyi xi khomeke Vaisrayele ha yona?
◻ Vuswikoti bya Yehovha bya ku vona swa nkarhi lowu taka byi kombisiwe njhani esikwini ra Nowa?
◻ I ku tiyiseka kwihi loku hi nga vaka na kona eka switshembiso swa Xikwembu?