Xana A Wu Swi Tiva?

Hi nga dyondza yini malunghana ni muapostola Petro emhakeni ya leswaku u tshame ni mutlhuvutsi wa madzovo a nga si byeriwa leswaku a ya eka Korneliyo?

▪ Rungula leri nga ebukwini ya Mintirho ri vula leswaku Petro u tshame “eYopa masiku yo hlayanyana swin’we na Simoni un’wana, lowa mutlhuvutsi wa madzovo” loyi a a ri ni “yindlu ekusuhi ni lwandle.” (Mintirho 9:43; 10:6) Hi ku ya hi langutelo ra Vayuda, ntirho wo tlhuvutsa madzovo a wu tekiwa tanihi lowu nga basangiki ni lowu tsongahataka. Milawu ya Vayuda a yi teka ntirho wo tlhuvutsa madzovo wu ri wa xiyimo xa le hansi swinene ku tlula wo rhwalela vulongo bya swiharhi. Ntirho wa Simoni a wu endla leswaku a tshama a ri karhi a khumba mintsumbu ya swiharhi, leswi vulaka leswaku a a tshama a ri exiyin’weni xo va a nga tenganga. (Levhitika 5:2; 11:39) Hi ku ya hi vatsari vo hambana-hambana malunghana ni mhaka leyi, swi nga ha endleka leswaku loko Simoni a endla ntirho wakwe a a tirhisa mati ya le lwandle naswona ndhawu leyi a a tirhela eka yona a yi ri ehandle ka muti hikuva ntirho wakwe wo tlhuvutsa madzovo a wu “nun’hwa.”

Ku nga khathariseki leswi, Petro a nga alanga ku tshama endlwini ya Simoni. Leswi swi kombisa leswaku swi nga ha endleka Petro a dyondze ku nga vi na xona xihlawuhlawu lexi Vayuda a va ri na xona eka vanhu lava a va tekiwa va nga tenganga, ku nga leswi Yesu a swi endleke emahlweni kakwe.—Matewu 9:11; Luka 7:36-50.

Xana ma vula yini marito ya Yesu lama nge “wena hi wexe u swi vurile”?

▪ Loko Kayafasi, muprista lonkulu wa Muyuda, a lave leswaku Yesu a vula erivaleni loko a ri Kreste, N’wana wa Xikwembu, Yesu u hlamule a ku: “Wena hi wexe u swi vurile.” (Matewu 26:63, 64) Xana a a vula yini?

Yesu a a nga ringeti ku papalata xivutiso xa Kayafasi. Xiga lexi nge “wena hi wexe u swi vurile” a ku ri ndlela yo vulavula leyi tolovelekeke eka Vayuda leyi tiyisekisaka leswaku mhaka leyi nga vuriwa i ntiyiso. Hi xikombiso, milawu ya le Yerusalema ya vukhongeri bya Vayuda leyi hlengeletiweke hi lembe-xidzana ra vumune C.E., yi hi byela hi wanuna wa Muyuda loyi loko a vutisiwa leswaku rabi u file, a hlamuleke a ku: “Wena hi wexe u swi vurile.” Marito wolawo a ma tekiwa ku ri xitiyisekiso xa leswaku hakunene rabi u file.

Yesu u xiye vulawuri bya muprista lonkulu byo lava leswaku a hlambanya leswaku leswi a swi vulaka i ntiyiso. Loko Yesu a lo miyela a nga hlamuli, muprista a ta va a ehlekete leswaku Yesu a ala leswaku a a ri Kreste. Kutani nhlamulo ya Yesu leyi nge: “Wena hi wexe u swi vurile” a yi kombisa leswaku u pfumela leswi vuriweke hi muprista lonkulu. Hi ku ya hi rungula leri fanaka ni leri, leri tsariweke eka Marka, loko Kayafasi a byele Yesu hi ku kongoma leswaku a vula loko A ri Mesiya, Yesu u hlamule hi xivindzi a ku: “Ndzi yena.”—Marka 14:62; nakambe vona Matewu 26:25 na Marka 15:2.

[Xifaniso lexi nga eka tluka 18]

Ndhawu yo tlhuvutsela eka yona madzovo efez, le Morocco