Hikwalaho Ka Yini U Fanele U Khongela?
“MA KOMBELA, kambe ke, a mi nyikiwi, hikuva mi kombela hi xikongomelo lexi hoxeke . . . Tshinelani eka Xikwembu, kutani xi ta tshinela eka n’wina.” (Yakobo 4:3, 8) Marito wolawo ya muapostola wa Yesu, Yakobo ma nga hi susumetela ku kambisisa swivangelo swa hina swo khongela.
Xikhongelo a ko va ndlela yo byela Xikwembu leswi hi swi pfumalaka. Eka Dyondzo ya yena leyi tivekaka ya le Ntshaveni Yesu u te: “Tata wa n’wina [w]a swi tiva swilo leswi mi swi lavaka mi nga si swi kombela eka xona.” Kambe Yesu u tlhele a ku: “Hambetani mi kombela, kutani mi ta nyikiwa.” (Matewu 6:8; 7:7) Kutani Yehovha wa swi lava leswaku hi n’wi byela leswi hi swi pfumalaka. Kambe ku na leswi lavekaka exikhongelweni ku tlula sweswo.
Vanghana va xiviri a va vulavuli ntsena loko va lava xo karhi. Va rhandzana naswona vuxaka bya vona bya kula loko va phofula mintlhaveko ya vona. Hilaha ku fanaka xikhongelo xi ni xikongomelo lexikulu ku tlula ku kombela swilo leswi lavekaka ntsena. Xi hi nyika nkarhi wo tiyisa vuxaka bya hina na Yehovha hi ku kombisa ku tinyiketela ka hina ka mbilu hinkwayo.
Ina, Xikwembu xi hi nyike lunghelo ra xikhongelo leswaku hi ta kota ku tshinela eka xona. Leswi swi nga endleka ntsena loko hi phofula leswi nga etimbilwini ta hina eka Xikwembu ematshan’wini yo vula swikhongelo leswi nhlokohatiweke. Mayana ku tsakisa ka swona ku vulavula na Yehovha hi xikhongelo! Tlhandlakambirhi, xivuriso xa Bibele xi ri: “Xikhongelo xa lavo lulama xa n’wi tsakisa.”—Swivuriso 15:8.
Mupisalema Asafa u yimbelele a ku: “Loko ku ri mina, ku tshinela eka Xikwembu i swinene eka mina.” (Pisalema 73:28) Kambe leswaku hi tshinela ekusuhi ni Xikwembu a hi fanelanga hi khongela ntsena. Xiya ndlela leyi mhaka leyi landzelaka yi kombisaka leswi ha yona:
“Un’wana wa vadyondzisiwa [va Yesu] a ku eka yena: ‘Hosi, hi dyondzise ndlela ya ku khongela.’” Loko a hlamula Yesu u te: “Loko mi khongela, vulani leswi, ‘Tatana, vito ra wena a ri kwetsimisiwe. Mfumo wa wena a wu te.’” (Luka 11:1, 2) Xana hi nga swi kota ku khongela hi ndlela leyi leyi twalaka handle ko sungula hi ku dyondza leswaku vito ra Xikwembu i mani ni leswaku ri fanele ri kwetsimisiwa njhani? Naswona xana hi nga khongela hi ku pfumelelana ni marito lawa ya Yesu loko hi nga twisisi leswaku Mfumo wa Xikwembu i yini? Hi nga ti twisisa timhaka leti loko hi kambisisa Bibele hi vukheta. Vutivi lebyi hi nga ta byi kuma byi ta hi pfuna ku tiva Xikwembu ni ku twisisa tindlela ta xona. Ku tlula kwalaho, ku tolovelana na Yehovha Xikwembu swi ta hi endla hi titwa hi ri kusuhi na yena naswona hi tinyiketela eka yena swinene. Hilaha ku fanaka leswi swi ta hi pfuna ku vulavula na yena hi ku ntshunxeka swinene hi xikhongelo.
Xikhongelo Xi Nga Ololoxa Swiphiqo
Ku aka vuxaka lebyikulu na Yehovha swi ta hi pfuna ku ololoxa swiphiqo. Xiya ndlela leyi leswi swi veke ha yona eka swiyimo leswi swi landzelaka. Swi kombisa leswaku lava khongelaka va kote ku tiyisa vuxaka bya vona na Yehovha.
