Swikombiso Leswinene Xana Wa Dyondza Eka Swona?

“MI VE xikombiso eka vapfumeri hinkwavo eMakedoniya ni le Akaya.” Muapostola Pawulo u tsalele Vakreste lava tshembekaka lava tshamaka eTesalonika marito lawa. Xikombiso lexi va xi vekeleke vapfumeri-kulobye a xi bumabumeleka hakunene. Hambiswiritano, Vatesalonika na vona a va landzela xikombiso lexi Pawulo swin’we ni vanakulobye va yena va xi vekeke. Pawulo u te: “Mahungu lamanene lawa hi ma chumayelaka a ma humelelanga exikarhi ka n’wina hi ku vulavula ntsena kambe ni hi matimba ni moya lowo kwetsima ni ku khorwiseka lokukulu, tanihi leswi mi swi tivaka leswaku hi ve vanhu va muxaka muni eka n’wina hi swi endlela n’wina; naswona mi ve vatekeleri va hina.”—1 Vatesalonika 1:5-7.

Ina, Pawulo a a nga chumayeli ntsena. Vutomi bya yena a byi ri dyondzo hi byoxe—xikombiso xa ripfumelo, ku tiyisela ni ku tinyikela. Hikwalaho ka leswi, Pawulo ni vanakulobye va yena va ve ni nkucetelo lowukulu evuton’wini bya vanhu va le Tesalonika, va va susumetele ku amukela ntiyiso “ehansi ka nhlomulo lowukulu.” Kambe, a ku nga ri Pawulo ni vatirhi-kulobye ntsena lava a va ri ni nkucetelo lowunene eka vapfumeri volavo. Xikombiso xa van’wana lava tiyiseleke nhlomulo na xona a xi ri xikhutazo. Pawulo u tsalele Vatesalonika a ku: “Mi ve vatekeleri va mavandlha ya Xikwembu lama nga eYudiya evun’weni na Kreste Yesu, hikuva na n’wina mi sungule ku xanisiwa hi varikwenu hi swilo leswi fanaka ni leswi na vona va xanisiweke ha swona hi Vayuda.”—1 Vatesalonika 2:14.

Kreste Yesu—Xikombiso Lexikulu

Hambileswi Pawulo hi yexe a vekeke xikombiso lexi faneleke xi tekeleriwa, u swi kotile ku vulavula hi Yesu Kreste tanihi xikombiso lexikulu lexi Vakreste va faneleke va xi landzela. (1 Vatesalonika 1:6) Kreste a a ri Xikombiso lexikulu xa hina naswona wa ha ri xona. Muapostola Petro u tsarile: “Mi vitaneriwe endleleni leyi, hikuva hambi Kreste u xanisekele n’wina, a mi siyela ntila leswaku mi landzelerisisa mikondzo yakwe.”—1 Petro 2:21.

Hambiswiritano, Yesu u hete vutomi bya yena a ri munhu wa nyama kwalomu ka malembe ya 2 000 lama hundzeke. Sweswi u “tsham[a] eku vonakaleni loku nga tshinelelekiki” a ri xivumbiwa xa moya lexi nga fiki. Hikwalaho ka sweswo, “[a ku] na munhu ni un’we la n’wi voneke kumbe la nga n’wi vonaka.” (1 Timotiya 6:16) Kutani, xana hi nga n’wi tekelela njhani? Ndlela yin’wana i ku dyondza tibuku ta mune ta le Bibeleni leti vulavulaka hi vutomi bya Yesu. Tievhangeli leti ti hlamusela vumunhu bya yena, ndlela leyi a hanyeke ha yona ni ‘langutelo ra yena ra mianakanyo.’ (Vafilipiya 2:5-8) Vutivi lebyi engetelekeke byi nga kumiwa hi ku dyondza hi vukheta buku leyi nge Nghwazi Leyi Tshameke Yi Hanya, leyi hlamuselaka swiendlakalo swa vutomi bya Yesu hi vuxokoxoko lebyikulu ni hi ku tlhandlamana ka minkarhi.a

Xikombiso xa Yesu xa ku tinyikela xi ve ni vuyelo lebyikulu eka muapostola Pawulo. U byele Vakreste va le Korinto a ku: “Loko ku ri mina ndzi ta tirhisa hinkwaswo leswi ndzi nga na swona hi ku tsaka lokukulu naswona ndzi ta tirhisiwa hi ku helela hikwalaho ka mimoya-xiviri ya n’wina.” (2 Vakorinto 12:15) Mawaku langutelo leri fanaka ni ra Kreste! Loko hi ri karhi hi anakanyisisa hi xikombiso lexi hetisekeke xa Kreste, na hina hi fanele hi susumeteleka ku n’wi tekelela eka ndlela leyi hi hanyaka ha yona.

