Ku Thwasa Ka Ntlawa Wa Vu-129 Wa Le Giliyadi

“Leri I Siku Ra N’wina”

HI September 11, 2010, vanhu va kwalomu ka 8 000 a va hlengeletanile eka xiendlakalo xo hlawuleka xa ku thwasa ka ntlawa wa vu-129 wa Xikolo xa Bibele xa Giliyadi xa Watchtower. Samuel Herd la nga xirho xa Huvo leyi Fumaka ya Timbhoni ta Yehovha u byele swichudeni a ku: “Leri i siku ra n’wina. Hi te laha leswaku hi ta tsaka na n’wina!”

“Ndleve Leyi Twaka”

Makwerhu Herd u sungule nongonoko hi ku bula hi xilaveko xo va Vakreste hinkwavo va va ni “ndleve leyi twaka” hi ku dzikisa mianakanyo ya vona eRitweni ra Xikwembu. (Swivuriso 20:12) Makwerhu Herd u byele swichudeni a ku: “Eka tin’hweti ti nga ri tingani leti hundzeke a mi yingisele Yehovha naswona mi ta hambeta mi endla tano vutomi bya n’wina hinkwabyo.”

Xana varhumiwa lavantshwa va nga ti tirhisa njhani tindleve ta vona hi vutlhari? Makwerhu Herd u te: “Hi ku va va dzikisa mianakanyo ya vona eRitweni ra Xikwembu.” U tlhele a ku: “Ku ni swo tala leswi mi nga ta swi twa eka nongonoko lowu leswi nga ta mi pfuna leswaku mi lunghekela ntirho wa n’wina wa vurhumiwa.”

“Tshembela Eka Yehovha Hi Mbilu Ya Wena Hinkwayo”

Gerrit Lösch, la nga xirho xa Huvo leyi Fumaka, u vulavule ni swichudeni hi nhloko-mhaka leyi, leyi tlhontlhaka mianakanyo. U boxe swiendlakalo swo tala leswi eka swona vanhu va Xikwembu va khale ni va manguva lawa va kombiseke ku tshembela ka vona eka Yehovha.

Makwerhu Lösch u tlhele a vula leswaku “varhumiwa va fanele va tshembeka eka swiavelo swa vona. Hi xikombiso, mi nga ha tivutisa swivutiso leswi landzelaka: ‘Xana ndzi ta swi kota ku dyondza ririmi lerintshwa? Xana ndzi ta swi kota ku tolovela ndhavuko lowuntshwa? Xana ndzi ta swi kota ku tshama ekule ni le kaya?’” Endzhaku ka sweswo u va nyike nhlamulo ya swivutiso leswi a ku: “Tshembelani eka Yehovha.”

Makwerhu Lösch u tlhele a hlaya Swivuriso 14:26, leyi nge: “Ku chava Yehovha ku tisa ntshembo lowukulu.” Hi ta ya hi tshembela eka Yehovha loko hi anakanyisisa hi tindlela leti a hi katekiseke ha tona.

Bibele yi vula leswaku munhu loyi a tshembelaka eka Yehovha “u ta fana ni murhi lowu byariweke ekusuhi ni mati, lowu naviselaka timitsu ta wona laha mati ma khulukaka kona; naswona a nge ku voni ku hisa loko ku fika, kambe switluka swakwe swi ta va swikulu.”—Yeremiya 17:7, 8.

Dyondzo ya kona yi le rivaleni. Makwerhu Lösch u te: “Ku nga khathariseki leswi mi nga ta langutana na swona, mi fanele mi tshembela eka Yehovha.”

“Tekelela Tintsumi To Tshembeka”

Leyi i nkulumo leyi nyikeriweke hi Stephen Lett, la nga xirho xa Huvo leyi Fumaka. Tintsumi ti hi vekela xikombiso lexinene. Makwerhu Lett u te: “Hinkwaswo leswi Bibele yi swi vulaka ha tona hi fanele hi swi tekelela.” Endzhaku ka sweswo u boxe timfanelo ta mune leti tintsumi to tshembeka ti nga na tona leti hi faneleke hi ti tekelela, ku nga ku tiyisela, ku titsongahata, ku pfuna ni ku tshembeka.

