Titshege Hi Moya Wa Xikwembu Loko U Langutana Ni Ku Hundzuka Ka Swiyimo eVuton’wini
“Endla hinkwaswo leswi u nga swi kotaka leswaku u tivonakarisa u amukeleka eka Xikwembu.”—2 TIMOTIYA 2:15.
1. I ku cinca kwihi loku ringaka vumoya bya hina?
MISAVA leyi hi hanyaka eka yona yi tshamela ku cinca. Hi vona nhluvuko lowukulu eka swa sayense ni thekinoloji, kambe mahanyelo ma hohloka hi ndlela leyi tsuvulaka ni misisi. Hilaha hi swi voneke hakona eka xihloko lexi hundzeke, Vakreste va fanele va lwisana ni moya wa misava leyi kanetanaka ni Xikwembu. Kambe loko misava yi ri karhi yi cinca, na hina ha cinca hi tindlela to tala. Hi suka evuhlangini hi va vanhu lava kuleke. Hi nga va ni rifuwo kumbe ri hi lahlekela, hi nga va ni rihanyo lerinene kumbe leri tsaneke naswona hi nga va ni vanhu lava hi va rhandzaka kumbe va nga hi siya. Swo tala swa swiyimo swo tano leswi cinceke a hi nge swi koti ku swi lawula, naswona swi nga tisa miringo leyintshwa ni leyikulu eka vumoya bya hina.
2. Xana vutomi bya Davhida byi cince hi ndlela yihi?
2 A hi vangani vanhu lava langutaneke ni ku cinca lokukulu evuton’wini bya vona ku fana na Davhida n’wana Yese. Hi xitshuketa Davhida u suke exiyin’weni xa ku va mufana la nga murisi la tolovelekeke a va nghwazi leyi nga ni ndhuma etikweni hinkwaro. Endzhaku u ve mubaleki, a hlotiwa ku fana ni xiharhi hi hosi leyi taleke mavondzo. Endzhaku ka sweswo, Davhida u ve hosi ni muhluri. U langutane ni vuyelo lebyi hlomulaka mbilu bya xidyoho xakwe lexikulu. Ndyangu wakwe wu weriwe hi khombo wu tlhela wu hahluka. U hlengelete rifuwo, a dyuhala a tlhela a va ni swiphiqo swa rihanyo leswi fambisanaka ni ku kula. Hambileswi Davhida a langutaneke ni ku hundzuka ka swiyimo swo tala evuton’wini byakwe, u hambete a tshemba Yehovha ni ku titshega hi moya wa Yena. U endle leswi a nga swi kotaka leswaku a tivonakarisa a “amukeleka eka Xikwembu,” kutani Xikwembu xi n’wi katekisile. (2 Timotiya 2:15) Hambileswi swiyimo swa hina swi hambanaka ni swa Davhida, hi nga dyondza swo karhi eka ndlela leyi a tameleke timhaka ta vutomi bya yena ha yona. Xikombiso xa yena xi nga hi pfuna ku twisisa ndlela leyi hi nga hambetaka ha yona hi kuma mpfuno wa moya wa Xikwembu loko hi ri karhi hi langutana ni swiyimo leswi cincaka evuton’wini bya hina.
Ku Titsongahata Ka Davhida I Xikombiso Lexinene
3, 4. Swi tise ku yini leswaku Davhida a suka exiyin’weni xa ku va mufana la nga murisi la tolovelekeke a va ni ndhuma etikweni hinkwaro?
3 Loko a ha ri mufana, Davhida a a nga ri munhu wa xiyimo xa le henhla hambi ku ri endyangwini wa ka vona. Loko muprofeta Samuwele a ya eBetlehema, tata wa Davhida u tise majaha yakwe ya nkombo a siya rin’we. Davhida loyi a a ri rikotse ra kona a a siyiwile leswaku a khathalela tinyimpfu. Kambe Yehovha a a hlawule Davhida leswaku a va hosi leyi a yi ta landzela eIsrayele. Davhida u landziwile eku riseni. Endzhaku, xiviko xa Bibele xi ri: “Samuwele a teka rimhondzo ra mafurha, a n’wi tota exikarhi ka vamakwavo. Kutani moya wa Yehovha wu sungula ku tirha ehenhla ka Davhida ku sukela esikwini rero ku ya emahlweni.” (1 Samuwele 16:12, 13) Davhida a a titshege hi moya wolowo evuton’wini bya yena hinkwabyo.
