Ntshembo Wa Ku Pfuxiwa Ka Vafi Wu Tiyile!
“Ndzi ni ntshembo eka Xikwembu . . . leswaku ku ta va ni ku pfuxiwa ka [vafi].”—MINTIRHO 24:15.
1. Ha yini hi nga vaka ni ntshembo eku pfuxiweni ka vafi?
YEHOVHA u hi nyike swivangelo leswi twalaka swo va ni ntshembo wa ku pfuxiwa ka vafi. Rito ra yena ri hi byela leswaku vafi va ta pfuka, va pfukela evuton’wini. Naswona xikongomelo xa yena malunghana ni lava va feke xi ta hetiseka hakunene. (Esaya 55:11; Luka 18:27) Entiyisweni, Xikwembu se xi ma kombisile matimba ya xona yo pfuxa vafi.
2. Xana ntshembo wa ku pfuxiwa ka vafi wu nga hi pfuna njhani?
2 Ku va ni ripfumelo eka lunghiselelo ra Xikwembu ro pfuxa vafi hi ku tirhisa Yesu Kreste, N’wana wa xona, swi nga hi tiyisa eminkarhini yo nonon’hwa. Ku tiya ka ntshembo wa ku pfuxiwa ka vafi ku nga tlhela ku hi pfuna ku tshama hi tshembekile eka Tata wa hina wa le tilweni hambiloko ho fa. A swi kanakanisi leswaku ntshembo wa hina wa ku pfuxiwa ka vafi wu ta tiyisiwa loko hi ri karhi hi kambisisa timhaka ta ku pfuxiwa ka vafi van’wana leti tsariweke eBibeleni. Hinkwawo masingita lawa ma endliwe hi matimba lama humaka eka Yehovha Hosi Leyikulu.
Va Amukele Vanhu Va Vona Lava Pfuxiweke
3. Xana Eliya u nyikiwe matimba ya ku endla yini loko noni ya le Sarepta yi feriwe hi n’wana?
3 Eka nkambisiso lowu nyanyulaka wa ripfumelo leri kombisiweke hi timbhoni ta Yehovha ta le mahlweni ka nguva ya Vukreste, muapostola Pawulo u tsarile: “Vavasati va amukela vafi va vona hi ku pfuka ka vafi.” (Vaheveru 11:35; 12:1) Un’wana wa vavasati volavo a ku ri noni leyi nga xisiwana ya le dorobeni ra le Fenikiya eSarepta. Hikwalaho ka leswi a veke ni malwandla eka Eliya muprofeta wa Xikwembu, mafurha ni mapa ya wansati loyi a swi helanga hi nkarhi wa ndlala leyikulu leyi a yi ta va yi n’wi dlele swin’we ni n’wana wa yena. Loko n’wana wa yena a file endzhakunyana, Eliya u n’wi late esangwini, a khongela, a pavalala ehenhla ka n’wana kanharhu, ivi a kombela a ku: “Oho Yehovha Xikwembu xanga, ndzi kombela u endla leswaku moya-xiviri wa n’wana loyi wu vuyela endzeni ka yena.” Xikwembu xi endle leswaku moya-xiviri, kumbe vutomi, byi vuyela endzeni ka mufana loyi. (1 Tihosi 17:8-24) Anakanya hi ntsako wa noni leyi loko ripfumelo ra yona ri hakeriwa hi ku pfuxiwa loku ko sungula loku tsariweke—ka n’wana wa yona la rhandzekaka!