Bibele yi vula leswaku ntsumi yin’wana yi lwisane ni ‘hosana ya le Peresiya’ ku ringana masiku ya 21, ku nga dimona leri nga ni matimba. (Daniyele 10:13) Ntsumi yoleyo yi kombise ku tiyisela. Makwerhu Lett u vule leswaku Vakreste na vona va “[dodombisana] . . . ni mavandla lama hombolokeke ya moya.” (Vaefesa 6:12) Kutani u byele swichudeni a ku: “Lwanani hi matimba leswaku mi ya emahlweni ni swiavelo swa n’wina.”

Loko Manowa, tata wa Samsoni, a vutise ntsumi vito ra yona, yi arile ku n’wi byela. Ntsumi yoleyo yi kombise ku titsongahata. (Vaavanyisi 13:17, 18) Makwerhu Lett u byele swichudeni a ku: “Loko munhu wo karhi a ringeta ku mi dzunisa hikwalaho ka vuswikoti bya n’wina, hi ku titsongahata mi fanele mi yisa ku dzuneka koloko eka Yehovha ni nhlengeletano yakwe.”—1 Vakorinto 4:7.

Loko Yesu a ri entangeni wa Getsemani emahlweninyana ko va a fa, “ntsumi leyi humaka etilweni yi [humelele] eka yena, yi n’wi tiyisa.” (Luka 22:43) Ntsumi yoleyo yi n’wi pfunile. Makwerhu Lett u te: “Hi xikhongelo, ringetani ku vona swilaveko swa nkoka eswiavelweni swa n’wina swa vurhumiwa naswona hi mpfuno wa Yehovha ringetani ku swi hetisisa.”

Leswi ti nga talangiki tintsumi leti xandzukeke na Sathana, hi nga vula leswaku to tala ta tona i swikombiso leswinene swa ku tshembeka leswi hlamarisaka.—Nhlavutelo 12:4.

Makwerhu Lett u khutaze swichudeni a ku: “Ku fana ni tintsumi teto to tshembeka, kanetani Diyavulosi kutani u ta mi balekela.”—Yakobo 4:7.

Tinhla-nkulu Tin’wana Tinharhu Ta Nongonoko

“Endla Yehovha A Va Ribye Ra Mbilu Ya Wena.” Loko a vulavula hi nhloko-mhaka leyi tsakisaka, leyi sekeriweke eka Pisalema 73:26, Gary Breaux, la nga xirho xa Komiti ya Rhavi ra le United States, u pfune swichudeni leswaku swi titshega hi Yehovha. Xana Yehovha u fana ni ribye hi ndlela yihi? Makwerhu Breaux u te: “Loko phepha ri ri ehansi ka ribye a ri nge hahi loko ku ri ni xidzedze. Hilaha ku fanaka, Yehovha a nga swi kota ku sirhelela timbilu ta n’wina.” I ntiyiso leswaku timbilu ta hina ti nga hi kanganyisa loko hi langutane ni miringo leyi hi faneleke hi yi tiyiselela. (Yeremiya 17:9) Maxelo, swakudya ni varhumiwa-kulobye lava u nga ta tshama na vona, swi nga ha endla leswaku munhu a ehleketa ku tshika ku va murhumiwa. Makwerhu Breaux u te: “Mi ta langutana ni swiyimo swo tala leswi eka swona mi nga ta boheka ku endla swiboho. Xana mi ta endla xiboho lexi nga ta tsakisa Yehovha? Loko mi endla tano, Yehovha u ta va ribye ra timbilu ta n’wina. U ta mi kongomisa.”