4 Endzhakunyana mufana yoloye loyi a nga murisi a a ta va ni ndhuma etikweni hinkwaro. U vitaniwile leswaku a ya tirhela hosi ni ku yi tlangela vuyimbeleri. U dlaye nhenha leyi vuriwaka Goliyadi, leyi a yi ri xihontlovila xo kariha bya xivatlankombe lerova hambi ku ri masocha lama nga ni ntokoto ya Vaisrayele a ma chava ku kongomana na xona. Tanihi ndhuna ya masocha, Davhida u lwe ni Vafilista a va hlula. Vanhu a va n’wi rhandza. Va qambhe tinsimu ta ku n’wi dzunisa. Eku sunguleni, mutsundzuxi wa Hosi Sawulo u hlamusele Davhida la ha riki muntshwa a ri loyi “a nga ni vuswikoti bya ku chaya” haripa tlhelo a ri “wanuna wa vurhena ni matimba . . . , wanuna wa nyimpi ni xivulavuri xo tlhariha, wanuna la vumbekeke kahle.”—1 Samuwele 16:18; 17:23, 24, 45-51; 18:5-7.
5. I yini leswi a swi ta endla leswaku Davhida a mila makatla hi ku olova, kambe hi swi tivisa ku yini leswaku a nga milanga makatla?
5 Tanihi leswi Davhida a a ri ni ndhuma, naswona a a ri mpohlo, hala tlhelo a ha tsakama, kasi a a ri xivulavuri lexinene, a tlhela a tlanga vuyimbeleri hi vutshila, nakambe a ri ni vuswikoti bya ku lwa nyimpi, a tlhela a amukeleka eka Xikwembu—a swi tikomba a nga pfumali nchumu. A swi ta olova leswaku xin’wana xa swilo sweswo xi n’wi mirisa makatla, kambe a swi vanga tano. Xiya nhlamulo ya Davhida eka Hosi Sawulo, loyi a tshembiseke ku nyika Davhida n’wana wakwe wa xisati leswaku a va nsati wakwe. Hi ku titsongahata ka ntiyiso, Davhida u te: “Xana ndzi mani naswona maxaka ya mina i va mani, ndyangu wa tatana eIsrayele lerova ndzi va mukon’wana wa hosi?” (1 Samuwele 18:18) Loko a vulavula hi ndzimana leyi, mukambisisi un’wana u tsarile a ku: “Nhlamuselo ya Davhida a ku ri leswaku timfanelo takwe, xikhundlha xakwe, ndyangu lowu a humaka eka wona, hinkwaswo a swi nga ta endla a faneleka ku va mukon’wana wa hosi.”
6. Ha yini hi fanele hi hlakulela moya wa ku titsongahata?
6 Ku titsongahata ka Davhida a ku vangiwa hileswi a a nga rivali leswaku Yehovha u tlakuke hi tindlela hinkwato eka vanhu lava nga hetisekangiki. Davhida u hlamarisiwe hi mhaka ya ku va Xikwembu xi khathala hi munhu wa nyama. (Pisalema 144:3) Nakambe Davhida a a swi tiva leswaku xikhundlha xihi ni xihi lexi a veke na xona u xi kume hileswi Yehovha a titsongahateke, a tixikisa leswaku a n’wi tiyisa, a n’wi sirhelela ni ku n’wi khathalela. (Pisalema 18:35) Yoleyo i dyondzo leyinene swonghasi eka hina! Vuswikoti bya hina, swilo leswi hi koteke ku swi fikelela kun’we ni malunghelo ya hina a swi fanelanga swi hi vangela ku va ni manyunyu. Muapostola Pawulo u tsarile a ku: “Kahle-kahle i yini lexi u nga na xona lexi u nga nyikiwangiki? Kahle-kahle loko u lo nyikiwa, ha yini u tibuma onge a wu lo nyikiwa?” (1 Vakorinto 4:7) Leswaku hi kuma moya lowo kwetsima wa Xikwembu ni leswaku hi amukeleka eka xona, hi fanele hi tshama hi ri karhi hi hlakulela moya wa ku titsongahata.—Yakobo 4:6.