4. Elixa u endle singita rihi eXunemi?
4 Wansati un’wana la pfuxeriweke n’wana wa yena a a tshama edorobeni ra le Xunemi. Nsati wa mukhalabye, u kombise Elixa swin’we ni mutirhi wakwe tintswalo. U hakeriwe hi n’wana wa mufana. Hambiswiritano, endzhaku ka malembe yo hlayanyana u vitane muprofeta, loyi a kumeke n’wana luya a file ekaya ra wansati loyi. Endzhaku ka loko Elixa a khongerile ni ku endla swo karhi, “hakatsongo-tsongo nyama ya n’wana yi kufumela.” A “sungula ku entshemula ka nkombo, endzhaku ka sweswo mufana a pfula mahlo.” A swi kanakanisi leswaku ku pfuxiwa loku ku tise ntsako lowukulu eka manana swin’we ni n’wana wa yena. (2 Tihosi 4:8-37; 8:1-6) Kambe va ta tsaka swinene loko va pfuxeriwa evuton’wini emisaveni eka “ku pfuxiwa ko antswa”—laha va nga taka va nga ha fi! Mawaku xivangelo xo nkhensa Yehovha Xikwembu xa rirhandzu, xa ku pfuxiwa ka vafi!—Vaheveru 11:35.
5. Xana Elixa u katseke njhani eku endleni ka singita hambiloko se a file?
5 Hambi ku ri endzhaku ka ku fa ni ku lahliwa ka Elixa, hi ku tirhisa moya lowo kwetsima, Xikwembu xi endle leswaku marhambu ya yena ma va ni matimba. Ha hlaya: “Loko [Vaisrayele vo karhi] va ri karhi va lahla munhu, waswivo, va vona vuthu ra [Vamowabu ra] vaphangi. Hi ku hatlisa va lahlela munhu exilahlweni xa Elixa, kutani va famba. Loko munhu [la feke] a khumba marhambu ya Elixa, xikan’we-kan’we a hanya, a yima hi milenge.” (2 Tihosi 13:20, 21) Kunene wanuna yoloye u fanele a hlamarile ni ku tsaka swinene! Wa nga anakanya ntsako lowu nga ta va kona loko varhandziwa va hina va pfuxeriwa evuton’wini hi ku pfumelelana ni xikongomelo xa Yehovha Xikwembu lexi nga weliki ehansi!
N’wana Wa Xikwembu U Pfuxe Vafi
6. I singita rihi leri Yesu a ri endleke ekusuhi ni muti wa Nayini, naswona xiendlakalo lexi xi nga hi khumba njhani?
6 Yesu Kreste, N’wana wa Xikwembu u hi nyike swivangelo leswi twalaka swo pfumela leswaku vafi va nga pfuxiwa, va ri ni ntshembo wa vutomi lebyi nga heriki. Xiendlakalo lexi humeleleke ekusuhi ni muti wa Nayini xi nga hi pfuna ku xiya leswaku singita ro tano ra koteka hi matimba lama humaka eka Xikwembu. Siku rin’wana, Yesu u hlangane ni vanhu lava a va ri enkosini va rhwale ntsumbu wa jaha rin’wana va ya ehandle ka muti va ya ri lahla. A ri n’wana la nga yexe wa noni. Yesu u te eka yena: “Tshika ku rila.” Kutani a khumba rihlaka ivi a ku: “Jaha, ndzi ri eka wena, Pfuka!” Xikan’we-kan’we ri pfuka ri tshama kutani ri sungula ku vulavula. (Luka 7:11-15) Singita leri entiyisweni ri tiyisa ripfumelo ra hina ra leswaku ntshembo wa ku pfuxiwa wu tiyile.
7. Ku humelele yini hi n’wana wa Yayiro?
7 Nakambe, anakanya hi xiendlakalo lexi katsaka Yayiro, ndhuna leyi ungamelaka sinagoga ya le Kapernawume. U kombele Yesu leswaku a ta hanyisa n’wana wa yena wa malembe ya 12 la rhandzekaka, loyi a a ri kusuhi ni ku fa. Endzhakunyana ku vikiwe leswaku nhwanyana loyi u file. Yesu u khutaze Yayiro loyi a a ri ni gome leswaku a va ni ripfumelo, ivi a famba na yena ekaya ka yena, laha a ku ri ni ntshungu lowu a wu ri eku rileni. Ntshungu lowu wu hlekile loko Yesu a ku: “N’wana lontsongo a nga fanga, kambe u etlele.” A a file hakunene, kambe Yesu a a ri kusuhi ni ku kombisa leswaku vanhu va nga pfuxeriwa evuton’wini ku fana ni loko va pfuxiwa evurhongweni lebyikulu. U khome nhwanyana luya hi voko, ivi a ku: “Nhwanyana, pfuka!” Xikan’we-kan’we a pfuka, naswona “vatswari vakwe a va nga tikoti” hi ku nyanyuka. (Marka 5:35-43; Luka 8:49-56) Handle ko kanakana, swirho swa ndyangu a swi ‘nge tikoti’ loko varhandziwa va swona lava feke va pfuxeriwa evuton’wini emisaveni leyi nga paradeyisi.
