U Nga Endla Yini Leswaku U va Munhu La Hisekelaka Swilo Swa Moya Hakunene?

MUAPOSTOLA PAWULO u tsarile a ku: “Ku anakanya swa nyama swi vula rifu, kambe ku anakanya swa moya swi vula vutomi ni ku rhula.” (Varhoma 8:6) Hi marito lawa, muapostola a a kombisa leswaku ku va munhu la hisekelaka timhaka ta moya a hi mhaka ya ku tihlawulela ntsena. Xa nkoka swinene, i mhaka ya vutomi ni rifu. Kambe, xana munhu la hisekelaka timhaka ta moya u kuma “vutomi ni ku rhula” hi ndlela yihi? Hi ku ya hi Bibele, munhu wo tano u ni ku rhula sweswi—yena n’wini swin’we ni Xikwembu—naswona u ta hakeriwa hi vutomi lebyi nga heriki enkarhini lowu taka. (Varhoma 6:23; Vafilipiya 4:7) A swi hlamarisi leswi Yesu a nga te: “Va tsaka lava khathalaka hi xilaveko xa vona xa moya”!—Matewu 5:3.

Mhaka ya leswaku u hlaya magazini lowu yi kombisa leswaku wa ti tsakela timhaka ta moya—naswona leri i goza ra vutlhari. Kambe mavonelo malunghana ni timhaka ta moya ma hambana swinene, kutani u nga ha tivutisa: ‘Ku hisekela swilo swa moya kahle-kahle swi vula yini? Naswona u nga swi kotisa ku yini ku va munhu wo tano?’

“Mianakanyo Ya Kreste”

Handle ko kombisa nkoka swin’we ni vuyelo bya ku hisekela timhaka ta moya, muapostola Pawulo u swi hlamusele hi vuxokoxoko leswaku kahle-kahle swi vula yini ku ti hisekela. Eka Vakreste va le mutini wa khale wa Korinto, Pawulo u hlamusele ku hambana exikarhi ka munhu wa nyama, leswi vulaka munhu loyi a landzelaka ku navela ka nyama, ni munhu wa moya, ku nga loyi a rhandzaka swilo swa moya. Pawulo u tsarile a ku: “Munhu wa nyama a nga swi amukeli swilo swa moya wa Xikwembu, hikuva eka yena i vuphukuphuku.” Kasi hi hala tlhelo, Pawulo u hlamusele leswaku munhu wa moya u tiviwa hi ku va ni “mianakanyo ya Kreste.”—1 Vakorinto 2:14-16.

Ku va ni “mianakanyo ya Kreste” kahle-kahle swi vula ku va ni “langutelo ra mianakanyo leri fanaka ni leri Kreste Yesu a a ri na rona.” (Varhoma 15:5; Vafilipiya 2:5) Hi marito man’wana, munhu wa moya hi loyi a ehleketaka ku fana na Yesu naswona a fambaka eminkondzweni Yakwe. (1 Petro 2:21; 4:1) Loko mianakanyo ya munhu yi ya yi fana ni ya Kreste, u ya a swi hisekela ngopfu swilo swa moya naswona u ya a tshinelela hakelo ya “vutomi ni ku rhula.”—Varhoma 13:14.

Ndlela Leyi Hi Nga Tivaka “Mianakanyo Ya Kreste” Ha Yona

Hambiswiritano, leswaku munhu a va ni mianakanyo ya Kreste u fanele a rhanga a tiva mianakanyo yoleyo. Hikokwalaho, goza ro sungula ro hlakulela ku hisekela swilo swa moya i ku tiva ndlela leyi Yesu a a ehleketa ha yona. Kambe u nga yi tiva njhani mianakanyo ya munhu loyi a hanyeke emisaveni malembe ya 2 000 lama hundzeke? Hi xikombiso, u va tive njhani vanhu va nkoka eka matimu ya tiko ra ka n’wina? Swi nga ha endleka leswaku u dyondze ha vona. Hi ndlela leyi fanaka, ku dyondza matimu ya Yesu lama tsariweke i ndlela ya nkoka yo tiva mianakanyo ya Kreste.—Yohane 17:3.