Le Brazil, wansati loyi vito ra yena ku nga Maria u khongele eka Xikwembu leswaku xi n’wi pfuna. A a lava ntsena ku lwisana ni mimpimanyeto ya mahanyelo leyi amukeriwaka, hikwalaho ka vukanganyisi lebyi a byi voneke evanhwini. Maria se a a siye nuna wa yena, vana va yena ni kaya ra yena. U sungule ni ku tirhisa swidzidzirisi. Kambe loko a tsandzekile ku kuma ntsako, u phofulele Xikwembu leswi a swi ri embilwini yakwe kutani a khongelela mpfuno.
Hi ku hatlisa Timbhoni ta Yehovha timbirhi ti endzele Maria kutani ti n’wi siyela Xihondzo xo Rindza lexi nga ni rungula leri kombisaka nkoka wo amukela nkongomiso wa Xikwembu. Ri n’wi khumbe mbilu lerova a sungula ku dyondza Bibele ni Timbhoni siku rero. Eku heteleleni leswi swi endle leswaku vutomi bya yena bya ndyangu byi vuyela exin’weni xa byona. Loko a ri karhi a dyondza hi Yehovha a a lava ku kombisa rirhandzu ra yena eka yena. Maria u te: “Ndzi hundzule vutomi bya mina. Nuna wa mina ni ndyangu wa mina eku sunguleni a va nga swi rhandzi leswaku ndzi dyondza Bibele. Kambe loko va sungula ku vona ku hundzuka loku a ku ri kona va sungule ku ndzi khutaza.” Endzhakunyana, Maria u nyiketele vutomi bya yena eka Mutwi wa xikhongelo leswaku a n’wi tirhela.
Hambileswi José a ri ni nsati wo saseka ni bindzu leri a ri n’wi nghenisela mali eBolivia, a a nga tsakanga. Rigangugangu ri vangele leswaku nsati wa yena a n’wi siya. U sungule ku nwa ku tlula mpimo a tlhela a titwa a nga pfuni nchumu. José u ri: “Ndzi sungule ku khongela hi mbilu ya mina hinkwayo ndzi vutisa leswaku ndzi fanele ndzi endla yini leswaku ndzi tsakisa Xikwembu. Hi ku hatlisa Timbhoni ta Yehovha ti endzele ndhawu ya mina ya mabindzu ti lava ku va ni dyondzo ya mahala ya Bibele na mina, kambe ndzi ti hlongorile. Leswi swi endleke kanharhu. Nkarhi na nkarhi loko ndzi khongelela mpfuno a ku fika tona. Eku heteleleni ndzi tiyimisele leswaku ndzi ta yingisela enkarhini lowu taka loko ti ta. A ndzi yi hlayile Bibele naswona a ndzi ri ni swivutiso swo tala, kambe nkarhi na nkarhi a ti ri ni tinhlamulo leti ti ndzi enerisaka. Ku dyondza hi Yehovha swi ndzi nyike xikongomelo lexintshwa evuton’wini naswona vanghana va mina va Timbhoni a va ri xikombiso lexi khutazaka! Ndzi hambane ni xigangu xa mina ni lava a ndzi nwa na vona. Ku nga ri khale se a ndzi vuyelelane ni nsati wa mina ni vana. Ndzi khuvuriwe eku sunguleni ka 1999.”
Le Italiya vukati bya Tamara a byi ri ekhombyeni, kutani u khongelele vutlhari. U kule a ri ni vukarhi hikwalaho ka leswi a tshameke a biwa a tlhela a hlongoriwa ekaya a ri ni malembe ya 14. Tamara u ri: “Ndzi kume Bibele kutani ndzi sungula ku yi hlaya. Madyambu man’wana ndzi dyondze leswaku ‘ku kuma vutlhari swi fana ni ku kuma ndzalama leyi fihliweke.’ Ndzi khongelele vutlhari byolebyo. (Swivuriso 2:1-6) Mixo lowu tlhandlameke Timbhoni ta Yehovha ti ndzi endzerile. Ndzi sungule ku dyondza Bibele na tona, kambe swi ndzi tekele nkarhi ku tirhisa leswi a ndzi swi dyondza. Eku heteleleni, ndzi endle xiboho xo landzela ndlela ya vutomi bya Vukreste naswona ndzi khuvuriwile. Sweswi mina ni nuna wa mina hi pfuna van’wana leswaku va vuyeriwa eka vutlhari bya Xikwembu.”
