Tshinela Eka Xikwembu
Yehovha U Va Teka Va Ri Va Risima Vanhu Vo Rhula
MANYUNYU, mavondzo ni ku ti lavela swa le henhla. Mikhuva yo tano yi tolovelekile exikarhi ka vanhu lava lavaka ku humelela emisaveni leyi. Xana mikhuva yo tano yi nga endla leswaku hi tshinela eka Yehovha Xikwembu? Nikatsongo, Yehovha u va teka va ri va risima evugandzerini byakwe vanhu vo rhula. Leswi hi swi vona eka rungula leri kumekaka eka Tinhlayo ndzima 12. Yi vulavula hi leswi humeleleke emananga ya Sinayi, endzhaku ka ku kutsuriwa ka Vaisrayele aEgipta.
Meriyamu sesi wa Muxe swin’we ni buti wakwe Aroni ‘va pfukele’ ndzisana ya vona. (Ndzimana 1) Ematshan’weni yo vulavula na Muxe, va n’wi pfukerile hi ku byela vanhu lava a va ri enxaxeni swivilelo swa vona. Meriyamu loyi ku vulavuriweke ha yena eku sunguleni ka ndzimana leyi hi yena muhlohloteri lonkulu. Xivangelo xo sungula lexi endleke leswaku va gungula hileswi Muxe a a teke wansati wa Mukuxi. Xana Meriyamu a a ri ni mavondzo hileswi a anakanya leswaku wansati loyi wa Mukuxi u ta xiximiwa ivi yena a tekeriwa ehansi?
Kambe a ku ri ni swivangelo swin’wana leswi a swi va endla va gungula. Meriyamu na Aroni a va tshamela ku vula marito lawa: “Xana Yehovha u vulavule hi Muxe ntsena? Xana a nga vulavulanga na hi hina?” (Ndzimana 2) Xana xivangelo xa vona xo gungula a ku ri ku lava vulawuri ni ku xiximiwa?
Rungula leri ri kombisa leswaku Muxe a nga va angulanga hi yexe. Entiyisweni u tiyisele swihehlo swoleswo a miyerile. Ku va Muxe a tiyisele swihehlo swoleswo a miyerile swi tiyisekisa leswi Bibele yi swi hlamuselaka ha yena tanihi munhu la “[rhuleke] ku tlula vanhu hinkwavo” emisaveni.a (Ndzimana 3) Muxe a a nga boheki ku tiyimelela. Yehovha a a yingisile naswona u n’wi yimelerile Muxe.
Leswi va gunguleleke Muxe, Yehovha u swi teke swi fana ni loko va gungulele Yena. Phela hi yena loyi a hlawuleke Muxe. Loko Xikwembu xi tshinya vanhu volavo lava a va gungula xi va tsundzuxe hi vuxaka byo hlawuleka lebyi a xi ri na byona na Muxe hi ku va byela marito lawa: “Ndzi vulavula na yena nomu hi nomu.” Kutani Yehovha u vutise Meriyamu na Aroni a ku: “Kutani, ha yini mi nga chavanga ku pfukela . . . Muxe?” (Ndzimana 8) Loko va pfukela Muxe entiyisweni a va pfukela Xikwembu. Hikwalaho ka leswi va vulavuleke hi ndlela yo pfumala xichavo va pfukela Muxe, a va ta langutana ni vukarhi bya Xikwembu.
Meriyamu, muhlohloteri lonkulu u biwe hi nhlokonho. Hi ku hatlisa endzhaku ka sweswo Aroni u kombele Muxe leswaku a kombela Xikwembu xi rivalela Meriyamu. Sweswi Meriyamu a a lava mpfuno eka Muxe, loyi a va n’wi pfukela! Hi moya wo rhula Muxe u endle hilaha a komberiweke hakona. Muxe u vulavule ro sungula eka rungula leri hi ku khongela a kombelela makwavo ndzivalelo eka Yehovha. Hambileswi Meriyamu se a a horile eka vuvabyi byakwe, a a fanele a tshama a ri yexe ekule ni vanhu ku ringana masiku ya nkombo.
Rungula leri ri hi pfuna ku twisisa leswaku ku na timfanelo leti Yehovha a ti rhandzaka ni mikhuva leyi a yi vengaka. Loko hi lava ku tshinela eka yena, hi fanele hi ti karhatela ku tsuvula mikhuva yihi na yihi ya manyunyu, mavondzo ni ku tilavela swa le henhla. Yehovha u rhandza vanhu vo rhula. U va tshembisa leswi: “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:11; Yakobo 4:6.
[Nhlamuselo ya le hansi]
a Ku va ni moya wo rhula, i mfanelo leyinene leyi endlaka leswaku munhu a kota ku tiyiselela ku khomiwa hi ndlela yo biha naswona a papalata moya wo rihisela.