Xana U Tshame U Titwa U Ri Ni Xivundza Naswona U Chava?

VANHU vo tala namuntlha va titwa va ri ni xivundza; va vona onge ku hava munhu loyi a khathalaka ha vona. Hakanyingi vanhu lavakulu va titwa hi ndlela yoleyo. Kambe vana vo tala namuntlha, hambi ku ri lava tirhelaka Xikwembu na vona va titwa va ri ni xivundza naswona va chava. Xana wa xi tiva xivangelo xa kona?—a

Ku nga ha va ku ri ni swivangelo swo tala. A hi kambisise xikombiso xa wanuna la hanyeke enkarhini lowu hundzeke—kwalomu ka malembe ya gidi emahlweni ko va Yesu a velekiwa. Vito rakwe a ku ri Eliya. U hanye hi nkarhi lowu Vaisrayele a va nga ha gandzeli Xikwembu xa ntiyiso, ku nga Yehovha. Vo tala a va sungule ku gandzela Bali, xikwembu xa mavunwa. Eliya u te: “Ku sele mina ntsena.” Kambe u ehleketa leswaku hakunene a ku sele Eliya ntsena loyi a a gandzela Yehovha?—

Hambileswi Eliya a a nga swi xiyi, a ka ha ri ni Vaisrayele vo tala lava a va gandzela Xikwembu xa ntiyiso. Kambe a va tumbela hikuva a va chava. Xana wa xi tiva xivangelo xa kona?—

Akabu, hosi ya Israyele, a a nga tirheli Yehovha; a a gandzela Bali, xikwembu xa mavunwa lexi nsati wakwe Yezabele wo homboloka a a gandzela xona. Kutani Yezabele na Akabu a va hlotana ni vanhu lava gandzelaka Yehovha leswaku va ta va dlaya, ngopfu-ngopfu Eliya. Leswi hi swona leswi endleke leswaku Eliya a baleka. U fambe tikhilomitara ta kwalomu ka 483, a ya emananga ya Horebe, ku nga ndhawu leyi nakambe yi vuriwaka Sinayi eBibeleni. Endhawini yoleyo hi kona laha Yehovha a nyikeke vanhu vakwe Milawu ya Khume ni milawu yin’wana, kwalomu ka malembe ya madzana Eliya a nga si velekiwa. Eliya u tumbele ebakweni ra le Horebe naswona o va swakwe. Xana u ehleketa leswaku leswi a swi fanele swi n’wi khomise rhumbyana Eliya?—

Bibele yi kombisa leswaku emahlweni ko va leswi swi endleka, Yehovha u tirhise Eliya leswaku a endla masingita lamakulu. Yehovha u tshame a hlamula xikhongelo xa Eliya loko a n’wi kombele leswaku a rhumela ndzilo ku suka etilweni leswaku wu hisa gandzelo rakwe. Hi ndlela yoleyo, Yehovha u kombise leswaku a a ri Xikwembu xa ntiyiso, ku nga ri Bali. Loko Eliya a ha ri ebakweni, Yehovha u vulavule na yena.

Yehovha u n’wi vutise a ku: “Xana u endla yini laha?” Hiloko Eliya a ku: ‘Eka lava ku gandzelaka ku sele mina ntsena.’ Hi musa, Yehovha u n’wi lulamisile a ku: ‘Ndzi ni vanhu va 7 000 lava ndzi tirhelaka.’ Yehovha u byele Eliya ku tlhelela endzhaku, a vula leswaku ku ni ntirho wo tala lowu a lavaka leswaku a n’wi endlela wona.

U ehleketa leswaku hi nga dyondza yini eka xikombiso xa Eliya?— Hambi ku ri vanhu lava tirhelaka Yehovha minkarhi yin’wana va nga ha titwa va chava. Kutani hinkwerhu ka hina, lavatsongo ni lavakulu, hi fanele hi tsundzuka ku kombela mpfuno eka Yehovha. Bibele yi hi tshembisa leswi: “Yehovha u le kusuhi ni hinkwavo lava n’wi vitanaka.”

Hi leyi dyondzo yin’wana: Emisaveni hinkwayo hi ni vamakwerhu lava rhandzaka Yehovha swin’we na hina. Bibele yi ri: “Ku xaniseka loku fanaka ku karhi ka endleka enhlengeletanweni hinkwayo ya [vamakwerhu] emisaveni.” Xana a swi ku tsakisi ku tiva leswaku a hi hexe?—