“Mi Nga Tirihiseli”
7. Hi wihi nkarhi lowu pfulekeleke Davhida leswaku a dlaya Hosi Sawulo?
7 Hambileswi ndhuma ya Davhida yi nga n’wi vangelangiki manyunyu, yi pfuxe mavondzo lamakulu eka Hosi Sawulo, loyi a a nga ha ri na moya wa Xikwembu. Hambileswi Davhida a a nga dyanga xa munhu, u balekile loko a lava ku dlayiwa, kutani a ya tshama emananga. Siku rin’wana loko tsima ra ku lavana na Davhida ri tinyike matimba, Hosi Sawulo u nghene ebakweni, a nga swi tivi leswaku Davhida ni vanhu va yena a va tumbele eka rona. Vavanuna va Davhida va n’wi khutaze leswaku a tirhisa nkarhi wolowo lowu a swi tikomba a nyikiwe wona hi Xikwembu leswaku a dlaya Sawulo. Anakanya va ri exinyameni va ri karhi va hlevetela eka Davhida va ku: “Hi leri siku leri Yehovha a ku byelaka ha rona a ku, ‘Waswivo, ndzi nyiketa nala wa wena evokweni ra wena, u fanele u n’wi endla hilaha swi vonakaka swi ri swinene hakona ematihlweni ya wena.’”—1 Samuwele 24:2-6.
8. Ha yini Davhida a titshinyile leswaku a nga tirihiseli?
8 Davhida u arile ku endla xo karhi eka Sawulo. Tanihi leswi a a ri ni ripfumelo ni ku lehisa mbilu, u vone swi enerile ku veka timhaka hinkwato emavokweni ya Yehovha. Loko hosi yi humile ebakweni, Davhida u yi huwelerile a ku: “Onge Yehovha a nga avanyisa exikarhi ka mina na wena; Yehovha u fanele a ndzi rihisela eka wena, kambe voko ra mina a ri nge ti ehenhla ka wena.” (1 Samuwele 24:12) Hambileswi a a swi tiva leswaku leswi a swi endliwa hi Sawulo a swi nga fanelanga, Davhida a nga tirihiselanga, naswona a nga hlamulananga hi ndlela yo biha na Sawulo kumbe ku vulavula swo biha ha yena. Eminkarhini yin’wana yo hlayanyana, Davhida u titshinyile a ala ku tirihisela. Ku ri na sweswo, u titshege hi Yehovha leswaku ku va yena loyi a lulamisaka timhaka.—1 Samuwele 25:32-34; 26:10, 11.
9. Ha yini hi nga fanelanga hi tirihisela loko hi kanetiwa kumbe hi xanisiwa?
9 Ku fana na Davhida, na wena u nga tikuma u ri eswiyin’weni swo nonon’hwa. Kumbexana u nga va u kanetiwa kumbe ku xanisiwa hi lava u dyondzaka na vona xikolo, vatirhi-kuloni, swirho swa ndyangu kumbe van’wana lava nga rhandziki vupfumeri bya wena. U nga tirihiseli. Rindzela Yehovha, u n’wi kombela leswaku a ku pfuna hi moya wa yena. Kumbexana vanhu vo tano lava nga pfumeriki va ta khumbeka hi mahanyelo ya wena lamanene ivi va va vapfumeri. (1 Petro 3:1) Kambe ku nga khathariseki leswaku ku endleka yini, tiyiseka leswaku Yehovha wa xi vona xiyimo xa wena naswona u ta endla swo karhi hi xona hi nkarhi wakwe lowu faneleke. Muapostola Pawulo u tsarile a ku: “Mi nga tirihiseli, varhandziwa, kambe kendlukelani vukarhi; hikuva ku tsariwile: ‘Ku rihisela i ka mina; hi mina ndzi nga ta tlherisela, ku vula Yehovha.’”—Varhoma 12:19.
“Yingisani Ndzayo”