“Xana U Ni Ripfumelo Leri Nga Ku Pfunaka Leswaku U Tsemakanya Nambu Wa Yordani?” Sam Roberson la nga muleteri wa xikolo xa Giliyadi u tlhuvutse nkulumo leyi, leyi sekeriweke eka Yoxuwa ndzima 3. Xana Vaisrayele lava a va ri timiliyoni va wu tsemakanye njhani Nambu wa Yordani lowu a wu khapakhapa hi mati? Yehovha u byele Yoxuwa leswaku a lerisa vaprista ku “yima [va] nga tsekatseki eYordani.” Xikwembu a xi tshembise leswi: “Loko mikondzo ya milenge ya vaprista . . . yi khumba mati ya Yordani, mati ya Yordani ma ta khawuka, . . . ma ta yima ma va damu.” (Yoxuwa 3:8, 13) Makwerhu Roberson u byele swichudeni a ku: “Leswi Nambu wa Yordani a wu ta va wu sivele Vaisrayele leswaku va nga katekisiwi, na n’wina mi ta langutana ni swiyimo swo tika leswi loko mo swi pfumelela swi nga ha mi sivelaka mikateko.” Hi xikombiso, swi nga ha endleka leswaku mi pfa mi tlulana milenge ni varhumiwa-kulobye. Xana mi ta endla yini? Makwerhu Roberson u te: “Dzikisani mianakanyo ya n’wina eka ntirho; ku nga ri eka vatirhi. Loko mi kombisa ripfumelo, Yehovha u ta mi pfuna entirhweni wa n’wina wa vurhumiwa.”

“Ma Simeke Ma Tiya Makungu Ya Wena.” Leyi i nkulumo leyi nyikeriweke hi William Samuelson la nga muleteri wa xikolo xa Giliyadi. Nkulumo yakwe a yi sekeriwe eka Swivuriso 16:3 leyi nge: “Andlala mintirho ya wena eka Yehovha, kutani makungu ya wena ma ta simekiwa ma tiya.” Makwerhu Samuelson u vutise swichudeni a ku: “Xana ndzimana leyi yi vula leswaku leswi mi ‘andlalaka mintirho ya n’wina’ eka Yehovha a ma ha fanelanga mi simeka makungu ya n’wina ma tiya?” U vule leswaku a swi tano, hikuva Swivuriso 16:1 yi ri: “Ku hlela ka mbilu i ka munhu wa la misaveni.” Makwerhu Samuelson u te: “Yehovha a nga hleli timbilu ta n’wina hi singita. Ku ri na sweswo, tiyisekani leswaku mi kongomisiwa endleleni leyinene. Hi ku dyondza, ku khongela ni ku tirhisana ni rhavi ra le ndhawini yoleyo, mi ta hambeta mi va ni timbilu leti nga ta ka ti nga mi hambukisi naswona Yehovha u ta simeka makungu ya n’wina ma tiya.”

Mintokoto Ni Mimbulavurisano

Loko swichudeni swa xikolo xa Giliyadi swi ri karhi swi dyondza, a swi famba ni mavandlha ya kwalaho ya Timbhoni ta Yehovha entirhweni wo chumayela. Mark Noumair, la nga un’wana wa valeteri va xikolo xa Giliyadi, u vulavurisane ni swichudeni leswi a swi hlamusela mintokoto ya swona. Yinhla leyi kandziyisiweke eka mintokoto yoleyo a ku ri ndlela leyi xikhongelo xi pfuneke ha yona leswaku ku kumiwa vanhu va timbilu letinene ensin’wini.

Hi xikombiso, loko mpatswa wun’wana wu ri exitolo xo xavisa swakudya leswi swekiweke, mutirhi wa kwalaho u wu vonile loko wu ri karhi wu khongela. U wu tshinelerile kutani a wu vutisa loko wu ri Timbhoni ta Yehovha. Loko a kume leswaku hi tona, u wu byele leswaku na yena u kurisiwe tanihi Mbhoni kambe u tshikile hi ku famba ka nkarhi. U tlhele a vula leswaku u tshame a khomiwa hikwalaho ko endla vugevenga. Kambe sweswi se a lava ku tlhela a tirhela Yehovha. Nakambe u vule leswaku emahlweni ko va mpatswa lowu wu nghena exitolo xexo, a a ri karhi a khongela eka Xikwembu, a kombela leswaku xi n’wi pfuna a lulamisa vutomi byakwe. Xikhongelo xakwe xi hlamuriwile!