Emhakeni ya Yesu, ku ni swiviko swa mune leswi twisisekaka kahle swa matimu—Tievhangeli leti tsariweke hi Matewu, Marka, Luka na Yohane. Ku hlaya swiviko leswi hi vukheta swi ta ku pfuna leswaku u twisisa ndlela leyi Yesu a a ehleketa ha yona, swilo leswi a a khumbeka ngopfu ha swona ni leswi a swi n’wi susumetela ku teka goza ro karhi. Loko u tinyika nkarhi wo anakanyisisa hi leswi u swi dyondzaka hi Yesu, u swi vona hi mahlo ya mianakanyo leswaku a a ri munhu wa muxaka muni. Hambiloko ana se u tivula mulandzeri wa Kreste, ku dyondza ko tano ni ku anakanyisisa swi ta ku pfuna leswaku u “[hambeta u] kula eka musa lowu nga faneriwiki ni le ka vutivi bya Hosi tlhelo Muponisi wa hina Yesu Kreste.”—2 Petro 3:18.

Loko wa ha ehleketa hi sweswo, a hi kambisiseni swiyenge swin’wana eka Tievhangeli hi vona leswaku i yini leswi endleke Yesu a hisekela timhaka ta moya. Kutani tivutise leswaku u nga wu landzela njhani ntila lowu a wu siyeke.—Yohane 13:15.

Ku Hisekela Swilo Swa Moya Ni “Mihandzu Ya Moya”

Mutsari wa Evhangeli Luka u vule leswaku moya lowo kwetsima wa Xikwembu wu chululeriwe eka Yesu loko a khuvuriwa kutani Yesu a “[tala] moya lowo kwetsima.” (Luka 3:21, 22; 4:1) Kutani Yesu u tsundzuxe vadyondzisiwa vakwe nkoka wa ku kongomisiwa hi moya lowo kwetsima wa Xikwembu kumbe “matimba lama tirhaka.” (Genesa 1:2; Luka 11:9-13) Ha yini sweswo swi ri swa nkoka? Hikuva moya wa Xikwembu wu ni matimba yo hundzula mianakanyo ya munhu leswaku yi sungula ku fana ni mianakanyo ya Kreste. (Varhoma 12:1, 2) Moya lowo kwetsima wu endla leswaku munhu a va ni timfanelo to tanihi “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.” Timfanelo leti—leti Bibele yi ti vitanaka “mihandzu ya moya”—ti kombisa munhu leswaku i wa moya hakunene. (Vagalatiya 5:22, 23) Hi ku komisa, munhu wa moya hi loyi a kongomisiwaka hi moya wa Xikwembu.

Yesu u kombise mihandzu ya moya evutirhelini bya yena hinkwabyo. Timfanelo to tanihi rirhandzu, musa ni vunene a ti vonaka ngopfu-ngopfu eka ndlela leyi a a va khoma ha yona lava a va tekiwa va ri va xiyimo xa le hansi etikweni. (Matewu 9:36) Hi xikombiso, xiya xiendlakalo lexi hlamuseriweke hi muapostola Yohane. Ha hlaya: “Kuteloko [Yesu] a hundza a vona munhu la velekiweke a fe mahlo.” Vadyondzisiwa va Yesu na vona va n’wi vonile wanuna loyi kambe va n’wi teke a ri mudyohi. Va vutisile va ku: “I mani la dyoheke, i munhu loyi kumbe i vatswari vakwe?” Vaakelani va wanuna loyi na vona va n’wi vonile kambe eka vona a a ri mukomberi ntsena. Va te: “I munhu loyi a a tshama ehansi a kombela, a hi swona ke?” Hambiswiritano, Yesu u vone wanuna loyi a feke mahlo tanihi munhu loyi a a lava mpfuno. U vulavule na yena kutani a n’wi tshungula.—Yohane 9:1-8.

Xana xiendlakalo lexi xi ku dyondzisa yini hi mianakanyo ya Kreste? Xo sungula, Yesu a a nga va honisi vanhu va xiyimo xa le hansi kambe a a va kombisa ntwela-vusiwana lowukulu. Xa vumbirhi, a a teka goza ku sungula leswaku a pfuna van’wana. Xana u ehleketa leswaku wa wu landzela ntila lowu vekiweke hi Yesu? Xana u languta vanhu ku fana na Yesu, u va nyika mpfuno lowu va wu lavaka leswaku va antswisa vutomi bya vona kutani va va ni ntshembo wa vumundzuku lebyinene? Kumbe, xana u voyamele eku rhandzeni ka vanhu va xiyimo xa le henhla kutani u honisa va xiyimo xa le hansi? Loko u languta vanhu hilaha Yesu a a va languta hakona, hakunene u landzela xikombiso xakwe.—Pisalema 72:12-14.