Hi xikombiso, Yesu u hi dyondzise leswaku hi fanele hi titshega hi switshembiso swa Xikwembu swo hi nyika swilo leswi vonakaka. Kambe u endle leswi tlulaka sweswo. U kombise ripfumelo ro tano ni ku tshemba Yehovha siku ni siku. U te: “Timhungubye ti ni micele ni tinyenyana ta tilo ti ni byetlelo, kambe N’wana wa munhu a nga na ndhawu yo veka nhloko yakwe.” (Matewu 6:25; 8:20) Xana ku karhateka hi swilo leswi vonakaka ku lawula mianakanyo ni swiendlo swa wena? Kumbe, xana vutomi bya wena byi kombisa leswaku u lava Mfumo ku sungula? Naswona ku vuriwa yini hi langutelo ra wena entirhweni wa Yehovha? Xana ri fana ni leriya ra Xikombiso xa hina, Yesu? Bibele yi kombisa leswaku Yesu a a nga chumayeli leswaku vanhu va fanele va hiseka ntsena kambe u kombise ku hiseka koloko minkarhi yo tala. (Yohane 2:14-17) Mawaku xikombiso lexinene lexi Yesu a xi vekeke loko swi ta eka rirhandzu! Phela, u nyikele hi vutomi bya yena leswaku byi va gandzelo hikwalaho ka vadyondzisiwa va yena! (Yohane 15:13) Xana u tekelela Yesu hi ku kombisa rirhandzu eka vamakwenu lava nga Vakreste? Kumbe, xana u pfumelela swihoxo swa van’wana leswaku swi ku sivela ku va rhandza?

Loko hi ri karhi hi lwela ku landzela xikombiso xa Kreste, hakanyingi hi ta tsandzeka eka swin’wana. Kambe entiyisweni Yehovha u tsakisiwa hi matshalatshala ya hina yo ‘ambala Hosi Yesu Kreste.’—Varhoma 13:14.

“Swikombiso eNtlhambini”

Xana namuntlha va kona vanhu evandlheni lava va nga vaka swikombiso eka hina? Va kona hakunene! Vamakwerhu lava vekiweke leswaku va va ni vutihlamuleri hi vona ngopfu-ngopfu lava faneleke va veka xikombiso. Pawulo u byele Tito, loyi a tirheke emavandlheni ya le Kreta a tlhela a veka valanguteri, leswaku nkulu un’wana ni un’wana la vekiweke u fanele a va ‘munhu la pfumalaka xihehlo.’ (Tito 1:5, 6) Muapostola Petro hilaha ku fanaka u tsundzuxe “vakulukumba” leswaku va va “swikombiso entlhambini.” (1 Petro 5:1-3) Naswona ku vuriwa yini hi lava va nga malandza ya vutirheli? Na vona hilaha ku fanaka va fanele va va “vavanuna lava tirhelaka hi mukhuva lowunene.”—1 Timotiya 3:13.

Ina, a hi swinene ku langutela leswaku nkulu kumbe nandza wa vutirheli un’wana ni un’wana u fanele a va ni vutshila lebyi hlamarisaka eka xivumbeko xin’wana ni xin’wana xa vutirheli bya Vukreste. Pawulo u byele Vakreste va le Rhoma a ku: “H[i] ni tinyiko leti hambanaka hi ku ya hi musa lowu nga faneriwiki lowu hi nyikiweke wona.” (Varhoma 12:6) Ku ni swilo swo hambana-hambana leswi vamakwerhu vo hambana-hambana va swi endlaka kahle. A hi swinene ku langutela leswaku vakulu va ta endla va tlhela va vula xin’wana ni xin’wana hi ndlela leyi hetisekeke. Eka Yakobo 3:2 Bibele yi ri: “Hinkwerhu ha khunguvanyeka minkarhi yo tala. Loko mani na mani a nga va khunguvanyisi van’wana hi rito, loyi i munhu la hetisekeke, la kotaka ku lawula ni miri wakwe hinkwawo.” Hambileswi vakulu va nga hetisekangiki, ku fana na Timotiya, va nga swi kota ku va “[swikombiso swa] lava tshembekaka eku vulavuleni, eku tikhomeni, erirhandzwini, eripfumelweni, evutengini.” (1 Timotiya 4:12) Loko vakulu va endla tano, swi ta va olovela lava nga entlhambini ku tirhisa xitsundzuxo xa Vaheveru 13:7: “Tsundzukani lava rhangelaka exikarhi ka n’wina, . . . naswona loko mi ri karhi mi xiyisisa vuyelo bya ku tikhoma ka vona, mi tekelela ripfumelo ra vona.”