8. Xana Yesu u endle yini esirheni ra Lazaro?
8 Lazaro se a a ri ni masiku ya mune a file loko Yesu a ya esirheni ra yena ivi a susa ribye enyangweni wa rona. Endzhaku ko khongela erivaleni leswaku vahlaleri va ta swi tiva leswaku u titshege hi matimba lawa a ma nyikiweke hi Xikwembu, Yesu u huwelerile a ku: “Lazaro, huma!” Kutani a huma! Mavoko ya yena ni milenge a swa ha boheleriwe hi swo tsondzela munhu loko a lahliwa, naswona nghohe ya yena a yi tsondzeriwe hi lapi. Yesu u te: “N’wi ntshunxeni, mi n’wi tshika a famba.” Loko va vone singita leri, vo tala lava a va ri kona kwalaho ku ta chavelela vamakwavo va Lazaro, Mariya na Marta va va ni ripfumelo eka Yesu. (Yohane 11:1-45) Xana rungula leri a ri ku endli u va ni ntshembo wa leswaku varhandziwa va wena va nga pfuxeriwa evuton’wini emisaveni leyintshwa ya Xikwembu?
9. Ha yini hi nga tiyisekaka leswaku sweswi Yesu a nga va pfuxa vafi?
9 Loko Yohane lowo Khuvula a ri ekhotsweni, Yesu u n’wi rhumele rungula leri ri khutazaka, a ku: “Lava feke mahlo va vona . . . ni lava feke va pfuxiwa.” (Matewu 11:4-6) Leswi Yesu loko a ha ri emisaveni a pfuxeke vafi, a nga swi endla sweswo hi ku tiyiseka tanihi leswi a nga xivumbiwa xa moya lexi nga ni matimba lama humaka eka Xikwembu. Yesu i “ku pfuka ni vutomi,” naswona swa chavelela hakunene ku tiva leswaku ku nga ri khale “hinkwavo lava nga eka masirha-bako ya xitsundzuxo va . . . ta twa rito ra yena kutani va huma”!—Yohane 5:28, 29; 11:25.
Timhaka Tin’wana Ta Ku Pfuxiwa Ka Vafi Ti Tiyisa Ntshembo Wa Hina
10. Xana u nga ku hlamusela njhani ku pfuxiwa ko sungula loku vikiweke, loku endliweke hi muapostola?
10 Loko Yesu a rhumela vaapostola va yena leswaku va ya chumayela hi Mfumo, u te: “Pfuxani vanhu lava feke.” (Matewu 10:5-8) Ina, leswaku va endla leswi a va fanele va titshega hi matimba ya Xikwembu. Le Yopa hi 36 C.E., wansati la chavaka Xikwembu la vuriwaka Dorkasi (Thavitha) u file. Mintirho ya yena leyinene a yi katsa ku rhungela tinoni leti a ti ri swisiwana, hikwalaho rifu ra yena ri vangele tinoni leti xirilo lexikulu. Vadyondzisiwa va n’wi lunghiselerile leswaku a ta lahliwa ivi va rhumela rito eka muapostola Petro, kumbexana leswaku a ta va chavelela. (Mintirho 9:32-38) U humesele vanhu hinkwavo ehandle lava a va ri ekamareni ra le henhla, kutani a khongela, a ku: “Thavitha, pfuka!” U pfule mahlo ya yena, a tshama, a khoma voko ra Petro ivi a n’wi yimisa. Ku pfuxiwa loku ko sungula ka munhu loyi a a file, loku endliweke hi muapostola ku endle leswaku vanhu vo tala va va vapfumeri. (Mintirho 9:39-42) Ku tlhela ku hi nyika xivangelo lexi engetelekeke xo va ni ntshembo eku pfuxiweni ka vafi.