Ku Hisekela Swilo Swa Moya Ni Xikhongelo

Swiviko swa Evhangeli swi kombisa leswaku Yesu hakanyingi a a khongela eka Xikwembu. (Marka 1:35; Luka 5:16; 22:41) Hi nkarhi wa vutirheli byakwe bya laha misaveni, Yesu a a tinyika nkarhi wa ku khongela. Mudyondzisiwa Matewu u tsarile a ku: “Loko a tlherise mintshungu, [Yesu] a tlhandlukela entshaveni a ri yexe a ya khongela.” (Matewu 14:23) Eminkarhini yoleyo leyi Yesu a a yi heta a ri swakwe a vulavula ni Tata wakwe wa le tilweni, a a kuma matimba. (Matewu 26:36-44) Namuntlha, vanhu lava hisekelaka swilo swa moya na vona va tinyika nkarhi wa ku vulavurisana ni Xikwembu, hikuva va swi tiva leswaku sweswo swi ta tiyisa vuxaka bya vona ni Muvumbi naswona swi ta va pfuna leswaku va fana na Kreste swinene eka ndlela leyi va ehleketaka ha yona.

Hakanyingi Yesu a a khongela nkarhi wo leha. (Yohane 17:1-26) Hi xikombiso, emahlweni ko hlawula vavanuna va 12 lava a va ta va vaapostola vakwe, Yesu u “y[e] entshaveni ku ya khongela, kutani a hambeta a khongela Xikwembu vusiku hinkwabyo.” (Luka 6:12) Hambileswi swi nga bohiki ku heta vusiku hinkwabyo u khongela, vanhu lava hisekelaka swilo swa moya va landzela xikombiso xa Yesu. Emahlweni ko endla swiboho leswikulu evuton’wini, va heta nkarhi wo tala va khongela eka Xikwembu, va lava nkongomiso wa moya lowo kwetsima leswaku va endla swiboho leswi nga ta va pfuna leswaku va swi hisekela ngopfu swilo swa moya.

Eswikhongelweni swakwe, Yesu u tlhele a kombisa ndlela leyi hi faneleke hi n’wi tekelela ha yona hi ku tinyiketela eswikhongelweni swa hina. Xiya leswi Luka a swi tsaleke malunghana ni ndlela leyi Yesu a khongeleke ha yona hi vusiku bya le mahlweni ka ku fa kakwe. “Kuteloko a fikeriwa hi maxangu a hambeta a khongela hi matimba swinene; kutani nyuku wakwe wu kotisa mathonsi ya ngati wu thonela ehansi.” (Luka 22:44) Yesu u tshame a khongela swinene emahlweni ka kwalaho, kambe hi nkarhi wolowo, leswi a a langutane ni ndzingo lowukulu swinene evuton’wini byakwe bya laha misaveni, u khongele “hi matimba swinene”—naswona xikhongelo xakwe xi hlamuriwile. (Vaheveru 5:7) Vanhu lava hisekelaka swilo swa moya va tekelela xikombiso xa Yesu. Loko va langutane ni miringo leyikulu swinene, va khongela Xikwembu “hi matimba swinene” leswaku xi va nyika moya lowo kwetsima, xi va kongomisa xi tlhela xi va seketela.

Tanihi leswi swi nga erivaleni leswaku Yesu a a hisekela ku khongela, a swi hlamarisi leswi vadyondzisiwa vakwe va laveke ku n’wi tekelela emhakeni leyi. Hikokwalaho, va n’wi komberile va ku: “Hosi, hi dyondzise ndlela ya ku khongela.” (Luka 11:1) Hilaha ku fanaka namuntlha, lava tlangelaka timhaka ta moya naswona va lavaka ku kongomisiwa hi moya lowo kwetsima wa Xikwembu va landzela xikombiso xa Yesu endleleni leyi va khongelaka ha yona eka Xikwembu. Ku hisekela swilo swa moya ni xikhongelo swa fambisana.

