Xana U Fanele U Kambisisa Vukhongeri Byin’wana?

MIGUEL loyi sweswi a nga Mbhoni ya Yehovha eAmerika Dzonga u ri: “Se a ndzi ri ni nkarhi lowu lavaka ku endla lembe ndzi ri karhi ndzi ya eminhlanganweni ya Vukreste, naswona ndzi tsakela ku byela van’wana hi Mfumo wa Xikwembu. Kutani ndzi sungule ku yingisela minongonoko ya vukhongeri eka xiya-ni-moya ni ku hlalela vafundhisi va vukhongeri eka thelevhixini. A ndzi ehleketa leswaku minongonoko yo tano yi ta ndzi pfuna ku twisisa vanhu va vukhongeri byin’wana ku antswa. Ndzi kume leswaku tidyondzo ta vona a ti nga pfumelelani na Bibele, kambe a a ndzi lava ku tiva.”

Eka rona tiko leri, Jorge a a hisekela ku dyondzisa van’wana mayelana ni vugandzeri bya ntiyiso. Kambe, siku rin’wana na yena u sungule ku yingisela minongonoko ya vukhongeri eka xiya-ni-moya ni le ka thelevhixini. A a rhandza ku vula leswaku, “u fanele ku tiva leswi vanhu van’wana va swi ehleketaka.” Loko a vutisiwa hi makhombo lama nga ha vaka kona hi ku yingisela tidyondzo ta mavunwa, a a ku: “Ku hava lexi nga tsanisaka ripfumelo ra loyi a tivaka ntiyiso wa Bibele.” Mintokoto leyi yi pfuxa xivutiso xa nkoka lexi nge, Xana i vutlhari ku yingisa leswi van’wana va swi pfumelaka?

Ku Tiva Vukreste Bya Ntiyiso

Endzhaku ka ku fa ka vaapostola, vugandzeri bya ntiyiso byi thyakisiwe hi swivumbeko swo tala swa Vukreste bya mpambukwa lebyi a byi tinyike matimba. Leswi Yesu a swi tiveke ka ha ri emahlweni swilo leswi, u paluxe ndlela leyi Vukreste lebyi bya mpambukwa byi nga hambanisiwaka ha yona ni Vukreste bya ntiyiso. Xo sungula u tsundzuxile a ku: “Tivoneleni vaprofeta va mavunwa lava taka va ambale nguvu ya nyimpfu, kambe endzeni va ri timhisi leti kakatlulaka.” Kutani a engetela hi ku: “Mi ta va vona hi mihandzu ya vona.” (Matewu 7:15-23) Valandzeri va Yesu va hanya hi ku pfumelelana ni leswi a va dyondziseke swona, naswona va xiyiwa hi ku olova hikwalaho ka mihandzu ya vona leyinene. Tanihi laha Yesu a endleke hakona, na vona va endzela vanhu va va hlamusela hi Mfumo wa Xikwembu hi ku ya hi Matsalwa. Leswi va landzelaka xikombiso xa Yesu, a va hoxi xandla eka tipolitiki ta misava ni le ka minkwetlembetano ya ntshamisano. Va amukela Bibele tanihi Rito ra Xikwembu va tlhela va yi xixima tanihi ntiyiso. Va tivisa vito ra Xikwembu. Leswi va lwelaka ku kombisa rirhandzu leri Xikwembu xi va dyondziseke rona, a va hlanganyeli etinyimpini. Ematshan’weni ya sweswo, va xiximana tanihi vamakwavo.—Luka 4:43; 10:1-9; Yohane 13:34, 35; 17:16, 17, 26.

Hi ku ya hi Matsalwa, swa koteka ku “vona ku hambana exikarhi ka lowo lulama ni lowo homboloka, exikarhi ka loyi a tirhelaka Xikwembu ni loyi a nga xi tirheliki.” (Malakiya 3:18) Mianakanyo ni swiendlo swa vagandzeri va ntiyiso namuntlha swa fana, tanihi leswi a swi ri hakona eka Vakreste va lembe-xidzana ro sungula. (Vaefesa 4:4-6) Loko u kala u tiva nhlangano wo tano wa Vakreste va ntiyiso, wa ha swi lavela yini ku tiva vupfumeri bya van’wana?