11. Hi kwihi ku pfuxiwa ka vafi ko hetelela loku vikiweke eBibeleni?
11 Ku pfuxiwa ka mufi ko hetelela loku vikiwaka eBibeleni ku humelele le Trowasi. Loko Pawulo a yime kwalaho eka riendzo ra yena ra vunharhu ra vurhumiwa, u vulavule kukondza ku va xikarhi ka vusiku. Hikwalaho ka ku karhala naswona kumbexana hikwalaho ka ku hisa loku a ku vangiwa hi timboni to tala leti a ti ri kona, ni ku tala ka vanhu endhawini leyi a ku hlanganiwe eka yona, jaha leri vuriwaka Yutiko ri biwe hi vurhongo ivi ri wa ri suka eka fasitere ra xithezi xa vunharhu. Loko va ri teka a ri nga lo titivala ntsena, kambe ‘ri tlakuriwe ri file.’ Pawulo u tilahlele ehenhla ka Yutiko, a n’wi khumbarheta, ivi a byela vahlaleri a ku: “Tshikani ku ba huwa, hikuva moya-xiviri wa rona wu le ka rona.” Pawulo a a vula leswaku vutomi bya jaha leri byi vuyiseriwile. Lava a va ri kona “a va chaveleriwe ku tlula mpimo.” (Mintirho 20:7-12) Namuntlha, malandza ya Xikwembu ma kuma nchavelelo lowukulu hi ku tiva leswaku vanghana va wona va khale lava tirheke ntirho wa Xikwembu va ta vona ku hetiseka ka ntshembo wa ku pfuxiwa ka vafi.
Ku Pfuxiwa Ka Vafi—Ntshembo Lowu Ku Nga Khale Wu Ri Kona
12. Hi wihi ntshembo lowu Pawulo a wu vuleke emahlweni ka Ndhuna-nkulu Felikisi wa Murhoma?
12 Loko a ri eku tengisiweni emahlweni ka Ndhuna-nkulu Felikisi wa Murhoma, Pawulo u nyikele vumbhoni a ku: “Ndzi kholw[a] swilo hinkwaswo leswi andlariweke eNawini ni leswi tsariweke eka Vaprofeta; naswona ndzi ni ntshembo eka Xikwembu . . . leswaku ku ta va ni ku pfuxiwa ka lava lulameke ni ka lava nga lulamangiki.” (Mintirho 24:14, 15) Xana swiyenge swa Rito ra Xikwembu, swo tanihi ‘Nawu,’ swi kombetela eku pfuxiweni ka vafi hi ndlela yihi?
13. Ha yini ku nga vuriwaka leswaku Xikwembu xi boxe mhaka ya ku pfuxiwa ka vafi loko xi vula vuprofeta byo sungula?
13 Xikwembu xi boxe mhaka ya ku pfuxiwa ka vafi loko xi vula vuprofeta byo sungula le Edeni. Loko Xikwembu xi avanyisa “nyoka ya khale,” Sathana Diyavulosi, xi te: “Ndzi ta veka vulala exikarhi ka wena ni wansati ni le xikarhi ka mbewu ya wena ni mbewu ya yena. Yi ta ku pfotlosa nhloko kutani wena u ta yi luma xirhendze.” (Nhlavutelo 12:9; Genesa 3:14, 15) Ku lumiwa xirhendze ka mbewu ya wansati a swi vula ku dlayiwa ka Yesu Kreste. Leswaku Mbewu yoleyo yi ta pfotlosa nhloko ya nyoka endzhaku ka ku lumiwa, Kreste a a fanele a pfuxiwa eka lava feke.