Beatriz a ri un’wana wa vanhu lava tivekaka emugangeni wa Caracas eVenezuela. Kambe u thariwile hi nuna wa yena naswona a a ri enhlomulweni. Leswi a a heleriwe hi ntshembo, siku rin’wana u hete nkarhi wo leha a ri karhi a khongela. Mixo lowu landzeleke ku gongondze munhu enyangweni. U hlometele hi le mbhoveni lowu nga enyangweni a ri karhi a nyangatsekile, kutani a vona vanhu vambirhi va tamele swikhwama. U endle onge a nga kona ekaya, kambe emahlweni ko va mpatswa lowu wu famba, wu hoxe xiphephana ehansi ka nyangwa. A xi ku “Tiva Bibele Ya Wena.” Xana riendzo ra wona a ri fambisana ni swikhongelo swa yena swa vusiku bya matolo xa kona? U va vitanile leswaku va vuya. Ku nga ri khale se a a dyondza Bibele naswona hi ku famba ka nkarhi u khuvuriwile. Beatriz eku heteleleni u tsakile, leswi sweswi a dyondzisaka van’wana malunghana ni ndlela yo kuma ntsako.
Carmen u khongerile malunghana ni ku kayakaya ka yena hi vusweti. A a ri ni vana va khume ni nuna la nga xindzendzele, Rafael. Carmen u te: “Ndzi ringete ku kuma mali hi ku hlantswela vanhu tinguvu.” Kambe xiphiqo xa Rafael xo nwa, xi nyanyile. “Nuna wa mina u sungule ku cinca loko hi sungula ku dyondza Bibele ni Timbhoni ta Yehovha. Hi dyondze hi xitshembiso xa Mfumo—leswaku Yehovha ku nga ri khale u ta herisa vusiwana bya misava hinkwayo ni ntshikilelo. Eku heteleleni swikhongelo swa mina eka Xikwembu swi hlamuriwile!” Ku dyondza hi tindlela ta Yehovha swi pfune Rafael ku tshika ku nwa kutani a ambala “vumunhu lebyintshwa.” (Vaefesa 4:24) Yena ni ndyangu wa yena va kote ku antswisa xiyimo xa vona xa le ndyangwini. Rafael u ri: “Hambileswi hi nga riki swigwili, naswona hi nga riki na kaya kambe hi na swona swo tihanyisa ha swona naswona hi tsakile.”
Nkarhi Lowu Swikhongelo Hinkwaswo Swi Nga Ta Hlamuriwa Ha Wona
Xana ku khongela swi va vuyerisile vanhu lava? Kunene! Naswona xana u swi xiyile leswaku hakanyingi swikhongelo swa vona a swi hlamuriwa loko un’wana wa vandlha ra Vukreste a va pfuna ku tshinela eka Yehovha Xikwembu hi ku dyondza Bibele na vona?—Mintirho 9:11.
Kutani hi ni swivangelo leswi twalaka swo khongela. Ku nga ri khale xikhongelo xa ku khongelela Mfumo wa Xikwembu leswaku wu ta ni ku rhandza ka xona leswaku ku endliwa emisaveni xi ta hlamuriwa. (Matewu 6:10) Loko Xikwembu xi ta va xi herise lava kanetanaka na xona emisaveni ya hina, “misava yi ta tala hi ku tiva Yehovha kukota mati lama funengetaka lwandle.” (Esaya 11:9) Kutani hinkwavo lava rhandzaka Yehovha va ta tsakela “ntshunxeko lowu vangamaka wa vana va Xikwembu”—ni swikhongelo swa vona swi ta hlamuriwa hakunene.—Varhoma 8:18-21.
[Xifaniso lexi nga eka tluka 7]
Xana wa swi tiva leswaku ha yini hi fanele hi khongela?