Tivonele Vadyondzisi Va Mavunwa

Bibele ya pfumela leswaku hambiloko se munhu a dyondze ntiyiso wa Bibele, ka ha ri ni khombo ro thyakisiwa hi tlhelo ra moya hi tidyondzo ta mavunwa. Muapostola Pawulo u tsundzuxile: “Tivoneleni: swi nga ha endleka ku va ni un’wana loyi a nga ta mi phasa hi filosofi ni vuxisi bya hava hi ku ya hi ndhavuko wa vanhu, hi ku ya hi swilo swa masungulo swa misava, ku nga ri hi ku ya hi Kreste.” (Vakolosa 2:8) Wa nga vona xifaniso lexi twalaka xa ndzimana leyi! Ku fana ni swiharhi leswi lavaka ku ku rhwala swi ya ku kakatlula, vadyondzisi va mavunwa va tisa khombo ra xiviri.

I ntiyiso leswaku Pawulo a nga swi banga hi makatla leswi van’wana a va swi pfumela. Nkarhi wun’wana u sungule nkulumo yakwe hi ku vula leswi: “Vavanuna va Atena, ndzi vona leswaku eka swilo hinkwaswo mi vonaka mi tinyikele ngopfu eku chaveni ka swikwembu ku tlula van’wana. Hi xikombiso, loko ndzi hundza ni ku xiyisisa hi vukheta swilo swa n’wina leswi xiximiwaka ndzi kume ni alitari leyi ku tsariweke leswi eka yona ‘Eka Xikwembu Lexi Nga Tiviwiki.’” (Mintirho 17:22, 23) Hambiswiritano, Pawulo a a nga tshameli ku anakanyisisa hi tifilosofi ta vadyondzisi va Magriki.

Ku tiva masungulo ni tidyondzo ta vukhongeri bya mavunwa a swi bihanga, kambe swi ni khombo ku anakanyisisa ha swona.a Yehovha u hlawule “hlonga ro tshembeka ni ro tlhariha” leswaku ri hi phamela tidyondzo leti sekeriweke eRitweni rakwe. (Matewu 4:4; 24:45) Pawulo u tsale a ku: “A mi nge dyi ‘etafuleni ra Yehovha’ swin’we ni le tafuleni ra madimona. Kumbe, ‘xana hi endla leswaku Yehovha a va ni mavondzo’?”—1 Vakorinto 10:20-22.

Swi nga ha endleka vadyondzisi van’wana va mavunwa va tshame va va Vakreste va ntiyiso, kambe va tshike ntiyiso va nghena endleleni leyi hoxeke. (Yudha 4, 11) Leswi a swi fanelanga swi hi hlamarisa. Endzhaku ka ku vulavula hi “hlonga ro tshembeka ni ro tlhariha” leri yimelaka ntlawa wa vatotiwa va Vakreste, Yesu u tlhele a vulavula hi “hlonga ro biha,” ntlawa lowu vilelaka wu ku, “n’wini wa mina wa hlwela,” ivi wu sungula ku ba mahlonga-kulobye. (Matewu 24:48, 49) Minkarhi yo tala, ntlawa lowu ni valandzeri va wona a va swi twisisi leswi va swi dyondzisaka; vo tsakisiwa ntsena hi ku dlaya ripfumelo ra van’wana. Mayelana na vona, muapostola Yohane u tsarile: “Loko un’wana a ta eka n’wina a nga tisi dyondzo leyi, mi nga tshuki mi n’wi amukela emakaya ya n’wina kumbe ku n’wi xeweta.”—2 Yohane 10; 2 Vakorinto 11:3, 4, 13-15.

Vanhu lavanene lava lavaka ntiyiso va endla kahle loko va xiya hi vukheta leswi va swi twaka eka vukhongeri byo hambana-hambana. Hi ku famba ka nkarhi, Xikwembu xi ta katekisa vanhu lava nga ni timbilu to tshembeka lava lavaka ntiyiso. Mayelana ni vutlhari bya Xikwembu, Bibele yi ri: “Loko u hambeta u [byi] lava kukota silivhere, naswona u [byi] lavisisa kukota xuma lexi fihliweke, hi ndlela yoleyo . . . u ta kuma vutivi bya Xikwembu.” (Swivuriso 2:4, 5) Loko se va kume vutivi lebyi bya Xikwembu hi ku hlaya Bibele ni ku va kona evandlheni ra Vukreste, ni loko se va vone ndlela leyi Yehovha a katekisaka lava kongomisiwaka hi vutivi byebyo, Vakreste va ntiyiso vo swi thya, swa ku yingisela tidyondzo ta vukhongeri bya mavunwa.—2 Timotiya 3:14.

[Nhlamuselo ya le hansi]