14. Yehovha “a hi Xikwembu xa lava feke, kambe i xa lava hanyaka” hi ndlela yihi?
14 Yesu u te: “Hambi Muxe u swi paluxile leswaku lava feke va pfuxiwa, emhakeni ya xihlahla xa mitwa, loko a vula leswaku Yehovha i ‘Xikwembu xa Abrahama ni Xikwembu xa Isaka ni Xikwembu xa Yakobe.’ A hi Xikwembu xa lava feke, kambe i xa lava hanyaka, hikuva eka xona hinkwavo va hanya.” (Luka 20:27, 37, 38; Eksoda 3:6) Abrahama, Isaka na Yakobe se a va file, kambe xikongomelo xa Xikwembu xo va pfuxa a xi tiyile swinene leswaku xi ta hetiseka lerova eka xona a swi fana ni loko va hanya.
15. Ha yini Abrahama a a ri ni xivangelo xo pfumela eku pfuxiweni ka vafi?
15 Abrahama a a ri ni xivangelo xo va ni ntshembo eku pfuxiweni ka vafi, hikuva loko yena ni nsati wa yena, Sara, va dyuhale ngopfu naswona vuswikoti bya vona byo kuma vana byi file, hi singita Xikwembu xi tlhele xi pfuxa matimba ya vona yo kuma vana. Leswi a swi fana ni ku pfuxiwa ka vafi. (Genesa 18:9-11; 21:1-3; Vaheveru 11:11, 12) Loko n’wana wa vona Isaka, a ri ni malembe ya kwalomu ka 25 hi vukhale, Xikwembu xi byele Abrahama leswaku a endla gandzelo hi yena. Hambiswiritano, loko Abrahama a ri kusuhi ni ku dlaya Isaka, ntsumi ya Yehovha yi khome voko ra yena. Abrahama “a a anakanya leswaku Xikwembu a xi ta swi kota ku n’wi pfuxa [Isaka] hambi ku ri eka lava feke; naswona ku sukela kwalaho u tlhele a n’wi amukela hi ndlela yo fanekisela.”—Vaheveru 11:17-19; Genesa 22:1-18.
16. Sweswi Abrahama u file, kambe u rindzele yini?
16 Abrahama a a ri ni ntshembo wa ku pfuxiwa ka vafi ehansi ka ku fuma ka Mesiya, Mbewu leyi tshembisiweke. Hi ku ya hi langutelo ra yena ra vumunhu, N’wana wa Xikwembu u xiye ripfumelo ra Abrahama. Hikwalaho loko Yesu Kreste a ha ri munhu u byele Vayuda a ku: “Abrahama tata wa n’wina a a tsake ngopfu hi ku langutela ku vona siku ra mina.” (Yohane 8:56-58; Swivuriso 8:30, 31) Sweswi Abrahama u file, u rindzele ku pfuxeriwa evuton’wini emisaveni ehansi ka Mfumo wa Vumesiya wa Xikwembu.—Vaheveru 11:8-10, 13.
Vumbhoni Lebyi Humaka eNawini Ni Le Ka Tipisalema
17. Xana ‘swilo leswi andlariweke eNawini’ swi kombetela njhani eku pfuxiweni ka Yesu Kreste?
17 Ntshembo wa Pawulo wa ku pfuxiwa ka vafi a wu pfumelelana ni ‘swilo leswi andlariweke eNawini.’ Xikwembu xi byele Vaisrayele xi ku: “Mi fanele mi tisa nyandza ya swirhangana swa ntshovelo wa n’wina eka muprista. [Hi Nisan 16] yena u fanele a ndziwita nyandza emahlweni ka Yehovha leswaku mi amukeleka.” (Levhitika 23:9-14) Kumbexana loko a ri karhi a anakanya hi nawu lowu, Pawulo u tsarile: “Kreste se u pfuxiwile eka lava feke, a va xirhangana xa lava va etleleke eku feni.” Ku fana ni “xirhangana,” Yesu u pfuxiwile hi Nisan 16, 33 C.E. Endzhakunyana, eka vukona bya yena, ku ta va ni ku pfuxiwa ka ‘mihandzu ya le ndzhaku’—valandzeri va yena lava totiweke hi moya.—1 Vakorinto 15:20-23; 2 Vakorinto 1:21; 1 Yohane 2:20, 27.
