“Xana Ndzi Ta Kombela Ku Pfuniwa Ku Fikela Rini?”

Loko Jayne a ri karhi a rila u te: “Ndzo lava ntsena leswaku ku vava loku ndzi ku twaka ku hela!” A a ri ni khensa naswona a yi hangalaka ni miri hinkwawo. Anakanya ndlela leyi vandyangu wakwe ni vanghana a va navela ha yona ku n’wi ntshunxa eka vuvabyi ni switlhavi swakwe! Va khongele Xikwembu leswaku xi n’wi pfuna. Xana a xi ta va yingisa? Xana a xi khathala ha vona?

XIKWEMBU xa swi vona swiyimo leswi vanhu va langutanaka na swona. Rito ra xona, ku nga Bibele, ri ri: “Ntumbuluko hinkwawo wu hambeta wu konya ni ku vaviseka swin’we.” (Varhoma 8:22) Xikwembu xa swi tiva leswaku ku ni vanhu va madzana ya timiliyoni lava ku fana na Jayne, swi nga ha endlekaka va twa ku vava emirini, va tshoveke moya, kumbe va tshikilelekile emianakanyweni. Xikwembu xi vona vanhu va timiliyoni ta 800 lava etlelaka xivambalana xi ri karhi xi buba, ni timiliyoni ta vanhu lava khomiweke hi tihanyi endyangwini swin’we ni vatswari lava karhatekeke hi vumundzuku ni vuhlayiseki bya vana va vona. Xana u tshame u tivutisa loko Xikwembu xi ta teka goza? Tanihi leswi hina hi lavaka ku pfuna varhandziwa va hina, xana Xikwembu a xi swi lavi ku pfuna vanhu lava nga swivumbiwa swa xona?

Loko u tshame u vutisa swivutiso swo fana ni sweswo, a wu wexe. Emalembeni yo tlula 2 600 lama hundzeke, wanuna wo tshembeka Habakuku u titwe hilaha vo tala va titwaka hakona namuntlha naswona u vutise Xikwembu a ku: “Oho Yehovha, xana ndzi ta kombela ku pfuniwa ku fikela rini, kambe u nga yingisi? Xana ndzi ta kombela leswaku u ndzi pfuna emadzolongeni ku fikela rini, kambe u nga ndzi ponisi? Ha yini u ndzi endla ndzi vona leswo biha, naswona u tshamela ku languta ku karhateka? Ha yini ku phanga ni madzolonga swi ri emahlweni ka mina, ha yini ku ri ni ku holova, naswona ha yini ku ri ni ku lwa?” (Habakuku 1:2, 3) Habakuku, muprofeta wa Muheveru, u vone swiendlo leswi tsemaka nhlana swa madzolonga ya nsele ni nkani enkarhini lowu a hanyeke ha wona. Namuntlha swiendlo swo tano i tshamela-maxelo naswona a swi va khomi kahle vanhu lava nga ni ntwela-vusiwana.

Xana Xikwembu a xi nga ri na mhaka na swona leswi a swi karhata Habakuku? A xi ri ni mhaka na swona hikuva xi swi yingisile swivutiso swakwe leswi humaka embilwini kutani xi n’wi chavelela ni ku n’wi khutaza tanihi leswi a a tshikilelekile. Yehovha Xikwembu u tiyise ripfumelo ra Habakuku hi ku n’wi tshembisa leswaku u ta herisa ku xaniseka. Rungula ra Xikwembu leri nyikaka ntshembo ri nga ku chavelela na wena hilaha ri endleke hakona eka Jayne swin’we ni ndyangu wakwe. Swihloko leswi landzelaka swi ta hlamula swivutiso leswi: Xana hi nga tiyiseka njhani leswaku Xikwembu xa hi khathalela hakunene? I yini leswi Xikwembu xi nga ta swi endla leswaku xi herisa ku xaniseka naswona xi ta swi endla rini?