Swikombiso Swin’wana Swa Manguva Lawa

Eka makume ya malembe lama hundzeke, vanhu va ntsandza-vahlayi va tikombise va ri swikombiso leswinene. Ku vuriwa yini hi magidi ya varhumiwa lava tinyikeleke lava “siyeke tindlu kumbe vamakwavo va xinuna kumbe vamakwavo va xisati kumbe tatana kumbe manana kumbe vana kumbe masimu” leswaku va hetisisa xiavelo xa Vukreste emasin’wini man’wana? (Matewu 19:29) Nakambe, anakanya hi valanguteri lava famba-fambaka ni vasati va vona, vavanuna ni vavasati lava tirhaka tanihi vatirhi vo tirhandzela etihofisini ta Sosayiti ya Watch Tower, ni maphayona lama nga vatirheli emavandlheni. Xana swikombiso swo tano swi nga va khutaza van’wana? Muvuri un’wana wa evhangeli la nga Mukreste eAsiya u tsundzuka murhumiwa loyi a a ri eka ntlawa wa vunhungu wa Xikolo xa Bibele xa Gilead xa Watchtower. U vule leswaku makwerhu loyi la tshembekaka a a “tiyimiserile ku tiyisela tinsuna to tala ni moya wo tsakama lowu hetaka mongo. . . . Lexi a xi tsakisa ku tlula mpimo a ku ri vuswikoti bya yena byo endla swingheniso hi Xichayina ni Ximalay hambileswi a a huma eNghilandhi.” Byi ve byihi vuyelo bya xikombiso lexi lexinene? Makwerhu loyi u te: “Ku rhula ka yena ni ku tiyiseka ka yena swi ndzi susumetele ku lava ku va murhumiwa loko ndzi kurile.” A swi hlamarisi leswi makwerhu loyi na yena a veke murhumiwa.

Watch Tower Publications Index yi ni nxaxamelo wa timhaka ta vutomi to tala leti humeleleke eka timagazini ta Xihondzo xo Rindza ni Xalamuka! Timhaka leti ti vulavula hi vanhu lava tshikeke mintirho ya ku tihanyisa ni tipakani ta misava, va hlula ku tsana, va cinca vumunhu bya vona hilaha ku heleleke, va va ni langutelo lerinene loko va langutane ni maxangu, naswona va kombiseke ku hiseka, ku tiyisela, ku tshembeka, ku titsongahata ni moya wa ku tinyikela. Muhlayi un’wana u tsale leswi landzelaka malunghana ni timhaka leti: “Loko ndzi ri karhi ndzi hlaya leswi van’wana va langutaneke na swona swi ndzi endla Mukreste la titsongahataka ni la nkhensaka swinene, naswona ti ndzi pfune leswaku ndzi nga titeki ndzi ri la antswaka swinene kumbe ku va ni vutianakanyi.”

Ku engetela kwalaho, u nga swi rivali swikombiso leswinene leswi nga evandlheni ra ka n’wina: tinhloko ta mindyangu leti ti nga tsandzekiki ku khathalela swilaveko swa nyama ni swa moya swa mindyangu ya tona; vamakwerhu va xisati—lava katsaka vamanana lava nga voxe—lava langutanaka ni mintshikilelo ya ku kurisa vana va ri karhi va hlanganyela hi ku hiseka evutirhelini; vanhu lava dyuhaleke ni lava lamaleke lava hambetaka va tshembeka ku nga khathariseki ku tsana loku yaka ku engeteleka ni rihanyo leri yaka ri hohloka. Xana swikombiso swo tano a swi ku khutazi?

Ina, misava yi tele hi swikombiso swo biha. (2 Timotiya 3:13) Nilokoswiritano, anakanya hi xikhutazo xa Pawulo lexi yaka eka Vakreste lava tshamaka eYudiya. Endzhaku ko rungula hi mahanyelo lamanene ya vavanuna ni vavasati vo tala va ripfumelo va khale, muapostola Pawulo u va khutazile a ku: “Hikwalaho, leswi hi nga ni papa lerikulu swinene ra timbhoni leri hi rhendzeleke, na hina a hi . . . tsutsumeni hi ku tiyisela eka mphikizano lowu vekiweke emahlweni ka hina, loko hi ri karhi hi languta swinene-nene eka Murhangeri Lonkulu ni Muhetisekisi wa ripfumelo ra hina, Yesu.” (Vaheveru 12:1, 2) Namuntlha Vakreste va rhendzeriwe hi ‘papa lerikulu’ ra swikombiso leswinene—swa khale ni swa manguva lawa. Xana wa dyondza hakunene eka swona? U nga dyondza loko u tiyimisele ku va “mutekeleri wa leswi nga swinene, kambe ku nga ri wa leswo biha.”—3 Yohane 11.

[Nhlamuselo ya le hansi]

[Marito lama tshahiweke exihlokweni lama nga eka tluka 20]

A hi swinene ku langutela leswaku nkulu kumbe nandza wa vutirheli un’wana ni un’wana u fanele a va ni vutshila lebyi hlamarisaka eka xivumbeko xin’wana ni xin’wana xa vutirheli bya Vukreste

[Swifaniso leswi nga eka tluka 21]

Vakulu va fanele va va “swikombiso entlhambini”