18. Xana Petro u swi kombise njhani leswaku ku pfuxiwa ka Yesu a ku vuriwe ka ha ri emahlweni eka Tipisalema?
18 Tipisalema na tona ti seketela ku pfuxiwa ka vafi. Hi siku ra Pentekosta ya 33 C.E., muapostola Petro u tshahe Pisalema 16:8-11, a ku: “Davhida u vula leswi malunghana na [Kreste], ‘A ndzi ri na Yehovha nkarhi hinkwawo emahlweni ka mahlo ya mina; hikuva u le vokweni ra mina ra xinene leswaku ndzi nga tshuki ndzi ninginisiwa. Hikwalaho mbilu ya mina yi khanile ni ririmi ra mina ri tsakile swinene. Ku tlula kwalaho, hambi nyama ya mina yi ta tshama yi ri ni ntshembo; hikuva a wu nge wu tshiki moya-xiviri wa mina eHayidesi, naswona a wu nge pfumeleli la tshembekeke wa wena a vona ku onhaka.’” Petro u engeterile: “[Davhida] u swi vone ka ha ri emahlweni a tlhela a vulavula hi ku pfuxiwa ka Kreste eka lava feke, leswaku a nga tshikiwanga eHayidesi naswona nyama yakwe a yi ku vonanga ku onhaka. Yesu yoloye Xikwembu xi n’wi pfuxile.”—Mintirho 2:25-32.
19, 20. Petro u yi tshahe rini Pisalema 118:22, naswona leswi a swi fambisana njhani ni rifu ni ku pfuxiwa ka Yesu?
19 Endzhaku ka masiku yo hlayanyana, Petro u yime emahlweni ka Sanedri, a tlhela a tshaha eka Tipisalema. Loko a vutisiwe leswaku u swi kotise ku yini ku horisa mukomberi loyi a a lamarile, muapostola u te: “Swi tiveni n’wina hinkwenu ni vanhu hinkwavo va Israyele, leswaku hi vito ra Yesu Kreste wa Munazareta, loyi mi n’wi beleleke kambe loyi Xikwembu xi n’wi pfuxeke eka lava feke, munhu loyi u yime laha mahlweni ka n’wina a ri loyi a hanyeke hikwalaho ka yena. [Yesu] i ‘ribye leri n’wina vaaki mi ri tekeke ri ri leri nga pfuniki nchumu leri veke nhloko ya yinhla.’ Ku tlula kwalaho, a ku na ku ponisiwa eka un’wana, hikuva ku hava vito rin’wana ehansi ka tilo leri nyikiweke vanhu leri hi faneleke ku ponisiwa ha rona.”—Mintirho 4:10-12.
20 Laha Petro u tshahe eka Pisalema 118:22, a tirhisa marito wolawo eka rifu ni ku pfuxiwa ka Yesu. Hikwalaho ko susumetiwa hi varhangeri va vukhongeri, Vayuda va ale Yesu. (Yohane 19:14-18; Mintirho 3:14, 15) ‘Ku ariwa ka ribye hi vaaki’ ku vangele rifu ra Kreste, kambe ‘loko ribye ri va nhloko ya yinhla’ swi kombise ku pfuxeriwa ka yena eku kwetsimeni ka moya etilweni. Hilaha mupisalema a vuleke hakona ka ha ri emahlweni, ‘leswi a swi huma eka Yehovha.’ (Pisalema 118:23) Ku endla “ribye” Nhloko ya yinhla a swi katsa ku n’wi tlakusa tanihi Hosi leyi Hlawuriweke.—Vaefesa 1:19, 20.
Ku Tiyisiwa Hi Ntshembo Wa Ku Pfuxiwa
21, 22. Xana Yobo u kombise ntshembo wihi, lowu tsariweke eka Yobo 14:13-15, naswona leswi swi nga va chavelela njhani lava feriweke namuntlha?