Hi ku tirhisa nhloko-mhaka leyi nge, “Nantswani Mi Vona Leswaku Yehovha Hi Lonene,” Rudi Hartl la tirhaka eka Ndzawulo leyi Hlamulaka Swivutiso u vulavurisane na Wayne Wridgway wo huma eMozambhiki, Jason Reed wo huma eChile na Kenji Chichii wo huma eNepal. Hi vunharhu bya vona i varhumiwa lava leteriweke exikolweni xa Giliyadi. Vamakwerhu lava va vulavule va ntshunxekile hi swiphiqo leswi va langutaneke na swona loko va ha ku sungula ntirho wa vurhumiwa, swo tanihi ku dyondza ririmi lerintshwa, ku tolovela ndhavuko lowuntshwa kumbe ku tshama ekule ni le kaya. Makwerhu Chichii u te: “Xin’wana lexi hi pfuneke i ku hatla hi endla vanghana evandlheni lerintshwa. Loko hi ya hi tolovela swirho swa vandlha, hi xiye leswaku swa hi pfuna leswaku hi nga tshami hi ri karhi hi tsundzuka ekaya.”

Endzhakunyana ka loko swichudeni hinkwaswo swa 56 swi kume swiavelo swa swona, xichudeni xin’wana xi hlaye papila leri khumbaka mbilu ro kombisa ku tlangela leri tsariweke hi swichudeni hinkwaswo. Xiphemu xin’wana xa rona lexi a xi kongomisiwe eka Huvo leyi Fumaka a xi ku: “Hi yi vonile ndlela leyi mi tinyiketeleke ha yona hi ku tirhandzela leswaku mi hi lunghiselela xikolo lexi, mi hi endzela loko ha ha ri etlilasini ni ku hi nyika nkongomiso lowunene wa moya. Leswi hi voneke ndlela leyi mi ri kombisaka ha yona rirhandzu, hi ta endla leswi nga ematimbeni ya hina leswaku hi tekelela xikombiso xa n’wina xa rirhandzu, ku lehisa mbilu, ku titsongahata ni ku rhandza vanhu loko hi fika eswiavelweni swa hina.”

[Marito lama tshahiweke exihlokweni lama nga eka tluka 28]

‘Loko munhu wo karhi a ringeta ku mi dzunisa mi nga pfumeli’

[Marito lama tshahiweke exihlokweni lama nga eka tluka 29]

‘Mi ta langutana ni swiyimo swo tika evuton’wini bya n’wina’

[Chati/Mepe lowu nga eka tluka 31]

TINHLAYO TA NTLAWA

9 matiko lama yimeriweke

56 swichudeni

28 mimpatswa leyi tekaneke

33,0 xiringaniso xa malembe

17,9 xiringaniso xa malembe va khuvuriwile

13,3 xiringaniso xa malembe evutirhelini bya nkarhi hinkwawo

[Mepe]

(Leswaku u vona rungula leri hleriweke hi ku helela, vona nkandziyiso wa kona)

Swichudeni swi averiwe ematikweni ya 25 hilaha swi kombisiweke hakona laha hansi

SWIAVELO SWA VARHUMIWA

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

GERMANY

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Xifaniso lexi nga eka tluka 30]

Swichudeni swa xikolo xa Giliyadi swi ri karhi swi kombisa yin’wana ya mintokoto leyi swi veke na yona entirhweni wo chumayela

[Xifaniso lexi nga eka tluka 31]

Ntlawa Wa Vu-129 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.