Swivutiso Swa Vahlayi

Hi swi tivisa ku yini leswaku nhlamuselo ya vutlhari leyi nga eka Swivuriso 8:22-31 yi kombetela eka Yesu Kreste loko a nga si ta laha misaveni?

Nhlamuselo leyi huhuteriweke ya vutlhari leyi kumekaka eka buku ya Swivuriso yi ri: “Yehovha u ndzi humesile ndzi ri masungulo ya ndlela yakwe, masungulo ya mintirho yakwe ya khale swinene. . . . Ku sukela eku sunguleni, tintshava ti nga si simekiwa, switsunga swi nga si va kona, ndzi tisiwe onge hiloko ndzi tisiwa hi switlhavi swa ku veleka . . . A ndzi ri kona loko a lunghiselela matilo; . . . hi nkarhi wolowo a ndzi ri etlhelo ka yena ndzi ri mutirhi la nga ni vuswikoti, a ndzi ri munhu loyi a n’wi rhandzaka hilaha ku hlawulekeke siku ni siku, mina ndzi tsakile emahlweni ka yena nkarhi hinkwawo, . . . naswona swilo leswi a ndzi swi rhandza a swi ri ni vana va vanhu.”

Tsalwa leri a ri vulavuli hi vutlhari bya Xikwembu kumbe vutivi byo karhi. Hikwalaho ka yini? Hikuva vutlhari lebyi ku vulavuriwaka hi byona laha byi ‘humesiwile’ kumbe ku tumbuluxiwa, tanihi masungulo ya ndlela ya Yehovha. Yehovha Xikwembu a nga vanga ni masungulo naswona u ve la tlhariheke minkarhi hinkwayo. (Pisalema 90:1, 2) Vutlhari bya yena byi hava masungulo; a byi tumbuluxiwanga kumbe ku humesiwa. A byi ‘tisiwanga onge hiloko byi tisiwa hi switlhavi swa ku veleka.’ Ku tlula kwalaho, ku vuriwa leswaku vutlhari lebyi bya vulavula byi tlhela byi teka goza, byi yimela munhu.—Swivuriso 8:1.

Buku ya Swivuriso yi vula leswaku khale swinene vutlhari lebyi a byi ri ekusuhi swinene na Yehovha Muvumbi, tanihi “mutirhi la nga ni vuswikoti.” Marito lawa ma vulavula hi Yesu hakunene. Khale swinene loko a nga si ta laha misaveni, Yesu a a tirha ekusuhi swinene na Yehovha lerova Rito ra Xikwembu ri vula leswi ha yena: “U le mahlweni ka swilo swin’wana hinkwaswo naswona swilo swin’wana hinkwaswo swi endliwe swi va kona hikwalaho ka yena.”—Vakolosa 1:17; Nhlavutelo 3:14.

Ku hlamuseriwa ka N’wana wa Xikwembu tanihi vutlhari swa fanela, hikuva hi yena a hlavuteleke swikongomelo swa Yehovha swa vutlhari ni swileriso swakwe. Loko a nga si ta laha misaveni, Yesu a a ri Rito ra Xikwembu kumbe Muvulavuleri wa xona. (Yohane 1:1) U hlamuseriwa tanihi loyi a nga “matimba ya Xikwembu ni vutlhari bya Xikwembu.” (1 Vakorinto 1:24, 30) Kunene i nhlamuselo leyinene leyi vulavulaka hi N’wana wa Xikwembu, loyi rirhandzu rakwe eka vanhu ri n’wi susumeteleke ku nyikela hi vutomi bya yena tanihi nkutsulo hikwalaho ka vona!—Yohane 3:16.

[Xifaniso lexi nga eka tluka 31]

“Ndzi tisiwe . . . tintshava ti nga si simekiwa”