10. Swi tise ku yini leswaku Davhida a wela exidyohweni, naswona u ringetise ku yini ku xi fihla?
10 Ku hundze malembe. Davhida u ve hosi leyi rhandzekaka leyi nga ni ndhuma leyikulu. Ku tshembeka kakwe loku xiyekaka, kun’we ni tipisalema to xonga leti a ti tsaleke a dzunisa Yehovha, swi nga va swi susumetele vanhu ku anakanya leswaku wanuna loyi a a nga ta pfuka a wele exidyohweni lexikulu. Ku hambana ni sweswo, u wele exidyohweni lexikulu. Siku rin’wana loko hosi leyi yi ri elwangwini ra yindlu ya yona yi vone wansati wo saseka a ri karhi a hlamba. Yi vutisise ha yena. Loko Davhida a kuma leswaku wansati loyi a ku ri Bati-xeba, ni leswaku nuna wa yena Uriya a a ri enyimpini, u rhumele rito ra ku ya n’wi vitana kutani a fika a va ni vuxaka bya rimbewu na yena. Endzhaku u kume leswaku u kumise wansati loyi khwiri. Sweswo a swi ta tisa xisandzu lexikulu loko mhaka leyi yi paluxeka! Ehansi ka Nawu wa Muxe, vuoswi a byi ri xidyoho lexikulu. Handle ko kanakana hosi leyi yi anakanye leswaku swi nga koteka ku fihla xidyoho lexi. Hiloko yi rhumela xileriso xa leswaku Uriya a ya vitaniwa enyimpini a vuya eYerusalema. Davhida a a anakanya leswaku Uriya u ta fika a etlela na Bati-xeba, kambe a swi vanga tano. Hi ku ka a nga xi tivi ni lexi a nga xi endlaka, Davhida u tlherisele Uriya enyimpini kun’we ni papila leri kongomisiweke eka Yowabu, ndhuna ya nyimpi. Papila ra kona a ri lerisa leswaku Uriya a vekiwa laha nyimpi yi hisaka kona leswaku a ta dlayiwa. Yowabu u endle leswi a lerisiweke swona, hiloko Uriya a dlayiwa. Endzhaku ka loko Bati-xeba a rile nuna wakwe ku ringana nkarhi lowu tolovelekeke, Davhida u n’wi tekile a va nsati wakwe.—2 Samuwele 11:1-27.
11. Hi yihi mhaka leyi Natani a yi hlamuseleke Davhida, naswona u angurise ku yini?
11 Rhengu ra Davhida a ri tikomba ri tirhile, hambileswi a a swi tiva leswaku Yehovha u vone hinkwaswo leswi a swi endleke. (Vaheveru 4:13) Ku hundze tin’hweti ivi ku tswariwa n’wana. Hiloko Xikwembu xi rhuma Natani lowa muprofeta leswaku a ya eka Davhida. Muprofeta u fike a byela hosi mhaka ya wanuna la fuweke la nga ni tinyimpfu to tala, kambe a teka nyimpfu ya wanuna la pfumalaka a yi dlaya, kasi a yo va yin’we ntsena naswona a a yi rhandza. Mhaka leyi yi endle leswaku Davhida a lava ku rihisela xiendlo xo tano, kambe a nga hatlanga a kumisisa nhlamuselo ya yona leyi tumbeleke. Davhida u hatlise a tsema mhaka ya wanuna la fuweke. Hi ku hlundzuka lokukulu, u byele Natani a ku: “Wanuna la endlaka leswi u faneriwa hi ku fa!”—2 Samuwele 12:1-6.
12. I vuavanyisi byihi lebyi Yehovha a byi tiseke ehenhla ka Davhida?
12 Muprofeta u te: “Wanuna loyi hi wena!” Davhida a a tiavanyisile. A swi kanakanisi leswaku moya wa ku hlundzuka wa Davhida wu hatle wu hela ivi a khomiwa hi tingana ni gome lerikulu. U yingisele a yime tindleve loko Natani a n’wi hlamusela ndlela leyi Yehovha a n’wi avanyiseke ha yona hilaha ku nga papalatekiki. A ku nga ri na marito ya ku n’wi chavelela. Davhida a a fularhele rito ra Yehovha hi ku endla leswo biha. Xana a a nga dlayanga Uriya hi banga ra nala? Banga a ri nga ta suka endlwini ya Davhida. Xana a a nga tekanga nsati wa Uriya exihundleni? Xiendlo lexi fanaka xo biha a xi ta n’wi humelela erivaleni, ku nga ri exihundleni.—2 Samuwele 12:7-12.
13. Davhida u angurise ku yini loko Yehovha a n’wi tshinya?
13 Davhida u ve ni nkateko hileswi a nga wu kanetangiki nandzu wakwe. A nga n’wi hlundzukelanga muprofeta Natani. A nga solanga van’wana kumbe a tiyimelela eka leswi a swi endleke. Loko a byeriwa swidyoho swa yena, Davhida u amukele nandzu, a ku: “Ndzi dyohele Yehovha.” (2 Samuwele 12:13) Pisalema 51 yi kombisa gome leri a veke na rona hikwalaho ka nandzu wakwe, yi tlhela yi kombisa ni mpimo wa ku tisola ka yena. U kombele Yehovha a ku: “U nga ndzi cukumeti ekule ni xikandza xa wena; u nga wu susi moya wa wena wo kwetsima eka mina.” A a tiyiseka leswaku Yehovha, hikwalaho ka musa wakwe, a a nga ta yi langutela ehansi “mbilu leyi tshovekeke yi tlhela yi pfotloseka” hikwalaho ka xidyoho. (Pisalema 51:11, 17) Davhida u hambete a titshega hi moya wa Xikwembu. Yehovha u rivalele Davhida, hambileswi a nga n’wi sirhelelangiki eka vuyelo byo biha bya xidyoho xakwe.