Ku Hisekela Swilo Swa Moya Ni Ku Chumayela Mahungu Lamanene

Eka Evhangeli ya Marka, hi kuma xiviko xa loko Yesu a tshungula vanhu vo tala lava vabyaka kukondza ku va vusiku. Esikwini leri landzeleke loko a ri yexe a ri eku khongeleni nimixo swinene, vaapostola vakwe va te eka yena kutani va n’wi byela leswaku vanhu vo tala a va ri ku n’wi laveni, kumbexana va lava ku tshunguriwa. Hambiswiritano, Yesu u va byele a ku: “A hi yeni kun’wanyana, emadorobeni ya muti lowu nga ekusuhinyana, leswaku ndzi ta chumayela na kona.” Kutani Yesu u hlamusele xivangelo xa kona a ku: “Ndzi hume hi xikongomelo xexo.” (Marka 1:32-38; Luka 4:43) Hambileswi a swi ri swa nkoka eka Yesu ku tshungula vanhu, ku chumayela mahungu lamanene ya Mfumo wa Xikwembu a ku ri ntirho lowukulu lowu a a rhumeriwe ku ta endla wona.—Marka 1:14, 15.

Namuntlha, ku byela van’wana hi Mfumo wa Xikwembu ka ha ri mfungho wa lava nga ni mianakanyo ya Kreste. Yesu u nyike hinkwavo lava lavaka ku va valandzeri vakwe xileriso lexi: “Hikokwalaho fambani mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Ku tlula kwalaho, Yesu u profetile a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Tanihi leswi Rito ra Xikwembu ri kombisaka leswaku ntirho wo chumayela wu endliwa hi matimba ya moya lowo kwetsima, ku hlanganyela entirhweni wolowo hi ku hiseka i xikombiso xa ku rhangisa swilo swa moya hakunene.—Mintirho 1:8.

Ku chumayela rungula ra Mfumo eka vanhu emisaveni hinkwayo swi lava leswaku vanhu va timiliyoni va va nyandza yin’we. (Yohane 17:20, 21) Lava hlanganyelaka entirhweni lowu va fanele va va vanhu lava hisekelaka swilo swa moya va tlhela va hleleka kahle emisaveni hinkwayo. Xana wa va tiva vanhu lava landzelaka mikondzo ya Kreste naswona va chumayelaka mahungu lamanene ya Mfumo emisaveni hinkwayo?

Xana Hakunene Wa Swi Hisekela Swilo Swa Moya?

Ina, ku ni swilo swin’wana leswi kombisaka loko munhu a swi hisekela hakunene swilo swa moya, kambe xana wa swi endla leswi se ku vulavuriweke ha swona? Leswaku u kuma nhlamulo, tivutise: ‘Xana ndzi dyondza Rito ra Xikwembu, ku nga Bibele nkarhi na nkarhi naswona ndzi anakanyisisa hi leswi ndzi swi dyondzaka? Xana ndzi kombisa mihandzu ya moya evuton’wini bya mina? Xana ndzi wanuna kumbe wansati loyi a khongelaka nkarhi na nkarhi? Xana ndzi lava ku tihlanganisa ni vanhu lava chumayelaka mahungu lamanene ya Mfumo wa Xikwembu emisaveni hinkwayo?’

Ku tikambisisa hi ku tshembeka swi nga ku pfuna ku vona loko hakunene u swi hisekela swilo swa moya. Hi ku khutaza leswaku u teka magoza lama fanelaka sweswi leswaku u kuma “vutomi ni ku rhula.”—Varhoma 8:6; Matewu 7:13, 14; 2 Petro 1:5-11.

[Bokisi/Xifaniso lexi nga eka tluka 7]

MUNHU LA HISEKELAKA SWILO SWA MOYA

◆ U rhandza Rito ra Xikwembu

◆ U kombisa mihandzu ya moya

◆ U khongela nkarhi na nkarhi ni hi mbilu hinkwayo eka Xikwembu

◆ U vulavula ni van’wana hi mahungu lamanene ya Mfumo

[Xifaniso lexi nga eka tluka 5]

Bibele yi ku pfuna leswaku u tiva “mianakanyo ya Kreste”