Ku Kambisisiwa Ka Mhaka Ya Ku Pfuxiwa Ka Yesu

“Ndzi nga ku byela hi ku kongoma leswaku hambiloko hi nga tiyiseka leswaku Yesu u tshame a hanya . . . , a hi nge vuli hi ku tiyiseka leswaku ha swi tiva leswaku U pfuxiwe hi Xikwembu eku feni.” Marito wolawo ma vuriwe hi mufundhisi wa Kereke ya le Nghilandhi, Bixopo-nkulu wa Canterbury.

MUAPOSTOLA Pawulo la nga Mukreste a nga swi kanakani sweswo. Eka ndzima ya 15 eka papila ra yena ro sungula leri huhuteriweke leri yaka eka Vakreste-kulobye eKorinto wa khale, Pawulo u tsarile: “Ndzi hundzisele eka n’wina leswaku Kreste u fele swidyoho swa hina hi ku ya hi Matsalwa; ni leswaku u lahliwile, ina, leswaku u pfuxiwile esikwini ra vunharhu hi ku ya hi Matsalwa.”—1 Vakorinto 15:3, 4.

Lexi susumeteleke vadyondzisiwa va Yesu Kreste ku chumayela evhangeli ematikweni ya Magriki ni Varhoma a ku ri ripfumelo eku pfuxiweni ka yena—“eka ntumbuluko hinkwawo lowu nga ehansi ka tilo.” (Vakolosa 1:23) Entiyisweni, ku pfuxiwa ka Yesu hi xona xisekelo xa ripfumelo ra Vukreste.

Kambe, ku sukela eku sunguleni ku pfuxiwa ka Yesu ku kanakaniwile ku tlhela ku nga tshembiwi. Eka Vayuda a ku ri xisandzu loko valandzeri va Yesu va vula leswaku wanuna la beleriweke a ri Mesiya. Naswona eka Magriki yo tala lama dyondzekeke, leswi a ma pfumela eka ku nga fi ka moya-xiviri, mhaka ya ku pfuka eku feni a yi ma nyangatsa.—Mintirho 17:32-34.

Vanhu Lava Kanakana Va Manguva Lawa

Emalembeni ya sweswinyana, swidyondzi swin’wana leswi tivulaka Vakreste swi kandziyise tibuku ni maphepha lama kanetaka ku pfuxiwa ka Yesu swi ku i ntsheketo naswona swi pfuxe njhekanjhekisano lowukulu emhakeni leyi. Eka nkambisiso wa vona wa “Yesu wa matimu,” swidyondzi swo hambana-hambana swi vula leswaku rungula ra Evhangeli ra sirha leri nga riki na nchumu swin’we ni ku humelela ka Yesu loko a pfukile ko va norho, lowu sunguriweke endzhaku ka nkarhi wo leha a file leswaku ku ta seketeriwa leswaku matimba ya yena a ma huma etilweni.

Hi xikombiso, twana mavonelo ya xidyondzi xa Mujarimani Gerd Lüdemann, profesa wa Testamente Leyintshwa ni mutsari wa buku leyi nge, What Really Happened to Jesus—A Historical Approach to the Resurrection. U vule leswaku ku pfuka ka Yesu “i mhaka leyi nga riki na xisekelo” leyi faneleke yi bakanyiwa hi un’wana ni un’wana la nga ni “mavonelo ya swa sayense hi misava.”

Profesa Lüdemann u vula leswaku Kreste la pfuxiweke la humeleleke eka muapostola Petro a ku ri xivono lexi vangiweke hi gome lerikulu ra Petro swin’we ni ku tivona nandzu hi ku va a landzule Yesu. Naswona hi ku ya hi Lüdemann, ku humelela ka Yesu eka vapfumeri lava tlulaka 500 hi nkarhi wun’wana a ku ri mhaka ya “ku nyanyuka ka vunyingi.” (1 Vakorinto 15:5, 6) Hi ku komisa, swidyondzi swo tala swi hunguta swiendlakalo swa Bibele malunghana na Yesu la pfuxiweke swi va mhaka leyi ngo ehleketeleriwa leyi endleke leswaku vadyondzisiwa va va ni ku titwa lokuntshwa ka ku titshemba hi tlhelo ra moya ni ku hisekela vurhumiwa.

Ina, vo tala a va swi tsakeli ku ya kwihi ku va ni njhekanjhekisano wa swa dyondzo. Hambiswiritano, bulo ra ku pfuka ka Yesu ri fanele ri hi khumba hinkwerhu. Hikwalaho ka yini? Hikuva loko a nga pfuxiwanga, Vukreste byi sekeriwe exisekelweni xa mavunwa. Hi hala tlhelo loko ku pfuka ka Yesu ku ri matimu ya ntiyiso hakunene, Vukreste byi sekeriwe entiyisweni. Ehansi ka swiyimo swo tano, a ku lweriwi leswi vuriwaka hi Kreste ntsena kambe ni switshembiso swa yena. Tlhandlakambirhi loko ku ri ni ku pfuka ka vafi, rifu a hi nghwazi kambe i nala la nga hluriwaka.—1 Vakorinto 15:55.

[Mfungho wa Vini va Xifaniso eka tluka 3]

From the Self-Pronouncing Edition of the Holy Bible, containing the King James and the Revised versions