14. Hi fanele hi angurisa ku yini loko Yehovha a hi tshinya?
14 Hinkwerhu ka hina a hi hetisekanga, naswona ha dyoha. (Varhoma 3:23) Minkarhi yin’wana hi nga wela exidyohweni lexikulu, ku fana na Davhida. Tanihi leswi tatana la nga ni rirhandzu a tshinyaka vana vakwe, kutani Yehovha u lulamisa lava va lwelaka ku tirhela yena. Kambe hambileswi ku tshinyiwa swi vuyerisaka, a swi olovi ku swi amukela. Entiyisweni minkarhi yin’wana swi “tisa gome.” (Vaheveru 12:6, 11) Kambe loko hi ‘yingisa ndzayo,’ hi nga kota ku vuyelelana na Yehovha. (Swivuriso 8:33) Leswaku Yehovha a hambeta a hi katekisa hi moya wakwe, hi fanele hi pfumela ku lulamisiwa kutani hi lwela ku amukeleka eka Xikwembu.
U Nga Tshembi Rifuwo Leri Nga Tiyangiki
15. (a) Hi tihi tindlela leti vanhu van’wana va tirhisaka rifuwo ra vona ha tona? (b) Davhida a a navela ku tirhisa rifuwo ra yena hi ndlela yihi?
15 A xi kona lexi kombisaka leswaku Davhida u kule a hanya emafurheni kumbe leswaku ndyangu wa ka vona a wu fuwile. Kambe hi nkarhi wa vuhosi byakwe, Davhida u hlengelete rifuwo ro tala. Hilaha u swi tivaka hakona, vo tala va vungelela rifuwo va tlhela va ri andzisa hi makwanga kumbe va ri tirhisa hi ndlela ya vutianakanyi. Van’wana va tirhisa mali ya vona hi ndlela ya ku tivonakarisa. (Matewu 6:2) Davhida u tirhise rifuwo rakwe hi ndlela leyi hambaneke. A a hisekela ku dzunisa Yehovha ha rona. Davhida u tivise Natani leswaku u navela ku akela Yehovha tempele, leswaku a nghenisa areka ya ntwanano eka yona, leyi hi nkarhi wolowo a yi ri eYerusalema, yi “tshama exikarhi ka ntsonga wa malapi.” Yehovha u tsakisiwe hi ku navela loku Davhida a a ri na kona, kambe u n’wi byele hi nomu wa Natani leswaku loyi a a ta aka tempele i Solomoni n’wana wa Davhida.—2 Samuwele 7:1, 2, 12, 13.
16. I yini leswi Davhida a swi lunghiseleleke ntirho wo aka tempele?
16 Davhida u hlengelete swilo leswi a swi ta tirhisiwa entirhweni lowu wukulu wa ku aka. Davhida u byele Solomoni a ku: “Ndzi lunghiselele yindlu ya Yehovha titalenta ta nsuku ta 100 000 ni titalenta ta silivhere ta miliyoni, ni koporo ni nsimbi, a ku na ndlela ya ku swi pima hikuva swi ve mpimo lowukulu ngopfu; ndzi lunghiselele timhandzi ni maribye, kambe swona u ta swi engetela.” Eka rifuwo ra yena n’wini, u teke titalenta ta 3 000 ta nsuku ni titalenta ta 7 000 ta silivhere a nyikela hi swona.a (1 Tikronika 22:14; 29:3, 4) Ku nyikela ka Davhida hi mbilu hinkwayo a ku nga ri xikombiso xa ku tibuma, kambe a ku ri xikombiso xa ripfumelo ni ku tinyiketela ka yena eka Yehovha Xikwembu. Hi ku xiya Xihlovo xa rifuwo ra yena, u byele Yehovha a ku: “Hinkwaswo swi huma eka wena, naswona hi ku nyike swona swi huma evokweni ra wena.” (1 Tikronika 29:14) Mbilu leyi hananaka ya Davhida yi n’wi susumetele ku endla hinkwaswo leswi a nga swi kotaka leswaku a seketela vugandzeri lebyi tengeke.
