‘A Hi Nyikeleni Gandzelo Ra Yehovha’

LOKO munhu wo karhi a ku endlela xiendlo xa musa, xana u swi kombisa njhani leswaku wa tlangela? Anakanyisisa hi ndlela leyi tindhuna ta nyimpi ta le Israyele ti kombiseke ku tlangela ka tona ha yona endzhaku ka loko ti lwe ni Vamidiyani. Nyimpi yoleyo yi lwiwe endzhaku ka loko Vaisrayele va gandzele Bali wa Peyori. Xikwembu xi endle leswaku vanhu va xona va hlula naswona leswi phangiweke enyimpini swi nyikiwe masocha ya 12 000 swin’we ni Vaisrayele hinkwavo. Hi ku pfumelelana ni leswi Yehovha a swi vuleke, masocha wolawo ma nyikele hi xiphemu xa nhundzu ya wona eka vaprista, ni Vaisrayele lavan’wana va nyikele hi xiphemu lexi fanaka eka Valevhi.—Tinhl. 31:1-5, 25-30.

Hambiswiritano, tindhuna ta nyimpi a ti lava ku endla leswi engetelekeke. Ti byele Muxe ti ku: “Malandza ya wena ma teke ntsengo wa vavanuna va nyimpi lava va languteriwaka hi hina, a nga kona ni un’we la vikiweke a kayivela eka hina.” Ti endle xiboho xo nyikela hi nsuku ni hi swin’wetsin’wetsi swo hambana-hambana tanihi gandzelo eka Yehovha. Ntiko hinkwawo wa swin’wetsin’wetsi swa nsuku a wu ri tikhilogiramu leti tlulaka 190.—Tinhl. 31:49-54.

Namuntlha vanhu vo tala na vona va swi tlangela swilo leswi Yehovha a va endleleke swona. Ku tlula kwalaho, a hi malandza ya Xikwembu ntsena lama tinyiketeleke lama kombisaka ku tlangela koloko. Hi xikombiso, anakanya hi muchayeri wa bazi loyi a a yisa vapfhumba a tlhela a va landza exitediyamu lexi ntsombano wa matiko yo hambana-hambana a wu khomeriwe eka xona le Bologna, eItaly, hi 2009. Hikwalaho ka leswi a a ri muchayeri la nga ni vuxiyaxiya swinene naswona a a rhurile, lava a va khandziye ebazini ra yena va n’wi tsalele khadi va n’wi nkhensa va tlhela va n’wi nyika mali swin’we ni buku leyi nge Xana Bibele Yi Dyondzisa Yini Hakunene? Muchayeri loyi wa bazi u te: “Ndzi ri amukele hi mandla mambirhi khadi leri va ndzi nyikeke rona swin’we ni buku, kambe mali ndza yi tlherisa hikuva ndzi lava ku nyikela ha yona leswaku mi ta ya emahlweni ni ntirho lowu mi wu endlaka. Hambileswi ndzi nga riki Mbhoni ya Yehovha, ndzi lava ku nyikela hikuva ndza swi vona leswaku leswi mi swi endlaka mi swi endla hikwalaho ka rirhandzu.”

Ndlela yin’wana leyi u nga swi kombisaka ha yona leswaku wa swi tlangela leswi Yehovha a ku endleleke swona i ku nyikela eka ntirho wa misava hinkwayo wa Timbhoni ta Yehovha. (Mat. 24:14) Tindlela tin’wana leti van’wana va hlawulaka ku nyikela ha tona ti hlamuseriwe eka bokisi leri fambisanaka ni xihloko lexi.

TINDLELA LETI VAN’WANA VA HLAWULAKA KU NYIKELA HA TONA

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya munyikelo lama nga ni mfungho lowu nge “Ntirho Wa Misava Hinkwayo.”

N’hweti na n’hweti mavandlha ma rhumela minyikelo leyi erhavini ra Timbhoni ta Yehovha leri langutelaka matiko lawa mavandlha ya kona ma nga eka wona. Nakambe minyikelo ya ku tirhandzela yi nga rhumeriwa hi ku kongoma eka Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, kumbe ehofisini ya rhavi ya Timbhoni ta Yehovha leyi langutelaka tiko ra ka n’wina. (Minyikelo ya ku tirhandzela leyi hlamuseriweke laha hansi yi nga rhumeriwa ehofisini ya rhavi ya Timbhoni ta Yehovha leyi langutelaka tiko ra ka n’wina.) Loko u nyikela hi cheke eka adirese leyi nga laha henhla, tsala leswaku mali ya kona yi ya eka “Watch Tower Society.” Ku nga ha nyikeriwa ni hi swin’wetsin’wetsi kumbe swilo swin’wana swa nkoka. Hikwalaho ku fanele ku rhumeriwa papila ro koma leri fambisanaka ni tinyiko leti leri hlamuselaka leswaku swilo leswi i nyiko leyi kongomeke.

NYIKO LEYI KUNGUHATIWEKE

Ku engetela eka minyikelo leyi kongomeke, ku ni tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo:

Watch Tower Bible and Tract Society of South Africa yi nga tsariwa tanihi leyi nga ta sala yi tirhisa mali ya ndzindza-khombo wa vutomi kumbe wa mudende loko n’wini wa wona a file.

Mali Leyi Lombisiweke Hi Ntswalo:

Mali leyi lombisiweke hi ntswalo yi nga nyikeriwa eka Watch Tower Bible and Tract Society of South Africa, tanihi nyiko leyi heleleke kumbe Watch Tower Bible and Tract Society of South Africa yi nga tsarisiwa yi ri leyi nga ta amukela mali yoleyo loko n’wini wa yona a file.

Ndhawu:

Ndhawu leyi xavisekaka yi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi ndhawu.

Swiboho:

Nhundzu kumbe mali swi nga ha nyikeriwa eka Watch Tower Bible and Tract Society of South Africa hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe u vutisa hofisi ya rhavi leyi langutelaka ntirho wo chumayela etikweni ra ka n’wina.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Riqingho: 011 761 1000