21 Hambileswi hina hi nga si tshamaka hi vona munhu la pfuxiweke eku feni, hi ti vonile timhaka tin’wana ta le Matsalweni leti hi tiyisekisaka hi ku pfuxiwa ka vafi. Hikwalaho, hi nga va ni ntshembo lowu vuriweke hi Yobo wanuna wo lulama. Loko a ri karhi a xaniseka, u kombele a ku: “Onge [Yehovha] u nga ndzi tumbeta eSheol, . . . leswaku u ndzi vekela nkarhi kutani u ndzi tsundzuka! Xana loko munhu la tiyeke emirini a fa a nga tlhela a hanya? . . . U ta vitana, mina ndzi ta ku hlamula. U ta navela ntirho wa mavoko ya wena.” (Yobo 14:13-15) Xikwembu ‘xi ta navela ntirho wa mavoko ya xona,’ xi navela ku pfuxa Yobo hi ku hiseka. Mawaku ntshembo lowu sweswo swi hi nyikaka wona!
22 Xirho xa ndyangu lexi chavaka Xikwembu xi nga ha vabya swinene, hilaha Yobo a vabyeke hakona, naswona xi nga hetelela xi file. Lava feriweke va nga ha va ni mihloti ya gome, tanihi leswi Yesu a rileleke ku fa ka Lazaro. (Yohane 11:35) Kambe swa chavelela hakunene ku tiva leswaku Xikwembu xi ta vitana kutani lava nga emianakanyweni ya xona va ta hlamula! Swi ta fana ni loko va vuya hi le riendzweni—va nga ha vabyi kumbe ku twa ku vava, kambe va ri ni rihanyo lerinene.
23. Xana van’wana va kombise ripfumelo ra vona eka ntshembo wa ku pfuxiwa ka vafi hi ndlela yihi?
23 Rifu ra Mukreste la tshembekaka la dyuhaleke ri susumetele vapfumeri-kulobye ku tsala va ku: “Hi mi chavelela swinene eka rifu ra mana wa n’wina. Endzhaku ka nkarhinyana hi ta va hi n’wi amukela nakambe—a sasekile naswona a hanye kahle!” Vatswari lava feriweke hi n’wana wa vona wa jaha va te: “Hi ri langutele hi mahlo-ngati siku leri Jason a nga ta pfuka ha rona! U ta languta ematlhelo ka yena ivi a vona Paradeyisi leyi a a yi langutele hi mahlo-ngati. . . . Mawaku ndlela leyi swi hi khutazeke ha yona hina lava n’wi rhandzaka leswaku hi n’wi vona paradeyisi yoleyo.” Ina, hi fanele hi tsaka ngopfu hileswi ntshembo wa ku pfuxiwa ka vafi wu tiyisekeke!
Hi Yihi Nhlamulo Ya Wena?
• Xana ku pfumela eka lunghiselelo ra Xikwembu ro pfuxa vafi swi nga hi pfuna njhani?
• I swiendlakalo swihi leswi tsariweke eMatsalweni leswi hi nyikaka xivangelo xo va ni ntshembo eku pfuxiweni ka vafi?
• Ha yini ku nga vuriwaka leswaku ku pfuxiwa ka vafi i ntshembo lowu ku nga khale wu rindzeriwile?
• I ntshembo wihi lowu chavelelaka lowu hi nga vaka na wona malunghana ni vafi?
[Xifaniso lexi nga eka tluka 10]
Hi matimba lama humaka eka Yehovha, Eliya u pfuxe n’wana wa noni
[Xifaniso lexi nga eka tluka 12]
Loko Yesu a pfuxe n’wana wa Yayiro wa nhwanyana, vatswari va yena a va nga ha tikoti hi ku nyanyuka
[Xifaniso lexi nga eka tluka 15]
Hi siku ra Pentekosta ya 33 C.E., muapostola Petro u nyikele vumbhoni hi xivindzi bya leswaku Yesu u pfuxiwile eka lava feke