17. Ndzayo leyi nga eka 1 Timotiya 6:17-19 yi tirha njhani eka lava fuweke ni le ka swisiwana?
17 Onge na hina hi nga tirhisa rifuwo ra hina hi ndlela leyinene. Ematshan’weni yo hlongorisa vutomi bya ku titlonya, swa antswa ku lwela ku amukeriwa hi Xikwembu—yoleyo i ndlela yo kuma vutlhari bya ntiyiso ni ntsako. Pawulo u tsarile a ku: “Lerisa lava fuweke emafambiselweni ya sweswi ya swilo leswaku va nga titekeli ehenhla, naswona va nga veki ntshembo wa vona erifuweni leri nga tiyangiki, kambe va wu veka eka Xikwembu, lexi hi nyikaka swilo hinkwaswo hilaha ku fuweke leswaku hi tiphina; va endla leswinene, va fuwa hi mintirho leyinene, va hanana, va tiyimisela ku avelana ni van’wana, va tivekela hi ku hlayiseka masungulo lamanene ya nkarhi lowu taka, leswaku va ta khomelela swinene evuton’wini bya xiviri.” (1 Timotiya 6:17-19) Ku nga khathariseki xiyimo xa hina xa timali, a hi titshegeni hi moya wa Xikwembu kutani hi namarhela vutomi lebyi nga ta hi “[fuwisa] eka Xikwembu.” (Luka 12:21) A ku na nchumu xa nkoka ku tlula ku va lava amukelekaka eka Tata wa hina wa le tilweni la nga ni rirhandzu.
Tivonakarise U Ri La Amukelekaka Eka Xikwembu
18. Davhida u vekele Vakreste xikombiso lexinene hi ndlela yihi?
18 Evuton’wini byakwe hinkwabyo, Davhida a a lwela ku fanelekela ku va la amukelekaka eka Yehovha. Eka risimu rakwe u huwelerile a ku: “Oho Xikwembu, ndzi kombe tintswalo, ndzi kombe tintswalo, hikuva moya-xiviri wa mina wu tumbele eka wena.” (Pisalema 57:1) Ku tshemba ka yena Yehovha a ku vanga ka hava. Davhida u dyuharile, “a enerisekile hi masiku.” (1 Tikronika 23:1) Hambileswi Davhida a endleke swihoxo leswikulu, u tsundzukiwa a ri un’wana wa timbhoni to tala ta Xikwembu leti kombiseke ripfumelo lerikulu.—Vaheveru 11:32.
19. Hi nga tikombisa njhani hi ri lava amukelekaka eka Xikwembu?
19 Loko u ri karhi u langutana ni swiyimo leswi hundzukaka evuton’wini, tsundzuka leswaku tanihi leswi Yehovha a tiyiseke Davhida a tlhela a n’wi lulamisa, A nga endla leswi fanaka ni le ka wena. Ku fana na Davhida, muapostola Pawulo u langutane ni ku hundzuka ka swiyimo swo tala evuton’wini byakwe. Kambe na yena u tshame a tshembekile hi ku titshega hi moya wa Xikwembu. U tsarile a ku: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.” (Vafilipiya 4:12, 13) Loko hi titshega hi Yehovha, u ta hi pfuna leswaku hi hlula. U lava leswaku hi hlula. Loko hi n’wi yingisela hi tlhela hi tshinela eka yena, u ta hi nyika matimba ya ku endla ku rhandza ka yena. Naswona loko hi hambeta hi titshega hi moya wa Xikwembu, hi ta kota ku ‘tivonakarisa hi ri lava amukelekaka eka Xikwembu’ sweswi ni hilaha ku nga heriki.—2 Timotiya 2:15.
[Nhlamuselo ya le hansi]
a Ntikelo wa minyikelo ya Davhida hi ku ya hi mpimo wa namuntlha a wu hundza R8,3 wa tibiliyoni.
A Wu Ta Hlamurisa Ku Yini?
• Hi nga wu papalatisa ku yini moya wa manyunyu?
• Ha yini hi nga fanelanga hi tirihisela?
• Hi fanele hi ku languta njhani ku tshinyiwa?
• Ha yini hi fanele hi tshemba Xikwembu ematshan’weni ya rifuwo?
[Xifaniso lexi nga eka tluka 16, 17]
Davhida a a titshege hi moya wa Xikwembu naswona a a lwela ku fanelekela ku va la amukelekaka eka xona. Xana na wena u endla tano?
[Xifaniso lexi nga eka tluka 18]
“Hinkwaswo swi huma eka wena, naswona hi ku nyike swona swi huma evokweni ra wena”